यूहन्ना 5:19 - चम्बयाली नौआ नियम

¹⁹ इस पर यीशु ने तिन्हा जो बोल्लेया, मैं तुसा जो सच-सच बोलदा, पुत्तर अपणी मर्जी कने किच्‍छ नी करी सकदा, पर सिर्फ से ही, जे परमेश्वर पिता जो करदे दिखदा, किजोकी जिन्हा-जिन्हा कम्मां जो “पिता” करदा, तिसजो पुत्तर भी तिसी तरिक्के करदा।

यूहन्ना 5:19 ပူးပေါင်းရင်းမြစ်များ

मत्ती 26:39

फिरी से थोड़ा होर अग्गे बधी करी मुँह रे भारे पेय, ते प्रार्थना कित्ती, ओ मेरे पिता जे होई सके तां ए कटोरा मेरे का टली जाए तां भी जिय्यां मैं चाह्‍ंदा तिय्यां नी पर जिय्यां तुसा चाह्‍ंदे तिय्यां ही हो।

लूका 21:15

किजोकी मैं तुसा जो इदेइ जुबान ते समझ दैणी कि तुसा रे दुश्मण तुसा री गल्ल नी कटी सकगे ते ना तुसा रा सामणा करी सकगे।

यूहन्ना 10:18

कोई मेरी जिन्दगी मेरे का खुस्सेया नी है करदा, बल्कि मैं अप्पु ही अपणी जिन्दगी दिंदा, मेरे जो अपणी जिन्दगी दैणे रा भी हक्क है, ते तिसजो फिरी लेई लैणे रा भी हक्क है: ए हुकम मेरे जो मेरे पिता-परमेश्वर का मिल्ले रा है।

यूहन्ना 12:49

किजोकी मैं अपणे पास्से का गल्लां नी कित्ती पर पिता जिनिये मेरे जो भेज्जे रा है, उन्ने ही मेरे जो हुकम दित्तेया कि क्‍या-क्‍या बोलणा?

यूहन्ना 12:50

ते मैं जाणदा कि तिन्हेरे हुकम हमेसा री जिन्दगी रे रस्ते पर लेई चलदे, इस तांइ मैं जे किच्‍छ भी बोलदा से ही बोलदा जैसा पिता मेरे जो बोलदे।

यूहन्ना 14:10

कै तू विश्वास नी करदा कि मैं पिता बिच है ते पिता मेरे बिच हिन? ए गल्लां जे मैं तुसा कने बोल्लेया करदा है, अपणे पास्से का नी है बोल्लेया करदा, बल्कि पिता मेरे बिच रही करी अपणा कम्म करेया करदे हिन।

यूहन्ना 2:19

यीशु ने तिन्हा जो जवाब दित्ता इस मन्दिर जो ढाई देयो ते मैं इसजो तीन्न दिना बिच खड़ा करी दिंगा।

यूहन्ना 3:3

यीशु ने तिसजो जवाब दित्ता मैं तुसा कने सच्ची-सच्ची बोलदा जे अगर कोई नौए सिरे का नी जम्मे तां परमेश्वर रे राज जो नी दिख्खी सकदा।

यूहन्ना 5:21

जिय्यां पिता, मरे रे लोक्कां जो जिन्दा करदे, तिय्यां ही पुत्तर भी जिन्हा जो चाह्‍ंदा तिन्हा जो फिरी जिन्दा करदा।

यूहन्ना 6:38

किजोकी मैं अपणी मर्जी कने नी, पर अपणे “पिता” री मर्जी पूरी करणे तांइ स्वर्ग का उतरेया।

यूहन्ना 8:28

तां यीशु ने बोल्लेया, कि जां तुसा मणू रे पुत्तर, जो ऊचें पर चढ़ांगे, तां जाणगें कि मैं से ही हैं, ते मैं अपणे आप का किच्‍छ नी करदा, पर पिता मेरे जो जिय्यां सिखान्दा, से ही गल्लां मैं बोलदा।

यूहन्ना 9:4

जिनिए मेरे जो भेज्जे रा है, असा जो तिन्हेरा कम्म दिन रैहन्दे ही करणा जरुरी है।

प्रेरितां रे कम्म 2:24

पर तिन्हा ही जो परमेश्वर ने मौत रे बधंन का छुड़ाई करी जिन्दा करी दित्ता, किजोकी ए नामुमकिन थिया कि से तिसेरे वस बिच रैहन्दे,

रोमियों 6:4

जां असा ने बपतिस्मा लित्तेया, तां ए इदेया थिया कि जिय्यां असी मसीह यीशु कने मरी गे, ते तिन्हा कने दब्बी दित्ते गे, ते जिय्यां पिता परमेश्वर री अनौखी महिमा ने मसीह यीशु जो जिन्दा कित्ता, तिय्यां ही असी भी तिन्हेरे सांई नौई जिन्दगी जीण।

