रोमियों 16:7 - चम्बयाली नौआ नियम

⁷ भ्याल अन्द्रुनीकुस ते भैण उनियास जो मेरा नमस्कार, जे मेरे यहूदी संगी विश्वासी हिन, ते मेरे कने कैद भी होए थिये, ते प्रेरित मणू तिन्हेरी बड़ी इज्जत करदे। तिन्हा ने मेरे का पैल्ले ही मसीह यीशु बिच विश्वास कित्ता थिया।

रोमियों 16:7 ပူးပေါင်းရင်းမြစ်များ

यूहन्ना 14:20

तिस रोज जां मैं वापिस हटणा, तुसा जाणना कि मैं पिता बिच है, ते तुसा मेरे बिच हिन, ते मैं तुसा बिच।

यूहन्ना 15:2

हर इक्क डाली जे मेरे बिच है ते जिस बिच फल्ल नी लगदा, से तिसजो बड्डी दिन्दे, अते मेरी हर इक्क डाली जो जे फलदी, से तिसजो छांटदे हिन ताकि होर जादा फल्ल लगन।

यूहन्ना 6:56

जे मेरा सरीर खान्दा ते मेरा खून पीन्दा, तिनिये हमेसा तिकर मेरे अन्दर बणी रैह्णा, ते मैं तिस बिच

रोमियों 16:10

अपिल्लेस जो मेरा नमस्कार, जिनिये ए साबित कित्तेया कि से मसीह यीशु तांइ किन्ना जादा विश्वासयोग्य है। अरिस्तुबुलुस ते तिसेरे टब्बर जो भी मेरा नमस्कार!

रोमियों 16:11

मेरे संगी यहूदी हेरोदियोन जो मेरा नमस्कार। नरकिस्सुस रे टब्बर जो भी मेरा नमस्कार, जे प्रभु यीशु मसीह बिच विश्वास करदे।

रोमियों 16:21

मसीह री सेवा करणे बिच मेरे साथी तीमुथियुस, ते मेरे संगी यहूदी लूकियुस, ते यासोन, ते सोसिपत्तरुस, रे पास्से का तुसा जो नमस्कार!

रोमियों 16:3

प्रिस्किल्ला भैण, ते तिन्हेरे लाड़े अक्विला भ्याल जो मेरा नमस्कार, जे प्रभु यीशु री सेवा करणे बिच मेरे कने कम्म करणे वाले मणू हिन।

रोमियों 16:6

मरियम जो मेरा नमस्कार, जिन्हा ने तुसा तांइ बड़ी वरी मैहनत कित्ती।

रोमियों 16:8

अम्पलियातुस जो मेरा नमस्कार, जे मसीह यीशु बिच मिंजो बड़ा प्यारा है।

रोमियों 16:9

उरबानुस जो मेरा नमस्कार, जे मसीह यीशु री सेवा करणे बिच असा रा साथी है, ते प्यारे इस्तखुस जो भी मेरा नमस्कार!

रोमियों 8:1

इधेरे तांइ अवे जे प्रभु यीशु मसीह बिच विश्वास करदे, तिन्हा पर सजा रा हुकम नी है।

रोमियों 8:11

पवित्रात्मा तुसा बिच रैहन्दा जिन्हा ने मसीह यीशु जो मुर्देयां बिच का जिन्दा कित्ता। ते जिय्यां परमेश्वर ने मसीह यीशु जो मुर्देयां बिच का जिन्दा कित्ता, तिय्यां ही तुसा जो भी तिस्सी पवित्रात्मा रे जरिये मुर्देया बिच का जिन्दा करणा जे तुसा बिच रैहन्दा।

रोमियों 9:3

किजोकी मैं यहूदी लोक्कां जो, जे मेरे अपणी जाति रे मणू हिन, छुटकारा दुआणे तांइ श्रापित कित्ते जाणे, ते मसीह का अलग करी दित्ते जाणे तांइ भी तैयार है।

1 कुरुन्थियों 1:30

पर परमेश्वर ने तुसा लोक्कां रा रिस्ता मसीह यीशु कने जोड़ेया, ते मसीह यीशु रे जरिये से असा जो अपणा ज्ञान दिंदे, परमेश्वर असा जो अपणी नजर बिच धार्मिक ठैहरांदे। असी मणू मसीह यीशु रे जरिये पवित्र ठैहराये गेरे हिन ते असा जो पाप का अजाद करदे।

2 कुरुन्थियों 11:23

कै से ही मसीह यीशु री सेवा करणे वाले मणू हिन? मैं बोलदा कि मैं तिन्हा का बधी करी है! मैं पागल मणू सांई बोलदा कि मैं तिन्हा का जादा मैहनत कित्ते री है, मैं तिन्हा का जादा कैद होए रा है, मैं तिन्हा का जादा कोड़े खाए, ते मैं तिन्हा का जादा मौत रे खतरे बिच पेरा है।

