रोमियों 12:2 - चम्बयाली नौआ नियम

² इस दुनिया रे लोक्कां सांई मत बणो, पर तुसा रे मन रे बदली जाणे री वजह कने तुसा रा चाल-चलन भी बदलदा रे, जिस कने तुसा परमेश्वर री भली, ते ठीक लगणे वाली, ते सिद्ध इच्छा जो तजुरबे कने जाणदे रेयो।

रोमियों 12:2 ပူးပေါင်းရင်းမြစ်များ

मत्ती 13:22

जे भी झिल्लां बिच पेया थिया, ए से हिन, जे वचना जो सूणदे, पर इस दुनिया री फिकरां अते पैसेयां रा लालच वचनां जो दबी रखदा, अते से कामयाब नी हुन्दे।

मरकुस 4:19

ते दुनिया री फिकर, ते पैसे रा धोखा, ते होर चीजां रा लालच उन्हा बिच समाई करी वचन जो दब्बी दिंदा ते से फल्ल ली लाई पांदे।

यूहन्ना 14:30

मैं अवे तुसा कने जादा गल्लां नी करणी, किजोकी इस दुनिया रा सरदार जे शैतान है, आया करदा है, मेरे पर तिसेरा कोई हक्क नी है,

यूहन्ना 15:19

जे तुसा इस दुनिया रे लोक्कां सांई हुन्दे तां दुनिया रे लोक्कां ने तुसा कने अपणेयां सांई प्यार करणा थिया, पर तुसा इस दुनिया रे लोक्कां सांई नी हिन किजोकी मैं तुसा जो इस दुनिया रे लोक्कां बिच का चुणी लित्ते रा है, अते इधेरे तांइ दुनिया रे मणू तुसा रे कने दुश्मणी रखदे।

यूहन्ना 17:14

मैं तुसा रा वचन दुनिया रे लोक्कां जो दित्तेया। दुनिया रे लोक्कां ने मेरे चेल्‍लेयां कने नफरत कित्ती, किजोकी जिय्यां दुनिया चलदी तिय्यां से नी चलदे, जिय्यां मैं भी इस दुनिया रे हिसाब कने नी चलदा।

यूहन्ना 7:7

दुनिया रे मणू तुसा कने नफरत नी करी सकदे, पर से मेरे कने नफरत करदे, किजोकी मैं तिन्हेरे खिलाफ गवाई दिन्दा, कि दुनिया रे लोक्कां रे कम्म बुरे हिन।

रोमियों 12:1

इधेरे तांइ ओ संगी विश्वासियों, मैं तुसा जो परमेश्वर रे दया जो याद दुआई करी तुसा का छन्दे करदा, कि अप्पु जो जिन्दा, ते पवित्र अते परमेश्वर जो भाणे वाले कुर्बानी रे रुप बिच चढ़ाओ। परमेश्वर री सेवा करणे रा ए ही सही तरिक्का है।

रोमियों 13:14

बल्कि प्रभु यीशु मसीह जो इक्क कवच सांई पाई लेयो, ते अपणी पाप रे स्वभाव कने जिन्दगी मत जियो।

रोमियों 7:12

पर फिरी भी मूसा रे कानून ते तिस बिच लिख्खे गे हुकम, धार्मिक, ठीक ते पवित्र हिन।

रोमियों 7:14

असी जाणदे कि मूसा रा कानून तां आत्मिक है, पर मैं सिर्फ इक्क इन्सान है, ते पाप रे हत्थां गुलाम बणाई करी बेच्चेया गे रा है।

रोमियों 7:22

मैं पूरे दिल कने परमेश्वर रे कानून कने तां बड़ा खुस रैहन्दा,

1 कुरुन्थियों 3:19

किजोकी परमेश्वर री नजर बिच इन्सानी ज्ञान बेवकूफी है, जिय्यां कि पवित्रशास्त्र बिच लिख्खे रा है, “से ही (परमेश्वर) है, जे ज्ञानी मणूआं जो तिन्हेरी चलाकी बिच फसाई दिंदा,”

2 कुरुन्थियों 4:4

शैतान, जे इस दुनिया रे लोक्कां रा शासक है, तिनिये मसीह यीशु बिच विश्वास ना करणे वाले लोक्कां री समझ जो मंद करी रख्खे रा है, ताकि से मणू सुब बसेख री महिमामय रौसनी जो नी दिख्खी सके। से मणू मसीह यीशु रे इस महिमा रे बसेख जो नी समजदे जे परमेश्वर रे प्रतीरुप हिन।