रोमियों 8:11

पवित्रात्मा तुसा बिच रैहन्दा जिन्हा ने मसीह यीशु जो मुर्देयां बिच का जिन्दा कित्ता। ते जिय्यां परमेश्वर ने मसीह यीशु जो मुर्देयां बिच का जिन्दा कित्ता, तिय्यां ही तुसा जो भी तिस्सी पवित्रात्मा रे जरिये मुर्देया बिच का जिन्दा करणा जे तुसा बिच रैहन्दा।

1 कुरुन्थियों 15:12

इधेरे तांइ अवे मैं तुसा का पूच्छदा कि जां असा सारेयां ने तुसा बिच ए ही प्रचार कित्ते रा है कि मसीह यीशु मरे रे लोक्कां बिच का फिरी जिन्दे होई गे, तां तुसा बिच का किन्ने कियां बोलदे कि मुर्दे लोक्कां रा जिन्दा होणा है ही नी?

2 कुरुन्थियों 4:14

अते ए जाणदे कि जिनिये प्रभु यीशु जो मरे रे लोक्कां बिच का जिंदा कित्तेया, तिन्हा ने ही असा जो भी तिय्यां ही जिंदा करणा, ते परमेश्वर ने असा जो तुसा कने कठ्ठे करी के लेई आणा ते असी तिन्हेरी मौजुदगी बिच हाजिर रैह्ण।

2 कुरुन्थियों 5:10

किजोकी जरुरी है असा सारेयां रा हाल मसीह यीशु रे असा रा हिसाब-किताब करदे बेल्ले खुली जाए, की हर इक्क मणू अपणे भले-बुरें कम्मां रा बदला पाए जे तिन्हा ने सरीर रे जरिए कित्ते होण।

इफिसियों 3:16

मैं ए प्रार्थना करदा कि से तुसा जो अपणी असीमित महिमा रे जरिये तुसा जो ए दान दैण ताकि तुसा अपणे अंदरूनी मनुष्यत्व बिच ताकत पाई करी मजबूत हुंदे जाओ।

फिलिप्पियों 3:21

तिन्हा ने अपणी तिस्सी ताकत कने जिस कने तिन्हा ने हर चीज पर अपणा काबू करी लैणा, असा रे कमजोर इन्सानी शरीरां जो बदली करी तिन्हा जो अपणे महिमामय सरीर सांई बणाई दैणा।

फिलिप्पियों 4:13

मसीह मेरे जो ताकत दिंदा ते तिस बिच मैं सब किच्‍छ करी सकदा।

कुलुस्सियों 1:11

मैं प्रार्थना करदा कि परमेश्वर री महिमा री ताकत रे मुताबक, हर किस्मे री ताकत कने मजबूत हुन्दे जाओ, ताकि तुसा बड़े सबर कने ते खुसी-खुसी अपणी हर मुसीबत जो सहन करी लेयो।

कुलुस्सियों 1:16

किजोकी तिन्हेरे जरिये ही परमेश्वर ने आसमान ते धरती बिच हर इक्क चीज जो बणाया, चाए से दिख्खे री होण या अणदिख्खी, चाए सिंहासन, चाए मालक, चाए प्रधानतां, चाए हक, सारी चीजां तिन्हेरे ही जरिए बणाई गयी ताकि हर इक्क चीज तिन्हेरी बड़ाई करे।

1 थिस्सलुनीकियों 4:14

किजोकी असी विश्वासी जाणदे कि ए गल्ल सच है कि यीशु मरे ते फिरी जिन्दे होई गे तिय्यां ही परमेश्वर ने तिन्हा विश्वासी जो भी फिरी जिन्दा करणा जे मरी गेरे हिन ते तिन्हा जो यीशु कने वापिस हटाई लाणा।

1 पतरस 3:18

मैं ए इधेरे तांइ बोल्लेया करदा है किजोकी मसीह ने असा रे पाप्पां रे बदले जुल्म सैह्‍ण कित्तेया ते मारे गे। से इक्क ही वरी मरे ते तिय्यां दुबारा करणे री जरुरत नी है। से अप्पु धार्मिक थिये जिन्हा असा जो परमेश्वर रे नेड़े अणने तांइ असी पाप्पी लोक्कां तांइ अपणी जान देई दित्ती। लोक्कां ने तिन्हेरे सरीर जो मारी छड्डेया पर तिन्हेरी आत्‍मा हल्ले भी जिया करदी है।

प्रकाशित वाक्य 2:23

मैं तिन्हा लोक्कां जो मारी रखणा जे तिसेरी सीख पर चलदे, ते इस कने सारी कलीसिया रे मणूआं ने जाणी जाणा कि मैं इन्सान री सोच ते मकसद री छानबीन करदा। मैं तुसा बिच का हर इक्क जणे जो तिन्हेरे कम्मां रे हिसाब कने ईनाम दैणा।