यूहन्ना 17:26 - चम्बयाली नौआ नियम

²⁶ मैं तुसा रा नां इन्हा सामणे प्रकट कित्ते रा है, ते अग्गे भी दसदे रैह्णा ताकि जे प्यार तुसा जो मेरे कने थिया से तिन्हा बिच रेय, ते मैं इन्हा बिच रेयां।

यूहन्ना 17:26 ပူးပေါင်းရင်းမြစ်များ

यूहन्ना 14:20

तिस रोज जां मैं वापिस हटणा, तुसा जाणना कि मैं पिता बिच है, ते तुसा मेरे बिच हिन, ते मैं तुसा बिच।

यूहन्ना 14:23

यीशु ने तिसजो जवाब दित्तेया, जे कोई मेरे कने प्यार रखगा तिनिये मेरे शिक्षा जो मनणा, ते मेरे पिता ने तिस कने दाह-पीड़ रखणी ते असा तिसका आणा, ते तिसेरे कन्ने रैह्णा।

यूहन्ना 15:15

अवे मैं तुसा जो नौक्कर नी बोलणा किजोकी कोई नौक्कर नी जाणदा कि उसेरा मालक कै करदा, पर मैं तुसा जो दोस्त बोल्लेया, किजोकी से सब गल्लां जे मैं अपणे पिता का सुणी तुसा जो दस्सी दित्ती री हिन।

यूहन्ना 15:4

तुसा मेरे बिच बणी रेयो ते मैं तुसा रे बिच बणी रैहन्गा, जिय्यां से डाली जे अंगूर री बेल कने जुड़ी ना रे तां अप्पु से फली नी सकदी, तिय्यां ही तुसा भी जे मेरे कने जुड़ी नी रैहन्गे तां नी फली सकदे।

यूहन्ना 15:9

जदेया मेरे पिता ने मेरे कने प्यार कित्तेया, मैं भी तिय्यां ही तुसा रे कने प्यार कित्तेया मेरे प्यार बिच बणी रेयो

यूहन्ना 17:23

मैं उन्हा बिच होणा ते तुसा मेरे बिच होणा, ताकि से सिद्व होई करी इक्क होई जाण, अते दुनिया जाणी जाये कि तुसा ने मेरे जो भेज्जेया है ते तुसा ने उन्हा कने भी तिय्यां प्यार कित्तेया जिय्यां मेरे कने प्यार करदे हिन

यूहन्ना 17:6

जिन्हा लोक्कां जो तुसा इस दुनिया रे लोक्कां बिच का मेरे जो सौंपेया थिया, मैं तिन्हा जो तुसा रे बारे बिच दस्सेया। से हमेसा का तुसा रे ही हिन। से तुसा रे बोलणे रे हिसाब कने चलेया करदे हिन।

यूहन्ना 17:8

किजोकी मैं तिन्हा जो से ही सारे उपदेस दित्ते, जे तुसा ने मेरे दित्ते थिये, अते तिन्हा ने तिसजो अपणाई लेया ते पक्के तौर पर जाणी लेरा है कि मैं तुसा पास्से का आए रा है, अते उन्हा ने विश्वास कित्तेया कि तुसा ने ही मेरे जो भेज्जे रा है।

यूहन्ना 6:56

जे मेरा सरीर खान्दा ते मेरा खून पीन्दा, तिनिये हमेसा तिकर मेरे अन्दर बणी रैह्णा, ते मैं तिस बिच

यूहन्ना 8:50

पर मैं अपणी बड़ाई नी कराणा चाह्‍ंदा, इक्क है जे चाह्‍ंदा कि मेरी बड़ाई हो, ते से इंसाफ करदा।

रोमियों 8:10

जे अगर मसीह तुसा बिच वास करदे, तां भले ही पाप री वजह कने सरीर रे मरी जाणे पर भी, पवित्रात्मा तुसा जो जिन्दगी दिंदी, किजोकी तुसा परमेश्वर रे सामणे धार्मिक ठैहराए गेरे हिन।

1 कुरुन्थियों 1:30

पर परमेश्वर ने तुसा लोक्कां रा रिस्ता मसीह यीशु कने जोड़ेया, ते मसीह यीशु रे जरिये से असा जो अपणा ज्ञान दिंदे, परमेश्वर असा जो अपणी नजर बिच धार्मिक ठैहरांदे। असी मणू मसीह यीशु रे जरिये पवित्र ठैहराये गेरे हिन ते असा जो पाप का अजाद करदे।

