यूहन्ना 14:2 - चम्बयाली नौआ नियम

² मेरे पिता रे घरे बड़ी सारी रैह्णे री जगाह् हिन, जे अगर जगाह् नी हुंदी तां मैं तुसा जो बोल्ली दैणा थिया, किजोकी मैं तुसा तांइ जगाह् तैयार करणे तांइ चलेया।

यूहन्ना 14:2 ပူးပေါင်းရင်းမြစ်များ

लूका 14:22

नौक्कर अपणे मालक जो बोलदा, ओ मालक, जिय्यां तुसा ने बोल्लेया थिया, तिय्यां ही मैं कित्तेया पर तां भी किच्‍छ जगाह् खाली रेई गई।

यूहन्ना 13:33

ओ मेरे प्रियों, मैं होर थोड़ी हाण तुसा रे कने है: फिरी तुसा मेरे जो तोपणा, ते जिय्यां यहूदियां जो बोल्लेया, जित्ते जाया करदा है तित्ते तुसा नी आई सकदे, तिय्यां ही मैं तुसा जो भी बोलदा

यूहन्ना 13:36

शमौन पतरस ने तिन्हा जो बोल्लेया, ओ प्रभु जी, तुसा कुते जाया करदे हिन? यीशु ने जवाब दित्तेया, जित्ते मैं जाया करदा है तू हल्ले तित्ते नी आई सकदा, पर इसेरे बाद मेरे पीच्छे आणा।

यूहन्ना 14:28

तुसा सुणी चुके रे हिन जे मैं तुसा जो बोल्लेया, मैं जांदा, ते तुसा रे का फिरी आणा, जे तुसा मेरे कने सच्चा प्यार करदे तां इस गल्ल कने खुस हुन्दे कि मैं पिता का जाया करदा है, जे मेरे का बड्डे हिन।

यूहन्ना 16:4

अते ए गल्लां मैं इधेरे तांइ बोल्ली कि जां से बेल्ला आये तां तुसा चेत्ता करेयो कि मैं तुसा जो इधेरे बारे बिच दस्सी दित्तेया थिया। अते ए गल्लां मैं तुसा जो सुरु बिच इधेरे तांइ नी दस्सी किजोकी मैं तुसा रे कने थिया।

यूहन्ना 17:24

ओ पिता जी! जे मणू तुसा मेरे जो दित्ते हिन, मैं चाह्‍ंदा कि जित्ते मैं है, से भी मेरे कने हो ताकि से मेरी उस बड़ाई जो दिख्खी सकण जे तुसा ने मेरे जो दित्ती है किजोकी दुनिया री रचना का भी पैल्ले तुसा मेरे कने प्यार करदे हिन

प्रेरितां रे कम्म 9:16

ते मैं तिसजो दसणा कि लोक्कां बिच मेरा प्रचार करणे री वजह कने तिसजो कदेया-कदेया दुख चुकणा पैणा।

2 कुरुन्थियों 5:1

जिय्यां कि असी जाणदे कि इस दुनिया बिच असा रा सरीर इक्क तम्बू सांई है जित्ते असी रैहन्दे। जां असी मरी जाणा तां असा जो परमेश्वर रे पास्से का स्वर्ग का इक्क इदेया सरीर मिलणा जे हत्थां रा बणे रा नी पर हमेसा तिकर रैह्णे वाला है।

1 थिस्सलुनीकियों 5:9

किजोकी परमेश्वर ने असा जो अपणे गुस्से बिच सजा दैणे तांइ नी चुणे रा है पर मसीह यीशु रे जरिए छुटकारा पाणे तांइ चुणे रा है।

तीतुस 1:2

इसेरे अंजाम रे तौर पर से मणू परमेश्वर कने जीणे री आस बिच रैहन्दे किजोकी परमेश्वर जे कदी झूठ नी बोलदे तिन्हा ने दुनिया बणाणे का पैल्ले ही इस गल्ल रा वादा करी दित्तेया थिया कि तिन्हेरे मणूआं ने हमेसा-हमेसा तांइ जीणा।

इब्रानियों 11:10

किजोकी से सहर जे हमेसा बणी रैह्णा, जे स्वर्ग बिच है, ते मणूआं रे हत्थां कने नी बणे रा है, जिसेरा बणाणे वाला परमेश्वर है।

इब्रानियों 13:14

किजोकी ए दुनिया असा रा घर नी है, पर असा आणे वाले सहर री खोज बिच हिन

इब्रानियों 6:20

यीशु मसीह असा का पैल्ले स्वर्ग बिच असा तांइ गे। से हमेसा-हमेसा तांइ मलिकिसिदक सांई प्रधान पुरोत्त बणी गेरे हिन।

इब्रानियों 9:8

इन्हा रीति-रीवाज रे जरिये पवित्रात्मा असा पर ए ही ज़ाहिर करदे कि जां तिकर से तम्बू ते रीति-रीवाज इस्तेमाल बिच थिये, तां तांइ सबका जादा पवित्र जगाह् जे स्वर्ग बिच है तिसेरा रस्ता खुले रा नी थिया।

प्रकाशित वाक्य 1:5

ते मसीह यीशु रे पास्से का भी, जिन्हेरी गल्लां रा असी भरोस्सा करी सकदे। से ही हिन जे सबका पैल्ले मरणे का बाद मुर्देयां बिच का जिन्दे होई गे ते से दुनिया रे सारे राज्जेयां रे राज्जे हिन।

प्रकाशित वाक्य 21:2

मैं तिस पवित्र सहर जे यरुशलेम है, तिसजो परमेश्वर रे पास्से का स्वर्ग का उतरदे दिख्खेया। से इक्क दुल्हन सांई तैयार कित्ती गयी थी, ते सजाई भी गयी थी कि से दुल्हे कने ब्याह करे।

प्रकाशित वाक्य 3:12

जिन्हा लोक्कां ने दुष्ट पर जीत हासिल करणी, तिन्हा लोक्कां ने परमेश्वर रे मन्दिर रे खम्भे सांई होणा जिन्हेरी मैं अराधना करदा, ते तिन्हा जो से जगाह् भी छडणी नी पैणी। ए दिखाणे तांइ कि से मणू मेरे हिन मैं तिन्हा पर परमेश्वर रा नां ते परमेश्वर रे सहर यरुशलेम रा नां री छाप लाणी। तिस सहर ने परमेश्वर रे पास्से स्वर्ग का उतरणा। मैं तिन्हा पर इक्क नौए नां री छाप लाणी।

प्रकाशित वाक्य 3:21

जिन्हा लोक्कां ने दुष्ट पर जीत हासिल करणी, तिन्हा जो मैं अपणे कने सिंहासन पर बैठाणा, जिय्यां मैं भी दुष्ट जो हराई करी अपणे पिता कने तिन्हेरे सिंहासन पर बेई गेया।