2 कुरुन्थियों 12:2

मैं मसीह यीशु बिच विश्वास करणे वाले इक्क मणू जो जाणदा जिस जो चौदह साल पैल्ले स्वर्ग तिकर चुक्की लित्तेया गेया थिया। मैं ए नी जाणदा कि से मणू अपणे सरीर बिच ही थिया जां ए होया, पर सिर्फ परमेश्वर ही जाणदे।

2 कुरुन्थियों 5:17

इस तांइ जे कोई मसीह यीशु बिच विश्वास रखदा तां से नौई रचना है: पुराणी जिन्दगी बीती गे री है, अवे नौई जिन्दगी री सुरुआत होए री है।

2 कुरुन्थियों 5:21

मसीह जे पाप का अनजाण थिये, तिन्हा ही जो परमेश्वर ने असा तांइ पाप्पी ठैहराया ताकि परमेश्वर असा जो मसीह रे कित्ते रे कम्मां रे जरिये धार्मिक ठैहराण।

गलातियों 1:22

पर यहूदियां प्रदेश बिच मसीह यीशु जो मनणे वाली कलीसिया रे लोक्कां ने मेरे जो कदी दिख्खे रा नी थिया,

गलातियों 2:2

ते मैं तित्ते इधेरे तांइ गेया किजोकी परमेश्वर ने मेरे जो जाणे तांइ बोल्लेया थिया, अते जे सुब बसेख मैं गैर यहूदी लोक्कां बिच प्रचार करदा थिया, तिसजो मैं एकांत बिच कलीसिया रे प्रधान मणूआं जो सुणाया ताकि जे कम्म मैं पैल्ले कित्ते थिये से बेकार नी ठैहरे।

गलातियों 2:6

पर यरुशलेम कलीसिया रे प्रधान मणूआं ने मेरे पर तिस बसेख जो बदलणे रा मेरे पर कोई दवाब नी पाया जे मैं सुणांदा। मेरे जो इस गल्ल रा कोई फरक नी पैंदा कि से प्रधान मणू कै हिन, किजोकी परमेश्वर कोई भेदभाव नी करदे। मेरे जो तिन्हा प्रधान मणूआं का कोई फायदा नी होया।

गलातियों 5:6

जां असी मसीह यीशु बिच विश्वास करणा सुरु करी दिंदे तां यहूदी या गैर यहूदी होणे रा कोई फरक नी रैहन्दा। पर जरुरी गल्ल ए है कि असी मसीह बिच विश्वास करदे ते तिस वजह कने परमेश्वर ते बाकि मणू प्यार रखदे।

गलातियों 6:15

किजोकी खतना होणे या ना होणे कने परमेश्वर जो कोई फरक नी पैंदा, पर इक्क नौई रचना बणी जाणा जरुरी है।

इफिसियों 2:10

किजोकी परमेश्वर ने असा जो बणाए रा है ते मसीह यीशु रे जरिये तिन्हा नौए मणू सांई तिन्हा भले कम्मां जो करणे तांइ बणाए गेरे हिन जिन्हा जो परमेश्वर ने इधेरे तांइ तैयार कित्ता कि असी से पूरे करण।

कुलुस्सियों 4:10

अरिस्तर्खुस जे मेरे कने जेल बिच है अते बरनबास रे रिस्तेदार यूहन्ना मरकुस री तरफ का तुसा जो प्रणाम (मैं जाणदा कि तुसा जो यूहन्ना मरकुस रे बारे बिच तुसा जो दस्सी दित्ता गे रा है, कि जां से तुसा का आए तां तिस कने ठीक तरिक्के बर्ताव करेयो।)

फिलेमोन 1:23

इपफ्रास भी मसीह यीशु रे बसेख रा प्रचार करणे री वजह कने मेरे कने कैद बिच पाया गे रा है।

1 यूहन्ना 4:13

इस कने ही असी जाणदे कि असी परमेश्वर अन्दर बणी रैह्‍न्दे, ते से असा अन्दर, किजोकी तिनिए अपणी पवित्रात्मा असा जो दित्ते रा है।

1 यूहन्ना 5:20

ते ए भी जाणदे कि परमेश्वर रा पुत्तर मसीह यीशु आई गे रा है ते तिनिये असा जो समझ दित्ते री है कि, असी तिस सच्चे परमेश्वर कने गहरे रिश्ते बिच हिन किजोकी असी मसीह यीशु कने गहरे रिश्ते हिन जे सच है, सच्चा परमेश्वर ते हमेसा री जिन्दगी ए ही है।

प्रकाशित वाक्य 1:9

मैं यूहन्ना सबर कने तुसा कने तिन्हा जुल्मां जो सहन करणे बिच तुसा रा साथी है जे असा पर मसीह कने रिस्ता होणे री वजह हुंदे, ते मैं परमेश्वर रे राज बिच तुसा रा साथी है। परमेश्वर रा बसेख सुनाणे ते यीशु रे सच्चे वचन रा प्रचार करणे री वजह कने रोमी साम्राज्य रे अधिकारियां ने मेरे जो पतमुस टाप्पु पर भेज्जी दित्ते रा है।