1 कुरुन्थियों 12:12

किजोकी जिय्यां असा रे इक्क जिस्म रे मते सारे अंग हिन, तिय्यां ही असी विश्वासी मणू मिली करी मसीह यीशु रे जिस्म रा हिस्सा बणी गेरे हिन, ते असी आपस बिच इक्क-दूए कने जुड़े रे हिन।

गलातियों 2:20

ए इदेया है कि जां यीशु मसीह सुली पर मरे तिय्यां ही मैं भी मरी गेया ते अवे मैं जिंदा नी रेया, पर मसीह यीशु मेरे बिच जिंदे। अते मैं अवे जे जिंदा है तां सिर्फ तिस विश्वास कने जिंदा है, जे मेरे जो परमेश्वर रे पुत्तर पर है, जिन्हा ने मेरे कने प्यार कित्तेया, अते मेरे तांइ अप्पु जो देई दित्तेया।

इफिसियों 1:6

परमेश्वर ने इय्यां इस तांइ कित्तेया ताकि तिन्हेरे महिमामय अनुग्रह तांइ तिन्हेरी बड़ाई करण, जिस जो तिन्हा ने असा लोक्कां जो मुफ्त बिच इधेरे तांइ दित्तेया किजोकी असा रा तिन्हेरे प्यारे पुत्तर कने रिस्ता है।

इफिसियों 3:17

मैं प्रार्थना करदा कि तुसा रे दिल मजबूत होई जाण ताकि जिय्यां तुसा मसीह यीशु पर विश्वास करण तिय्यां ही से तुसा रे दिल बिच बसी रैह्ण ते परमेश्वर ते बाकि लोक्कां तांइ तुसा रा प्यार तुसा जो मजबूत बणाई रख्खे।

इफिसियों 5:30

किजोकी असी मसीह रे सरीर रे अगं हिन।

इफिसियों 5:32

ए बड़ा बड्डा राज़ है, पर मैं मसीह यीशु ते कलीसिया रे बारे बिच बोलदा।

कुलुस्सियों 1:27

किजोकी परमेश्वर ने चाएया कि तिन्हेरे मणू जाणे कि मसीह री शोहरत ते महिमा गैर यहूदियां तांइ भी है, ते से राज़ मसीह है, जे तुसा बिच वास करदे जे असा री परमेश्वर री महिमा बिच हिस्सेदार बणने री आस है।

कुलुस्सियों 2:10

मसीह यीशु हर ताकत ते राज रे उप्पर प्रधान हिन, इधेरे तांइ जां तुसा मसीह यीशु कने जुड़े रे हिन, तां तुसा बिच कुसकी भी गल्ल री कमी नी हुंदी।

कुलुस्सियों 3:11

जिसेरा अंजाम ए होया कि तिस बिच कोई यूनानी, यहूदी, खतना वाले, बगैर खतना वाले, विदेशी, नौक्कर ते अजाद मणूआं बिच कोई फरक नी रेया, पर सिर्फ मसीह यीशु ही सारेयां बिच सबका जादा जरुरी हिन ते तुसा तिन्हेरे हिसाब कने जिन्दगी जियो।

2 थिस्सलुनीकियों 2:16

असी अपणे प्रभु यीशु मसीह ते पिता परमेश्वर का प्रार्थना करदे जे असा कने प्यार करदे ते जिन्हा ने अपणे अनुग्रह रे जरिये असा जो कदी ना मुकणे वाली हिम्मत ते इक्क पक्की आस भी दित्ते री है।

इब्रानियों 2:12

मसीह, परमेश्वर जो इस बारे बिच ए बोलदे, “मैं अपणे लोक्कां जो तुसा रे ठीक कम्मां रे बारे बिच दसणा, जां से मणू तुसा री अराधना तांइ कठिंदे तां मैं तुसा री बड़ाई करणी।”

1 यूहन्ना 3:24

जे तिसेरे हुकमां जो मनदा, से परमेश्वर कने बणी रैहन्दा ते परमेश्वर तिस मणू बिच बणी रैहन्दा ते इस तरिक्के कने पवित्रात्मा रे जरिए जिस जो परमेश्वर ने असा जो दित्तेया है, असी ए जाणदे कि असा रा परमेश्वर कने रिस्ता बणे रैहन्दा।