गलातियों 2:2 - चम्बयाली नौआ नियम

² ते मैं तित्ते इधेरे तांइ गेया किजोकी परमेश्वर ने मेरे जो जाणे तांइ बोल्लेया थिया, अते जे सुब बसेख मैं गैर यहूदी लोक्कां बिच प्रचार करदा थिया, तिसजो मैं एकांत बिच कलीसिया रे प्रधान मणूआं जो सुणाया ताकि जे कम्म मैं पैल्ले कित्ते थिये से बेकार नी ठैहरे।

गलातियों 2:2 ပူးပေါင်းရင်းမြစ်များ

मत्ती 10:16

दिख्खो, जिय्यां कोई भेड़ भेड़िये रे बिच मझाटे हो तिय्यां ही मैं तुसा जो तिन्हा लोक्कां बिच भेज्जेया करदा है। इधेरे तांइ कीड़े सांई चलाक अते कबूतरां सांई भोले बणो

प्रेरितां रे कम्म 15:12

तां सारी सभा चुपचाप होई करी बरनबास ते पौलुस री सुनणे लग्गे, कि परमेश्वर ने तिन्हेरे जरिए गैर यहूदियां रे मणूआं बिच कदेइ-कदेइ निशानियां, ते अनौखे कम्म दिख्खाये

प्रेरितां रे कम्म 15:2

जां पौलुस ते बरनबास रा तिन्हा कने मिलणे तांइ यरुशलेम सहर बिच आए तां तिन्हा कने बड़ी बैहस-बाजी होई, ते ए फैसला कित्ता कि पौलुस ते बरनबास, ते असा बिच का किच्‍छ मणू इस गल्ल रे बारे बिच यरुशलेम सहर बिच रैह्णे वाले खास प्रेरितां का ते बुजुर्ग मणू का जाण।

प्रेरितां रे कम्म 15:4

जां पौलुस ते बरनबास यरुशलेम सहर बिच पूज्जे, तां कलीसिया ते खास प्रेरितां ते बुजुर्ग मणू तिन्हा कने खुसी कने मिल्ले, ते तिन्हा ने दस्सेया कि परमेश्वर ने तिन्हा कने होई करी कदेय-कदेय कम्म कित्ते थिये

प्रेरितां रे कम्म 18:9

राती प्रभु जी ने दर्शन रे जरिए पौलुस जो बोल्लेया, मत डर प्रचार करदा जा ते चुप मत हो

प्रेरितां रे कम्म 23:11

तिस्सी रात्ती प्रभु यीशु ने तिसेरे नेड़े खड़े होई करी बोल्लेया, ओ पौलुस, हिम्मत कर किजोकी जिय्यां तैं यरुशलेम अन्दर मेरी गवाई दित्ती, तिय्यां गवाई तिज्जो रोम अन्दर भी दैणा पैणी।

प्रेरितां रे कम्म 5:34

पर गमलीएल नां रे इक्क फरीसी ने जे शास्त्रि लोक्कां ते सारे लोक्कां बिच बड़ा मन्नेया जादां थिया, सभा बिच खड़ी करी प्रेरितां जो थोड़ी देर तांइ बाहर करी दैणे रा हुकम दित्तेया,

रोमियों 9:16

इधेरे तांइ परमेश्वर तिन्हा जो चुणदा, जिन्हा पर से दया करणा चाह्‍ंदे, ते ए सारा किच्‍छ असा री मर्जी या कम्मां पर निर्भर नी करदा, पर सिर्फ परमेश्वर री दया पर निर्भर करदा।

1 कुरुन्थियों 1:23

पर असा तां तिस सुली पर चढ़ाये मसीह यीशु रा प्रचार करदे जिन्हा ने असा जो पाप्पां का छुड़ाणे तांइ सुली पर जान दित्ती थी, किजोकी यहूदी लोक्कां ने ए सोच्चेया थिया कि मसीह ने हमेसा जीणा इधेरे तांइ से इस गल्ल पर विश्वास नी करी सके कि यीशु ही मसीह थिये।

1 कुरुन्थियों 2:2

किजोकी मैं ए ठाणी लित्ता थिया कि मैं तुसा लोक्कां बिच मसीह यीशु ते तिन्हेरे सुली पर जान दैणे रे अलावा होर कुसकी चीज रे बारे बिच गल्ल ना करां।

1 कुरुन्थियों 9:24

तुसा जो पता ही है कि दौड़ बिच तां मते जणे दौड़दे, पर ईनाम सिर्फ इक्क जणे जो ही मिलदा। तुसा तिय्यां ही दौड़ो कि जीत्ती जाओ।

