यूहन्ना 5:42 - चम्बयाली नौआ नियम

⁴² पर मैं जाणदा कि तुसा परमेश्वर जो दिल कने प्यार नी करदे।

यूहन्ना 5:42 ပူးပေါင်းရင်းမြစ်များ

लूका 16:15

यीशु ने तिन्हा जो बोल्लेया, तुसा जे मणूआं जो ए जताणा चाह्‍ंदे कि तुसा बड़े सही हिन, पर परमेश्वर तां तुसा रे मनां जो भी जाणदे। दुनिया जिस गल्ल रा बड़ा आदर करदी, से गल्ल परमेश्वर री नजरां अन्दर घटिया हिन।

यूहन्ना 2:25

कने तिसजो कोई जरुरत नी थी कि से मणूआं रे बारे बिच कोई गवाई दे किजोकी से अप्पु ही जाणदा थिया कि मणूआं रे मना बिच कै है।

यूहन्ना 21:17

तिन्हा ने तिज्जी वरी तिसजो बोल्लेया, ओ शमौन, यूहन्ना रे पुत्तर, कै तू मेरे कने प्यार रखदा? पतरस उदास होई गेया कि यीशु ने तिसका तिज्जी वरी इय्यां बोल्लेया कि, कै तू मेरे कने प्यार रखदा? अते तिसने बोल्लेया, ओ प्रभु जी, तुसा तां सब किच्‍छ जाणदे तुसा जाणदे हिन कि मैं तुसा कने प्यार रखदा यीशु ने तिसजो बोल्लेया, मेरी शिक्षा जो मनणे वाले लोक्कां जो भेड़ां सांई चरा।

यूहन्ना 5:41

मैं मणूआं का बड़ाई नी चाहन्दा।

यूहन्ना 5:43

“पिता” ने मेरे जो अधिकार देई करी तुसा का भेज्जे रा है, ते तुसा मेरे जो नी अपणांदे, पर जे अगर होर कोई अपणे ही अधिकार कने आए तां तिसजो अपणाई लिंदे।

यूहन्ना 5:44

तुसा इक्क-दुजे का बड़ाई चाह्‍ंदे, कने से बड़ाई जे इक्क मात्र परमेश्वर रे पासे का है, नी चाहंदे, कुस तरिक्के कने मेरा विश्वास करी सकगे?

यूहन्ना 8:42

यीशु ने तिन्हा जो बोल्लेय, जे परमेश्वर तुसा रा प्यो हुदां, तां तुसा मेरे कने प्यार करदे, किजोकी मैं परमेश्वर रे पास्से का आए रा है, मैं अप्पु नी आया, पर तिनहा ने ही मेरे जो भेज्जेया।

यूहन्ना 8:47

जे परमेश्वर रे पास्से का हुदां, से परमेश्वर री गल्लां जो सूणदा, ते तुसा इस तांइ नी सूणदे किजोकी परमेश्वर रे पास्से का नी हिन।

यूहन्ना 8:55

तुसा तां तिन्हा जो नी जाणदे: पर मैं तिन्हा जो जाणदा, पर जे अगर मैं बोल्लां कि मैं तिन्हा जो नी जाणदा, तां मैं तुसा सांई झूठ्ठा ठैहरणा, पर मैं तिन्हा जो जाणदा ते तिन्हेरी शिक्षा जो मनदा।

रोमियों 8:7

किजोकी पाप रे स्वभाव रे काबू बिच रैह्णा ता परमेश्वर कने दुश्मणी रखणा है, किजोकी पाप रा स्वभाव ना परमेश्वर रे कानून रे हेठ है, ते ना ही होई सकदा।

1 यूहन्ना 2:15

तुसा ना तां दुनिया कने, ते ना तां दुनिया री चीजां कने प्यार रखो, जे कोई दुनिया कने प्यार रखदा तां से पिता परमेश्वर कने प्यार नी करदे।

1 यूहन्ना 3:17

पर जिस का इस दुनिया री धन-दौलत है अते से अपणे संगी विश्वासियां जो जरुरत रे बेल्ले तिस पर दया नी करदा, तां तिस बिच परमेश्वर रा प्यार नी है।

1 यूहन्ना 4:20

अगर कोई बोल्ले कि, मैं परमेश्वर कने प्यार रखदा पर अपणे संगी विश्वासी कने प्यार ना रख्खो, तां से झूठा है किजोकी जे अपणे संगी विश्वासी कने जिस जो तिनिए दिख्खे रा है, प्यार नी रखदा तां से परमेश्वर कने भी जिस जो तिनिए नी दिख्खेया, प्यार नी रख्खी सकदा।

प्रकाशित वाक्य 2:23

मैं तिन्हा लोक्कां जो मारी रखणा जे तिसेरी सीख पर चलदे, ते इस कने सारी कलीसिया रे मणूआं ने जाणी जाणा कि मैं इन्सान री सोच ते मकसद री छानबीन करदा। मैं तुसा बिच का हर इक्क जणे जो तिन्हेरे कम्मां रे हिसाब कने ईनाम दैणा।