यूहन्ना 15:15 - चम्बयाली नौआ नियम

¹⁵ अवे मैं तुसा जो नौक्कर नी बोलणा किजोकी कोई नौक्कर नी जाणदा कि उसेरा मालक कै करदा, पर मैं तुसा जो दोस्त बोल्लेया, किजोकी से सब गल्लां जे मैं अपणे पिता का सुणी तुसा जो दस्सी दित्ती री हिन।

यूहन्ना 15:15 ပူးပေါင်းရင်းမြစ်များ

मत्ती 13:11

यीशु ने जवाब दित्तेया, तुसा जो स्वर्ग रे राज रे भेदां री समझ दित्ती गे री है, पर इन्हा जो नी।

लूका 10:23

जिस बेल्ले तित्ते चेल्‍लेयां जो छड्डी करी होर कोई भी नी थिया, तां यीशु ने तिन्हा जो बोल्लेया, तुसा धन्न हिन कि ए सब किच्‍छ जे होया करदा है, से अपणी हाख्खियां कन्ने दिख्खेया करदे हिन

यूहन्ना 12:26

जे कोई मेरी सेवा करे, तां मेरा चेल्ला बणी जाए, ते जित्ते मैं है उत्ते तिनिये भी होणा, तां पिता ने उसदा आदर करणा।

यूहन्ना 13:16

मैं तुसा कने सच-सच बोल्दा, नौक्कर अपणे मालक का बड्डा नी, ते ना ही दूत अपणे भेजणे वाले का बड्डा हुंदा।

यूहन्ना 15:20

मैं जे गल्लां तुसा जो बोल्ली, तिन्हा जो याद रख्खो, इक्क नौक्कर अपणे मालक का बड्डा नी हुंदा, इधेरे तांइ जे तिन्हा मेरे पर जुल्म कित्तेया तां तुसा पर भी जुल्म करणा, अते जे अगर तिन्हा मेरी शिक्षा जो मन्नेयां, तां तुसा री भी मनणी।

यूहन्ना 16:12

मेरे जो तुसा कने होर भी मती सारी गल्लां करणे जो हिन, पर हल्ले तुसा उन्हा जो सैह्‍ण नी सकदे।

यूहन्ना 17:26

मैं तुसा रा नां इन्हा सामणे प्रकट कित्ते रा है, ते अग्गे भी दसदे रैह्णा ताकि जे प्यार तुसा जो मेरे कने थिया से तिन्हा बिच रेय, ते मैं इन्हा बिच रेयां।

यूहन्ना 20:17

यीशु ने तिसजो बोल्लेया, मेरे जो मत छू, किजोकी मैं हल्ले तांइ पिता का उप्पर नी गेया, पर मेरे चेल्‍लेयां का जाई करी तिन्हा जो बोल्ली दे, मैं अपणे ते तुसा रे परम पिता, अते अपणे ते तुसा रे परमेश्वर का उप्पर जाया करदा है।

यूहन्ना 4:19

जनानी ने तिन्हा जो बोल्लेया, ओ प्रभु जी, मेरे जो लगदा कि तुसा भविष्यद्वक्ता हिन

यूहन्ना 8:26

मेरे का तुसा रे बारे बिच बोलणे ते तुसा पर इल्जाम लाणे तांइ मता किच्‍छ है। पर परमेश्वर, जिन्हा ने मेरे जो इस दुनिया रे लोक्कां का भेज्जे रा है, से सच्चा है, ते जे किच्‍छ मैं तिसका सूणेया, से ही दुनिया रे लोक्कां कने बोलदा।

प्रेरितां रे कम्म 20:27

किजोकी मैं तुसा जो परमेश्वर री से सारी गल्लां दसणे का नी झिझकेया जे से तुसा जो दसणा चाह्‍ंदे।

रोमियों 7:15

ते जे कम्म मैं करदा तिसजो नी जाणदा, किजोकी जे मैं चाह्‍ंदा से नी करदा, पर जिस कम्म का मेरे जो घिन्न आंदी से ही कम्म करदा।

1 कुरुन्थियों 2:16

पर जिय्यां कि पवित्रशास्त्र बिच लिख्खे रा है, “कोई भी नी जाणी सकदा कि परमेश्वर रे मन बिच कै है। कोई भी तिन्हा जो सिखाई नी सकदा” पर पवित्रात्मा ने असी विश्वासी लोक्कां जो मसीह रे मन जो समजणे री ताकत दित्ते री है।

