यूहन्ना 10:10 - चम्बयाली नौआ नियम

¹⁰ चोर कुसकी होर कम्म तांइ नी पर सिर्फ चोरी करणे, ते मारणे, ते तबाह करणे तांइ आदां। मैं इस तांइ आया की ओ जिन्दगी पाण ते रज्जी करी पाण।

यूहन्ना 10:10 ပူးပေါင်းရင်းမြစ်များ

मत्ती 18:10

इधेरे तांइ दिख्खो, तुसा इन्हा मेरे भोले बच्चेयां बिच का कुसकी जो भी छोटा मत समजदे, किजोकी मैं तुसा जो बोल्दा, कि स्वर्ग बिच दूत मेरे स्वर्गीय पिता रे सामणे हाजिर रैहन्दे।

मत्ती 18:11

किजोकी मणू रा पुत्तर, जे मैं ही है, गुअच्चे रे लोक्कां जो तोपणे तांइ आए रा है।

मत्ती 20:28

जिय्यां मणू रा पुत्तर, जे मैं ही है से इस तांइ नी आया कि उसेरी सेवा-टहल कित्ती जाए, पर इस तांइ आया कि अप्पु सेवा टहल करे ते मते जणेया रे छुटकारे तांइ अपणी जान देई दे।

मत्ती 21:13

ते तिन्हेरे जो बोल्लेया, लिख्खे रा है कि मेरा घर प्रार्थना रा मन्दिर होणा पर तुसा तिसजो डाकुआं रा अड्डा बणादें।

मत्ती 23:13

ओ ढोंगी शास्त्रियों, ते फरीसी लोक्कों, तुसा पर लाणत है! तुसा लोक्कां जो स्वर्ग रे राज बिच नी जाणा दिंदे, ना तां अप्पु खुद उस बिच जांदे अते ना ही उन्हा जो जाणे दिंदे जे जाणे तांइ कोसीस करेया करदे हिन।

मरकुस 11:17

अते यीशु ने तिन्हा लोक्कां जो बोल्लेया, “पवित्रशास्त्र अंदर लिख्खे रा है, ‘कि मेरा मन्दिर देस-देस रे लोक्कां तांइ प्रार्थना रा मन्दिर बोल्लेया जाणा’ पर तुसा ने इसजो डाकुआं रा अड्डा बणाई दित्ते रा है।”

लूका 19:10

किजोकी मणू रा पुत्तर, जे मैं ही है तेरे जदेय होर भी मणूआं जो हमेसा री सजा का बचाणे तांइ आए रा है।

यूहन्ना 10:1

मैं तुसा जो सच-सच बोलदा कि जे कोई दुआर का गुआड़ बिच नी बड़दा, पर कुसकी दूए पास्से का चढ़दा, से चोर ते डाकू है।

यूहन्ना 10:11

खरा पुहाल मैं है, खरा पुहाल अपणी भेड़ां तांइ हमेसा अपणी जान दैणे तांइ तैयार रैहन्दा।

यूहन्ना 12:47

जे कोई मेरी गल्लां सुणी करी ना मन्ने, तां मैं तिसजो गलत नी ठैहरादां, किजोकी मैं दुनिया जो गलत ठैहराणे तांइ नी, पर दुनिया रे लोक्कां छुटकारा दैणे तांइ आए रा है।

यूहन्ना 12:6

तिनिये ए गल्ल इस तांइ नी बोल्ली कि तिसजो गरीबां री चिन्ता थी, पर इस तांइ किजोकी ओ चोर थिया, ते उन्हेरी पैसे री थैल्ली हमेसा तिसका रैहंदी थी, ते जे किच्‍छ भी उस बिच पाया जादां थिया, ओ कड्डी लिदां थिया।

यूहन्ना 3:17

परमेश्वर ने अपणे पुत्तर जो दुनिया बिच इस तांइ नी भेज्जेया कि दुनिया रे लोक्कां पर सजा रा हुकम दे, पर इस तांइ कि दुनिया रे मणू तिसेरे जरिए छुटकारा पाए।

यूहन्ना 5:40

फिरी भी तुसा हमेसा री जिन्दगी पाणे तिकर मेरे का आणा नी चाह्‍ंदे।

यूहन्ना 6:33

परमेश्वर री रोट्टी ओ ही है, जेडी स्वर्ग का उत्तरी करी दुनिया रे लोक्कां जो जिन्दगी दिन्दी।

यूहन्ना 6:51

हमेसा री जिन्दगी री रोट्टी, जे स्वर्ग का उतरे री है, से मैं है, जे कोई इस रोट्टी जो खान्दा, तिनिये हमेसा तांइ जिन्दा रैह्णा ते जे रोट्टी मैं दुनिया रे लोक्कां जो जिन्दगी तांइ दैणी, से मेरा सरीर है।

रोमियों 2:21

इधेरे तांइ जां तू दूज्जेयां जो सिखांदा, तां तू अप्पु जो किजो नी सिखांदा? तू जे चोरी ना करणे जो बोलदा, अप्पु ही चोरी करदा,

1 तीमुथियुस 1:15

जे गल्लां मैं तुसा जो दस्सी से सच्ची ते पूरी तरिक्के कने भरोस्सेमंद हिन किजोकी मसीह यीशु असी पाप्पी लोक्कां जो छुटकारा दैणे तांइ इस दुनिया बिच आए ते तिन्हा बिच सबका बड्डा पाप्पी मैं है।

इब्रानियों 6:17

इधेरे तांइ परमेश्वर ने भी कसम खाई, किजोकी से लोक्कां जो दिखाणा चाह्‍ंदे थिये कि तिन्हा ने जे वादा कित्ते रा है, तिसजो उन्हा ने जरुर पूरा करणा।

इब्रानियों 7:25

इधेरे तांइ जे मणू मसीह यीशु रे जरिए परमेश्वर का आंदे, से तिन्हा लोक्कां रा पूरा छुटकारा दिंदे, किजोकी मसीह यीशु तिन्हा लोक्कां तांइ बिचौल्ले रे तौर पर हमेसा प्रार्थना करदे रैहन्दे।

2 पतरस 1:11

ते परमेश्वर ने भी तुसा जो बड़ी खुसी कने स्वर्ग लेई आणा जित्ते मसीह यीशु रैह्‍न्दे, जे असा रे प्रभु ते जे असा जो छुटकारा दिंदे, ते जिन्हा ने इक्क राज्जे रे तौर पर हमेसा-हमेसा तिकर राज करणा।