प्रकाशित वाक्य 2:3 - चम्बयाली नौआ नियम

³ मेरे तांइ जुल्म सहन करणे बिच तू सबर कने रेया, ते तू हार नी मन्नी।

प्रकाशित वाक्य 2:3 ပူးပေါင်းရင်းမြစ်များ

मरकुस 15:21

शमौन जे कुरेन सहर रा मणू थिया ते सिकन्दर ते रुफुस रा प्यो थिया, से यरुशलेम जो जाया करदा थिया; पर सपाईयां ने तिसजो जबरदस्ती पकड़ेया ताकि से यीशु री सुली चुक्की करी लेई चलो।

लूका 14:27

जे कोई अपणी दुख-तकलिफां जो अपणाई करी मेरे तांइ मरणे तिकर भी तैयार है से ही मेरा चेल्ला बणी सकदा।

लूका 18:1

फिरी यीशु ने अपणे चेल्‍लेयां जो ए बताणे तांइ कि से हर बेल्ले प्रार्थना करदे रैण अते दुख्खी ना होण तिधेरे तांइ इक्क उदारण दित्ता

लूका 21:19

पर सबर कने तुसा अपणी जिन्दगी बचाए रखणी।

लूका 5:5

शमौन ने तिन्हा जो जवाब दित्तेया, ओ मेरे मालक, असा सारी रात मच्छी पकड़ने तांइ बड़ी मैहनत कित्ती, पर किच्‍छ भी नी पकड़ी सके, फिरी भी जे तुसा बोल्लेया करदे हिन, तां मैं सिर्फ तुसा रे बोलणे पर दुबारा जाल पाई दिन्दा।

लूका 8:15

पर से बीह् जे ठीक मिट्टी पर पे थिये, से तिन्हा मणूआं सांई हुन्दे, जे मन रे ठीक अते नेक, ते सच्चे मन कने परमेश्वर रे वचन जो सुणी करी तिन्हा पर चलदे ते तिन्हेरे सबर री वजह कने ही से खरा फल्ल लियान्दे।

यूहन्ना 15:21

पर तिन्हा लोक्कां ने तुसा पर भी जुल्म करणा किजोकी तुसा मेरे चेल्‍ले हिन, किजोकी से परमेश्वर जो नी जाणदे जिस ने मेरे जो भेज्जे रा है।

रोमियों 12:12

जे परमेश्वर ने असा तांइ करणा तिस आस बिच खुस रेयो, मुसीबतां बिच सबर रख्खो, प्रार्थना बिच लगातार लग्गी रेयो।

रोमियों 16:12

असा री विश्वासी बहणा, त्रूफैना कने त्रुफोसा जो भी मेरा नमस्कार, जे प्रभु री सेवा तांइ बड़ी मैहनत करदी। प्यारी भैण पिरसिस जो भी मेरा नमस्कार, जिनिए प्रभु तांइ बड़ी जादा मैहनत कित्ते री है।

रोमियों 2:7

जे ठीक कम्मां बिच टिके रेई करी महिमा, इज्जत ते हमेसा री जिन्दगी री खोज बिच हिन, परमेश्वर ने तिन्हा लोक्कां जो हमेसा री जिन्दगी दैणी।

रोमियों 8:25

पर असी तिस ही चीज री आस रखदे जिन्हा जो हल्ले असी दिख्खे रा ना हो। ते असा जो सबर ते हौंसले कने तिसजो भालणा भी चाएदा।

1 कुरुन्थियों 13:7

से हर गल्ल जो सैह्‍ण करी लिंदे, प्यार करणे वाले मणू परमेश्वर बिच विश्वास नी छडदे, प्यार परमेश्वर बिच असा री आस जो बणाई रखदा, ते मुस्किल ते तकलिफां रे दौर बिच से सबर कने रैहन्दा।

1 कुरुन्थियों 16:16

इधेरे तांइ मैं तुसा कने बिनती करदा कि ऐसे मणूआं रे अधीन रेयो जे इदेइ सच्ची भक्ति कने मैहनत करदे।

2 कुरुन्थियों 10:15

असी सीमा का बाहर दूज्जेयां री मैहनत पर गर्व नी करदे, पर असा जो आस है कि जिस तरिक्के कने तुसा रा विश्वास बदधा जाणा तिस तरिक्के कने असी अपणी सीमा रे हिसाब कने तुसा री वजह कने होर भी जादा लोक्कां जो मसीह रा सुब बसेख सूणाई सकणा।

