प्रकाशित वाक्य 9:4 - चम्बयाली नौआ नियम

^4-5 ते जिय्यां कुसकी भी मणू जो बिच्छु रे कटणे कने पीड़ हुंदी, इन्हा टिड्डेयां जो तिन्हा लोक्कां जो जिन्हा रे मत्थे पर परमेश्वर री मौहर नी लग्गे री थी, तैसी ही पीड़ दैणे रा हक दित्तेया गेया थिया। पर तिन्हा जो कुसकी, बूट्टे, पौधे या घा जो नुक्सान दैणे रा हक नी मिल्ले रा थिया।

प्रकाशित वाक्य 9:4 ပူးပေါင်းရင်းမြစ်များ

मत्ती 24:24

किजोकी झूठ्ठे मसीह ते झूठ्ठे भविष्यद्वक्ता खड़ी उठणे, ते बड्डी-बड्डी चीजां ते हैरान करणे वाले चमत्कार दिखाणे कि जे होई सके ते चुणे रे लोक्कां जो भी भड़काई दैण।

इफिसियों 4:30

अपणे कम्मां री वजह कने पवित्रात्मा जो दुखी मत करो जिन्हेरे जरिये छुटकारे वाले दिन तांइ तुसा पर मौहर लाई गे री है।

प्रकाशित वाक्य 14:1

फिरी मैं दिख्खेया, ते दिखो, से “उरणू रा बच्चा” सिय्योन पहाड़ पर खड़ितेरा है ते तिसेरे कने इक्क लख चुरताली हजार जणे हिन जिन्हेरे मत्थे पर तिसेरा अते तिन्हेरे पिता रा नां लिख्खे रा है।

प्रकाशित वाक्य 6:6

अते मैं तिन्हा चारो प्राणी रे बिच का मन्नो इक्क अवाज जो ए बोलदे सूणेया, “इक्क धियाड़ी री मजूरी रे इक्क किल्लो कणक, ते दीनार रा इक्क किल्लो जौ, पर तेल, अगूंर रे रस्स जो नुक्सान मत पूजांदे।”

प्रकाशित वाक्य 7:1

इसेरे बाद मैं चार स्वर्गदूतां जो धरती रे चार कूणेयां पर खड़ित्ते रे दिख्खेया। तिन्हा जो परमेश्वर का ए हक मिल्ले रा थिया कि चाए धरती हो या समुंद्र, से महामारी कने धरती रे लोक्कां रा नुक्सान करे। तिन्हा ने धरती रे चारो कूणेयां का हवा जो बांद्द करी दित्तेया, ताकि धरती पर, जंगला बिच ते समुंद्र पर कोई हवा ना चली सके। ते फिरी मैं पूरब दिसा बिच इक्क होर स्वर्गदूत जो दिख्खेया। तिसजो हमेसा-हमेसा तिकर जीणे वाले परमेश्वर का इक्क मौहर मिल्ले री थी। तिस स्वर्गदूत ने बाकि रे चार स्वर्गदूतां जो जोर कने हक्क लाई करी ए बोल्लेया,

प्रकाशित वाक्य 8:7

पैल्ले स्वर्गदूत ने तुरही बजाई, ते खून कने मिल्ले रे औले ते आग्ग धरती पर पे। ते इसेरा नतीज्जा ए होया कि धरती रा इक्क तिहाई फुक्की गेया, ते सब हरा घा भी फुक्की गेया।