रोमियों 12:8 - चम्बयाली नौआ नियम

⁸ जे अगर कुसकी जो लोक्कां प्रोत्साहित करणे रा वरदान मिल्ले रा हो, तां से लोक्कां जो प्रोत्साहित करणे बिच लग्गी रेयो। जिस जो दान दैणे रा वरदान मिल्ले रा हो, ता से खुले मन कने दान दे। जिस जो लोक्कां री अगुवाई करणे रा वरदान मिल्ले रा हो, से पूरी मैहनत कने लोक्कां री अगुवाई करे। जिस जो दया करणे रा वरदान मिल्ले रा हो, से खुसी कने करेया करे।

रोमियों 12:8 ပူးပေါင်းရင်းမြစ်များ

मत्ती 25:40

फिरी मैं उन्हा जो जवाब दैणा, मैं तुसा रे कने सच बोलदा जां भी तुसा ने मेरे भोले-भाले चेल्‍लेयां बिच का कुसकी इक्क तांइ भी किच्‍छ कित्तेया, तां से तुसा मेरे तांइ कित्तेया।

प्रेरितां रे कम्म 11:23

से तित्ते पूज्जी करी परमेश्वर रे अनुग्रह जो दिख्खी करी बड़ा खुस होया ते सब जो शिक्षा दित्ती की तन मन लगाई करी प्रभु यीशु कने लिपटी रेयो,

प्रेरितां रे कम्म 13:12

तां हाकिम ने जे किच्‍छ होया थिया, दिख्खी करी अते प्रभु री उपदेस का हैरान होई करी मसीह यीशु बिच विश्वास कित्तेया।

प्रेरितां रे कम्म 13:15

ते मूसा रे कानून ते भविष्यद्वक्ता री कताबां रे पढ़ने का बाद सभास्थल रे सरदारा ने तिन्हा का बोल्ली भेज्जेया, कि ओ भाईयों, जे मणूआं री उपदेस तांइ तुसा रे मन बिच कोई गल्ल है तां बोल्लो।

प्रेरितां रे कम्म 15:32

ते यहूदा ते सीलास ने जे खुद भी भविष्वाणी करणे वाले थिये, बड़ी गल्लां कने विश्वासियां जो उपदेस देई करी मजबूत कित्तेया।

प्रेरितां रे कम्म 20:2

तिस पूरे प्रदेश बिच का होई करी ते प्रेरितां री हिम्मत बधाई करी से यूनान देस बिच आई गेया।

प्रेरितां रे कम्म 20:28

इधेरे तांइ अपणी ते अपणे सारे झुण्ड री चुकन्ने रेह्ई करी देख-रेख करो जिन्हा परमेश्वर रे लोक्कां बिच पवित्रात्मा ने तुसा जो कलीसिया रे मुखिया बणाए रा है कि तुसा परमेश्वर री कलीसिया री रखवाली करो जिस जो तिसने अपणे खून कने खरीदी लित्ते रा है।

प्रेरितां रे कम्म 4:36

यूसुफ नां रा इक्क साइप्रस रा लेवी गोत्र रा मणू थिया जिसेरा नां प्रेरितां ने बरनबास (मतलब कि सांती रा पुत्तर) रख्खे रा थिया

रोमियों 12:13

पवित्र मणूआं तांइ जे किच्‍छ भी जरुरी हो, तिस अन्दर तिन्हेरी मदद करो। अजनबी लोक्कां रीखातिर दारी करणे बिच लग्गी रेयो।

रोमियों 13:6

इधेरे तांइ चुंगी भी देया करो, किजोकी शासन करणे वाले परमेश्वर रे दास हिन ते हमेसा अपणी जिम्मदारियां जो निभाणे बिच लगे रैह्‍न्दे।

