यूहन्ना 6:27 - चम्बयाली नौआ नियम

²⁷ मुकी जाणे वाली रोट्टी तांइ परिश्रम न करो, पर तिस रोट्टी तांइ मैहनत करो जे कि हमेसा री जिन्दगी तक रैह्‍ंदी, जिस जो मणू रा पुत्तर, जे मैं ही है, तुसा जो दिंगा, किजोकी पिता परमेश्वर ने ए करणा रा अधिकार भी दित्ते रा है।

यूहन्ना 6:27 ပူးပေါင်းရင်းမြစ်များ

मत्ती 17:5

से बोल्लेया ही करदा थिया कि दिख्खो, इक्क चमकदे बदल ने तिन्हा जो ढक्की लेया, अते तिस बदल बिच का इक्क अवाज निकली, ए मेरा प्यारा पुत्तर है, जिस का मैं बड़ा खुस है: इसेरी सुणो।

मत्ती 25:46

ते तिन्हा पुठ्ठे पास्से वाले बुरे लोक्कां ने हमेसा बलणे वाली आग्ग बिच सजा भुगतणी पर, धार्मिक सीद्दे पास्से वाले लोक्कां ने हमेसा री जिन्दगी बिच चली जाणा।

मत्ती 3:17

अते दिख्खो, स्वर्ग बिच का ए अवाज आई कि ए मेरा प्यारा पुत्तर है, “जिस का मैं बड़ा-वरी खुस है।”

मत्ती 6:19

“अपणे तांइ दुनिया पर धन-दौलत मत कठेरो, जित्ते कीड़ा लग्गी जान्दा ते जांग कने खराब होई जांदी अते जित्ते चोर सेंध लाई करी चोरी लिन्दे।”

मत्ती 8:20

यीशु ने तिसजो बोल्लेया, “लोमड़ी री खोह अते आसमान रे चिड़ू-पखेरुआं रे घोंसले हुन्दे हिन पर मणू रे पुत्तर का, जे मैं ही है का रैह्णे तांइ अपणी कोई जगाह् नी है।”

मरकुस 1:11

ते ए स्वर्ग बिच का ए अवाज आई, “तू मेरा प्यारा पुत्तर है, तेरे का मैं खुस है।”

मरकुस 9:7

तां इक्क बदल ने तिन्हा जो घेरी लेया, ते परमेश्वर री अवाज आई, “ए मेरा प्यारा पुत्तर है। इसेरी सुणो।”

लूका 3:22

ते पवित्रात्मा इक्क कबूतर रे रुप बिच यीशु पर उतरेया ते स्वर्ग बिच का ए अवाज आई, तू मेरा प्यारा पुत्तर है, अते मैं तेरे का खुस है।

लूका 9:35

ते से बद्दल रे अन्दर ही थिये, कि तिस बदलां बिच का अवाज आई, कि ए मेरा पुत्तर है, जिस जो मैं चुणे रा है, इसेरी सूणेया करो

यूहन्ना 10:28

ते मैं तिन्हा जो हमेसा री जिन्दगी दिंदा, से कदी भी बर्बाद नी होणी, ते कोई तिन्हा जो मेरे हथ का नी खुस्सि सकदा।

यूहन्ना 11:42

मैं जाणदा थिया कि तू हमेसा मेरी सूणदा, पर जै भीड़ नेड़े-तेड़े खड़िती री है, उनहेरि वजह कने मैं ए जादा जोरे बोल्लेया कि जिस कने ए विश्वास करण कि तैं मेरे जो भेज्जे रा है,

यूहन्ना 14:6

यीशु ने तिसजो बोल्लेया, रस्ता अते सच्चाई ते जिन्दगी मैं ही है, बगैर मेरे कोई पिता-परमेश्वर का नी पूज्जी सकदा।

यूहन्ना 15:24

जे मैं तिन्हेरे बिच से चिन्हा-चमत्कार नी दसदा, जे कुसकी ने भी नी कित्ते, तां से पाप रे कसुरवार नी हुन्दे, पर अवे जां से दिख्खी चुके रे हिन तां भी मेरे कने अते मेरे पिता दोन्नां का नफरत करदे हिन।

यूहन्ना 17:2

किजोकी तुसा ने अपणे पुत्तर जो पूरी मणू जाति पर हक दित्ते रा है कि से, हर इक्क जो, जिन्हा जो तुसा ने तिसजो दित्ते रा है, हमेसा री जिन्दगी देयो।

यूहन्ना 3:15

तां कि जे कोई तिस पर विश्वास करे से हमेसा री जिन्दगी पाए।

यूहन्ना 3:33

पर जिनिए तिसेरी गवाई मन्नी लेई, तिनिए इस गल्ल पर छाप लगाई दित्ती कि परमेश्वर सच्चे हिन।