2 कुरुन्थियों 5:17

इस तांइ जे कोई मसीह यीशु बिच विश्वास रखदा तां से नौई रचना है: पुराणी जिन्दगी बीती गे री है, अवे नौई जिन्दगी री सुरुआत होए री है।

गलातियों 1:4

असा रे परमेश्वर ते पिता री मर्जी रे हिसाब कने मसीह यीशु ने असा रे पाप्पां तांइ अप्पु जो कुर्बान होणे तांइ देई दित्तेया, ताकि असा जो अज्ज रे इस बुरे दुनिया रे असर का बची रैह्ण।

इफिसियों 1:18

मैं ए भी प्रार्थना करदा कि से तुसा जो सच्चाई जो पूरी तरिक्के कने समजणे बिच मदद करे ताकि तुसा जाणी सको तिन्हेरे असा जो सद्दणे री आस कै है, ताकि तुसा जाणी सको कि से आशीषां किन्नी जादा महिमामय हिन जिन्हेरे दैणे रा वादा परमेश्वर ने अपणे लोक्कां कने कित्ते रा है।

इफिसियों 2:2

तिस बेल्ले तुसा दुनियादारी रे तौर-तरिक्के कने चलदे थिये ते तुसा शैतान रे कहे मुताबिक चलेया करदे थिये जे दुष्टात्मां रा हाकिम है, ते जे अज्ज भी तिन्हा लोक्कां बिच कम्म करेया करदा है जे परमेश्वर रे हुकमां री ना-फरमानी करदे।

इफिसियों 5:17

इस तांइ बेफकुफ मत बणो, पर ध्यान कने समझो की परमेश्वर री मर्जी कै है?

कुलुस्सियों 1:9

इधेरे तांइ जां रा असी तुसा रे बारे बिच सुणे रा है, तां का ही असी तुसा तांइ प्रार्थना करदे रैहन्दे। असी परमेश्वर का हमेसा प्रार्थना करदे कि से तुसा जो पूरी समझ ते आत्मिक बुद्वी ते समजदारी दैण ताकि तुसा तिन्हेरी इच्छा जो समजी सको।

कुलुस्सियों 3:10

तुसा अवे इक्क नौए मणू बणी गेरे हिन, ए नौआ स्वभाव अपणे बणाणे वाले परमेश्वर सांई बणदा जाया करदा है ते इस वजह कने तुसा परमेश्वर जो जादा ठीक तरिक्के कने समझणा।

कुलुस्सियों 4:12

इपफ्रास भी जे तुसा रे ही सहर का है। ते से मसीह यीशु रा दास है, तुसा जो प्रणाम बोल्लेया करदा है। से बड़ी लगन कने तुसा तांइ प्रार्थना करदा रैहन्दा ताकि तुसा मसीह यीशु बिच विश्वास करणे बिच मजबूत होई करी, सिद्व होई करी ते पक्के तौर पर पूरे विश्वास कने परमेश्वर री मर्जी जो पूरा करो।

1 थिस्सलुनीकियों 4:3

किजोकी परमेश्वर री ये मर्जी है कि तुसा व्यभिचार ना करो ते पवित्र बणो।

तीतुस 3:5

ते परमेश्वर ने असा जो पाप री सजा मिलणे का बचाया ते ए असा रे धार्मिक कम्मां री वजह कने नी पर तिन्हा ने अपणी दया री वजह कने असा जो इक्क नौई जिन्दगी दित्ती। तिन्हा ने असा रे पाप्पां जो मिटाई दित्तेया ते असा जो इक्क नौआ स्वभाव दित्तेया। तिन्हा ए असा जो अपणा पवित्रात्मा दैणे रे जरिये कित्तेया।

याकूब 1:27

असा रे परमेश्वर पिता री नजर बिच सच्ची ते सुच्ची भक्ति ए है कि अनाथ ते विधवा रे दुख बिच तिन्हेरा ख्याल रखणा, ते अप्पु दुनिया रे बुरे कम्मां का दुर रैह्ण जे तुसा जो बिगाड़दे।

