रोमियों 2:10 - चम्बयाली नौआ नियम

¹⁰ पर परमेश्वर ने हर इक्क भला कम्म करणे वाले, पैल्ले यहूदी फिरी गैर यहूदी मणू जो महिमा, आदर ते सांती दैणी।

रोमियों 2:10 ပူးပေါင်းရင်းမြစ်များ

मत्ती 10:13

जे से घर लायक होया तां तुसा री आशीष तिन्हा पर बणी रेह्णी, पर जे नी हुन्गा तां सांती री तुसा री आशीष तुसा रे का हटी आणी।

लूका 1:79

जे मणू परमेश्वर जो नी जाणदे से इदेय हिन कि जिय्यां से मौत रे साये बिच बैठ्ठे रे हिन, ते हमेसा री मौत री खतरे बिच हिन जे कि नरक है, इधेरे तांइ परमेश्वर री रौसनी तिन्हा लोक्कां जो परमेश्वर रे सांती रे रस्ते पर लेई चलणा।

लूका 12:37

से नौक्कर धन्न हिन जे अपणे मालक रे हटणे री भाल अन्दर जागदे हुन्दे ते दुआर खोल्णे तांइ तैयार हुन्दे मैं तुसा जो सच बोल्लेया करदा है, कि तिस मालक ने अप्पु नौकरां वाले कपड़े पाई करी अपणे नौक्करां जो अप्पु रोट्टी खुआणी ते तिन्हेरी सेवा भी करणी

लूका 19:42

किन्ना खरा हुन्दा कि तू, हाँ तू ही सांती रे रस्ते जो जाणी पान्दा, पर अवे बड़ी हाण होई गे री है अते सांती तुसा री हाख्खी का गैब होई गे रा है।

लूका 22:14

फिरी जां से बेल्ला आया तां यीशु अपणे बारा प्रेरितां कने फसह री धाम खाणे जो बेई गे।

लूका 9:48

ते तिन्हा जो बोल्लेया, जे भी मेरे नां कने इस निक्के जो अपणाई लिंदा, से मेरे जो अपणाई लिंदा, ते जे मेरे जो अपणाई लिंदा, से परमेश्वर जो अपणाई लिंदा, जिन्हा ने मेरे जो भेज्जे रा है, किजोकी जे तुसा बिच सबणी का छोटा है, सेह्ई सबणी का बड्ड़ा है

यूहन्ना 12:26

जे कोई मेरी सेवा करे, तां मेरा चेल्ला बणी जाए, ते जित्ते मैं है उत्ते तिनिये भी होणा, तां पिता ने उसदा आदर करणा।

यूहन्ना 14:27

“मैं तुसा जो अपणी सांती देई करी जाया करदा है। जदेई सांती दुनिया रे मणू दिंदे तैसी सांती नी। तुसा रे दिल दुखी ना हो, ते ना ही डरे।”

यूहन्ना 16:33

ए गल्लां मैं तुसा रे कने बोल्ली हिन कि तुसा जो मेरे जरिए सांती मिल्लो, दुनिया बिच तुसा जो तकलिफां मिल्ली हिन, पर हिम्मत रख्खो किजोकी मैं इस दुनिया रे सरदार, शैतान जो हराई दित्ते रा है।

प्रेरितां रे कम्म 10:35

पर परमेश्वर हर जाति जे रा डर मनदे ते भले कम्म करदे, तिन्हा जो से अपणाई लिंदे।

रोमियों 14:17

किजोकी परमेश्वर रे राज बिच खाणा-पीणा नी है, पर धार्मिकता, मेल जोल ते से सांती है, जे पवित्रात्मा कने हुन्दा।

रोमियों 15:13

मैं आस दैणे वाले परमेश्वर का प्रार्थना करदा, कि तुसा जो विश्वास करणे बिच पूरे तरिक्के खुसी ते सांती दे, ताकि पवित्रात्मा री ताकत कने तुसा री उम्मीद बदधी जाओ।

