मरकुस 13:22 - चम्बयाली नौआ नियम

²² किजोकी झूठ्ठे मसीह ते झूठे भविष्यद्वक्ता खड़ी उठणे, अते तिन्हा मती किस्म री निशानियां ते चमत्कार वाले कम्म दखाणे ताकि होई सके तां से चुणे रे लोक्कां जो भी धोखा देई दैण।

मरकुस 13:22 ပူးပေါင်းရင်းမြစ်များ

मत्ती 24:24

किजोकी झूठ्ठे मसीह ते झूठ्ठे भविष्यद्वक्ता खड़ी उठणे, ते बड्डी-बड्डी चीजां ते हैरान करणे वाले चमत्कार दिखाणे कि जे होई सके ते चुणे रे लोक्कां जो भी भड़काई दैण।

मत्ती 7:15

“झूठे भविष्यद्वक्ता का बच्ची रेयो, जे भेड़ां रे भेस अन्दर तुसा का आन्दे, पर अन्दर का से खूंखार भेड़िए सांई हिन।”

मरकुस 13:21

तिस बेल्ले अगर तुसा जो कोई बोल्लो, “दिख्खो, मसीह यीशु इत्ते हिन, या ‘दिख्खो, उत्ते हिन’ तां तिन्हेरा विश्वास मत करदे।”

मरकुस 13:23

पर तुसा चुकन्ने रेयो दिख्खो, मैं तुसा जो सब गल्लां पैल्ले ही बोल्ली रख्खियाँ।

मरकुस 13:6

किजोकी मते जणेया ने मेरा नां लेई करी आणा, ते बोलणा कि, “मैं ही मसीह है” ते मते जणेया जो भटकाई दैणा।

यूहन्ना 4:48

यीशु ने तिसजो बोल्लेया, जिस बेल्ले तक तुसा चमत्कार नी दिख्खी लैणे तिस बेल्ला तक तुसा कदी विश्वास नी करणा कि मैं मसीह है।

2 तीमुथियुस 2:19

तां भी परमेश्वर रे लोक्कां रा विश्वास कुसकी घरे री नीं सांई मजबूत है जे बिल्कुल भी हिलदी नी। तिस नीं पर ए गल्लां लिखित्ते री हिन, “परमेश्वर जाणदे कि तिन्हेरे मणू कुण हिन” ते ए भी “जे मणू परमेश्वर री अराधना करदे तिन्हा जो बुराई करणा छड्डी दैणा चाएदा।”

1 यूहन्ना 2:18

ओ बच्चेयों, मसीह रे हटी आणे रा बेल्ला नेड़े है ते जिय्यां तुसा सुणे रा है कि मसीह यीशु रा विरोधी आणे वाला है, तिसेरे हिसाब कने अब्बे भी मते सारे मसीह यीशु रा विरोध करणे वाले खड़ी गेरे हिन, इस कने असा जो पता चलदा कि ए आखरी समय है।

1 यूहन्ना 2:19

मसीह रा विरोध करणे वाले मणू असा री कलीसिया बिच का निकली करी चली गे, पर से असा रे अपणे नी थिये। किजोकी जे अगर से असा रे अपणे हुंदे तां तिन्हा ने असा कने रैहन्दे, पर से मणू निकली गे जिस कने ए साबित होई गेया कि से सारे कदी असा रे अपणे नी थिये।

1 यूहन्ना 2:26

मैं तुसा जो ए गल्लां तिन्हा गलत शिक्षा देई करी भटकाणे वाले लोक्कां का चुकन्ने रैह्णे तांइ लिख्खे री हिन।

प्रकाशित वाक्य 13:8

धरती रे सारे मणूआं ने तिसेरी अराधना कित्ते री है। जिन्हा लोक्कां रे नां तिस जिन्दगी री कताब बिच दुनिया जो बणाणे रे पैल्ले लिख्खे गेरे हिन, सिर्फ तिन्हा ने ही तिस ड्रोणे जानवर री अराधना नी कित्ती। से जिन्दगी री किताब, तिस “उरणू” री कताब है जिस जो कुर्बान कित्तेया गेया थिया।

प्रकाशित वाक्य 17:8

जे ड्रोणा जानवर तैं अब्बे दिख्खेया, से पैल्ले कदी जिन्दा हुंदा थिया, पर अवे से मरी गे रा है, इनिये पताल का बाहर आणा ते परमेश्वर ने तिसजो हमेसा तांइ मुकाई दैणा। जे मणू धरती पर रेया करदे हिन, जिन्हेरे नां परमेश्वर ने अपणी जिन्दगी री कताब बिच नी लिख्खे रे हिन, तिन्हा लोक्कां ने तिस जानवर जो दिख्खी करी बड़ा हैरान होणा। से कदी जिन्दा हुंदा, पर अवे से मरी गे रा है, पर तिनिये फिरी वापिस आणा।