रोमियों 1:7 - चम्बयाली नौआ नियम

⁷ मैं ए चीठ्ठी रोम सहर बिच रैह्णे वाले तुसा सारे विश्वासियां जो लिख्खेया करदा है, जिन्हा जो परमेश्वर प्यार करदे ते जिन्हा जो तिन्हा ने अपणे मणू बणने तांइ चुणे रा है। परमेश्वर पिता ते मसीह यीशु तुसा जो अनुग्रह ते सांती दैण।

रोमियों 1:7 ပူးပေါင်းရင်းမြစ်များ

मत्ती 5:16

इय्यां ही तुसा री लौ मणूआं रे सामणे चमकणा चाएदी कि से तुसा रे भले कम्मां जो दिख्खी करी तुसा रे प्यो री, जे स्वर्ग अन्दर हिन, बड़ाई करण।”

यूहन्ना 20:17

यीशु ने तिसजो बोल्लेया, मेरे जो मत छू, किजोकी मैं हल्ले तांइ पिता का उप्पर नी गेया, पर मेरे चेल्‍लेयां का जाई करी तिन्हा जो बोल्ली दे, मैं अपणे ते तुसा रे परम पिता, अते अपणे ते तुसा रे परमेश्वर का उप्पर जाया करदा है।

प्रेरितां रे कम्म 15:23

ते तिन्हेरे हत्थां ए चीठ्ठी लिख्खी भेज्जी, कि अन्ताकिया सहर ते सीरिया ते किलिकिया प्रदेश बिच रैह्णे वाले भाईयां जो जे कि गैर यहूदियां रे हिन, खास प्रेरितां ते बुजुर्ग लोक्कां रा नमस्कार।

प्रेरितां रे कम्म 9:13

हनन्याह ने जवाब दित्तेया, ओ प्रभु जी, मैं इस मणू रे बारे बिच मते जणेया का सुणे रा है कि तिसने यरुशलेम सहर बिच तुसा रे परमेश्वर रे लोक्कां री बड़ी वरी बुराई कित्त्ते री है,

रोमियों 1:6

तुसा रोम सहर बिच रैह्णे वाले विश्वासी तिन्हा लोक्कां बिच गिणे जांदे जिन्हा जो परमेश्वर ने मसीह यीशु रा होणे तांइ चुणे रा है।

रोमियों 5:1

इधेरे तांइ परमेश्वर ने असा जो मसीह बिच विश्वास करणे रे जरिये धार्मिक ठैहराया। ते प्रभु यीशु मसीह रे जरिये असा रा परमेश्वर कने मेल-मिलाप होया।

रोमियों 5:5

ते इस आस कने असा जो निराशा नी हुंदी, किजोकी परमेश्वर ने असा जो पवित्रात्मा दित्ते रा है, जे असा रे मन जो परमेश्वर रे प्यार कने भरी दिंदा।

रोमियों 8:28

असी जाणदे कि परमेश्वर हर गल्ल बिच तिन्हा लोक्कां कने भलाई करदे जे तिन्हा कने प्यार करदे। परमेश्वर ने तिन्हा लोक्कां जो अपणे मकसद तांइ चुणे रे हिन।

रोमियों 8:39

ना कोई असा रे उप्पर, ना कोई असा रे थल्ले, ना परमेश्वर री बणाए री कोई होर रचना, असा जो परमेश्वर रे उस प्यार का बखरा करी सकदा जे तिन्हा ने असा पर प्रभु यीशु मसीह रे जरिये ज़ाहिर कित्ता।

रोमियों 9:25

गैर यहूदियां रे बारे बिच सोचदे होए परमेश्वर ने भविष्यद्वक्ता होशे री कताब बिच बोल्ले रा है, “मते जणे जे मेरे मणू नी थिये, तिन्हा जो मैं अपणे मणू बोलणा। मते मणू जिन्हा जो मैं पैल्ले प्यार नी कित्तेया, तिन्हा जो मैं अवे प्यार करणा।