याकूब 4:4

ओ बेईमान लोक्कों, तुसा जाणदे कि दुनिया री चीजां कने प्यार रखणा परमेश्वर कने नफरत करणा है। अते जे दुनिया रा दोस्त होणा चाह्‍ंदा, से अपणे आप जो परमेश्वर रा दुश्मण बणादां

1 पतरस 1:14

परमेश्वर रे हुकमां जो इस तरिक्के कने मन्नेया करो जिय्यां अच्छे बच्चे अपणे प्यो रे हुकमां जो मनदे। तिन्हा बुराई रे कम्मां जो करणे री चाह्‍त मत रख्खो जे तुसा तिस बेल्ले करणा चाह्‍ंदे थिये जां तुसा परमेश्वर जो नी जाणदे थिये।

1 पतरस 1:18

तुसा जाणदे कि पैल्ले तुसा बेकार तरिक्के कने जिन्दगी जिया करदे थिये, से ओ ही तरिक्का थिया जे तुसा जो अपणे का पैल्ले रे मणूआं का मिल्लेया थिया। पर तुसा जो तिस बेकार जिन्दगी का छुटकारा दित्तेया गेया। तुसा रा मुल्ल चुकाया गेया पर सोन्ने चाँदी जदेई चीजां कने नी जे सड़ी जांदी, पर मसीह रे कीमती खून कने, जे इक्क सुच्चे ते सिद्व उरणू सांई हिन।

1 पतरस 2:3

किजोकी पवित्रशास्त्र बिच इस हिसाब कने लिख्खे रा है, “तुसां ने अपणे अनुभव कने सिख्खे रा है कि परमेश्वर भले हिन।”

1 पतरस 4:2

इसेरे अंजाम रे तौर पर तिस मणू ने इस दुनिया बिच अपणी बाकि री जिन्दगी अपणे सरीर री बुरी इच्छा जो पूरा करदे होए नी बिताणी, पर तिसने से ही कम्म करणा जे परमेश्वर तिसका करवाणा चाह्‍ंदे।

2 पतरस 1:4

ते तिन्हेरी महिमा ते भलाई री वजह कने तिन्हा ने असा कने बड़ा महान ते कीमती वादा कित्ते रा है। इन्हा वरदान्नां जो इस्तेमाल करी के असी सरीर री बुरी इच्छां का बची सकदे जिसेरी वजह कने दुनिया रे मणू बर्बाद होई जांदे। ते इन्हा रे जरिये मणू परमेश्वर रे स्वभाव बिच हिस्सेदार बनण।

2 पतरस 2:20

मणू जां मसीह जो अपणे प्रभु ते छुटकारा दैणे वाले रे रुप बिच जाणी जांदे, तां से दुनिया री दुष्टता का बची जांदे। पर अवे दुबारा से मणू गलत कम्म करणे बिच शामिल होई गेरे हीन ते से गलत कम्म अवे तिन्हा जो चलांदे। इधेरे तांइ मसीह जो नक्कारी दैणे का बाद तिन्हेरी अब्बे री हालत तिस समय का जादा बुरी है जां से मसीह जो नी जाणदे थिये।

1 यूहन्ना 3:13

ओ मेरे संगी विश्वासियों, जां दुनिया रे मणू तुसा कने नफरत करदे, तां हैरान मत हुन्दे।

1 यूहन्ना 5:19

असा जो पता है कि असी परमेश्वर कने हिन ते सारी दुनिया तिस शैतान रे वस अन्दर पेरी है।

प्रकाशित वाक्य 12:9

तां तिस अजगर ते तिसेरे दूत जो धरती पर सूटी दित्तेया गेया। से अजगर ओ ही है जिस जो पैल्ले-पैल्ले कीड़ा भी बोल्लेया गेया थिया, जिसेरा नां शैतान। एह् ओई है जे दुनिया रे लोक्कां पर इल्जाम लगांदा अते भटकाया करदा है।

प्रकाशित वाक्य 13:8

धरती रे सारे मणूआं ने तिसेरी अराधना कित्ते री है। जिन्हा लोक्कां रे नां तिस जिन्दगी री कताब बिच दुनिया जो बणाणे रे पैल्ले लिख्खे गेरे हिन, सिर्फ तिन्हा ने ही तिस ड्रोणे जानवर री अराधना नी कित्ती। से जिन्दगी री किताब, तिस “उरणू” री कताब है जिस जो कुर्बान कित्तेया गेया थिया।