यूहन्ना 20:19 - चम्बयाली नौआ नियम

¹⁹ उसी रोज संझा बेल्ले, जे हफ्ते रा पैल्ला रोज थिया, उन्हेरे चेल्‍लेयां ने यहूदियां रे डर रे मारे दरवाज्जे बांद्द कित्ते रे थिये, उस्सी बेल्ले यीशु आई करी तिन्हेरे मंझाटे खड़े होई गे, अते तिन्हा जो बोल्लेया, तुसा जो सांती मिल्लो।

यूहन्ना 20:19 ပူးပေါင်းရင်းမြစ်များ

मत्ती 10:13

जे से घर लायक होया तां तुसा री आशीष तिन्हा पर बणी रेह्णी, पर जे नी हुन्गा तां सांती री तुसा री आशीष तुसा रे का हटी आणी।

मत्ती 18:20

किजोकी जित्ते मेरे पर विश्वास करणे दो या त्रै मणू मेरे नां कने इकट्ठा हुन्गे, तिन्हेरे मैं बिच मझाटे होणा।

मरकुस 16:14

बाद बिच, यीशु अपणे बाकि रे ग्यारह चेल्‍लेयां जो भी दिस्से जां से रोट्टी खाया करदे थिये। से चेल्‍लेयां जो बकणा लग्गे किजोकी तिन्हा ने अपणी ढिठाई ते विश्वास री कमी री वजह कने तिन्हेरे मुर्देयां बिच का जिन्दे होणे रे बारे बिच भरोस्सा नी कित्तेया।

यूहन्ना 14:27

“मैं तुसा जो अपणी सांती देई करी जाया करदा है। जदेई सांती दुनिया रे मणू दिंदे तैसी सांती नी। तुसा रे दिल दुखी ना हो, ते ना ही डरे।”

यूहन्ना 16:22

तिस्सी तरिक्के कने अवे तुसा दुखी तां हिन, पर मैं तुसा रे कने फिरी मिलणा, अते तुसा रे मन खुस होई जाणे, अते तुसा री खुसी जो कोई तुसा का खुस्सि नी सकदा।

यूहन्ना 16:33

ए गल्लां मैं तुसा रे कने बोल्ली हिन कि तुसा जो मेरे जरिए सांती मिल्लो, दुनिया बिच तुसा जो तकलिफां मिल्ली हिन, पर हिम्मत रख्खो किजोकी मैं इस दुनिया रे सरदार, शैतान जो हराई दित्ते रा है।

यूहन्ना 20:21

तां यीशु ने तिन्हा जो फिरी बोल्लेया, तुसा जो सांती मिल्लो जिय्यां परम पिता ने मेरे जो भेज्जेया है, तिय्यां ही मैं भी तुसा जो दुनिया रे लोक्कां का भेजदा।

यूहन्ना 20:26

इक्क हफ्ते बाद तिन्हेरे चेल्‍ले फिरी घरे रे अन्दर थिये, अते थोमा तिन्हेरे कने थिया ते दुआर बन्द थिये, तां यीशु आई करी तिन्हेरे मझाटे खड़े होई गे अते बोल्लेया, तुसा जो सांती मिल्लो।

यूहन्ना 21:1

इन्हा गल्लां रे बाद यीशु ने खुद जो गलीली समुन्द्र (तिबिरियुस) रे कनारे चेल्‍लेयां रे सामणे प्रकट कित्तेया। अते इस तरिके कने सामणे आये;

यूहन्ना 21:14

ए तिज्जी वरी ए कि यीशु मरे रे बिच का जिन्दा होणे का बाद चेल्‍लेयां जो लिब्बे।

यूहन्ना 7:13

तां भी यहूदी अधिकारियां रे डरे रे मारे मते मणू यीशु रे हित बिच गल्ल नी करदे थिये।

प्रेरितां रे कम्म 1:3

ते तिन्हा ने दुख झेलणे रे मरणे का बाद अप्पु जो अपणे प्रेरितां रे सामणे पक्के सबुतां कने ए साबित कित्ता कि से फिरी मरे रे लोक्कां बिच का जिन्दे होई गेरे हिन, ते चाली दिनां तिकर से तिन्हा सामणे प्रकट हुंदे रे, ते परमेश्वर रे राज री गल्लां करदे रे।

रोमियों 15:33

सांती रा परमेश्वर, तुसा सबणी कन्ने रैह्ण। आमीन!

1 कुरुन्थियों 15:5

ते पतरस जो ते बाकि रे सारे प्रेरितां जो भी दिस्से थिये,

इफिसियों 2:14

मसीह ने अप्पु ही असा बिच सांती बणाई। पैल्ले-पैल्ले यहूदी ते गैर यहूदियां बिच इन्नी जादा नफरत थी कि जिय्यां दोन्नां बिच मझाटे कोई दुआल हो पर अवे मसीह यीशु ने सुली पर अपणी कुर्बानी रे जरिये तिस दुआल जो ढाह्ई दित्ते रा है ते दोन्नां पास्से रे लोक्कां जो आपस बिच मिलाई दित्ता। मसीह यीशु ने मूसा रे कानून जो रद्द करी दित्तेया ते परमेश्वर कने असा रा मेल जोल कराई दित्तेया।

इफिसियों 6:23

मैं परमेश्वर पिता ते प्रभु मसीह यीशु का ए प्रार्थना करदा कि से तुसा जो सांती दे। ते इस कने तुसा बिच प्यार बधे ते तुसा मसीह यीशु बिच विश्वास करणे बिच बणी रेयो।

फिलिप्पियों 1:2

असा रे पिता परमेश्वर ते प्रभु यीशु मसीह रे पास्से का तुसा जो अनुग्रह ते सांती मिलदी रेयो।

2 थिस्सलुनीकियों 3:16

प्रभु जे सांती दैणे वाला है, मैं तिन्हा का प्रार्थना करदा कि से तुसा जो हमेसा ते हर तरिक्के री सांती दिंदे रैह्ण, ते प्रभु तुसा सारे जणेया कने रैह्ण।

3 यूहन्ना 1:14

मैं चाह्‍ंदा कि तित्ते तुसा का आई करी तुसा कने आमणे सामणे गल्ल करां, ताकि असी अप्पु-मिते खुसी मनाई सकण।

प्रकाशित वाक्य 1:4

मैं यूहन्ना, एशिया प्रदेश रे सत्त इलाक्केयां बिच रैह्णे वाले विश्वासियां जो ए चीठ्ठी लिख्खेया करदा है। मैं प्रार्थना करदा कि तुसा जो परमेश्वर का अनुग्रह ते सांती मिलदी रे। परमेश्वर पिता ही हिन जे अब्बे भी हिन, से पैल्ले भी थिये, ते तिन्हा ने हमेसा तिकर रैह्णा। तिन्हा सत्त आत्मां रे पास्से का जे परमेश्वर रे सिहांसन रे सामणे हमेसा खड़े रैह्‍न्दे,