1 कुरुन्थियों 12:28

मसीह रे इस सरीर बिच परमेश्वर ने असा जो अलग-अलग तरिक्के रा कम्म करणे तांइ दित्ते रा है, पैल्ले तिन्हा ने किच्‍छ मणूआं जो प्रेरित बणने तांइ चुणेया, किच्‍छ मणूआं जो तिन्हेरी गल्लां दसणे तांइ भविष्यवाणी करणे तांइ चुणेया, ते किच्‍छ जणेया जो तिन्हा ने लोक्कां जो वचन री शिक्षा दैणे तांइ चुणेया, इसका बाद किच्‍छ जणेया जो तिन्हा ने चिन्ह-चमत्कार करणे रा हक दित्ते रा है, ते किच्‍छ जणेया जो लोक्कां री बीमारी ठीक करणे रा हक, ते किच्‍छ जणेया जो दूज्जेयां री मदद करणे रा हक दित्ते रा है, ते किच्‍छ जणेया जो तिन्हा ने अगुवे बणने तांइ चुणे रा है, ते किच्‍छ जणेया जो तिन्हा ने पवित्रात्मा रे जरिये बखरी-बखरी भाषा बिच गल्ल करणे री खूबी दित्ते री है।

1 कुरुन्थियों 14:3

पर जे मणू भविष्यवाणी करदा से विश्वासी मणू री मसीह बिच विश्वास जो मजबूत बणने बिच मदद करदा, प्रोत्साहित रे सुकून दिंदा।

2 कुरुन्थियों 1:12

किजोकी असी अपणे विवेक री इस गवाई पर असी पूरी बुड़ख कने बोलदे कि असी अपणे हर काम्म-काज बिच परमेश्वर री दित्ते री पवित्रता ते सच्चाई कने जिन्दगी जिन्दे, खासतौर पर जां असी तुसा कने थिये। असी अपणी इन्सानी समझ पर नी पर परमेश्वर रे अनुग्रह पर निर्भर रैहन्दे।

2 कुरुन्थियों 11:3

पर मैं डरदा कि जिय्यां शैतान ने कीड़े रे रुप बिच, अपणी चलाकी कने हव्वा जो बैह्काया थिया, तिय्यां ही तुसा रे मन तिस सिधाई ते पवित्रता, जिस कने तुसा जो मसीह यीशु रा आदरमान करणा चाएदा, कुदखी भ्रष्ट नी कित्ते जाण।

2 कुरुन्थियों 8:12

किजोकी जे अगर तुसा अपणे पूरे मन कने दान दिंदे, तां से मंज़ूर भी हुंदा। ते जे किच्‍छ भी तुसा का है, तिसेरे हिसाब कने दान करो, ना कि जे तुसा का नी है।

2 कुरुन्थियों 9:11

तुसा ने हर तरिक्के कने आशीष पाणी, ते तिस्सी कने ही तुसा उदारता कने दान दैणे रे जोग्गे भी बणना। ते जां असी तुसा रे उदार दान जो जरुरतमंद लोक्कां तिकर पूजाणा, तां तिन्हा लोक्कां ने परमेश्वर रा शुकर करणा।

2 कुरुन्थियों 9:13

किजोकी दूज्जेयां जो आर्थिक रीति कने सेवा करणे जो सबूत मन्नी करी तिन्हा ने परमेश्वर री महिमा करणी किजोकी तुसा ने मसीह यीशु रे सुब बसेख जो मन्नी करी तिन्हेरे अधीन रैहन्दे, ते से गरीब विश्वासी भाईयां री ते सारेयां री मदद करणे बिच बड़े उदार रैहन्दे। ते तुसा जो मिलणे री बड़ी लालसा करदे।

2 कुरुन्थियों 9:7

हर इक्क मणू जदेया से अपणे मन बिच पक्का करी लेयो तदेया ही दान करो। ना ता कुढ़ी-कुढ़ी करी ते नां ही कुसकी दवाब री वजह कने से दान करो, किजोकी परमेश्वर खुसी कने दान दैणे वालेयां कने प्यार करदे हिन।

इफिसियों 6:5

ओ गुलामों, इस दुनिया बिच जे तुसा रे मालक हिन, तिन्हेरे हुकमां जो मन्नों ते अपणे मन रे सिद्देपन कने तिन्हेरे तिन्ने ही भरोसेमंद रेयो जिन्ना तुसा मसीह कने हिन,

