यूहन्ना 6:57 - चम्बयाली नौआ नियम

⁵⁷ जिय्यां जिन्दे पिता ने मेरे जो भेज्जेया ते मैं पिता री वजह कने जिन्दा है, तिय्यां ही से भी जे मेरे जो खाणा, तिनिये भी मेरी वजह कने जिन्दा रैह्णा।

यूहन्ना 6:57 ပူးပေါင်းရင်းမြစ်များ

मत्ती 16:16

शमौन पतरस ने जवाब दित्तेया, तुसा जिंदा परमेश्वर रे पुत्तर मसीह यीशु हिन।

यूहन्ना 14:19

अवे थोड़ी ही देर बाद दुनिया रे लोक्कां ने मेरे जो नी दिख्खणा, पर तुसा ने मेरे जो दिख्खणा, किजोकी मैं जिंदा है, इधेरे तांइ तुसा भी जिंदे रैह्णा।

यूहन्ना 14:6

यीशु ने तिसजो बोल्लेया, रस्ता अते सच्चाई ते जिन्दगी मैं ही है, बगैर मेरे कोई पिता-परमेश्वर का नी पूज्जी सकदा।

यूहन्ना 17:21

कि से सब इक्क होंन, तिय्यां ही जिय्यां, ओ पिता जी, तुसा मेरे बिच हिन अते मैं तुसा रे बिच है, से भी असा बिच का इक्क होंन, ताकि दुनिया रे मणू विश्वास करण कि तुसा ने मेरे जो भेज्जेया है।

यूहन्ना 3:17

परमेश्वर ने अपणे पुत्तर जो दुनिया बिच इस तांइ नी भेज्जेया कि दुनिया रे लोक्कां पर सजा रा हुकम दे, पर इस तांइ कि दुनिया रे मणू तिसेरे जरिए छुटकारा पाए।

यूहन्ना 5:26

किजोकी जिस तरिक्के बाबा अप्पु अन्दर जिन्दगी रखदा तिसी तरिक्के तिसने पुत्तर जो भी ए हक्क दितेरा है कि अप्पु बिच जिन्दगी रखे

यूहन्ना 6:29

यीशु ने तिन्हा जो जवाब दित्ता परमेश्वर तुसा का ए चाह्‍ंदे कि तुसा मणू तिस पर विश्वास करो जिस जो परमेश्वर ने भेज्जे रा है।

यूहन्ना 6:38

किजोकी मैं अपणी मर्जी कने नी, पर अपणे “पिता” री मर्जी पूरी करणे तांइ स्वर्ग का उतरेया।

1 कुरुन्थियों 15:22

ते जिय्यां आदम री वजह कने असा सारेयां पर मौत आई मरदे, तिय्यां ही मसीह यीशु रे कने असा सारेयां जो हमेसा री जिन्दगी मिल्ली।

1 कुरुन्थियों 15:45

पवित्रशास्त्र बिच इय्यां भी लिख्खे रा है, “पैल्ला मणू, मतलब आदम जिन्दा मणू बणेया, ते आखरी आदम, जे मसीह यीशु हिन, हमेसा री जिन्दगी दैणे वाला बणेया।”

2 कुरुन्थियों 13:4

मसीह यीशु सरीर री कमजोरी बिच सुली पर चढाई करी मारे गे, ते अवे परमेश्वर री ताकत रे जरिये जिया करदे हिन, तिस्सी तरिक्के कने असी भी मसीह यीशु सांई सरीर रे तौर पर कमजोर हिन, पर असी परमेश्वर री ताकत कने तुसा रे मामलेयां जो निपटाणे तांइ, मसीह यीशु कने जीणा।

गलातियों 2:20

ए इदेया है कि जां यीशु मसीह सुली पर मरे तिय्यां ही मैं भी मरी गेया ते अवे मैं जिंदा नी रेया, पर मसीह यीशु मेरे बिच जिंदे। अते मैं अवे जे जिंदा है तां सिर्फ तिस विश्वास कने जिंदा है, जे मेरे जो परमेश्वर रे पुत्तर पर है, जिन्हा ने मेरे कने प्यार कित्तेया, अते मेरे तांइ अप्पु जो देई दित्तेया।

1 थिस्सलुनीकियों 1:9

किजोकी मणू अप्पु-मिते गल्लां करदे कि जां असी तुसा का आए थिये तां तुसा ने असी लोक्कां रा कदेया स्वागत कित्तेया थिया अते तुसा मूर्तां री पूजा करणा छड्डी करी जिंदे परमेश्वर रे पास्से किय्यां मुड़े थिये, ताकि तुसा जिंदे अते सच्चे परमेश्वर री सेवा करी सको,

इब्रानियों 9:14

पर मसीह रा बेकसूर खून असा रे विवेक जो असा रे पाप्पां, जे असा री मौत री वजह बणदे, तिन्हा का साफ करदे, ताकि असी जिन्दे परमेश्वर री अराधना करी सकण। किजोकी पवित्रात्मा री ताकत रे जरिये मसीह ने अप्पु जो इक्क सिद्व कुर्बानी रे तौर पर परमेश्वर जो अर्पित करी दित्तेया।

1 यूहन्ना 4:9

जे प्यार परमेश्वर असा कने करदा, से इस कने जाहिर होया कि परमेश्वर ने अपणे इक्को ही इक्क निक्के जो दुनिया अन्दर भेज्जे रा है कि असी तिसेरे जरिए हमेसा री जिन्दगी हासिल करण।