इफिसियों 4:31 - चम्बयाली नौआ नियम

³¹ सबणी किस्मे री कड़वाट, ते गुस्से ते लैहर-र ते कहला, ते बेजती, सारे बैर भाव समेत तुसा का दुर कित्ते जान्

इफिसियों 4:31 ပူးပေါင်းရင်းမြစ်များ

प्रेरितां रे कम्म 21:30

तां सारे सहर अन्दर रोला पेई गेया, ते मणू दौड़ी करी कठ्ठी गे ते पौलुस जो पकड़ी करी मन्दिर का बाह्र घसीट्टी अन्देया, अते झट्ट दरवाज्जे बन्द करी दित्ते

रोमियों 3:14

तिन्हेरा गल्लां लाणतां ते कड़वाट कने भरे री है।

1 कुरुन्थियों 14:20

ओ संगी विश्वासियों, इन्हा गल्लां जो समजणे बिच बच्चेयां सांई ना बणो, बुराई करणे बिच तां बच्चेयां सांई अनजाण ही रेयो, पर इन्हा गल्लां जो समजणे बिच अक्कलमंद बणो।

1 कुरुन्थियों 5:8

इधेरे तांइ आओ असा अपणा फसह रा त्योहर मनांदे जिय्यां कि यहूदी मणू तराक्क जो कड्डी करी सूटी दिंदे ते अखमीरी रोट्टी खांदे थिये, तिय्यां ही असा जो भी जिन्दगी तिस हिसाब कने नी जीणा चाएदी जिय्यां असी मसीह यीशु बिच विश्वास करणे का पैल्ले जिंदे थिये।

2 कुरुन्थियों 12:20

किजोकी मेरे जो डर है, कि कुते इय्यां ना होई जाए कि जां मैं तुसा का आं, तां जदेया मैं चाह्‍ंदा, तुसा तदेय ना होण, ते तुसा भी मेरे जो तदेया ना पाओ जदेया तुसा मेरे जो चाह्‍ंदे। ते मेरे जो डर है कि तिसेरी वजह कने तुसा बिच लड़ाई, हिरस, गुस्सा, विरोध, मतलबीपन, चुगली, घमण्ड, धोखा-धड़ी ते बखेड़े होई जाणे।

गलातियों 5:20

मूर्तां री पूजा करणा, जादू-टोणा करणा, दुश्मणी रखणा, लड़ाई-झगड़े करणा, हिरस, लैह्र, मतलबीपन, दूज्जे रे खिलाफ सोच, फूट पाणा, गुटबंदी करणा,

इफिसियों 4:22

कि तुसा जो दस्सेया गेया थिया कि तुसा री बेवकूफी भरी मर्जियां ने तुसा जो बर्बाद करी छडणा ते तुसा जो अपणी जिन्दगी जीणे रे पुराणे तरिक्के जो ते अपणी सारी गलत आदतां जो छड्डी दैणा चाएदा।

इफिसियों 4:25

इधेरे तांइ झूठ बोलणा छड्डी करी सब जणे अपणे संगी विश्वासी कने सच बोल्लेया करो, जिय्यां कि असी इक्क ही सरीर रे अंग हिन।

इफिसियों 4:26

जे अगर तुसा गुस्सा भी होई जांदे ता ध्यान रख्खो कि कोई पाप ना करो, ते ध्यान रख्खो कि रात्ती सोणे का पैल्ले-पैल्ले ही अपणे गुस्से जो सांत करी लेया करो।

कुलुस्सियों 3:19

ओ लाड़ेयों, तुसा भी अपणी लाड़ियां कने प्यार कने रेयो ते तिन्हा कने सख्ती मत करो।

कुलुस्सियों 3:8

पर अवे तुसा इन्हा सारी गल्लां जो, जिय्यां की गुस्से, रोष, दुश्मणी, बैर-भाव, बेजती करणा, गालीयां दैणा, छड्डी देयो।

1 तीमुथियुस 3:11

सेवादारां री लाड़ियां रा लोक्कां बिच खरा नां होणा चाएदा। से मणूआं पर इल्जाम लाणे वाली नी होणा चाएदी, पर तिन्हा जो चज्ज कने बर्ताव करणा चाएदा ते से पूरे तरिक्के कने भरोस्सेमंद होणा चाएदी।

1 तीमुथियुस 3:3

कलीसिया रा मुखिया पियक्कड़ ते मार-कुटाई करणे वाला ना हो बल्कि से नरमदिल मणू होणा चाएदा। से ना ता झगड़ालू ते ना ही पैसे रा लालची ना हो।