गलातियों 4:6

अवे असी जे तिन्हेरे अपणे औलाद हिन इधेरे तांइ परमेश्वर ने अपणे आत्‍मा जो असा रे दिल बिच पाए रा है, जे असा जो ओ अब्बा ते ओ पिता करी के पुकारदा।

इफिसियों 1:9

परमेश्वर ने अपणी इच्छा रा राज़ ठीक इराद्दे कने असा पर जाहिर कित्तेया, जे तिन्हा ने अप्पु मसीह यीशु रे जरिये स्थापित कित्तेया थिया।

इफिसियों 3:5

पैल्ले समय बिच परमेश्वर ने अपणाए राज़ कुसकी पर भी ज़ाहिर नी कित्ते रा थिया, पर अवे तिन्हा ने इसजो अपणे पवित्र प्रेरितां ते भविष्यद्वक्तां पर पवित्रात्मा रे जरिये ज़ाहिर कित्ते रा है।

कुलुस्सियों 1:26

मतलब कि से बसेख जिस जो जे परमेश्वर सदियां ते पीढ़ियां का राज़ रख्खेया, पर अवे परमेश्वर ने अपणे पवित्र मणूआं पर तिसजो जाहिर कित्ते रा है।

फिलेमोन 1:16

तुसा तिसजो सिर्फ अपणा गुलाम समजदे करी मत रखदे पर से गुलाम का बधी करी है। से अवे इक्क संगी विश्वासी है। मैं तिस कने बड़ा जादा प्यार करदा पर तुसा जो तिस कने अपणे गुलाम ते इक्क मसीही भाई रे तौर पर होर भी जादा प्यार करणा चाएदा।

याकूब 1:1

मैं याकूब परमेश्वर रा ते मसीह यीशु रा दास, तिन्हा बारा गोत्तर रे यहूदी विश्वासियां जो ए चीठ्ठी लिखदा ते नमस्ते करदा जे दुनिया रे अलग-अलग जगाह् बिच बिखरे रे हिन।

याकूब 2:23

ते पवित्रशास्त्र रा से वचन पूरा होया कि अब्राहम ने परमेश्वर पर भरोसा कित्तेया, ते तिसेरे विश्वास रे जरिए परमेश्वर ने तिसजो धार्मिक मणू ठैहराया, ते इत्ते तिकर कि से परमेश्वर रा दोस्त केहलाया।

1 पतरस 1:11

मसीह री आत्‍मा तिन्हा बिच थी ते से तिन्हा जो दस्सेया करदा थिया कि किय्यां मसीह ने बड़े जुल्म सैह्‍ण करणे ते फिरी तिन्हा जो बड़ी महिमा दित्ती जाणी। इधेरे तांइ तिन्हा ने बड़ी खौजबीन कित्ती कि मसीह कुण होणा ते ए सब किच्‍छ कुस समय पर होणा।

2 पतरस 1:1

मैं शमौन पतरस, मसीह यीशु रा सेवादार ते प्रेरित है। मैं तुसा सारेया जो ए चीठ्ठी लिख्खेया करदा है जे असा सांई तिस ही विश्वास बिच हिस्सेदार हिन, से विश्वास जे असा जो मसीह यीशु का मिल्ले रा है, असा रे प्रभु ते छुटकारा दैणे वाले, ते जे असा जो परमेश्वर रे सामणे धार्मिक ठैहरांदे।

यहूदा 1:1

मैं यहूदा जे मसीह यीशु रा सेवादार ते याकूब रा छोटा भ्याल है, तुसा लोक्कां जो ए चीठ्ठी लिख्खेया करदा है जिन्हा जो परमेश्वर ने तिन्हा बिच विश्वास करणे तांइ सद्दे रा है। परमेश्वर पिता तुसा जो प्यार करदे ते तुसा जो मसीह यीशु बिच सुरक्षित रखदे।

प्रकाशित वाक्य 1:1

परमेश्वर ने मसीह यीशु जो से लुके री चीजां दिखाई जे बड़े तौले होणे वाली हिन, ताकि से अपणे सेवादार मणूआं जो से गल्लां दस्सी सकण। मसीह यीशु ने अपणे स्वर्गदूत जो भेज्जी करी मेरे पर इन्हा गल्लां जो जाहिर कित्ता जे तिन्हेरा सेवादार है।