1 कुरुन्थियों 9:26

इसी वजह कने मैं अपणे इक्क ही मकसद पास्से दौड़दा जांदा ते जिय्यां इक्क कुश्तिबाज़ अपणे मुक्केयां जो काबू बिच रखदा, तिय्यां ही मैं भी अपणे विश्वासी जिन्दगी जो मसीह रे काबू बिच जिंदा।

2 कुरुन्थियों 12:1

हालांकि मेरे तांइ घमंड करणा फायदेमंद ता नी है, पर मेरे जो घमंड करणा पैंदा। पर अवे मैं परमेश्वर रे पास्से का मिल्ले रे दर्शनां ते दस्से री गल्लां रे बारे बिच चर्चा करणी।

गलातियों 1:12

किजोकी मेरे जो से असा रे मणू का नी मिल्लेया, ते कुसकी धर्म गुरु ने मेरे जो इसेरी शिक्षा नी दित्ते री है, पर मेरे जो से यीशु मसीह रे जरिये मिल्लेया, जां से मेरे पर प्रकट होए थिये।

गलातियों 1:6

परमेश्वर पिता ने तुसा जो मसीह यीशु रे अनुग्रह रे जरिये चुणी लित्ते रा है। पर मेरे जो हैरानी हुंदी कि तुसा मणू इतणी तौले कुसकी बखरे सुब बसेख जो मनणा सुरु करी के परमेश्वर का दुर होई गेरे हिन।

गलातियों 2:6

पर यरुशलेम कलीसिया रे प्रधान मणूआं ने मेरे पर तिस बसेख जो बदलणे रा मेरे पर कोई दवाब नी पाया जे मैं सुणांदा। मेरे जो इस गल्ल रा कोई फरक नी पैंदा कि से प्रधान मणू कै हिन, किजोकी परमेश्वर कोई भेदभाव नी करदे। मेरे जो तिन्हा प्रधान मणूआं का कोई फायदा नी होया।

गलातियों 2:9

याकूब, कैफा ते यूहन्ना जिन्हा जो कलीसिया रे खम्भे सांई समजेया जांदा, जां तिन्हा ने मेरे पर होए रे परमेश्वर रे अनुग्रह जो समजी लेया, तां तिन्हा ने मेरे जो ते बरनबास जो अपणी मण्डली रा सहयोगी मन्नी लेया ते से इस गल्ल पर सहमत होई गे कि से यहूदी मणूआं बिच ते असी गैर यहूदी मणूआं जो बसेख सूणाणा जारी रखण।

गलातियों 5:7

परमेश्वर कने तुसा रा रिस्ता ता बड़ा छैल होया करदा थिया, अवे कुनिए तुसा जो रोक्की दित्तेया कि तुसा मसीह रे सुब बसेख री सच्चाई जो ना मन्नो?

फिलिप्पियों 2:16

ताकि जिस दिन मसीह यीशु ने हटी आणा तिस दिन मेरे जो ए घमंड होणा कि मेरी कोशीशां ते मैहनत फायदेमंद होई।

फिलिप्पियों 2:29

इधेरे तांइ तुसा प्रभु बिच तिस कने बड़ी खुसी कने मिलणा ते तिसेरे जदेय लोक्कां रा आदर करेयो।

1 थिस्सलुनीकियों 3:5

इधेरे तांइ जां मेरे का तुसा रा हालचाल जाणे बगैर रेया नी गेया, तां मैं तुसा रे विश्वास रा हाल जानणे तांइ तीमुथियुस जो भेज्जी दित्ता। मेरे जो ता ए डर थिया कि कुते शैतान ने तुसा जो परिक्षा बिच पाई करी भटकाई दित्ते रा हो ते असा री सारी मैहनत बेकार होई गे री हो।

2 तीमुथियुस 4:7

इक्क पहलवान सांई मैं भी इक्क ठीक लड़ाई लड़े री है, मैं से कम्म पूरा कित्ते रा है जे मेरे जो मसीह ने दित्तेया थिया जिय्यां कि इक्क दौड़ लाणे वाला अपणी दौड़ पूरी करदा ते मैं आखिर तिकर भरोस्सेमंद रेया।

इब्रानियों 12:1

जां विश्वास बिच जीणे वाले इन्हा मणूआं री मती सारी गवाहियां जो असी जाणदे, इधेरे तांइ आओ, असी तिन्हा सारी चीजां जो छड्डी दैण, जे असा जो रोकदी, ते उलझाणे वाले जो दुर करी के, सबर कने तिस रस्ते पर बदधे जाण, जिस पर असा जो जाणा चाएदा।