रोमियों 11:6 - चम्बयाली नौआ नियम

⁶ जे अगर परमेश्वर ने तिन्हा जो अपणे अनुग्रह कने चुणे रा है, तां फिरी जे अगर ए ठीक कम्मां जो करणे कने होया हुंदा, तां अनुग्रह ने अनुग्रह नी रैह्णा थिया।

रोमियों 11:6 ပူးပေါင်းရင်းမြစ်များ

लूका 6:13

अगले रोज्जे भ्यागा तिन्हा ने अपणे सारे चेल्‍लेयां जो अपणे नेड़े सद्देया ते तिन्हा बिच का बारह जणेया जो चुणी लेया ते उन्हा जो प्रेरित (यीशु मसीह यीशु के धर्म प्रचारक, समाचार प्रचारक) नां दित्तेया गेया,

1 कुरुन्थियों 15:10

परमेश्वर रे अनुग्रह री वजह कने ही मैं प्रेरित बणेया, तिन्हेरा से अनुग्रह जे मेरे पर होया, तिसेरा मेरी जिन्दगी बिच बड़ा जादा असर रेया। मैं तिन्हा सारे प्रेरितां का बधी करी मैहनत भी कित्ती: तां भी ए मेरे पास्से का नी होया पर परमेश्वर रे अनुग्रह री वजह जे मेरे पर है।

गलातियों 2:21

मैं परमेश्वर रे अनुग्रह जो नक्कारी नी सकदा, किजोकी जे अगर मूसा रे कानूनां रे जरिए धार्मिकता मिल्ली सकदी तां मसीह यीशु री कुर्बानी री कोई जरुरत नी हुंदी।

गलातियों 5:4

तुसा मणू जे मूसा रे कानून जो मन्नी करी धार्मिक ठैहराणा चाह्‍ंदे, ते तुसा अप्पु जो मसीह यीशु का बखरा करी लित्तेया ते तुसा बिच परमेश्वर रा अनुग्रह नी रेया।

2 तीमुथियुस 1:9

परमेश्वर ने असा जो छुटकारा दित्तेया ते असा जो इक्क पवित्र जिन्दगी जीणे तांइ सद्दे रा है। तिन्हा ने असा जो इधेरे तांइ नी चुणेया कि असी कोई भलाई रे कम्म कित्ते थिये, पर तिन्हा ने असा जो अपणे मकसद ते अनुग्रह री वजह कने चुणेया। परमेश्वर ने मसीह यीशु जो धरती पर भेजणे रे जरिये असा जो अपणा अनुग्रह दिखाणे रा मकसद इस दुनिया जो बणाणे का पैल्ले ही करी लित्तेया थिया।

तीतुस 3:5

ते परमेश्वर ने असा जो पाप री सजा मिलणे का बचाया ते ए असा रे धार्मिक कम्मां री वजह कने नी पर तिन्हा ने अपणी दया री वजह कने असा जो इक्क नौई जिन्दगी दित्ती। तिन्हा ने असा रे पाप्पां जो मिटाई दित्तेया ते असा जो इक्क नौआ स्वभाव दित्तेया। तिन्हा ए असा जो अपणा पवित्रात्मा दैणे रे जरिये कित्तेया।