यूहन्ना 6:40

किजोकी मेरे “पिता” री इच्छा ए है कि जे कोई पुत्तर जो दिख्खे, कने तिस पर विश्वास रखे, से हमेसा री जिन्दगी पाये कने मैं तिसजो आखरी दिन फिरी जिन्दा करणा।

यूहन्ना 6:47

मैं तुसा जो सच-सच बोलदा, कि जे कोई विश्वास करदा, हमेसा री जिन्दगी तिसेरी ही है।

यूहन्ना 6:51

हमेसा री जिन्दगी री रोट्टी, जे स्वर्ग का उतरे री है, से मैं है, जे कोई इस रोट्टी जो खान्दा, तिनिये हमेसा तांइ जिन्दा रैह्णा ते जे रोट्टी मैं दुनिया रे लोक्कां जो जिन्दगी तांइ दैणी, से मेरा सरीर है।

यूहन्ना 6:53

यीशु ने तिन्हा जो बोल्लेया मैं तुसा जो सच-सच बोलदा जां तांइ मणू रे पुत्तर, जे मैं ही है रा सरीर नी खांगे, कने तिसेरा खून नी पींगे, तुसा बिच जिन्दगी नी है।

यूहन्ना 6:54

जे कोई मेरा सरीर खान्दा, कने मेरा खून पीन्दा, हमेसा री जिन्दगी तिसेरी है, कने मैं अन्त रे दिना फिरी तिसजो जिन्दा करणा।

यूहन्ना 6:58

जेड़ी रोट्टी स्वर्ग का उतरी, ए ही है, से तिस रोटी सांई नी जिस जो बाब्बे-दाद्दे ने खाया ते मरी गे, जे कोई ए रोट्टी खांगा, से हमेसा जिन्दा रैहन्गा।

यूहन्ना 6:62

पर जे तुसा मणू रे पुत्तर, जे मैं ही है जो जित्ते से पैल्ले थिया, उत्ते का उप्पर जांदे दिखगे, तां कै हुगां?

यूहन्ना 6:68

शमौन पतरस ने तिसजो जवाब दिता, ओ प्रभु, असी कुसका जाईए? तुसा का हमेसा री जिन्दगी रे वचन हिन।

यूहन्ना 8:18

इक्क ते मैं अप्पु अपणी गवाई दिन्दां, हाँ, कने दुजा बाबा मेरी गवाई दिन्दा हैं जिन्हा ने मेरे जो भेज्जे रा है।

प्रेरितां रे कम्म 10:38

परमेश्वर ने कुस तरिक्के कने नासरत कस्बे रे यीशु, जो पवित्रात्मा ते ताकत कने अभिषेक कित्तेया: से भलाई रे कम्म करदे, ते सारेयां जो जे शैतान रे सताए रे थिये, जाई-जाई करी ठीक करदे रे, किजोकी परमेश्वर तिन्हा कने थिये।

प्रेरितां रे कम्म 2:22

ओ इस्राएलियों, ए गल्लां सुणो: नासरत कस्बे रे यीशु, इक्क मणू थिये जिन्हेरा परमेश्वर रे पास्से का होणे रा सबूत तिन्हा चिन्ह-चमत्कारां, अनौखे कम्मां ते चमत्कारी चिन्ह कने अप्पु जो साबित कित्ता, जे परमेश्वर ने तुसा मझाटे तिन्हेरे का करी दिखाए, जिन्हेरे जो तुसा अप्पु ही जाणदे।

रोमियों 4:11

परमेश्वर ने पैल्ले ही अब्राहम जो धार्मिक ठैहराई करी अपणाई लित्तेया थिया, जां हल्ले तिन्हेरा खतना भी नी होए रा थिया। खतने रा निसान परमेश्वर द्वारा अपणाए जाणे री निशानी है। इधेरे तांइ अब्राहम तिन्हा लोक्कां रे आत्मिक पुरखे हिन जिन्हेरा खतना ता नी होए रा है पर तिन्हा जो परमेश्वर बिच विश्वास है। से मणू अपणे विश्वास रे जरिए धार्मिक बणाए गेरे हिन।

रोमियों 6:23

किजोकी पाप री मजदूरी ता मौत है, पर परमेश्वर री दान कने असा जो प्रभु यीशु मसीह रे जरिये हमेसा री जिन्दगी मिलदी।

1 कुरुन्थियों 6:13

तुसा मणू बोलदे कि रोट्टी पेट तांइ जरुरी है ते पेट रोट्टी तांइ जरुरी। ए गल्ल सही ता है पर इक्क दिन परमेश्वर ने इन्हा दोन्नां जो मुकाई दैणा। पर कोई भी मणू ए नी बोल्ली सकदा कि असा रे सरीर व्यभिचार तांइ बणे रे हिन। असा रे सरीर प्रभु रे हिन ते असा जो अपणे शरीरां जो प्रभु री इच्छा पूरी करणे तांइ इस्तेमाल करणा चाएदा।

