गलातियों 1:1 - चम्बयाली नौआ नियम

^1-2 मैं पौलुस, जे इक्क प्रेरित है, गलातिया प्रदेश री कलीसिया जो ए चीठ्ठी लिख्खेया करदा है। ते जिन्ने भी विश्वासी मेरे कन्ने हिन, तिन्हेरे पास्से का तुसा जो नमस्कार। मेरे जो प्रेरित होणे तांइ सद्देया गेया है। पर मेरे जो किच्‍छ लोक्कां री मडंली ने प्रेरित नी बणाया, या कुसकी मणू ने मेरे जो प्रेरित बणने तांइ नी भेज्जेया। ए मसीह यीशु ते पिता परमेश्वर री वजह कने ही होया, जिन्हा ने मसीह यीशु जो मुर्देयां बिच का फिरी जिन्दा कित्तेया थिया।

गलातियों 1:1 ပူးပေါင်းရင်းမြစ်များ

1 कुरुन्थियों 1:1

मैं पौलुस, जे परमेश्वर री मर्जी रे हिसाब कने यीशु मसीह रा प्रेरित है, कुरिन्थुस सहर री कलीसिया रे विश्वासियां जो ए चीठ्ठी लिख्खेया करदा है। भाई सोस्थिनेस कने मिली करी मैं तुसा लोक्कां जो ए चीठ्ठी भेज्जेया करदा है जिन्हेरा रिस्ता परमेश्वर ने मसीह यीशु कने बणाई करी अपणे मणू बणाणे तांइ अलग कित्ते रा है, ते तुसा जो अपणे बणने तांइ सद्दे रा है, बिल्कुल तिय्यां ही जिय्यां तिन्हा ने हर जगाह् तिन्हा दूज्जे लोक्कां जो भी चुणेया जे तिन्हेरी सेवा करदे किजोकी से असा रे प्रभु मसीह यीशु हिन।

प्रकाशित वाक्य 1:5

ते मसीह यीशु रे पास्से का भी, जिन्हेरी गल्लां रा असी भरोस्सा करी सकदे। से ही हिन जे सबका पैल्ले मरणे का बाद मुर्देयां बिच का जिन्दे होई गे ते से दुनिया रे सारे राज्जेयां रे राज्जे हिन।

रोमियों 1:1

मैं पौलुस, मसीह यीशु रा दास है, ते परमेश्वर ने मेरे जो प्रेरित बणने तांइ चुणे रा है। ते तिन्हा ने तिस सुब बसेख रा प्रचार करणे तांइ अलग कित्ते रा है,

इफिसियों 3:8

हालांकि मैं परमेश्वर रे सारे लोक्कां बिच का सारेयां का घट काबिल है, पर फिरी भी परमेश्वर ने मेरे जो ए सौभाग्य दित्ते रा है कि मैं गैर यहूदियां बिच ए सुब बसेख सूणां कि मसीह यीशु भरपूर आशीषां रा जरिया हिन,

तीतुस 1:3

ते अवे बिल्कुल सही समय पर परमेश्वर ने ए सुब बसेख असा पर जाहिर कित्ते रा है ते असी इसेरा प्रचार सारे मणूआं बिच करदे। परमेश्वर जे असा जो छुटकारा दिंदे, तिन्हा ने मेरे जो ए जिम्मेदारी दित्ते री है ते तिन्हा तांइ मेरे जो ए कम्म करणे रा हुकम दित्ते रा है।

2 कुरुन्थियों 1:1

मैं पौलुस परमेश्वर री मर्जी कने मसीह यीशु रा प्रेरित है। ते असा रे विश्वासी भ्याल तीमुथियुस कने कुरिन्थुस सहर बिच परमेश्वर री कलीसिया जो ते अखाया प्रदेश रे परमेश्वर रे सारे लोक्कां जो ए चीठ्ठी लिख्खेया करदा है।

2 तीमुथियुस 1:1

मैं पौलुस ए चीठ्ठी तीमुथियुस जो लिख्खेया करदा है। परमेश्वर ने मेरे जो मसीह यीशु रा प्रेरित बणने तांइ चुणे रा है ताकि मैं तिस बसेख रा प्रचार करां कि परमेश्वर ने सारे लोक्कां जो से हमेसा री जिन्दगी दैणा रा वादा कित्ते रा है जे मसीह यीशु बिच विश्वास करणे रे जरिये मिलदी।

रोमियों 10:9

जे अगर कोई भी मणू सारेयां सामणे, अपणे दिल कने यीशु जो प्रभु मन्नी लै, ते अपणे मन बिच ए विश्वास करे कि परमेश्वर ने तिन्हा जो मुर्देयां बिच का जिन्दा कित्ता, तां परमेश्वर ने तिसजो तिसेरे पाप्पां का बचाणा।