कुलुस्सियों 3:22

ते गुलामों, सुणो, ईमानदारी कने अपणे दुनियावी मालिकां रे हुकमां जो मन्नेया करो, सिर्फ तिस बेल्ले ही नी जां से तुसा जो दिखदे होण, दिल री पूरी ईमानदारी ते प्रभु तांइ आदरमान कने करो।

1 थिस्सलुनीकियों 2:3

किजोकी असा रा उपदेस ना वहम कने है ते ना गलत इराद्दे कने, ते ना छल कने है।

1 थिस्सलुनीकियों 2:8

ते तिय्यां ही असी तुसा री चाहत करदे होए, ना सिर्फ परमेश्वर रा सुब बसेख पर अपणी जान भी तुसा जो दैणे तांइ तैयार थिये, इस तांइ किजोकी तुसा जो बड़ा प्यार करदे थिये।

1 तीमुथियुस 4:13

जां तांइ मैं तित्ते ना पुज्जां तां तांइ कलीसिया बिच विश्वासियां रे सामणे पवित्रशास्त्र पढ़ने, तिन्हा जो प्रोत्साहित करणे ते सिखाणे बिच वक्त गुजारो।

1 तीमुथियुस 5:17

कलीसिया रा कोई भी मुखिया जे अगर अपणा कम्म सही तरिक्के कने करदा तां तिसेरी इज्जत होणा चाएदी खासतौर पर कलीसिया रे से बुजुर्ग मणू जे परमेश्वर रे बसेख जो सिखांदे ते प्रचार करदे।

1 तीमुथियुस 6:18

तिन्हा जो बड़े जादा ठीक काम्म, ते दयालू ते इक्क-दूए री जरुरत रे हिसाब कने बडंणा सिखाओ।

इब्रानियों 10:25

ते इक्क-दूए कने संगती रखणा ना छड्डे, जिय्यां की मते जणेया ने संगती रखणा छड्डी भी दित्ते रा है, पर इक्क-दूए जो प्रोत्साहन दिंदे रैह्णा चाएदा। ते जिय्या-जिय्यां तुसा परमेश्वर रा हटणे रे समय जो नेड़े आया करदा है, तिय्यां-तिय्यां इक्क-दूए जो जादा का जादा प्रोत्साहन देया करो।

इब्रानियों 13:17

अपणे अगुवे री गल्लां मन्नो, ते तिन्हेरे अधीन रेयो। से हमेसा तुसा तांइ चुकन्ने रैहन्दे, ताकि तुसा भटकी ना जाण। किजोकी तिन्हा जो अपणी सेवकाई रा हिसाब परमेश्वर जो दैणा जरुरी है। इय्यां ही करो, ताकि से अपणे कम्मां बिच र खुस ही होण, ना की दुखी होण, नी ता तुसा जो कोई फायदा नी होणा।

इब्रानियों 13:22

मेरे संगी विश्वासियों, मैं तुसा का बिनती करदा कि तुसा सबर कने इस बसेख जो सुणो, जे मैं तुसा जो प्रोत्साहित करणे तांइ लिख्खे रा है। किजोकी मैं तुसा जो बड़ी घट शब्दां बिच लिख्खे रा है।

इब्रानियों 13:24

अपणे सारे अगुवे जो नमस्ते ते परमेश्वर रे सारे लोक्कां जो नमस्ते बोल्लो। ईतालिया देस बिच रैह्णे वाले विश्वासी लोक्कां रा तुसा जो नमस्कार।

इब्रानियों 13:7

जे तुसा रे आत्मिक अगुवे थिये, ते जिन्हा ने तुसा जो परमेश्वर रे बारे बिच दस्सेया थिया, तिन्हा जो याद रख्खो; ते सोच्चो कि से किय्यां जिन्दगी जिन्दे थिये, ते फिरी मरे। जदेया विश्वास तिन्हा जो परमेश्वर बिच विश्वास थिया, तैसा ही विश्वास तुसा भी परमेश्वर बिच दिखाओ।