1 तीमुथियुस 5:13

ते इस कने से लोक्कां रे घरे-घरे घुम्मी-फिरी करी आलसी होई जांदी ते लोक्कां रे बारे बिच चुगलखोरी करणा सुरु करी दिंदी, से लोक्कां रे मामलेयां बिच दखलअंदाजी करदी ते पुठ्ठी-सीद्दी चीजां बोलदी।

2 तीमुथियुस 2:23

पर बेकार री गल्लां रे बारे बिच बैह्सबाजी करणे का दुर रेयो, किजोकी तू जाणदा तिन्हेरा नतीज्जा सिर्फ लड़ाई-झगड़ा ही हुंदा।

2 तीमुथियुस 3:3

बेरहम, दूज्जेयां जो माफ ना करणे वाले, दूज्जेयां री गलतियां कडणे वाले, अपणी शरीरी इच्छा पर काबू ना रखणे वाले, मार-कुटाई करणे वाले, भलाई रे कम्मां रे दुश्मण,

तीतुस 1:7

किजोकी कलीसिया रे मुखिए जो परमेश्वर रा कम्म करणे री वजह कने बेकसूर होणा चाएदा, से ना ता जिद्दी, ना गुस्सा करणे वाला, ना सराब पीणे वाला, ना मार-कुटाई करणे वाला, ते ना ही बेईमानी री कमाई रा लालची हो।

तीतुस 2:3

इय्यां ही बुजुर्ग जनानियां भी इदेय हिसाब कने बर्ताव करण जिस कने परमेश्वर जो हर गल्ल बिच महिमा मिल्ले। से मणूआं पर इल्जाम लाणे वाली ते सराबी ना होण पर से ठीक जिन्दगी जीणे री शिक्षा दैणे वाली बनण।

याकूब 1:19

ओ मेरे प्यारे संगी विश्वासियों, तुसा ए गल्ल जाणी लेयो, हर इक्क मणू सुनणे तांइ हमेसा तयार, सबर कने बोलणे वाला ते अपणे गुस्से जो काबू बिच रखणे वाला हो

याकूब 3:14

पर जे अगर तुसा रे मन बिच बड़ा हिरस अते मतलबीपन है, तां तुसा झूठ बोल्ली करी इस सच्चाई पर पर्दा पाया करदे हिन कि तुसा समजदार नी हिन।

याकूब 4:11

ओ संगी विश्वासियों, इक्क दूए री बदनामी मत करेया करो, जे अपणे संगी विश्वासी री बदनामी करदा या तिस पर इल्जाम लादां, तां से मूसा रे कानून री बदनामी करदा ते मूसा रे कानून पर इल्जाम लादां, ते तू मूसा रे कानून पर चलणे वाला नी पर तिस पर हाकिम ठैहरेया।

1 पतरस 2:1

इधेरे तांइ हर तरिक्के री नफरत, धोख्खेबाजी, ढोंग, हिर्स ते लोक्कां री बदनामी करणा छड्डी देयो।

1 यूहन्ना 3:12

असा जो आदम रे पुत्तर कैन सांई नी बणना जे उस शैतान रे पास्से का थिया, ते जिनिए अपणे भ्याल जो मारी रख्खेया, तिसने अपणे भ्याल जो भला किजो मारेया? तिसने इधेरे तांइ इदेया कित्तेया कि तिसेरे कम्म बुरे थिये अते तिसेरे भ्याल रे कम्म धार्मिक थिये।

1 यूहन्ना 3:15

हर इक्क मणू जे अपणे संगी विश्वासी का नफरत करदा, से खूनी है, अते तुसा जाणदे कि खूनी लोक्कां बिच हमेसा री जिन्दगी नी है।

प्रकाशित वाक्य 12:10

अवे असा रे परमेश्वर ने अपणे लोक्कां जो बचाणा! अवे तिन्हा ने अपणी ताकत रा इस्तेमाल करणा ते दुनिया पर राज करणा! अवे तिन्हेरे मसीह ने दुनिया पर अपणा हक रा एलान करणा। किजोकी अवे शैतान असा रे परमेश्वर रे सामणे असा रे संगी विश्वासियां पर दिन-रात इल्जाम लाणे तांइ नी खड़ी सकदा। तिसजो स्वर्ग का बाहर सूटी दित्ते गे रा है।