प्रकाशित वाक्य 16:15 - चम्बयाली नौआ नियम

^15-16 ते दुष्टात्मां ते सारे राज्जे ते तिन्हेरे सिपाई इब्रानी भाषा बिच हरमीगिद्दोन नां री जगाह् बिच कठ्ठे होए। इधेरे तांइ मसीह यीशु ने बोल्लेया, “ए गल्ल सुणो, मेरे आणे रा दिन कुसकी चोर रे आणे सांई चाणचक्के ही होणा। धन्न है से मणू जे मेरे आणे रे समय पर अपणे कपड़े तैयार रख्खी करी जागदा रेह्। तां तिन्हा ने नंगे नी रैह्णा ते तिन्हा जो शर्मिंदा होणे तांइ किच्‍छ नी रैह्णा ते आए से फिरी लोक्कां बिच भी चली जाण।”

प्रकाशित वाक्य 16:15 ပူးပေါင်းရင်းမြစ်များ

मत्ती 25:13

इधेरे तांइ चौकन्ने रेयो, किजोकी तुसा ना उस दिन जो जाणदे, ना उस बेल्ले जो जां मैं वापिस हटी करी आणा।”

मत्ती 26:41

जागदे रेयो, ते प्रार्थना करदे रेयो की तुसा परिक्षा बिच ना पेयो: आत्‍मा तां तैयार है, पर सरीर कमजोर है।

मरकुस 14:38

यीशु ने तिन्हा त्रै चेल्‍लेयां जो बोल्लेया, “तुसी मेरी गल्ल मनणा तां चाह्‍ंदे, पर तुसा शारीरिक तौर पर कमजोर हिन। इधेरे तांइ चुकन्ने रेयो ते प्रार्थना करदे रेयो ताकि तुसा परिक्षा बिच ना पेयो।”

लूका 21:36

हर बेल्ले तैयार रेयो, अते प्रार्थना करदे रेयो कि तुसा जो इन्हा सब गल्लां का, जे होणे वाली हिन, तिन्हा का बचणे री ताकत मिली सकें अते भरोसे कने मणू रे पुत्तर, जे मैं ही है रे अग्गे खड़ी सकण।

प्रेरितां रे कम्म 20:31

इधेरे तांइ चुकन्ने रेयो ते याद रख्खो कि मैं तुसा कने त्रै साल रेया ते हर बेल्ले तुसा री फिकर कित्ती ते कदी भी समझाणा नी छड्डेया।

2 कुरुन्थियों 5:3

ताकि जां असी अपणे स्वर्गीय सरीर जो पाई लैण तां असी तिसेरे बगैर ना पाए जाण।

1 थिस्सलुनीकियों 5:4

पर ओ संगी विश्वासियों, तुसा तां इन्हा गल्लां रे बारे बिच अनजाण नी हिन किजोकी तुसा बुराई जदेय न्याहरे बिच नी हिन कि प्रभु रे हटी आणे रा से समय तुसा पर चोर सांई चाणचक्के ही आई पेयो।

1 थिस्सलुनीकियों 5:6

इधेरे तांइ असी दूज्जेयां सांई प्रभु रे आणे रे समय तांइ सोन्दे ते बगैर तयारी रे ना रैह्ण, पर जागदे होए ते चुकन्ने रैह्ण।

1 पतरस 4:7

हर चीज रा अंत नेड़े है। इधेरे तांइ चुकन्ने रेयो ते अपणे मन पर काबू रख्खो ताकि तुसा प्रार्थना करदे रेयो।

2 पतरस 3:10

पर मसीह ने पक्के तौर पर वापिस हटणा। तिन्हा ने कुसकी रे सोच्चे बगैर ही हटणा, जिय्यां कि कोई चोर आंदा। तिस बेल्ले आसमान बिच गर्जणे जदेई अवाज होणी, ते आसमान गायब होई जाणा, सूरत, चाँद, ते सितारे आग्ग कने मुकाई दित्ते जाणे। तिस दिन, परमेश्वर ने से हर इक्क से चीज जाहिर करणी जे लोक्कां ने धरती पर कित्ते री हिन ताकि परमेश्वर तिन्हा का हिसाब-किताब लेई सके।

प्रकाशित वाक्य 22:7

यीशु ने बोल्लेया, सुणो, मैं तौले आणे वाला है! धन्न हिन से मणू जे इस कताब री भविष्यवाणियां जो मनदे।

प्रकाशित वाक्य 3:11

इधेरे तांइ, तुसा जो मेरे पर मजबूती कने विश्वास करदे होए सबर कने जुल्म सहणा जारी रखणा चाएदा, ताकि कोई तुसा जो तुसा रा ईनाम पाणे का ना रोक्की सके।

प्रकाशित वाक्य 3:18

इधेरे तांइ मैं तेरे जो सलाह दिंदा कि तू मेरे का सोन्ना खरीदी लै ताकि तू हकीकत बिच अमीर बणी जाए। तू मेरे का चिट्टे कपड़े भी खरीदी लै ताकि तू लोक्कां सामणे नंगे होणे री कने शर्मसार होणे का बची जाए। तेरे जो अपणी हाख्खियां बिच पाणे तांइ किच्‍छ दवाई भी खरीदी लैणी चाएदी ताकि तू दिख्खी सके।