गलातियों 3:1 - चम्बयाली नौआ नियम

¹ ओ गलातिया कलीसिया रे मणूओं, तुसा नासमझ होई गेरे हिन। मैं तुसा जो साफ-साफ समजाया थिया कि यीशु मसीह ने सुली पर कुर्बानी किजो दित्ती थी, पर फिरी भी तुसा किय्यां धोखा खाई सकदे?

गलातियों 3:1 ပူးပေါင်းရင်းမြစ်များ

2 कुरुन्थियों 11:3

पर मैं डरदा कि जिय्यां शैतान ने कीड़े रे रुप बिच, अपणी चलाकी कने हव्वा जो बैह्काया थिया, तिय्यां ही तुसा रे मन तिस सिधाई ते पवित्रता, जिस कने तुसा जो मसीह यीशु रा आदरमान करणा चाएदा, कुदखी भ्रष्ट नी कित्ते जाण।

प्रकाशित वाक्य 2:20

मेरे जो तेरे खिलाफ ए बोलणा है कि पैल्ले जमान्ने राणी ईज़ेबेल जदेई इक्क जनानी तुसा बिच-मझाट्टे है। से अप्पु जो भविष्यद्वक्तिणी बोलदी पर मेरे विश्वासियां जो झूठ्ठी शिक्षां सिखांदी। से लोक्कां जो ए खोठ्ठी गल्लां सिखाई करी भटकांदी कि हमेसा तिकर जीणे तांइ मूर्तां जो भेंट चढ़ाए री चीजां खाओ।

गलातियों 1:6

परमेश्वर पिता ने तुसा जो मसीह यीशु रे अनुग्रह रे जरिये चुणी लित्ते रा है। पर मेरे जो हैरानी हुंदी कि तुसा मणू इतणी तौले कुसकी बखरे सुब बसेख जो मनणा सुरु करी के परमेश्वर का दुर होई गेरे हिन।

1 पतरस 4:17

से समय आई गे रा है कि परमेश्वर लोक्कां का हिसाब लैणा सुरु करी दैण। किजोकी तिन्हा ने असी विश्वासी लोक्कां का ही हिसाब-किताब लैणा सुरु करणा, ता फिरी तिन्हा ड्रौणी चीजां रे बारे बिच सोच्चो जे सुब बसेख री ना-फरमानी करणे वालेयां कने होणी।

2 पतरस 2:18

जां से लोक्कां जो सिखाणा लगदे, तां से बेकार ते घमंड कने भरपूर शब्दां रा इस्तेमाल करदे। से लोक्कां जो ए सिखांदे कि से अपणे सरीर री बेशर्मी भरी इच्छां जो पूरा करी सकदे। ते से लोक्कां जो पाप री से ही चीजां करणे बिच दुबारा भटकाई दिंदे जिस जो करणा तिन्हा ने हाल ही बिच छड्डे रा हुंदा।

इब्रानियों 11:8

जां परमेश्वर ने अब्राहम जो कुसकी जगाह् पर जाणे तांइ सद्देया, तां तिनिये विश्वास करी के परमेश्वर रे हुकम जो मन्नी करी, इक्क इदेय जगाह् पास्से निकली गेया, जिस जगाह् जो परमेश्वर ने तिसजो तिसेरी अपणी जायदाद रे तौर पर देई दैणी थी। पर से ए नी जाणदा थिया, कि से कुते जाया करदा है, पर से ता भी निकली गेया।

इफिसियों 4:14

ताकि अग्गे जो असी बच्चेयां सांई ना रैह्ण, असी तिन्हा किस्तियां सांई नी रैह्णा जे लहरां ते हवा कने इत्ते-उत्ते डोलदी रेह्न्दी। इसेरा मतलब ए है कि चलाक ते ठग लोक्कां ने फिरी असा जो अपणी झूठ्ठी शिक्षा कने बेवकूफ नी बणाई सकणा।

गलातियों 4:9

पर अवे ता असा ने परमेश्वर जो जाणी लित्ते रा है, बल्कि इय्यां बोलणा जादा सही होणा कि पैल्ले परमेश्वर ने असा कने रिस्ता बणाया। तां फिरी किय्यां तिस कमजोर ते सुरुआती शिक्षा पास्से मुड़ी सकदे? तुसा फिरी किजो तिन्हेरे गुलाम बणना चाह्‍ंदे?

गलातियों 3:3

कै तुसा इन्ने जादा नासमझ होई गेरे हिन कि तुसा ने अपणी नौई जिन्दगी जो पवित्रात्मा रे कम्मां रे हिसाब कने सुरु ता कित्ता पर अवे बाकि री जिन्दगी अपणी मर्जी कने जीणा चाह्‍ंदे?