1 कुरुन्थियों 1:24

पर से मणू जिन्हा जो परमेश्वर ने अपणे मणू होणे तांइ सद्दे रा है, चाए फिरी से यहूदी हो या गैर यहूदी हो, तिन्हा तांइ मसीह परमेश्वर री ताकत ते ज्ञान हिन।

1 कुरुन्थियों 16:23

प्रभु यीशु रा अनुग्रह तुसा पर हुंदा रे।

2 कुरुन्थियों 13:14

असा रे प्रभु यीशु रा अनुग्रह, ते परमेश्वर रा प्यार ते पवित्रात्मा री संगती, तुसा सबणी कने बणी रेयो।

गलातियों 6:18

ओ संगी विश्वासियों, असा रे प्रभु यीशु मसीह रा अनुग्रह तुसा कने बणी रेयो। आमीन!

इफिसियों 1:2

तुसा जो असा रे पिता परमेश्वर अते मसीह यीशु रे पास्से का अनुग्रह ते सांती मिलदी रे।

इफिसियों 6:23

मैं परमेश्वर पिता ते प्रभु मसीह यीशु का ए प्रार्थना करदा कि से तुसा जो सांती दे। ते इस कने तुसा बिच प्यार बधे ते तुसा मसीह यीशु बिच विश्वास करणे बिच बणी रेयो।

फिलिप्पियों 1:2

असा रे पिता परमेश्वर ते प्रभु यीशु मसीह रे पास्से का तुसा जो अनुग्रह ते सांती मिलदी रेयो।

फिलिप्पियों 4:13

मसीह मेरे जो ताकत दिंदा ते तिस बिच मैं सब किच्‍छ करी सकदा।

फिलिप्पियों 4:20

असा रे परमेश्वर ते पिता री बड़ाई हमेसा-हमेसा तिकर हुंदी रे आमीन।

फिलिप्पियों 4:23

असा रे प्रभु यीशु मसीह रा अनुग्रह तुसा री आत्‍मा कने रे।

कुलुस्सियों 3:12

किजोकी परमेश्वर तुसा जो प्यार करदे ते तिन्हा ने तुसा जो अपणे पवित्र मणू बणने तांइ चुणी लित्ते रा है, इधेरे तांइ तुसा बड़ी करुणा, निमतापन, भलाई, कने सहनशीलता ते दया रा स्वभाव धारण करी लेयो।

कुलुस्सियों 3:15

अप्पु जो तिस सांती रे वस बिच करी देयो जे मसीह का मिलदी, किजोकी तुसा सारे ही इक्क ही सरीर रे हिस्सा हिन ते तुसा सारे इक्क-दूए कने सांती कने रैह्णे तांइ सद्दे गेरे हिन।

1 थिस्सलुनीकियों 1:1

मैं पौलुस, सिलवानुस अते तीमुथियुस कने थिस्सलुनीकियों सहर री कलीसिया जो ए चीठ्ठी लिख्खेया करदा है जे परमेश्वर अते प्रभु यीशु मसीह बिच है। तुसा जो अनुग्रह अते सांती मिलदी रेह्।

1 थिस्सलुनीकियों 1:3

जां असी पिता परमेश्वर का प्रार्थना करदे तां असी तुसा लोक्कां रे विश्वास रे हिसाब रे कम्मां जो, ते विश्वासी लोक्कां तांइ तुसा रे प्यार भरे कम्मां जो, ते मसीह यीशु रे हटणे री आस बिच मुसीबतां रे दौरान तुसा रे सबर रखणे जो भी याद करदे।

1 थिस्सलुनीकियों 1:4

ओ संगी विश्वासियों, असी जाणदे कि परमेश्वर तुसा जो प्यार करदे ते तिन्हा ने तुसा जो अपणे मणू बणाई लैणे तांइ चुणी लित्ते रा है।

1 थिस्सलुनीकियों 4:7

किजोकी परमेश्वर ने असा जो अपवित्रता री जिन्दगी जीणे तांइ नी पर पवित्रता री जिन्दगी जीणे तांइ सद्दे रा है।

