यूहन्ना 15:2 - चम्बयाली नौआ नियम

² हर इक्क डाली जे मेरे बिच है ते जिस बिच फल्ल नी लगदा, से तिसजो बड्डी दिन्दे, अते मेरी हर इक्क डाली जो जे फलदी, से तिसजो छांटदे हिन ताकि होर जादा फल्ल लगन।

यूहन्ना 15:2 ပူးပေါင်းရင်းမြစ်များ

मत्ती 13:12

किजोकी जिस का घट्ट है, तिसजो दित्तेया जाणा अते उस का बड़ा जादा होई जाणा पर जिस का किच्‍छ भी नी है, तिसका जे किच्‍छ है, से भी लेई लित्तेया जाणा।

मत्ती 13:33

यीशु ने तिन्हा लोक्कां जो समझाणे तांइ इक्क होर उदारण दित्तेया, “स्वर्ग रा राज आट्टे री तराक्क सांई है, ते जिय्यां थोड़ी जदेई तराक्क पूरी प्रात रे आट्टे जो भी त्राक्की दिंदी तिय्यां ही स्वर्ग रा राज भी थोड़े लोक्कां रे जरिए सारी लोक्कां बिच फैलदा जाणा।”

मत्ती 15:13

पर यीशु ने जवाब दित्तेया, हर इक्क पौधा जे मेरे स्वर्गीय पिता ने नी लाए रा है, से पुट्टी दित्ता जाणा।

मत्ती 21:19

सड़क रे कनारे इक्क अंजीर रा इक्क बूट्टा दिख्खी करी तिसेरे नेड़े गे ते पत्तेयां जो छड्डी करी तिस बिच होर किच्‍छ ना पाई करी तिसजो बोल्लेया, अब्बे का तेरे बिच फिरी कदी फल्ल ना लगे ते अंजीर रा बूट्टा तिसी बेल्ले सुकी गेया।

मत्ती 25:29

किजोकी हर उस मणू का, जिस ने जे किच्‍छ उस का थिया उसेरा सही इस्तेमाल कित्तेया, तिसजो होर जादा दित्तेया जाणा पर उस का, जिस का जे किच्‍छ थिया उसेरा सही इस्तेमाल नी कित्तेया, सब किच्‍छ लेई लित्तेया जाणा।

मत्ती 3:10

अवे परमेश्वर रे हिसाब-किताब रा झोंटू बूट्टे री जड़ पर रख्खे रा है, ताकि तिस मणू जो कट्टी दे जे जिस बूट्टे सांई हिन जिन्हा पर खरा फल्ल नी लगदा, से बूट्टा जड़ का बड्डी दित्तेया जाणा ते फुक्की दित्ता जाणा।

मत्ती 3:12

तिन्हेरा छज्ज तिन्हेरे हत्थां बिच है, अते तिन्हा ने अपणे खलाड़े जो खरा करी साफ करणा, कणक जो खत्ते अन्दर इकट्ठा करणा, ते भूह् जो तिस आग्ग अन्दर फुक्की दैणा, जे कदी भी नी बुझणी।”

मत्ती 7:19

हर इक्क बूट्टा जे खरा फल्ल नी दिंदा, से बड्डेया अते आग्ग अन्दर पाई दित्तेया जान्दा ए।

मरकुस 4:20

ते जे ठीक जमीन बिच बोए गे, ए से हिन जे वचन सुणी करी अपणाई लिदें ते फल्ल लादें : कोई तीह् गुणा, कोई साठ्ठ गुणा ते कोई सौ गुणा।

लूका 8:13

जे बीह् पथरिली मिट्टी पर पे थिये, से तिन्हा मणूआं सांई हुन्दे जे वचनां जो बड़े मजे कने सूणदे अते तिन्हा पर चलणा भी लग्गी पैंदे, पर वचन तिन्हेरे मना बिच पकड़ नी बणाई पांदा ते किच्‍छ बेल्ले तांइ से वचना पर विश्वास तां करदे पर, जां परखिणे रा बेल्ला आन्दा तां से बहकी जादें।

यूहन्ना 15:1

“यीशु ने बोल्लेया, सच्ची अंगूर री बेल मैं है, अते मेरे पिता तिसेरे माली हिन।

यूहन्ना 15:16

तुसा मेरे जो नी चुणेया, पर मैं तुसा जो इक्क मकसद कने चुणेया कि तुसा जाओ अते इदेय कम्म करण जे पिता-परमेश्वर जो पसंद आए ते तुसा रे ठीक कम्म बणी रे, ताकि मेरे नां कने तुसा जे किच्‍छ भी पिता का मंगो से तुसा री हर जरुरत जो पूरा करण।