रोमियों 2:7

जे ठीक कम्मां बिच टिके रेई करी महिमा, इज्जत ते हमेसा री जिन्दगी री खोज बिच हिन, परमेश्वर ने तिन्हा लोक्कां जो हमेसा री जिन्दगी दैणी।

रोमियों 2:9

दुख ते मुसीबत बुरे कम्म करणे वाले हर मणू पर पैणे। परमेश्वर ने पैल्ले यहूदी लोक्कां रा हिसाब लैणा ते फिरी गैर यहूदी लोक्कां रा।

रोमियों 5:1

इधेरे तांइ परमेश्वर ने असा जो मसीह बिच विश्वास करणे रे जरिये धार्मिक ठैहराया। ते प्रभु यीशु मसीह रे जरिये असा रा परमेश्वर कने मेल-मिलाप होया।

रोमियों 9:21

कै इक्क कुम्हार जो ए हक नी है कि इक्क ही साँचे का बदिया कम्मां तांइ भांडे बणाए, ते तिस्सी साँचे बिच का आम इस्तेमाल रे भी भांडे बणाए?

रोमियों 9:23

परमेश्वर ने तिन्हा लोक्कां पर अपणी महिमा ज़ाहिर करी कित्ता, जिन्हा जो तिन्हा ने अपणी महिमा दैणे तांइ चुणेया थिया।

गलातियों 5:22

पर पवित्रात्मा का पैदा होणे वाला स्वभाव बिच प्यार, आनंद, सांती, सबर, दया, नेकी, ते विश्वास है।

गलातियों 5:6

जां असी मसीह यीशु बिच विश्वास करणा सुरु करी दिंदे तां यहूदी या गैर यहूदी होणे रा कोई फरक नी रैहन्दा। पर जरुरी गल्ल ए है कि असी मसीह बिच विश्वास करदे ते तिस वजह कने परमेश्वर ते बाकि मणू प्यार रखदे।

फिलिप्पियों 4:7

तां परमेश्वर री सांती जे सारी समझ का परे है, तुसा रे दिल ते तुसा री सोच्चां जो मसीह यीशु बिच बचाई करी रखगी।

1 तीमुथियुस 1:17

हमेसा तिकर राज करणे वाले राज्जा, अविनाशी, अणदिख्खे ते इकलौत्ते परमेश्वर रा आदरमान ते महिमा हमेसा-हमेसा तिकर हुंदी रे। आमीन!

इब्रानियों 2:7

“तुसां इन्सान जो स्वर्गदूतां का घट ही ताकतवर बणाए रा है, तुसा तिसजो इक्क राज्जे सांई महिमा ते आदर दित्ते रा है, ते तिसजो अपणे हत्थां रे कम्मां पर हक दित्ते रा है।

याकूब 2:22

तैं दिख्खी लित्तेया कि तिन्हेरा विश्वास तिन्हेरे ठीक कम्मां री वजह कने सिद्व होया।

याकूब 3:13

जे अगर तुसा समजदार ते परमेश्वर री गल्लां जो समजणे वाले मणू हिन, तां इधेरे तांइ इक्क खरी जिन्दगी जियो। निम्तेपन ते समजदारी कने ठीक कम्म करी के साबित करो।

1 पतरस 1:7

इन्हा मुसीबतां रा मकसद ए दर्शाणा है कि तुसा परमेश्वर पर विश्वास करदे भी या नी। मसीह बिच तुसा विश्वास सोन्ने का भी जादा कीमती है। जिय्यां कि सोन्ना जे इक्क दिन खत्म होई जाणा, तिसजो भी आग्ग बिच परखेया ते निखारेया जांदा। जे अगर तुसा रा विश्वास इन्नी कड़ी मुसीबतां रे बाद भी बणेया रैहन्दा, तां इसेरी वजह कने तुसा जो तिस दिन बड़ा आदरमान ते महिमा मिलणी जिस दिन मसीह यीशु ने हटी आणा।

1 पतरस 5:4

जां मसीह यीशु ने हटी आणा जे असा रे सबका बड्डे पुहाल हिन, तां तिन्हा ने तुसा जो इक्क इदेया ईनाम दैणा जिसेरी चमक कदी नी मुकणी।