यूहन्ना 5:25 - चम्बयाली नौआ नियम

²⁵ ते मैं तुसा जो सच-सच बोलदा कि से बेल्ला आया करदा है बल्कि अब्बे ही है कि जां मरे रे लोक्कां ने मेरी यानी परमेश्वर रे पुत्तर री अवाज जो सुनणा अते जिन्ने जणेया ने सुनणा तिन्हा ने हमेसा तिकर जीणा।

यूहन्ना 5:25 ပူးပေါင်းရင်းမြစ်များ

लूका 15:24

किजोकी मेरे जो लग्गेया थिया कि मेरा हल्का निक्का मरी गे रा थिया पर ए जिन्दा है, ए गुआच्ची गे रा थिया, पर अवे वापिस मिली गे रा है। ते फिरी से खुसियां मनाणा लग्गी पे

लूका 15:32

पर अज्ज असा जो तेरे हल्के भ्याल रे हटी आणे री खुसी मनाणा चाएदी किजोकी असा जो लग्गेया थिया कि तेरा हल्का भाई मरी गे रा होणा पर ए जिन्दा है, ए गुआच्ची गे रा थिया, पर अवे वापिस मिली गे रा है।

लूका 9:60

यीशु ने तिसजो बोल्लेया, मरणे वालेयां जो अपणे मुर्दे दबणा दे, किजोकी परमेश्वर रा वचन सब मणूआं तांइ है, इधेरे तांइ तेरा फर्ज ए है कि तू मणूआं जो परमेश्वर रे राज करणे रे बारे अन्दर दस्स

यूहन्ना 13:1

फसह रे त्याहार का पैल्ले, जां यीशु ने जाणी लेया कि मेरा से बेल्ला आई गेया कि दुनिया जो छड्डी करी पिता का हटी जां। यीशु अपणी सेवकाई री सुरुआत का लेई आखर तिकर अपणे चेल्‍लेयां कने बड़ा प्यार करदे थिये।

यूहन्ना 17:1

जां यीशु अपणे चेल्‍लेयां जो ए गल्लां बोल्ली बैठ्ठे, तां तिन्हा ने उप्पर आसमान पास्से दिख्खी करी बोल्लेया, ओ पिता, से बेल्ला आई रेया, अपणे पुत्तर री बड़ाई कर ताकि पुत्तर भी तुसा री बड़ाई करे।

यूहन्ना 4:21

यीशु ने तिसजो बोल्लेया, ओ जनानी मेरी गल्ल रा विश्वास कर कि से बेल्ला आंदा है कि न तां तुसा इस पहाड पर बाबे री भक्ति करणी ना ही यरुशलेम बिच

यूहन्ना 4:23

पर से बेल्ला आणे वाला है हालांकि अब्बे भी है जिस बिच सच्चे भक्त बाबे री भक्ति आत्‍मा कने सच्चाई कने करणी किजोकी बाबा अपणे तांइ इदेए भक्तां जो तोपदा

यूहन्ना 5:21

जिय्यां पिता, मरे रे लोक्कां जो जिन्दा करदे, तिय्यां ही पुत्तर भी जिन्हा जो चाह्‍ंदा तिन्हा जो फिरी जिन्दा करदा।

यूहन्ना 5:28

इस बिच हैरान मत हो, किजोकी से वक्त आया करदा है कि मरे रे लोक्कां ने तिन्हेरी अवाज सुणी करी वापिस जिन्दे होई जाणा ते अपणी कब्रां का बाहर निकली आणा।

यूहन्ना 6:60

तिसेरे दूए चेल्‍ले बिच मत्ते जणे ने ए सुणी करी बोल्ले, कि ए गल्ल तां मनणे तांइ मुस्किल है ते इसजो कुण सुणी सकदा?

यूहन्ना 8:43

तुसा मेरी गल्ल किजो नी समजदे? इस तांइ किजोकी तुसा मेरा शिक्षा जो सुणी नी सकदे।

यूहन्ना 8:47

जे परमेश्वर रे पास्से का हुदां, से परमेश्वर री गल्लां जो सूणदा, ते तुसा इस तांइ नी सूणदे किजोकी परमेश्वर रे पास्से का नी हिन।

यूहन्ना 9:27

तिनिए तिन्हा जो बोल्लेया, मैं तां तुसा जो बोल्ली चुके रा है ते तुसा ने सूणेया नी अवे दुई वरी किजो सुनणा चाह्‍ंदे? कै तुसा भी तिन्हेरे चेल्‍ले बणना चाह्‍ंदे?

रोमियों 6:4

जां असा ने बपतिस्मा लित्तेया, तां ए इदेया थिया कि जिय्यां असी मसीह यीशु कने मरी गे, ते तिन्हा कने दब्बी दित्ते गे, ते जिय्यां पिता परमेश्वर री अनौखी महिमा ने मसीह यीशु जो जिन्दा कित्ता, तिय्यां ही असी भी तिन्हेरे सांई नौई जिन्दगी जीण।

इफिसियों 2:1

पैल्ले-पैल्ले तुसा बिच परमेश्वर रे पास्से का कोई नौई जिन्दगी नी थी, किजोकी तुसा अपणे पाप ते गलत कम्मां री वजह कने मरे रे मणूआं सांई थिये।

इफिसियों 5:14

इधेरे तांइ ए बोल्लेया जांदा, “ओ सोणे वाले मणू, जाग, ते मुर्देयां बिच का जिन्दा होई जा! मसीह ने तुसा पर अपणी रौसनी चमकाणी।”

कुलुस्सियों 2:13

तुसा अपणे पाप्पां ते पापी स्वभाव री वजह कने इक्क मुर्दे मणू सांई थिये, ते अपणे पापी स्वभाव का हल्ले कट्टे नी गे थिये। तां परमेश्वर ने तुसा जो मसीह यीशु कने फिरी जिन्दा कित्ता, ते तिन्हा ने असा रे सारे पाप माफ करी दित्ते।

प्रकाशित वाक्य 3:1

तिनिये मेरे जो बोल्लेया, “सरदीस सहर रे कलीसिया रे स्वर्गदूत जो ए चीठ्ठी लिख्ख, मैं अपणे सज्जे हत्थ बिच सत्त तारेयां जो थाम्मि करी रख्खे रा है, ते मैं ही तिन्हा सत्त दियां रे धूपदान रे बिच-मझाट्टे घूमदा-फिरदा। मैं तुसा जो ए बोलदा, मैं तेरे कम्मां जो जाणदा। दिखणे बिच ता तू मेरा भरोस्सेमंद विश्वासी लगदा पर अवे तू मेरे कहे मुताबिक नी चलदा।