1 थिस्सलुनीकियों 5:28

असा रे प्रभु यीशु मसीह रा अनुग्रह तुसा पर हुंदा रेयो।

2 थिस्सलुनीकियों 1:2

असी प्रार्थना करदे कि तुसा जो पिता परमेश्वर अते प्रभु यीशु मसीह रे पास्से का अनुग्रह अते सांती मिल्ले।

2 थिस्सलुनीकियों 3:16

प्रभु जे सांती दैणे वाला है, मैं तिन्हा का प्रार्थना करदा कि से तुसा जो हमेसा ते हर तरिक्के री सांती दिंदे रैह्ण, ते प्रभु तुसा सारे जणेया कने रैह्ण।

2 थिस्सलुनीकियों 3:18

असा रे प्रभु यीशु मसीह रा अनुग्रह तुसा सारे जणेया पर हुंदा रेयो।

1 तीमुथियुस 1:2

मसीह यीशु बिच विश्वास करणे री वजह कने तीमुथियुस तू मेरा सच्चा मुंडा है। असा रे पिता परमेश्वर ते मसीह यीशु तेरे जो अनुग्रह ते सांती दिंदे रैह्ण।

1 तीमुथियुस 6:2

ते जे अगर कुसकी विश्वासी रा मालिक भी कोई विश्वासी है, तां से तिन्हा जो अपणे संगी विश्वासी होणे री वजह कने तुच्छ ना समजे बल्कि से तिन्हेरी होर भी जादा सेवा करेया करे किजोकी से मालिक जिन्हा जो अपणे गुलाम्मां का फायदा मिलदा, से अपणे गुलाम्मां रे संगी विश्वासी होणे री वजह कने तिन्हा कने बड़े ठीक ते भरोस्सेमंद हिन। सारेयां जो ए गल्लां मनणा सिखांदा रेय।

2 तीमुथियुस 1:2

ओ तीमुथियुस तू मेरा प्यारा मुंडा है। पिता परमेश्वर ते असा रे मसीह यीशु तुसा पर अनुग्रह करदे रैह्ण।

2 तीमुथियुस 4:22

मैं प्रार्थना करदा कि परमेश्वर तुसा कने रे ते तिन्हेरा अनुग्रह भी तुसा पर हुंदा रे।

तीतुस 1:4

मसीह बिच असा रे विश्वास री वजह कने, तीतुस तू मेरे बच्चे सांई है। पिता परमेश्वर ते असा जो छुटकारा दैणे वाले प्रभु यीशु मसीह तेरे जो अनुग्रह ते सांती दे।

फिलेमोन 1:25

मैं प्रार्थना करदा कि मसीह यीशु तुसा पर अनुग्रह करण। आमीन!

फिलेमोन 1:3

असा रे पिता परमेश्वर ते प्रभु यीशु मसीह रे पासे का तुसा जो अनुग्रह ते सांती मिलदी रेय।

याकूब 1:1

मैं याकूब परमेश्वर रा ते मसीह यीशु रा दास, तिन्हा बारा गोत्तर रे यहूदी विश्वासियां जो ए चीठ्ठी लिखदा ते नमस्ते करदा जे दुनिया रे अलग-अलग जगाह् बिच बिखरे रे हिन।

1 पतरस 1:15

हर इक्क गल्ल बिच अप्पु जो बुराई रे कम्मां का बखरा रेयो किजोकी परमेश्वर पवित्र हिन।

1 यूहन्ना 3:1

ध्यान देयो कि परमेश्वर पिता ने असा कने कितणा प्यार कित्तेया ताकि असा जो परमेश्वर रे निके-निके बोल्लेया जाई सके अते वाक्केई असी तिन्हेरे बच्चे हिन भी! इधेरे तांइ दुनिया रे मणू असा जो नी जाणदे कि असी परमेश्वर रे बच्चे हिन किजोकी तिन्हा ने परमेश्वर पिता जो भी नी जाणेया।

