रोमियों 1:20 - चम्बयाली नौआ नियम

²⁰ परमेश्वर री ताकत ते स्वभाव दिख्खे नी जाई सकदे, पर दुनिया रे रचणे री सुरुआत का ही, परमेश्वर ने अप्पु ही इन्हा सारे गुण जो अपणे कम्मां रे जरिये ही दिखाए रा है, इधेरे तांइ इन्हा लोक्कां का अपणे तांइ कोई बहान्ना नी है कि से परमेश्वर जो नी जाणदे।

रोमियों 1:20 ပူးပေါင်းရင်းမြစ်များ

मत्ती 5:45

ताकि तुसा अपणे पिता परमेश्वर रे बच्चे बणी सको जे स्वर्ग बिच हिन, किजोकी से ठीक लोक्कां पर ते बुरे लोक्कां पर अपणा सूरज चमकान्दा, अते धार्मिक अते अधर्मी दोन्नां लोक्कां पर बरखा बरसांदे।

मरकुस 10:6

पर परमेश्वर ने दुनिया री सुरुआत का मड़द अते जनानी जो बणाया।

यूहन्ना 1:18

परमेश्वर जो कदी कुसकी ने नी दिख्खेया पर इकलौते पुत्तर ने जे अप्पु ही परमेश्वर है, ते पिता रे सबका जादा करीब है। तिन्हा ने ही असा पर परमेश्वर जो प्रकट कित्ते रा है।

यूहन्ना 15:22

जे मैं नी आंदा अते तिन्हा कने गल्लां नी करदा तां से कुसकी भी पाप रे कसुरवार नी हुन्दे पर अवे तिन्हा का तिन्हेरे पाप्पां तांइ कोई भी भाह्ना नी ए

प्रेरितां रे कम्म 17:29

इधेरे तांइ परमेश्वर री औलाद होई करी असा जो ए समझणा ठीक नी, कि से दिव्य सच्चाई सोणे या चाँदी या पत्थर री बणे री मणू री सोच या मिस्रियां रे बणी री कुसकी मूर्ति जदेयी है।

प्रेरितां रे कम्म 22:1

ओ संगी विश्वासियों, मेरा जवाब सुणो, जे मैं तुसा रे सामणे बोलणा लग्गेया

रोमियों 1:19

पर ए गल्ल सारी दुनिया रे मणू जाणदे कि परमेश्वर कदेय हिन, किजोकी परमेश्वर ने अप्पु ही सारे लोक्कां पर इस गल्ल जो ज़ाहिर कित्ते रा है।

रोमियों 16:26

ते जिय्यां कि परमेश्वर ने पैल्ले का हुकम दित्तेया, ते भविष्यद्वक्तां ने पवित्रशास्त्र बिच दस्से रा है, ए लुके री गल्ल अवे गैर यहूदियां बिच दस्सी दित्ती गे री है, ताकि से मणू अवे परमेश्वर पर विश्वास करणे वाले ते तिन्हेरे हुकमां जो मनणे वाले मणू बणी जाण।

रोमियों 2:1

दूज्जेयां पर इल्जाम लाणे वाले लोक्कों, तुसा जे कम्म करदे तिस तांइ तुसा का कोई बहान्ना नी है किजोकी जिस गल्ल बिच तुसा दूज्जे लोक्कां पर इल्जाम लांदे, तिस बिच अप्पु जो गलत ठैहरांदे किजोकी तुसा दूज्जेयां पर जे इल्जाम लांदे, से ही कम्म अप्पु भी करदे।

रोमियों 2:15

किजोकी से मणू अपणे जिन्दगी जीणे रे तरिक्के कने इस गल्ल जो साबित करदे कि कानून रे हुकम, तिन्हेरे दिल बिच लिखित्ते रे हिन। तिन्हेरा विवेक भी इस गल्ल रे बारे बिच गवाई दिंदा। तिन्हेरा विवेक तिन्हा जो कदी सही ते कदी गलत ठेहरांदा रैहन्दा।

1 कुरुन्थियों 1:20

तां फिरी अवे असी समजदार मणूआं रे बारे बिच कै बोल्ली सकदे? अवे असी यहूदी नियमां रे शास्त्रियां रे बारे बिच कै बोल्ली सकदे? ते अवे असी तिन्हा लोक्कां रे बारे बिच कै बोल्ली सकदे जे गल्ल-बात करणे बिच बड़े तेज हिन? परमेश्वर ने ए ज़ाहिर जताई दित्तां कि इस दुनिया री समझ रा कोई मुल्ल नी है।

कुलुस्सियों 1:15

कोई भी परमेश्वर जो नी दिख्खी सकदा, पर जां तिन्हेरे पुत्तर ने इक्क मणू रे रुप बिच जन्म लित्ता, तां तिसने परमेश्वर जो लोक्कां पर ज़ाहिर कित्ता किजोकी से अप्पु परमेश्वर रे स्वरूप बिच है। परमेश्वर रा पुत्तर पूरे ब्रम्हांड रे बणाए जाणे रे पैल्ले का है, ते परमेश्वर री बणाए री हर चीज पर तिन्हेरा हक है।

कुलुस्सियों 2:9

इन्हा जो अप्पु जो धोखा देई करी फसाणे रा मौक्का मत देयो, किजोकी जां मसीह यीशु ने मणू रे रुप बिच भी जन्म लित्तेया थिया, तां भी तिन्हा बिच परमेश्वर रा पूरा स्वभाव थिया।

1 तीमुथियुस 1:17

हमेसा तिकर राज करणे वाले राज्जा, अविनाशी, अणदिख्खे ते इकलौत्ते परमेश्वर रा आदरमान ते महिमा हमेसा-हमेसा तिकर हुंदी रे। आमीन!

1 तीमुथियुस 6:16

ते सिर्फ से ही हिन जिन्हा ने हमेसा तांइ रैह्णा, से इन्नी जादा चमकदार रौसनी बिच रैह्‍न्दे। कुसकी मणू ने तिन्हा जो कदी नी दिख्खेया ते ना ही दिख्खी सकदा, तिन्हेरी महिमा ते ताकत हमेसा-हमेसा तांइ रैह्णी। आमीन!

इब्रानियों 11:27

भरोसे कने ही राज्जे रे गुस्से का नी डरी करी तिसने मिस्र जो छड्डी दित्ता किजोकी से समजी गेया थिया कि ए इदेया है, जिय्यां तिसने अणदिख्खे परमेश्वर जो दिख्खे रा हो।

इब्रानियों 9:14

पर मसीह रा बेकसूर खून असा रे विवेक जो असा रे पाप्पां, जे असा री मौत री वजह बणदे, तिन्हा का साफ करदे, ताकि असी जिन्दे परमेश्वर री अराधना करी सकण। किजोकी पवित्रात्मा री ताकत रे जरिये मसीह ने अप्पु जो इक्क सिद्व कुर्बानी रे तौर पर परमेश्वर जो अर्पित करी दित्तेया।