याकूब 4:11 - चम्बयाली नौआ नियम

¹¹ ओ संगी विश्वासियों, इक्क दूए री बदनामी मत करेया करो, जे अपणे संगी विश्वासी री बदनामी करदा या तिस पर इल्जाम लादां, तां से मूसा रे कानून री बदनामी करदा ते मूसा रे कानून पर इल्जाम लादां, ते तू मूसा रे कानून पर चलणे वाला नी पर तिस पर हाकिम ठैहरेया।

याकूब 4:11 ပူးပေါင်းရင်းမြစ်များ

लूका 6:37

कुसकी पर इल्जाम मत लाओ, ताकि हिसाब-किताब रे बेल्ले तुसा पर भी इल्जाम नी लगाये जाये दूज्जेयां जो कसुरवार मत समझो, ताकि तुसा भी कसुरवार नी समजे जाओ पर, दूज्जेयां जो माफ करी देया करो, तां तुसा जो भी माफ कित्ता जाणा।

रोमियों 2:1

दूज्जेयां पर इल्जाम लाणे वाले लोक्कों, तुसा जे कम्म करदे तिस तांइ तुसा का कोई बहान्ना नी है किजोकी जिस गल्ल बिच तुसा दूज्जे लोक्कां पर इल्जाम लांदे, तिस बिच अप्पु जो गलत ठैहरांदे किजोकी तुसा दूज्जेयां पर जे इल्जाम लांदे, से ही कम्म अप्पु भी करदे।

रोमियों 2:13

किजोकी मूसा रे कानून जो सुनणे वाले मणू नी, पर कानून जो मनणे वाले मणू धार्मिक ठैहराए जांदे।

रोमियों 7:7

तां असी कै बोलण? कै मूसा रा कानून पाप है? बिल्कुल भी नी! बल्कि मूसा रे कानून री वजह कने ही मैं अपणे पाप जो पैछाणेया: मूसा रा कानून अगर नी बोलदा, कि लालच मत कर, तां मैं नी जाणना थिया कि लालच करणा पाप है।

1 कुरुन्थियों 4:5

इधेरे तांइ, पैल्ले ही कुसकी गल्ल रा हिसाब कताब मत करेया करो, बल्कि जां तांइ प्रभु नी आंदे तां तांइ रुकी रेयो। किजोकी तिन्हा ने लोक्कां री दिल री लुके री गल्लां रे बारे बिच साफ-साफ दसणा जिन्हा रे बारे बिच कोई नी जाणदा। तिन्हा ने लोक्कां रे दिल रे लुके रे इराद्देयां जो साफ-साफ ज़ाहिर करणा। तां फिरी परमेश्वर ने सारेयां री तारिफ करणी।

2 कुरुन्थियों 12:20

किजोकी मेरे जो डर है, कि कुते इय्यां ना होई जाए कि जां मैं तुसा का आं, तां जदेया मैं चाह्‍ंदा, तुसा तदेय ना होण, ते तुसा भी मेरे जो तदेया ना पाओ जदेया तुसा मेरे जो चाह्‍ंदे। ते मेरे जो डर है कि तिसेरी वजह कने तुसा बिच लड़ाई, हिरस, गुस्सा, विरोध, मतलबीपन, चुगली, घमण्ड, धोखा-धड़ी ते बखेड़े होई जाणे।

इफिसियों 4:31

सबणी किस्मे री कड़वाट, ते गुस्से ते लैहर-र ते कहला, ते बेजती, सारे बैर भाव समेत तुसा का दुर कित्ते जान्

1 तीमुथियुस 3:11

सेवादारां री लाड़ियां रा लोक्कां बिच खरा नां होणा चाएदा। से मणूआं पर इल्जाम लाणे वाली नी होणा चाएदी, पर तिन्हा जो चज्ज कने बर्ताव करणा चाएदा ते से पूरे तरिक्के कने भरोस्सेमंद होणा चाएदी।

2 तीमुथियुस 3:3

बेरहम, दूज्जेयां जो माफ ना करणे वाले, दूज्जेयां री गलतियां कडणे वाले, अपणी शरीरी इच्छा पर काबू ना रखणे वाले, मार-कुटाई करणे वाले, भलाई रे कम्मां रे दुश्मण,

तीतुस 2:3

इय्यां ही बुजुर्ग जनानियां भी इदेय हिसाब कने बर्ताव करण जिस कने परमेश्वर जो हर गल्ल बिच महिमा मिल्ले। से मणूआं पर इल्जाम लाणे वाली ते सराबी ना होण पर से ठीक जिन्दगी जीणे री शिक्षा दैणे वाली बनण।

याकूब 1:16

ओ मेरे प्यारे संगी विश्वासियों, धोखा मत खांदे।

याकूब 1:19

ओ मेरे प्यारे संगी विश्वासियों, तुसा ए गल्ल जाणी लेयो, हर इक्क मणू सुनणे तांइ हमेसा तयार, सबर कने बोलणे वाला ते अपणे गुस्से जो काबू बिच रखणे वाला हो

याकूब 1:25

पर जे मणू तिस व्यवस्था पर ध्यान करदा रैहन्दा जे अजादी दिंदी, तिस मणू जो अपणे कम्मां बिच इधेरे तांइ आशीष मिलणी किजोकी से सुणी करी भूलदा नी, पर तिसजो पूरे मन कने मनदा।

याकूब 2:8

तां भी जे अगर तुसा पवित्रशास्त्र रे इस खास हुकम जो मनदे “तू अपणे पड़ोसी कने अप्पु सांई प्यार रख,” तां ठीक करदे।

याकूब 5:10

ओ संगी विश्वासियों, जिन्हा भविष्यद्वक्ता ने प्रभु रे नां कने गल्लां कित्ती, तिन्हेरे दुख चुक्कणे ते सबर रखणे जो इक्क आर्दश समझो।

याकूब 5:7

इधेरे तांइ ओ मेरे संगी विश्वासियों, प्रभु रे आणे तिकर सबर रखो। जिय्यां किसान दुनिया री कीमती फसल री उम्मीद रख्खी करी पैल्ली ते आखरी बरखा तिकर सबर रखदा ताकि फसल उगे ते बड्डिणे तांइ तैयार होई जाए।

याकूब 5:9

ओ संगी विश्वासियों, इक्क दूज्जे पर मत कुड़कुड़ाओ, ताकि परमेश्वर जे हाकिम है तुसा जो सजा ना दे, ते से अवे बड़े नेड़े है ते वस पुजणे ही वाला है।

1 पतरस 2:1

इधेरे तांइ हर तरिक्के री नफरत, धोख्खेबाजी, ढोंग, हिर्स ते लोक्कां री बदनामी करणा छड्डी देयो।