2 कुरुन्थियों 11:23

कै से ही मसीह यीशु री सेवा करणे वाले मणू हिन? मैं बोलदा कि मैं तिन्हा का बधी करी है! मैं पागल मणू सांई बोलदा कि मैं तिन्हा का जादा मैहनत कित्ते री है, मैं तिन्हा का जादा कैद होए रा है, मैं तिन्हा का जादा कोड़े खाए, ते मैं तिन्हा का जादा मौत रे खतरे बिच पेरा है।

2 कुरुन्थियों 4:1

इधेरे तांइ जां असा रे पर इदेयी दया होई कि असा जो परमेश्वर रा बसेख सुनाणे री सेवा मिल्ली तां असी हिम्मत नी हारदे।

2 कुरुन्थियों 4:16

इधेरे तांइ असी हिम्मत नी हारदे, हालांकि असा रा सरीर मुकेया करदा है पर असा अंदर असा री आत्‍मा हर रोज नौई हुंदी जांदी।

2 कुरुन्थियों 5:9

इस तांइ असा रे मन री खुसी ए है कि चाए असी तिन्हा कन्ने स्वर्ग बिच रैह्ण या चाए तिन्हा का दुर इस दुनिया बिच रैह्ण, पर असी तिन्हा जो पसंद आंदे रैह्ण।

2 कुरुन्थियों 6:5

ते असी कोड़े खाणे कने, कैद होणे कने, हगांमेया कने, मैहनत करदे होए, जागदे रैह्णे कने, भूख्ख बिच, पवित्रता कने, ज्ञान कने, सबर कने, रहम कने, पवित्रात्मा कने अप्पु जो परमेश्वर रे चुणे रे दास साबित करदे।

गलातियों 6:2

तुसा मुसीबत बिच इक्क-दूए री मदद करेया करो ते इसी तरिक्के कने तुसा मसीह रे हुकमां जो पूरा करो।

गलातियों 6:9

असा जो नेक कम्म करणे तांइ हिम्मत नी छडणी चाएदी, किजोकी जे अगर असी हिम्मत ना छड्डे तां असा ने परमेश्वर रे ठैहराए रे समय पर ईनाम पाणा।

फिलिप्पियों 2:16

ताकि जिस दिन मसीह यीशु ने हटी आणा तिस दिन मेरे जो ए घमंड होणा कि मेरी कोशीशां ते मैहनत फायदेमंद होई।

फिलिप्पियों 4:3

ते मैं मसीह री सेवा करणे वाले अपणे विश्वासी भ्याल सुजुगस का ए बिनती करदा, कि से तिन्हा जनानियां बिच भी सुलह कराई दये किजोकी तिन्हा जनानियां ने मसीह रा सुब बसेख फैलाणे बिच मेरे, क्लेमेंस ते मेरे बाकि रे साथियां कने बराबर मैहनत कित्ते री है। ते तिन्हेरे नां जिन्दगी री कताब बिच लिख्खे गेरे हिन।

कुलुस्सियों 1:11

मैं प्रार्थना करदा कि परमेश्वर री महिमा री ताकत रे मुताबक, हर किस्मे री ताकत कने मजबूत हुन्दे जाओ, ताकि तुसा बड़े सबर कने ते खुसी-खुसी अपणी हर मुसीबत जो सहन करी लेयो।

1 थिस्सलुनीकियों 1:3

जां असी पिता परमेश्वर का प्रार्थना करदे तां असी तुसा लोक्कां रे विश्वास रे हिसाब रे कम्मां जो, ते विश्वासी लोक्कां तांइ तुसा रे प्यार भरे कम्मां जो, ते मसीह यीशु रे हटणे री आस बिच मुसीबतां रे दौरान तुसा रे सबर रखणे जो भी याद करदे।

1 थिस्सलुनीकियों 2:9

किजोकी ओ भाईयों, तुसा ने असा री कड़ी मैहनत जो याद रख्खेया ते असा ने इस तांइ रात-दिन कम्म करी के तुसा बिच परमेश्वर रा सुब बसेख प्रचार कित्ता ताकि असी अपणी जरुरतां तांइ तुसा पर बोझ ना बनण।

1 थिस्सलुनीकियों 5:12

ओ संगी विश्वासियों, असी तुसा का बिनती करदे कि जे मणू तुसा बिच मैहनत करदे, ते मसीह बिच तुसा रे अगुवे हिन, ते जे तुसा विश्वास री शिक्षा दिन्दे, तिन्हेरी गल्लां मन्नेया करो।