यूहन्ना 15:3

मैं जे शिक्षा तुसा जो दित्ते री है तुसा तिस कने पवित्र होई गेरे हिन।

यूहन्ना 15:6

जे कोई मेरे अंदर बणी नी रैहन्दा, तां तिसजो कट्टी करी सूटी दित्तेया जांदा ते जां से सुकी जांदा तां मणू तिसजो बटोरी करी आग्ग करी बिच फुक्की दिंदे।

यूहन्ना 15:8

जां तुसा मता फल्ल लियांदे तां तिस कने ए साबित हुंदा कि तुसा मेरे चेल्‍ले हिन। इस कने मेरे पिता री बड़ाई हुंदी।

यूहन्ना 17:12

जां मैं तिन्हेरे कने थिया, मैं तुसा रे उस नां री ताकत कने जे तुसा ने मेरे जो दित्ते रा है, तिन्हेरी रखवाली कित्ती, सिवाय विनास रे पुत्तर जो छड्डी उन्हा बिच कोई खत्म नी होया, इधेरे तांइ कि पवित्रशास्त्र बिच लिख्खे री गल्ल पूरी हो;

रोमियों 11:17

इस्राएल देस रे मणू जैतून रे बूट्टे री डालियां सांई हिन। ते तिन्हेरी जड़ तिन्हेरे पुरखा अब्राहम, इसहाक ते याकूब हिन। ते जे अगर किच्‍छ डालियां तिस बिच का कट्टी भी दित्ती गयी हो, ते अगर तू इक्क जंगली बूट्टे री डाली होणे रे बावजूद भी तिन्हा बिच साट्टेया गेया हो, तां जिय्यां कोई साट्टे रे डाली तिस बूट्टे री चिकनेपन री हिस्सेदार बणदी, तिय्यां ही तू भी यहूदियां जो मिलणे वाली तिन्हा आशीषां रा हिस्सेदार बणेया, जिसेरा वादा परमेश्वर ने अब्राहम कने कित्तेया थिया।

रोमियों 11:22

इधेरे तांइ परमेश्वर री दया ते सख्ती पर ध्यान देयो। जे डालियां कट्टी गयी तिन्हा पर ता सख्ती होई, पर तेरे पर दया होई, जिस जो तिन्हा ने साट्टेया। तिन्हेरी दया बिच बणी रेयो, नी तां तू भी कट्टी दित्तेया जाणा।

रोमियों 8:28

असी जाणदे कि परमेश्वर हर गल्ल बिच तिन्हा लोक्कां कने भलाई करदे जे तिन्हा कने प्यार करदे। परमेश्वर ने तिन्हा लोक्कां जो अपणे मकसद तांइ चुणे रे हिन।

1 कुरुन्थियों 13:1

जे अगर मैं मणूआं ते स्वर्गदूतां री भाषां बोल्लां, पर कुसकी कने प्यार ना करां, तां मेरी गल्ल-बात इक्क ठणठणांदे पित्तल ते झणझणादीं झाज्जं सांई बेमतलब है।

तीतुस 2:14

जिन्हा ने असा जो पाप री ताकत का छुटकारा दैणे तांइ अप्पु जो कुर्बान करी दित्ता ते असा जो धार्मिक ठैहराया ताकि असी तिन्हेरे अपणे खास मणू बणी जाण जिन्हा बिच ठीक कम्म करणे री बड़ी वरी इच्छा है।

इब्रानियों 12:15

ते चुकन्ने रेयो, कुते इय्यां ना हो कि कोई परमेश्वर रे अनुग्रह का अछुता रेई जाओ, ते तुसा तांइ इक्क मुसीबत री वजह बणी जाए। इदेया कोई भी मणू अप्पु ता परमेश्वर रे सच्चे रस्ते का दुर चली जांदा ते मते जणेया तांइ परमेश्वर री सच्चाई का भटकणे री वजह बणी सकदा।

1 यूहन्ना 2:19

मसीह रा विरोध करणे वाले मणू असा री कलीसिया बिच का निकली करी चली गे, पर से असा रे अपणे नी थिये। किजोकी जे अगर से असा रे अपणे हुंदे तां तिन्हा ने असा कने रैहन्दे, पर से मणू निकली गे जिस कने ए साबित होई गेया कि से सारे कदी असा रे अपणे नी थिये।

प्रकाशित वाक्य 3:19

किजोकी मैं जिस कने प्यार करदा, तिसजो सुधारदा भी, ते जिस जो औलाद सांई मनदा, तिसजो कोड़े भी लादां ताकि से पाप रे कम्म करणा छड्डी दे।