यूहन्ना 15:4 - चम्बयाली नौआ नियम

⁴ तुसा मेरे बिच बणी रेयो ते मैं तुसा रे बिच बणी रैहन्गा, जिय्यां से डाली जे अंगूर री बेल कने जुड़ी ना रे तां अप्पु से फली नी सकदी, तिय्यां ही तुसा भी जे मेरे कने जुड़ी नी रैहन्गे तां नी फली सकदे।

यूहन्ना 15:4 ပူးပေါင်းရင်းမြစ်များ

मत्ती 12:33

जे अगर इक्क बूट्टा खरा है तां तिसेरा फल्ल भी खरा ही होणा, पर जे अगर इक्क बूट्टा खराब है तां तिसेरा फल्ल भी खराब ही होणा, किजोकी बूट्टा अपणे फलां कने पछाणेया जांदा।

लूका 8:15

पर से बीह् जे ठीक मिट्टी पर पे थिये, से तिन्हा मणूआं सांई हुन्दे, जे मन रे ठीक अते नेक, ते सच्चे मन कने परमेश्वर रे वचन जो सुणी करी तिन्हा पर चलदे ते तिन्हेरे सबर री वजह कने ही से खरा फल्ल लियान्दे।

यूहन्ना 14:20

तिस रोज जां मैं वापिस हटणा, तुसा जाणना कि मैं पिता बिच है, ते तुसा मेरे बिच हिन, ते मैं तुसा बिच।

यूहन्ना 17:23

मैं उन्हा बिच होणा ते तुसा मेरे बिच होणा, ताकि से सिद्व होई करी इक्क होई जाण, अते दुनिया जाणी जाये कि तुसा ने मेरे जो भेज्जेया है ते तुसा ने उन्हा कने भी तिय्यां प्यार कित्तेया जिय्यां मेरे कने प्यार करदे हिन

यूहन्ना 6:56

जे मेरा सरीर खान्दा ते मेरा खून पीन्दा, तिनिये हमेसा तिकर मेरे अन्दर बणी रैह्णा, ते मैं तिस बिच

यूहन्ना 8:31

तां यीशु ने तिन्हा यहूदी लोक्कां कने ए बोल्लेया जिन्हा ने तिन्हा पर विश्वास कित्तेया थिया, जे तुसा मेरे शिक्षा बिच बणी रैहन्गे, तां हकीकत बिच मेरे चेल्‍ले ठैहरगे।

प्रेरितां रे कम्म 11:23

से तित्ते पूज्जी करी परमेश्वर रे अनुग्रह जो दिख्खी करी बड़ा खुस होया ते सब जो शिक्षा दित्ती की तन मन लगाई करी प्रभु यीशु कने लिपटी रेयो,

प्रेरितां रे कम्म 14:22

ते हर इक्क कस्बे बिच जाई करी चेल्‍ले रे मन जो मजबूत करदे रे ते ए उपदेस दिंदे थिये, कि विश्वास बिच बणे रेयो, ते ए बोलदे थिये कि असा जो बड़े दुख सहन करी के परमेश्वर रे राज बिच पुजणा है।

2 कुरुन्थियों 13:5

अपणे आप जो परखो ते समझो कि मसीह यीशु बिच तुसा रा विश्वास सच्चा है या नी। तुसा पक्के तौर पर जाणदे कि मसीह यीशु तुसा बिच वास करदे; ते जे अगर तुसा बिच वास नी करदे, तां तुसा रा विश्वास सच्चा नी है।

गलातियों 2:20

ए इदेया है कि जां यीशु मसीह सुली पर मरे तिय्यां ही मैं भी मरी गेया ते अवे मैं जिंदा नी रेया, पर मसीह यीशु मेरे बिच जिंदे। अते मैं अवे जे जिंदा है तां सिर्फ तिस विश्वास कने जिंदा है, जे मेरे जो परमेश्वर रे पुत्तर पर है, जिन्हा ने मेरे कने प्यार कित्तेया, अते मेरे तांइ अप्पु जो देई दित्तेया।

इफिसियों 3:17

मैं प्रार्थना करदा कि तुसा रे दिल मजबूत होई जाण ताकि जिय्यां तुसा मसीह यीशु पर विश्वास करण तिय्यां ही से तुसा रे दिल बिच बसी रैह्ण ते परमेश्वर ते बाकि लोक्कां तांइ तुसा रा प्यार तुसा जो मजबूत बणाई रख्खे।

फिलिप्पियों 1:11

तुसा री जिन्दगी मसीह यीशु रे जरिए परमेश्वर री धार्मिकता रे कम्मां कने भरदी जाए जिस कने परमेश्वर री बड़ाई ते तारीफ हुंदी रे।

कुलुस्सियों 1:23

मसीह बिच तुसा रा विश्वास, नीं बणे रे मजबूत घर सांई होणा चाएदा। मसीह रे सुब बसेख जो सुणी करी जे आस तुसा जो मिल्ली थी, तिसजो मत छड्डो, ते जिस सुब बसेख रा प्रचार दुनिया रे सारे लोक्कां बिच कित्ता गे रा है। ते मैं पौलुस जिस सुब बसेख रा दास बणेया।

कुलुस्सियों 1:27

किजोकी परमेश्वर ने चाएया कि तिन्हेरे मणू जाणे कि मसीह री शोहरत ते महिमा गैर यहूदियां तांइ भी है, ते से राज़ मसीह है, जे तुसा बिच वास करदे जे असा री परमेश्वर री महिमा बिच हिस्सेदार बणने री आस है।

कुलुस्सियों 2:6

अते जिय्यां तुसा ने मसीह यीशु जो प्रभु मन्नी करी के अपणाई लित्ते रा है, तिय्यां ही तिन्हा पीच्छे चलदे रेयो।

1 थिस्सलुनीकियों 3:5

इधेरे तांइ जां मेरे का तुसा रा हालचाल जाणे बगैर रेया नी गेया, तां मैं तुसा रे विश्वास रा हाल जानणे तांइ तीमुथियुस जो भेज्जी दित्ता। मेरे जो ता ए डर थिया कि कुते शैतान ने तुसा जो परिक्षा बिच पाई करी भटकाई दित्ते रा हो ते असा री सारी मैहनत बेकार होई गे री हो।

इब्रानियों 10:39

जे मणू परमेश्वर का पीच्छे हटी जांदे, तिन्हा जो परमेश्वर ने सजा दैणी, पर असा ने परमेश्वर बिच विश्वास करदे रैह्णा ते तिन्हा ने असा जो बचाणा।

1 यूहन्ना 2:6

जे अगर कोई ए बोलदा की मैं परमेश्वर बिच बणी रैहन्दा, तां तिस तांइ जरुरी है कि तदेई ही जिन्दगी जिये जदेई जिन्दगी मसीह यीशु जिन्दे थिये।

2 यूहन्ना 1:9

मैं तुसा जो बोलदा कि जे अगर कोई मणू मसीह यीशु री शिक्षा पर चलणा छड्डी दिंदा पर तिस शिक्षा बिच अपणी गल्लां भी जोड़ी दिंदा तां तिसेरा परमेश्वर कने कोई रिस्ता नी है। पर जे अगर कोई मणू मसीह री शिक्षा पर बराबर चलदा रैहन्दा तां तिस मणू रा पिता परमेश्वर ते तिन्हेरे पुत्तर मसीह यीशु कने रिस्ता है।