रोमियों 2:14 - चम्बयाली नौआ नियम

¹⁴ फिरी जां गैर यहूदी मणू जिन्हा का मूसा रा कानून नी है, फिरी भी कुदरती ही कानून रे हुकमां री समझ होणे री वजह कने तिन्हा पर चलदे, इस कने से ए साबित करदे कि मूसा रा कानून तिन्हेरे दिल बिच है।

रोमियों 2:14 ပူးပေါင်းရင်းမြစ်များ

प्रेरितां रे कम्म 10:35

पर परमेश्वर हर जाति जे रा डर मनदे ते भले कम्म करदे, तिन्हा जो से अपणाई लिंदे।

प्रेरितां रे कम्म 14:16

तिन्हा ने पैल्ले सब जातियां रे मणूआं जो अपणे-अपणे रस्ते चलणे दित्तेया

प्रेरितां रे कम्म 17:30

इधेरे तांइ परमेश्वर लोक्कां री अज्ञानता रे बेल्ले बिच आनाकानी करी के, अवे हर जगाह् सब मणूआं जो अपणे पाप्पां का तौबा करी लैणे रा हुकम दिंदे हिन।

रोमियों 1:32

से ता परमेश्वर रे इन्हा धार्मिकता रे नियमां जो जाणदे कि इदेय-इदेय कम्म करणे वाले मौत री सजा रे जोग्गे हिन, ते फिरी भी ना सिर्फ इदेय कम्म करदे, पर इदेय कम्म करणे वालेयां का खुस भी हुदें। से ता जाणदे कि परमेश्वर इंसाफ करणा चाह्‍ंदे, ते इदेय कम्म करणे वाले मणू तिन्हेरी नजर बिच मौत री सजा रे जोग्गे हिन।

रोमियों 2:12

इस तांइ जिन्हा गैर यहूदियां ने मूसा रे कानून जो जाणे बगैर पाप कित्ता, परमेश्वर ने तिन्हा जो कानून रे बगैर ही सजा दित्ती जाणी, ते जिन्हा यहूदी लोक्कां ने मूसा रा कानून पाणे रे बाद भी पाप कित्ता, तिन्हेरी सजा कानून रे हिसाब कने होणी।

रोमियों 2:15

किजोकी से मणू अपणे जिन्दगी जीणे रे तरिक्के कने इस गल्ल जो साबित करदे कि कानून रे हुकम, तिन्हेरे दिल बिच लिखित्ते रे हिन। तिन्हेरा विवेक भी इस गल्ल रे बारे बिच गवाई दिंदा। तिन्हेरा विवेक तिन्हा जो कदी सही ते कदी गलत ठेहरांदा रैहन्दा।

रोमियों 2:27

हर इक्क मणू ने जिसेरा कदी खतना नी होया हो पर फिरी भी कानून जो मनदा हो, तुसा पर इल्जाम लाणा। हालांकि तुसा रा खतना भी होया ते तुसा का परमेश्वर रा कानून भी है पर तुसा फिरी भी तिसेरा पालण नी करदे।

1 कुरुन्थियों 11:14

आमतौर पर तुसा जाणदे की आदमी तांइ लम्बे बाल रखणा तिसेरे तांइ बेजती री गल्ल है।

1 कुरुन्थियों 9:21

तिय्यां ही जां मैं गैर यहूदी लोक्कां बिच थिया, तां मैं भी इक्क गैर यहूदी मणू सांई रेया। गैर यहूदी लोक्कां जो मसीह बिच छिक्की अणने तांइ मैं गैर यहूदी मणूआं सांई ही रेया जे मूसा रे कानून जो नी मनदे। (पर मैं ए जाणदा कि मैं परमेश्वर रे कानून रे बगैर नी जिया करदा थिया किजोकी मैं मसीह रे कानून रे अधीन है।)

इफिसियों 2:12

तिस बेल्ले तुसा मसीह रे बारे बिच नी जाणदे थिये ते तुसा परमेश्वर रे चुणे रे मणूआं बिच का नी थिये ते तुसा परमेश्वर री तिन्हेरे लोक्कां कने कित्ते रे वादे रे हिस्सेदार भी नी थिये। तुसा इस दुनिया बिच परमेश्वर का दुर बगैर कुसकी आस रे जिया करदे थिये।

इफिसियों 2:3

असी भी तिन्हा लोक्कां सांई जिन्दगी जिंदे थिये जे अपणे सरीर री बुरी इच्छां जो पूरा करेया करदे ते बाकि मणू कुदरती तौर पर बुरे मणू थिये ते परमेश्वर रे गुस्से रे हिस्सेदार थिये।

फिलिप्पियों 4:8

इस तांइ ओ संगी विश्वासियों, जे गल्लां सच हिन, ते जे गल्लां आदरणीय हिन, ते जे गल्लां सही हिन ते जे गल्लां पवित्र हिन ते, जे गल्लां सोह्णि हिन, ते जे गल्लां दिलां जो भाणे वाली हिन, ते आखिरकार जे ठीक गुण ते तारिफ रे जोग्गे हिन, तिन्हा पर ध्यान लाया करो।