1 कुरुन्थियों 9:2

जे अगर दूज्जे मणू मेरे जो प्रेरित नी मनदे, तां भी मैं तुसा तांइ प्रभु यीशु रा प्रेरित ही है, किजोकी मैं ही तुसा जो सुब बसेख सुणाया थिया ते प्रभु बिच तुसा रा विश्वास मेरे प्रेरित होणे रे सबूत हिन।

2 कुरुन्थियों 4:18

अते असा तां दिख्खी री चीजां जो नी पर अण-दिख्खी चीजां जो दिखदे रैह्‍न्दे, किजोकी दिख्खी री चीजां थोड़े ही रोज री हिन, पर अणदिख्खी चीजां हमेसा बणी रेह्न्दी।

गलातियों 5:6

जां असी मसीह यीशु बिच विश्वास करणा सुरु करी दिंदे तां यहूदी या गैर यहूदी होणे रा कोई फरक नी रैहन्दा। पर जरुरी गल्ल ए है कि असी मसीह बिच विश्वास करदे ते तिस वजह कने परमेश्वर ते बाकि मणू प्यार रखदे।

फिलिप्पियों 2:13

किजोकी परमेश्वर तुसा बिच कम्म करेया करदे हिन, ते तुसा जो इच्छा ते ताकत देया करदे हिन ताकि तुसा से कम्म करो जिस कने से खुस हुंदे।

कुलुस्सियों 1:29

इधेरे तांइ मैं मसीह री ताकत पर, जे मेरे अंदर कम्म करदी, निर्भर होई करी कड़ी मैहनत करदा।

कुलुस्सियों 2:22

लोक्कां री ए सारी रीति-रीवाज ते शिक्षां बेकार हिन, किजोकी ए मणूआं रे हुकमां ते शिक्षा पर आधारित है।

कुलुस्सियों 3:2

दुनिया री चीजां पर नी, पर स्वर्ग री चीजां पर ध्यान लांदे रेयो।

1 थिस्सलुनीकियों 1:3

जां असी पिता परमेश्वर का प्रार्थना करदे तां असी तुसा लोक्कां रे विश्वास रे हिसाब रे कम्मां जो, ते विश्वासी लोक्कां तांइ तुसा रे प्यार भरे कम्मां जो, ते मसीह यीशु रे हटणे री आस बिच मुसीबतां रे दौरान तुसा रे सबर रखणे जो भी याद करदे।

2 तीमुथियुस 2:19

तां भी परमेश्वर रे लोक्कां रा विश्वास कुसकी घरे री नीं सांई मजबूत है जे बिल्कुल भी हिलदी नी। तिस नीं पर ए गल्लां लिखित्ते री हिन, “परमेश्वर जाणदे कि तिन्हेरे मणू कुण हिन” ते ए भी “जे मणू परमेश्वर री अराधना करदे तिन्हा जो बुराई करणा छड्डी दैणा चाएदा।”

इब्रानियों 12:16

तुसा बिच कोई मणू इदेया ना हो जे व्यभिचारी, या अब्राहम रे पोत्ते एसाव सांई अधर्मी हो, जिनिये इक्क वरी री रोट्टी रे बदले अपणे पैल्ले मुडें होणे रे औहदे जो बेच्ची दित्तेया थिया।

इब्रानियों 4:11

इधेरे तांइ असी भी तिस अराम री जगाह् बिच जाणे तांइ हर कोसीस करदे रैह्ण, कुसकी जो भी तिन्हा लोक्कां सांई नी चलणा चाएदा जिन्हा ने परमेश्वर रे हुकमां री ना-फरमानी कित्ती। तां असा ने अराम री जगाह् बिच जाणा।

याकूब 1:11

जिय्यां सूरज उगदे कने ही कड़ी धूप्प पैंदी ते घा जो सुखाई दिंदी, ते तिसेरा फूल्ल झड़ी जादां, ते तिसेरी खूबसुरती मिटी जांदी; तिय्यां ही अमीर मणू ने अपणे कम्मां जो करणे बिच ही मुकी जाणा।

1 पतरस 1:24

पवित्रशास्त्र बिच ए लिख्खे रा है, “सारे मणू घा सांई हिन ते तिन्हेरी खूबसुरती जंगली फूल्ल सांई है। घा ने सुकी जाणा ते फूल्ल ने झड़ी जाणा,

2 पतरस 1:17

असी तिस बेल्ले मसीह यीशु कने तिस पवित्र पहाड़ पर थिये जां पिता परमेश्वर ने तिन्हा जो आदरमान ते महिमा दित्ती थी। तां परमेश्वर, जे अप्पु महिमामय हिन, तिन्हा रे पास्से का ए अवाज आई, “ए मेरा प्यारा मुंडा है, जिस कने मैं बड़ा वरी खुस है!” असा ने अप्पु ए अवाज स्वर्ग का आंदी होई सूणी।