यूहन्ना 15:19 - चम्बयाली नौआ नियम

¹⁹ जे तुसा इस दुनिया रे लोक्कां सांई हुन्दे तां दुनिया रे लोक्कां ने तुसा कने अपणेयां सांई प्यार करणा थिया, पर तुसा इस दुनिया रे लोक्कां सांई नी हिन किजोकी मैं तुसा जो इस दुनिया रे लोक्कां बिच का चुणी लित्ते रा है, अते इधेरे तांइ दुनिया रे मणू तुसा रे कने दुश्मणी रखदे।

यूहन्ना 15:19 ပူးပေါင်းရင်းမြစ်များ

मत्ती 10:22

मेरी नां री वजह कने सबने तुसा रे कने नफरत करणी, पर जे आखर तांइ सबर रखगा तिसेरा ही छुटकारा होणा।

मत्ती 24:9

तां तिन्हा लोक्कां ने जे तुसा रे खिलाफ हिन तुसा जो सताणे तांइ पकड़वाणा, ते तिन्हा ने तुसा जो मारी रखणा, ते मेरे पीच्छे चलणे री वजह कने सारी जातियां रे लोक्कां ने तुसा कने नफरत रखणी।

लूका 6:32

जे तुसा अपणे प्यार करणे वालेयां कन्ने ही प्यार कने रैह्न्गे तां इस अन्दर कुण देई बड्डी गल्ल ए? किजोकी पापी मणू भी तां इय्यां ही करदे

यूहन्ना 13:18

मैं तुसा सारे रे बारे बिच नी बोलदा; जिन्हा जो मैं चुणी लित्तेया रा है तिन्हा जो मैं जाणदा, पर ए इधेरे तांइ होया कि पवित्रशास्त्र रा से वचन पूरा हो, “जिनिये मेरी रोट्टी खाई, तिनिये मेरे कने धोखा कित्ता।”

यूहन्ना 15:16

तुसा मेरे जो नी चुणेया, पर मैं तुसा जो इक्क मकसद कने चुणेया कि तुसा जाओ अते इदेय कम्म करण जे पिता-परमेश्वर जो पसंद आए ते तुसा रे ठीक कम्म बणी रे, ताकि मेरे नां कने तुसा जे किच्‍छ भी पिता का मंगो से तुसा री हर जरुरत जो पूरा करण।

यूहन्ना 6:70

यीशु ने तिन्हा जो जवाब दित्ता, कि मैं तुसा बारा जणेया जो मैं चुणी लित्ते रा है पर तां भी तुसा बिच इक्क जणे जो शैतान ने काबू बिच करी लित्ते रा है।

याकूब 4:4

ओ बेईमान लोक्कों, तुसा जाणदे कि दुनिया री चीजां कने प्यार रखणा परमेश्वर कने नफरत करणा है। अते जे दुनिया रा दोस्त होणा चाह्‍ंदा, से अपणे आप जो परमेश्वर रा दुश्मण बणादां

1 पतरस 4:3

किजोकी तुसा ने अपणे पैल्ले री जिन्दगी जो तिन्हा कम्मां बिच गुजारी दित्ती जिन्हा जो करणे बिच अविश्वासी मणू बड़े खुस रैह्‍न्दे। तुसा री जिन्दगी व्यभिचार ते अश्लीलता, ते अविश्वासी लोक्कां री धाम ते सराब पी करी मतवाल्ले होणे, रंगरेलियां मनाणे, ते तिन्हेरी मूर्तां री पूजा करणे बिच बीत्ती जिन्हा का परमेश्वर नफरत करदे।

1 यूहन्ना 3:12

असा जो आदम रे पुत्तर कैन सांई नी बणना जे उस शैतान रे पास्से का थिया, ते जिनिए अपणे भ्याल जो मारी रख्खेया, तिसने अपणे भ्याल जो भला किजो मारेया? तिसने इधेरे तांइ इदेया कित्तेया कि तिसेरे कम्म बुरे थिये अते तिसेरे भ्याल रे कम्म धार्मिक थिये।

प्रकाशित वाक्य 12:17

इसेरे नतीज्जे रे तौर पर, से अजगर जो तिस जनानी पर बड़ा वरी गुस्सा आया। इधेरे तांइ तिनिये तिस जनानी रे ‍खानदान रे खिलाफ इक्क लड़ाई रा एलान करी दित्तेया। ए से मणू होणे जे परमेश्वर रे हुकम मुताबिक चलदे ते तिन्हा सच्ची शिक्षां पर बणी रैह्‍न्दे जे मसीह ने सिखाए री हिन।

प्रकाशित वाक्य 12:9

तां तिस अजगर ते तिसेरे दूत जो धरती पर सूटी दित्तेया गेया। से अजगर ओ ही है जिस जो पैल्ले-पैल्ले कीड़ा भी बोल्लेया गेया थिया, जिसेरा नां शैतान। एह् ओई है जे दुनिया रे लोक्कां पर इल्जाम लगांदा अते भटकाया करदा है।