2 यूहन्ना 1:3

पिता परमेश्वर ते तिन्हेरे पुत्तर मसीह यीशु रा अनुग्रह, दया ते सांती तिन्हा लोक्कां कने हमेसा-हमेसा तांइ बणी रे जे मणू सच्चाई ते प्यार बिच जिन्दगी बितांदे।

प्रकाशित वाक्य 2:1

तिनिये मेरे जो बोल्लेया, “इफिसुस सहर रे कलीसिया रे स्वर्गदूत जो ए चीठ्ठी लिख्ख, मैं अपणे सज्जे हत्थ बिच सत्त तारेयां जो थाम्मि करी रख्खे रा है ते मैं ही तिन्हा सत्त दियां रे धूपदान रे बिच-मझाट्टे घूमदा-फिरदा। मैं तुसा जो ए बोलदा,

प्रकाशित वाक्य 2:12

तिन्हा ने मेरे जो बोल्लेया पिरगमुन सहर री कलीसिया रे स्वर्गदूत जो ए बसेख लिख्खी करी भेज्जी दे। “मैं से मणू है जिस का पैन्नी दोधारी तलवार है, मैं तुसा जो ए बोल्लेया करदा है,

प्रकाशित वाक्य 2:18

तिन्हा ने मेरे जो ए भी बोल्लेया, “थुआतीरा सहर री कलीसिया रे स्वर्गदूत जो ए बसेख लिख्ख, परमेश्वर रा पुत्तर, जे मैं ही है, ते जिसेरी हाख्खियां आग्ग री लपटां सांई चमकदी, ते जिसेरे पैर भट्टी री आग्ग बिच तपाए रे पित्तल सांई हिन, तुसा कने ए गल्लां बोल्लेया करदा है,

प्रकाशित वाक्य 2:29

जे सुनणा चाए, से ध्यान कने सुणे कि पवित्रात्मा कलीसिया कने कै बोलदा।”

प्रकाशित वाक्य 2:8

तिन्हा ने मेरे जो ए भी बोल्लेया, “ए बसेख स्मुरना सहर री कलीसिया रे स्वर्गदूत जो लिख्ख, मैं सुरुआत ते आखिर है। मैं इक्क वरी मरेया, पर अवे मैं जिन्दा है, ते हमेसा-हमेसा तांइ जिन्दा ही रैह्णा। जे मरी गेया थिया, अते अवे जिंदा होई गे रा है। मैं तुसा जो ए बोल्लेया करदा है,

प्रकाशित वाक्य 22:21

मैं प्रार्थना करदा कि प्रभु यीशु परमेश्वर रे लोक्कां पर अनुग्रह करण।

प्रकाशित वाक्य 3:14

तिनिये मेरे जो फिरी बोल्लेया, “लौदीकिया रे सहर रे कलीसिया रे स्वर्गदूत जो ए चीठ्ठी लिख्ख, मैं आमीन है, किजोकी मैं भरोस्सेमंद है, ते मैं इस गल्ल जो साबित करदा कि परमेश्वर सच है। जे किच्‍छ भी परमेश्वर ने बणाए रा है मैं तिसेरा जरिया है। मैं तुसा जो ए बोलदा,

प्रकाशित वाक्य 3:22

जे सुनणा चाए, से ध्यान कने सुणे कि पवित्रात्मा कलीसिया कने कै बोलदा।”

प्रकाशित वाक्य 3:7

तिनिये मेरे जो बोल्लेया, “फिलदिलफिया सहर रे कलीसिया रे स्वर्गदूत जो ए चीठ्ठी लिख्ख, मैं ही से पवित्र ते सच्चाई है, जिस का से चाब्बी है जे दाऊद राज्जे का थी। जां मैं चाब्बी लेई करी दुआर खोलदा, तां तिसजो कोई भी बांद्द नी करी सकदा, ते जां मैं चाब्बी लेई करी कोई दुआर बांद्द करदा, तां कोई तिसजो खोल्ली नी सकदा। मैं तेरे जो ए बोलदा,