मरकुस 10:30 - चम्बयाली नौआ नियम

³⁰ इदेय हर कुसकी मणू जो सताव कन्ने कन्ने बदले बिच सौ गुणा घर-बार, भाई-भैण, मां, निके-निके, जमिनां ते आणे वाले दिनां बिच हमेसा री जिन्दगी मिलणी।

मरकुस 10:30 ပူးပေါင်းရင်းမြစ်များ

मत्ती 12:32

अते जे कोई मणू रे पुत्तर, जे मैं ही है रे खिलाफ बिच बोलगा तिसजो माफ कित्तेया जाणा, पर जे कोई पवित्रात्मा रे खिलाफ बिच किच्‍छ बोलगा, तिसेरा ए गुनाह ना तां इस जुग बिच अते ना आणे वाले जुग बिच माफ कित्तेया जाणा।

मत्ती 13:8

पर किच्‍छ ठीक मिट्टी पर पे, अते फल्ल भी लियाये, किच्‍छ सौ गुणा, किच्‍छ साठ्ठ, अते किच्‍छ तीह् गुणा।

मत्ती 6:33

पर पैल्ले तुसा परमेश्वर रे राज ते तिन्हेरी धार्मिकता जो महत्व देयो, तां ए सब चीजा तुसा जो मिली जाणियां।

लूका 18:30

तिसजो इस जुग बिच तां कई गुणा जादा मिलणा ही पर आणे वाले जुग बिच हमेसा री जिन्दगी भी मिलणी।

यूहन्ना 10:23

यीशु मन्दिर बिच सुलैमान रे अंगण बिच घूम्मेया करदे थिये।

प्रेरितां रे कम्म 14:22

ते हर इक्क कस्बे बिच जाई करी चेल्‍ले रे मन जो मजबूत करदे रे ते ए उपदेस दिंदे थिये, कि विश्वास बिच बणे रेयो, ते ए बोलदे थिये कि असा जो बड़े दुख सहन करी के परमेश्वर रे राज बिच पुजणा है।

प्रेरितां रे कम्म 16:25

अद्दी रात्ती रे करीब पौलुस ते सीलास परमेश्वर रे भजन गान्दे ते प्रार्थना करेया करदे थिये, ते दूज्जे कैदी तिन्हा जो सूणेया करदे थिये

प्रेरितां रे कम्म 5:41

से इस गल्ल का खुस होई करी महासभा रे सामणे का चली गे, कि असी यीशु रे नां री बड़ाई होणे रे जोग्गे तां ठैहरे।

रोमियों 5:3

सिर्फ ए ही नी, पर असी ए सोच्ची करी दुख-तकलिफां सहणे बिच भी खुस हिन, कि दुख-तकलीफ सहणे कने सबर बदधा,

रोमियों 6:23

किजोकी पाप री मजदूरी ता मौत है, पर परमेश्वर री दान कने असा जो प्रभु यीशु मसीह रे जरिये हमेसा री जिन्दगी मिलदी।

फिलिप्पियों 3:8

जे अगर मैं मसीह यीशु जो अप्पु जानणे रे मुल री तुलना बाकि चीजां कने करां, तां मैं बाकि सारी चीजां जो बेकार समजदा, ते इसी वजह कने मैं हर तिस चीज जो छड्डी रख्खेया ते मैं तिन्हा चीजां जो कचरा समजदा। ताकि मैं मसीह यीशु रे हुकमां जो जादा ठीक तरिक्के कने मन्नी सकां।

2 थिस्सलुनीकियों 2:16

असी अपणे प्रभु यीशु मसीह ते पिता परमेश्वर का प्रार्थना करदे जे असा कने प्यार करदे ते जिन्हा ने अपणे अनुग्रह रे जरिये असा जो कदी ना मुकणे वाली हिम्मत ते इक्क पक्की आस भी दित्ते री है।

1 तीमुथियुस 4:8

शरीरी कसरत रे ता थोड़े-मते फायदे ता हिन पर आत्मिक कसरत हर तरिक्के कने फायदेमंद है किजोकी ए असा रे अज्ज ते आणे वाले बेल्ले बिच भी हमेसा री जिन्दगी दैणे रा वादा करदी।

1 तीमुथियुस 6:6

पर असा तांइ ए खरा है कि असी से कम्म करिये जिस कने परमेश्वर खुस हुंदे ते तिस बिच संतुष्ट रैह्ण जे परमेश्वर असा जो दिंदे।

याकूब 1:12

धन्न है से मणू, जे परखे जाणे रे बेल्ले टिकी रैहन्दा; किजोकी खरा साबित होणे पर तिसजो हमेसा री जिन्दगी रा से मुकट मिलणा, जिस जो दैणे रा वादा परमेश्वर ने तिन्हा लोक्कां कने कित्ते रा है जे परमेश्वर कने कित्ते रा है।

याकूब 5:11

असी सबर रखणे वाले लोक्कां जो धन्न बोलदे। तुसा अय्यूब नां रे मणू रे सबर रखणे रे बारे बिच तां सुणे रा ही है, ते प्रभु ने आखर तिसजो जे प्रतिफल दित्ता तिसजो तुसा जाणी लित्ते रा कि प्रभु अती करुणामयी ते दयालू हिन।

1 यूहन्ना 2:25

जिसेरा वादा पिता परमेश्वर ने असा कने कित्ते रा थिया से हमेसा री जिन्दगी है।

1 यूहन्ना 3:1

ध्यान देयो कि परमेश्वर पिता ने असा कने कितणा प्यार कित्तेया ताकि असा जो परमेश्वर रे निके-निके बोल्लेया जाई सके अते वाक्केई असी तिन्हेरे बच्चे हिन भी! इधेरे तांइ दुनिया रे मणू असा जो नी जाणदे कि असी परमेश्वर रे बच्चे हिन किजोकी तिन्हा ने परमेश्वर पिता जो भी नी जाणेया।

प्रकाशित वाक्य 2:9

मैं जाणदा कि तेरे पर बड़े जुल्म होए रे हिन ते तू गरीब है। पर आत्मिक गल्लां बिच तू अमीर है। मैं तिन्हा यहूदी मणूआं जो जाणदा जे परमेश्वर रे चुणित्ते रे मणू होणे रा दावा ता करदे पर से हकीकत बिच चुणित्ते रे नी हिन। से तुसा री बुराई करदे ते से शैतान रे गुट रे मणू हिन।

प्रकाशित वाक्य 3:18

इधेरे तांइ मैं तेरे जो सलाह दिंदा कि तू मेरे का सोन्ना खरीदी लै ताकि तू हकीकत बिच अमीर बणी जाए। तू मेरे का चिट्टे कपड़े भी खरीदी लै ताकि तू लोक्कां सामणे नंगे होणे री कने शर्मसार होणे का बची जाए। तेरे जो अपणी हाख्खियां बिच पाणे तांइ किच्‍छ दवाई भी खरीदी लैणी चाएदी ताकि तू दिख्खी सके।