प्रेरितां रे कम्म 22:10

तां मैं बोल्लेया, ओ प्रभु जी, मैं कै करां? प्रभु जी ने मेरे जो बोल्लेया, अवे उठी करी दमिश्क कस्बे अन्दर जा ते जे किच्‍छ तेरे करणे तांइ ठैह्राया गे रा है, तित्ते तिज्जो दस्सी दित्तेया जाणा।

प्रेरितां रे कम्म 9:6

पर अवे उठी करी कस्बे बिच जा, अते जे तेरे जो करणा है से तेरे जो दस्सी दित्तेया जाणा,

प्रकाशित वाक्य 2:8

तिन्हा ने मेरे जो ए भी बोल्लेया, “ए बसेख स्मुरना सहर री कलीसिया रे स्वर्गदूत जो लिख्ख, मैं सुरुआत ते आखिर है। मैं इक्क वरी मरेया, पर अवे मैं जिन्दा है, ते हमेसा-हमेसा तांइ जिन्दा ही रैह्णा। जे मरी गेया थिया, अते अवे जिंदा होई गे रा है। मैं तुसा जो ए बोल्लेया करदा है,

प्रकाशित वाक्य 1:18

मैं जिंदा है। मैं मरी गेया थिया, पर अवे दिख, मैं हमेसा-हमेसा तांइ जिंदा है। मौत अते पताल जित्ते मरे रे लोक्कां री आत्मां रेह्न्दी, तिस पर मेरा हक है।

1 पतरस 1:21

मसीह यीशु ने जे असा तांइ कित्तेया तिसेरी वजह कने अवे तुसा परमेश्वर बिच विश्वास करदे। तिन्हा ने ही मसीह यीशु जो मुर्देयां बिच का फिरी जिन्दा कित्तेया ते तिन्हा जो महिमा दित्ती। इधेरे तांइ परमेश्वर बिच तुसा रा विश्वास ते आस अवे मजबूत है।

इब्रानियों 13:20

अवे असा रा सांती दैण वाला परमेश्वर, जिन्हा ने असा रे प्रभु यीशु मसीह जो मुर्देयां बिच का जिन्दा कित्तेया, हमारे जैसी भेड़ां तांइ इक्क पुहाल सांई हिन। तिन्हा ने अपणी जान री कुर्बानी देई करी हमेसा री वाचा जो पक्का कित्तेया।

रोमियों 14:9

किजोकी मसीह यीशु इधेरे तांइ ही मरे, अते मुर्देयां बिच का जिन्दे भी होई गे, ताकि से मरे रे ते जिन्दे, दोन्नां रे प्रभु ठैहरे।

यूहन्ना 20:21

तां यीशु ने तिन्हा जो फिरी बोल्लेया, तुसा जो सांती मिल्लो जिय्यां परम पिता ने मेरे जो भेज्जेया है, तिय्यां ही मैं भी तुसा जो दुनिया रे लोक्कां का भेजदा।

यूहन्ना 10:30

मैं ते प्यो इक्क ही हिन।

यूहन्ना 5:19

इस पर यीशु ने तिन्हा जो बोल्लेया, मैं तुसा जो सच-सच बोलदा, पुत्तर अपणी मर्जी कने किच्‍छ नी करी सकदा, पर सिर्फ से ही, जे परमेश्वर पिता जो करदे दिखदा, किजोकी जिन्हा-जिन्हा कम्मां जो “पिता” करदा, तिसजो पुत्तर भी तिसी तरिक्के करदा।

प्रेरितां रे कम्म 3:15

ते तुसा ने हमेसा री जिन्दगी रे राजकुमार जो मारी रख्खेया, जिस जो परमेश्वर ने मुर्देयां बिच का जिन्दा कित्ता ते इस गल्ल रे असी गवाह हिन, ते तिन्निए तिसरा सीद्दा हत्थ पकड़ी करी तिसजो चुक्केया ते तिस्सी बेल्ले तिसेरे पैरां ते गोड्डेयां बिच जोर आई गेया।

गलातियों 1:15

पर तां परमेश्वर अपणे पुत्तर जो मेरे पर प्रकट करणे जो खुस होए, ताकि मैं यीशु रे बारे बिच सुब बसेख रा प्रचार करां। परमेश्वर ने ही मेरे जो मेरे पैदा होणे का पैल्ले ही चुणेया, ते अपणे अनुग्रह कने मेरे जो अपणी सेवा करणे तांइ सद्दी लित्तेया। यीशु रे अप्पु जो मेरे पर ज़ाहिर करणे का बाद, ना ता मैं कुसकी का सलाह मंगणे तांइ गेया, ते ना ही मैं यरुशलेम बिच मेरे का पैल्ले वाले प्रेरितां का गेया। पर मैं अरब देस जो गेया, ते बाद बिच तित्ते का दमिश्क सहर जो हटी आया।