इफिसियों 5:25 - चम्बयाली नौआ नियम

²⁵ ओ लाड़ेयों, अपणी-अपणी लाड़ियां कने प्यार रखो, जिय्यां मसीह यीशु ने भी कलीसिया कने प्यार कित्ता ते अप्पु जो तिस तांइ कुर्बान करी दित्ता

इफिसियों 5:25 ပူးပေါင်းရင်းမြစ်များ

मत्ती 20:28

जिय्यां मणू रा पुत्तर, जे मैं ही है से इस तांइ नी आया कि उसेरी सेवा-टहल कित्ती जाए, पर इस तांइ आया कि अप्पु सेवा टहल करे ते मते जणेया रे छुटकारे तांइ अपणी जान देई दे।

यूहन्ना 6:51

हमेसा री जिन्दगी री रोट्टी, जे स्वर्ग का उतरे री है, से मैं है, जे कोई इस रोट्टी जो खान्दा, तिनिये हमेसा तांइ जिन्दा रैह्णा ते जे रोट्टी मैं दुनिया रे लोक्कां जो जिन्दगी तांइ दैणी, से मेरा सरीर है।

प्रेरितां रे कम्म 20:28

इधेरे तांइ अपणी ते अपणे सारे झुण्ड री चुकन्ने रेह्ई करी देख-रेख करो जिन्हा परमेश्वर रे लोक्कां बिच पवित्रात्मा ने तुसा जो कलीसिया रे मुखिया बणाए रा है कि तुसा परमेश्वर री कलीसिया री रखवाली करो जिस जो तिसने अपणे खून कने खरीदी लित्ते रा है।

गलातियों 1:4

असा रे परमेश्वर ते पिता री मर्जी रे हिसाब कने मसीह यीशु ने असा रे पाप्पां तांइ अप्पु जो कुर्बान होणे तांइ देई दित्तेया, ताकि असा जो अज्ज रे इस बुरे दुनिया रे असर का बची रैह्ण।

गलातियों 2:20

ए इदेया है कि जां यीशु मसीह सुली पर मरे तिय्यां ही मैं भी मरी गेया ते अवे मैं जिंदा नी रेया, पर मसीह यीशु मेरे बिच जिंदे। अते मैं अवे जे जिंदा है तां सिर्फ तिस विश्वास कने जिंदा है, जे मेरे जो परमेश्वर रे पुत्तर पर है, जिन्हा ने मेरे कने प्यार कित्तेया, अते मेरे तांइ अप्पु जो देई दित्तेया।

इफिसियों 5:2

जिय्यां मसीह यीशु ने तुसा कने प्यार कित्तेया, तिय्यां ही तुसा भी सारेयां कने प्यार करो। मसीह ने अप्पु जो तुसा रे पाप मिटाणे तांइ कुर्बान करी दित्ता ते से कुर्बानी परमेश्वर रे सामणे इक्क खुशबूदार भेंट सांई थिया।

इफिसियों 5:24

जिय्यां कलीसिया मसीह यीशु रे अधीन है तिय्यां ही लाड़ीया भी हर गल्ल बिच अपणे-अपणे लाड़ेयां रे अधीन रहे।

इफिसियों 5:28

इसी तरिक्के कने लाड़ा अपणी लाड़ी कने अपणे सरीर रे बराबर प्यार करे। जे अपणी लाड़ी कने प्यार रखदा, से अप्पु कने प्यार करदा।

इफिसियों 5:33

ए ही गल्ल तुसा बिच का हर इक्क पर लागू हुंदी कि तुसा सारे अपणी लाड़ियां कने अपणे बराबर प्यार रख्खे, ते लाड़ी भी अपणे लाड़े री इज्जत करे।

कुलुस्सियों 3:19

ओ लाड़ेयों, तुसा भी अपणी लाड़ियां कने प्यार कने रेयो ते तिन्हा कने सख्ती मत करो।

1 तीमुथियुस 2:6

सारे लोक्कां शैतान ते पाप रे काबू का छुड़ाणे तांइ मसीह ने अप्पु जो कुर्बान कित्तेया ते तिन्हेरी कुर्बानी सही समय इस गल्ल रा सबूत थी कि परमेश्वर सारे लोक्कां जो छुटकारा दैणा चाह्‍ंदे थिये।

1 पतरस 3:7

तिय्यां ही ओ लाड़ेयों, अपणी लाड़ियां कने बड़ी नरमीयत कने रेयो, तुसा जो ए गल्ल याद रखणी चाएदी कि से तुसा का कमजोर हिन, इधेरे तांइ तुसा जो तिन्हेरी इज्जत करणा चाएदी, किजोकी तुसा दोन्नों तिस वरदान बिच हिस्सेदार हिन जे परमेश्वर ने तुसा जो बड़े अनुग्रह कने दित्ते रा है, जे कि हमेसा री जिन्दगी है। इय्यां ही करेया करो किजोकी जां तुसा प्रार्थना करेया करो तां से तुसा जो सुणे।

प्रकाशित वाक्य 1:5

ते मसीह यीशु रे पास्से का भी, जिन्हेरी गल्लां रा असी भरोस्सा करी सकदे। से ही हिन जे सबका पैल्ले मरणे का बाद मुर्देयां बिच का जिन्दे होई गे ते से दुनिया रे सारे राज्जेयां रे राज्जे हिन।

प्रकाशित वाक्य 5:9

से इक्क नौआ गाणा गाणे लगे, “तू इस कताब री मौहरे खोलणे रे तिस बिच लिख्खे री गल्लां जो पढ़ने रे लायक है, किजोकी तू मारेया गेया थिया ते तैं अपणे खून कने हर इक्क कुल, देस, भाषा, ते लोक्कां जो परमेश्वर तांइ खरीदी लित्तेया।”