2 थिस्सलुनीकियों 3:13

तुसा ओ संगी विश्वासियों, भले कम्म करणे बिच हिम्मत मत हारो।

2 थिस्सलुनीकियों 3:5

प्रभु यीशु मसीह तुसा जो ए समजणे री ताकत दे कि परमेश्वर अपणे लोक्कां कने किन्ना जादा प्यार करदे ते जिय्यां मसीह यीशु ने अप्पु सबर रख्खी करी सहन कित्तेया तिय्यां ही तुसा भी सहन करी सको।

2 थिस्सलुनीकियों 3:8

ते कुसकी का मुफ्त बिच रोट्टी नी खाई पर मैहनत-मजदूरी करी के रात-दिन कम्म-काज करदे थिये ताकि असी तुसा बिच का कुसकी पर अपणी जरुरतां तांइ निर्भर ना हो।

1 तीमुथियुस 4:10

किजोकी असी जिंदा परमेश्वर बिच विश्वास करदे इधेरे तांइ असी संघर्ष ते मैहनत करदे ताकि तिस जिन्दगी जो हासिल करी सकण। परमेश्वर असा मणूआं जो छुटकारा दिंदे ते खासतौर पर तिन्हा लोक्कां जो जे तिन्हा बिच विश्वास करदे।

1 तीमुथियुस 5:17

कलीसिया रा कोई भी मुखिया जे अगर अपणा कम्म सही तरिक्के कने करदा तां तिसेरी इज्जत होणा चाएदी खासतौर पर कलीसिया रे से बुजुर्ग मणू जे परमेश्वर रे बसेख जो सिखांदे ते प्रचार करदे।

इब्रानियों 10:36

किजोकी तुसा जो सबर रखणा जरुरी है, ताकि तुसा परमेश्वर री मर्जी जो पूरा करी के, तिन्हा जो खुस करी सको ते तुसा ने तिस ईनाम जो पाणा जिसेरा वादा परमेश्वर ने कित्ते रा है।

इब्रानियों 12:1

जां विश्वास बिच जीणे वाले इन्हा मणूआं री मती सारी गवाहियां जो असी जाणदे, इधेरे तांइ आओ, असी तिन्हा सारी चीजां जो छड्डी दैण, जे असा जो रोकदी, ते उलझाणे वाले जो दुर करी के, सबर कने तिस रस्ते पर बदधे जाण, जिस पर असा जो जाणा चाएदा।

इब्रानियों 13:13

इधेरे तां, आओ, कुर्बानी चढ़ाणे री रीति-रिवाज्‍जां जो छड्डी करी, यीशु रे नेड़े आओ। ते जिय्यां तिन्हा ने बेज्जती सहन कित्ती, तिय्यां ही असी भी बेज्जती जो सहन करण।

इब्रानियों 6:10

किजोकी परमेश्वर हमेसा इंसाफ ही करदे; तिन्हा ने तुसा रे से कम्म नी भुलणे ते ना तुसा रे तिस प्यार जो भुलणा जे तुसा ने तिन्हेरे लोक्कां री मदद करी के दिखाया। ते तिन्हा ने से भी याद रखणा अब्बे जे तुसा तिन्हेरे लोक्कां री मदद करेया करदे हिन।

इब्रानियों 6:15

ते इस तरिक्के कने अब्राहम ने सबर करी के परमेश्वर रे वादे जो हासिल कित्ता।

2 पतरस 1:6

ते ज्ञान पर अप्पु पर काबू रखणा, ते अप्पु पर काबू रखणे पर मजबूती बधांदे रेयो, ते अपणी मजबूती पर भक्ति,

प्रकाशित वाक्य 1:9

मैं यूहन्ना सबर कने तुसा कने तिन्हा जुल्मां जो सहन करणे बिच तुसा रा साथी है जे असा पर मसीह कने रिस्ता होणे री वजह हुंदे, ते मैं परमेश्वर रे राज बिच तुसा रा साथी है। परमेश्वर रा बसेख सुनाणे ते यीशु रे सच्चे वचन रा प्रचार करणे री वजह कने रोमी साम्राज्य रे अधिकारियां ने मेरे जो पतमुस टाप्पु पर भेज्जी दित्ते रा है।

प्रकाशित वाक्य 3:10

इधेरे तांइ तुसा ने सबर कने जुल्मां जो सैह्णे रा मेरा हुकम मन्नेया। तिस वजह कने, मैं तुसा जो परिक्षा रे समय बिच बचाणा। ए परिक्षा रा समय दुनिया रे हर इन्सान री जिन्दगी बिच आणा।