1 पतरस 1:22

सच्चाई जो मन्नी करी चलणे री वजह कने अवे तुसा सुच्चे कित्ते गे, अवे तुसा जो तन-मन लाई करी संगी विश्वासियां कने आपसी प्यार रखणा चाएदा। बड़ी चाह्‍त ते पूरे दिल कने इक्क-दूए कने प्यार रख्खो।

इब्रानियों 5:9

ते इस तरिक्के कने परमेश्वर ने तिन्हा जो सिद्ध बड्डा पुरोत्त बणाई दित्ता, तिन्हेरे मनणे वाले सारे मणूआं तांइ हमेसा री जिन्दगी री वजह बणी गे।

इफिसियों 5:15

इधेरे तांइ ध्यान देयो कि तुसा कदेइ जिन्दगी जिया करदे हिन, बेवकूफ लोक्कां सांई मत बणो पर समजदार बणो।

1 तीमुथियुस 6:4

तां से मणू घमंडी है, ते से किच्‍छ भी नी समजदा। इदेया मणू वस बुरी, हिर्स, झगड़े ते गंदी गल्लां रे बारे बिच बैह्स ते झगड़े करणा पसंद करदा।

गलातियों 2:14

पर जां मैं ए दिख्खेया कि से मणू तिस सच्चाई रे हिसाब कने नी चलेया करदे हिन जे सुब बसेख सिखांदी तां मैं लोक्कां रे सामणे पतरस जो बोल्लेया, जां तू यहूदी होई करी भी गैर यहूदी लोक्कां सांई जिन्दगी जिंदा, तां फिरी किजो गैर यहूदी लोक्कां कने यहूदियां सांई जीणे तांइ जबरदस्ती करेया करदा है?

1 कुरुन्थियों 11:26

किजोकी जा कदी तुसा इस रोट्टी बिच का खादें या इस कटोरे बिच का अंगूर रा रस्स पिन्दे, जां तांइ प्रभु हटी ना आण तां तांइ तिन्हेरी कुर्बानी रा प्रचार करदे रेयो।

1 कुरुन्थियों 2:2

किजोकी मैं ए ठाणी लित्ता थिया कि मैं तुसा लोक्कां बिच मसीह यीशु ते तिन्हेरे सुली पर जान दैणे रे अलावा होर कुसकी चीज रे बारे बिच गल्ल ना करां।

रोमियों 6:17

पर परमेश्वर रा शुकर हो, कि तुसा जे पाप रे गुलाम थिये, अवे मन कने तिन्हा शिक्षां जो मनणे वाले बणी गेरे हिन, जे मैं तुसा जो मसीह रे बारे बिच सिखाई थी।

रोमियों 2:8

पर जे मणू मतलबी हिन ते सच्चाई जो नी मनदे, पर बुरे कम्म करणा चाह्‍ंदे, तिन्हा पर परमेश्वर रा गुस्सा ते कहर भड़कणा।

प्रेरितां रे कम्म 6:7

परमेश्वर रा वचन फैलदा गेया ते यरुशलेम सहर बिच चेल्‍लेयां री गिनती मती बदद्धी गेई ते मते सारे पुरोत्तां ने भी मसीह बिच विश्वास करणे रे इस बसेख जो अपणाया।

2 थिस्सलुनीकियों 1:8

अते जे मणू परमेश्वर जो नक्कारदे ते जे असा रे प्रभु यीशु रे सुब बसेख जो नी मनदे तिन्हा जो सजा दित्ती जाणी

इफिसियों 3:8

हालांकि मैं परमेश्वर रे सारे लोक्कां बिच का सारेयां का घट काबिल है, पर फिरी भी परमेश्वर ने मेरे जो ए सौभाग्य दित्ते रा है कि मैं गैर यहूदियां बिच ए सुब बसेख सूणां कि मसीह यीशु भरपूर आशीषां रा जरिया हिन,

2 कुरुन्थियों 10:5

असी इन्सानी बैह्सबाजी ते घमंड री वजह कने आणे वाली हर इक्क बाधा जो तोड़ी दिंदे जे लोक्कां जो परमेश्वर जो जानणे का दुर रखदी। ते असी तिन्हेरे हर इक्क चाहत जो काबू बिच करी के, तिन्हा जो मसीह यीशु री गल्ल मनणे वाले बणांदे।

रोमियों 10:16

पर बड़े घट जणेया ने सुब बसेख पर विश्वास कित्ता। जिय्यां कि यशायाह भविष्यद्वक्ता ने पवित्रशास्त्र बिच बोल्ले रा है, “ओ प्रभु, बड़े घट लोक्कां ने असा रे बसेख पर विश्वास कित्ता।”

लूका 24:25

तां यीशु ने तिन्हा दो चेल्‍लेयां जो बोल्लेया, तुसा बड़े बेवकूफ हिन भविष्यद्वक्ता ने शास्त्र बिच जे किच्‍छ बोल्लेया थिया तिन्हा गल्लां पर विश्वास करणा तुसा जो बड़ा मुशकल लग्गेया करदा है?

मत्ती 24:24

किजोकी झूठ्ठे मसीह ते झूठ्ठे भविष्यद्वक्ता खड़ी उठणे, ते बड्डी-बड्डी चीजां ते हैरान करणे वाले चमत्कार दिखाणे कि जे होई सके ते चुणे रे लोक्कां जो भी भड़काई दैण।

मत्ती 7:26

पर जे कोई मेरे इन्हा वचनां जो सूणदा पर उन्हा पर चलदा नी, से उस बेवकूफ मणू सांई हिन, जिनिए अपणा घर रेत पर बणाया।

प्रेरितां रे कम्म 16:6

से फ्रूगिया ते गलातिया प्रदेशां का होई करी निकले किजोकी पवित्रात्मा ने तिन्हा जो एशिया प्रदेश बिच वचन सुनाणे जो मना करी दित्तेया थिया।

गलातियों 5:11

पर ओ संगी विश्वासियों, जे अगर मैं मसीह का छुटकारा मिलणे रे बसेख कने-कने खतना कराणे रा प्रचार करदा रैहन्दा ता ना ही कोई मेरे बुरा मनदा ते ना ही मेरे पर कोई जुल्म करदा।