रोमियों 13:12 - चम्बयाली नौआ नियम

¹² असा रा इस बुरी दुनिया बिच रैह्णे रा समय तिय्यां ही मुकणे वाला है जिय्यां कि रात मुकणे वाली हुंदी। मसीह यीशु रे हटणे रे समय बड़ा नेड़े है। इधेरे तांइ असा जो न्याहरे रे कम्मां जदेय तिन्हा बुरे कम्म करणा छड्डी दैणे चाएदे, जे कम्म इस दुनिया रे मणू करदे, ते असा जो रौसनी रे ठीक कम्मां जदेय हथियार बन्नी लैणे चाएदे।

रोमियों 13:12 ပူးပေါင်းရင်းမြစ်များ

रोमियों 13:14

बल्कि प्रभु यीशु मसीह जो इक्क कवच सांई पाई लेयो, ते अपणी पाप रे स्वभाव कने जिन्दगी मत जियो।

1 कुरुन्थियों 10:11

पर ए सब गल्लां जे तिन्हा कने होई थी, असा लोक्कां जो चितौणी दैणे तांइ लिख्खी गे री हिन जे इन्हा आखरी दिनां बिच रैह्‍न्दे।

1 कुरुन्थियों 7:29

ओ संगी विश्वासियों, मैं ए बोलदा कि असा का इस दुनिया बिच जादा समय नी है, इधेरे तांइ जरुरी है कि से ब्याह होणे रे बावजूद भी परमेश्वर री सेवा इय्यां करण कि जिय्यां से हल्ले भी कुंवारे हिन।

2 कुरुन्थियों 10:4

असी इन्सानी विचारां ते झूठ्ठी बैह्सबाजी जो नास करणे तांइ दुनियावी हथियारां रा नी, बल्कि परमेश्वर रे ताकतवर हथियारां रा इस्तेमाल करदे।

2 कुरुन्थियों 6:7

असी सच्चे प्यार कने, सच्चाई रे वचनां कने, परमेश्वर री ताकत कने, धार्मिकता रे हथियारां कने जे हमला करणे ते अपणी रक्षा करणे तांइ हिन, ते लोक्कां रा असा री इज्जत या बेइज्जती करणे रे जरिये, ते तिन्हेरे असा रे बारे बिच ठीक या बुरी गल्लां बोलणे रे जरिये भी अप्पु जो परमेश्वर रे चुणे रे दास साबित करदे। ते हालांकि असा जो ढोंगी समजेया गेया, पर असी सच ही बोलदे।

इफिसियों 4:22

कि तुसा जो दस्सेया गेया थिया कि तुसा री बेवकूफी भरी मर्जियां ने तुसा जो बर्बाद करी छडणा ते तुसा जो अपणी जिन्दगी जीणे रे पुराणे तरिक्के जो ते अपणी सारी गलत आदतां जो छड्डी दैणा चाएदा।

इफिसियों 5:11

न्याहरे रे नाकाम पाप्पां बिच हिस्सेदार मत बणो, बल्कि लोक्कां जो फटकार लाई करी दस्सो कि से कम्म गलत हिन।

इफिसियों 5:8

तुसा पैल्ले न्याहरे बिच जीणे वाले मणूआं सांई थिये, पर अवे तुसा रौसनी रे मणू हिन किजोकी तुसा परमेश्वर रे मणू हिन। इधेरे तांइ रौसनी रे मणूआं सांई जिन्दगी जियो।

इब्रानियों 10:25

ते इक्क-दूए कने संगती रखणा ना छड्डे, जिय्यां की मते जणेया ने संगती रखणा छड्डी भी दित्ते रा है, पर इक्क-दूए जो प्रोत्साहन दिंदे रैह्णा चाएदा। ते जिय्या-जिय्यां तुसा परमेश्वर रा हटणे रे समय जो नेड़े आया करदा है, तिय्यां-तिय्यां इक्क-दूए जो जादा का जादा प्रोत्साहन देया करो।

इब्रानियों 12:1

जां विश्वास बिच जीणे वाले इन्हा मणूआं री मती सारी गवाहियां जो असी जाणदे, इधेरे तांइ आओ, असी तिन्हा सारी चीजां जो छड्डी दैण, जे असा जो रोकदी, ते उलझाणे वाले जो दुर करी के, सबर कने तिस रस्ते पर बदधे जाण, जिस पर असा जो जाणा चाएदा।

याकूब 1:21

इधेरे तांइ सारी गन्दगी ते नफरत जो छड्डी करी परमेश्वर रे वचन जो निमते मन कने अपणाई लेयो जे दिल बिच बोया गे रा है ते जे तुसा जो छुटकारा देई सकदा।

याकूब 5:8

तिय्यां ही तुसा भी सबर रखो, ते हिम्मत रख्खो, किजोकी प्रभु तौले ही आणे वाले हिन।

1 पतरस 2:1

इधेरे तांइ हर तरिक्के री नफरत, धोख्खेबाजी, ढोंग, हिर्स ते लोक्कां री बदनामी करणा छड्डी देयो।

1 पतरस 4:7

हर चीज रा अंत नेड़े है। इधेरे तांइ चुकन्ने रेयो ते अपणे मन पर काबू रख्खो ताकि तुसा प्रार्थना करदे रेयो।

2 पतरस 3:11

ए गल्ल साफ है कि परमेश्वर ने सब किच्‍छ इय्यां ही तबाह करणा, तुसा जाणदे कि तुसा जो कदेया बोल-चाल रखणा चाएदा।

2 पतरस 3:9

किच्‍छ मणू इय्यां सोचदे कि परमेश्वर अपणे वापिस हटणे रे वादे जो पूरा करणे बिच देर करेया करदे हिन। पर परमेश्वर तिस तरिक्के कने देर नी करेया करदे हिन। बल्कि से तुसा कने सबर कने रेया करदे हिन, किजोकी से कुसकी जो मुकाणा नी चाह्‍ंदे। पर से चाह्‍ंदे कि सारे अपणे मन जो बदली करी, गलत कम्म करणा छड्डी करी, तिन्हा का आए।

1 यूहन्ना 2:18

ओ बच्चेयों, मसीह रे हटी आणे रा बेल्ला नेड़े है ते जिय्यां तुसा सुणे रा है कि मसीह यीशु रा विरोधी आणे वाला है, तिसेरे हिसाब कने अब्बे भी मते सारे मसीह यीशु रा विरोध करणे वाले खड़ी गेरे हिन, इस कने असा जो पता चलदा कि ए आखरी समय है।

प्रकाशित वाक्य 1:3

परमेश्वर ने तिस हर इक्क मणू जो आशीष दैणी जे इन्हा भविष्यवाणी री गल्लां जो लोक्कां जो पढ़ी करी सुणांदा ते तिन्हा तिस हर मणू जो भी आशीष दैणी जे इन्हा गल्लां जो सूणदा ते इन्हा जो मनदा किजोकी ए गल्लां बड़े तौले होणे वाली हिन।

प्रकाशित वाक्य 22:10

फिरी तिनिए मेरे जो बोल्लेया, इस कताब री भविष्यवाणी री गल्लां जो लोक्कां का मत लूका, किजोकी इन्हा गल्लां रे पूरे होणे रा बेल्ला नेड़े आई गे रा है।