इफिसियों 4:13 - चम्बयाली नौआ नियम

¹³ असा सारेयां रा मकसद ए है कि असी विश्वास करणे रे जरिये इक्क बणी जाण ते परमेश्वर रे पुत्तर कने रिस्ता होणे री वजह कने असी पके रे विश्वासी बणी जाण, ते पूरे तरिक्के मसीह यीशु सांई बणी जाण, जे बिल्कुल सिद्व हिन।

इफिसियों 4:13 ပူးပေါင်းရင်းမြစ်များ

मत्ती 11:27

मेरे परम पिता ने सब किच्‍छ मेरे हवाले करी दित्तेया, अते कोई पुत्तर जो नी जाणदा, सिर्फ परम पिता जाणदा अते कोई परम पिता जो नी जाणदा, सिर्फ पुत्तर जाणदा, अते हर इक्क से मणू परम पिता जो जाणदा, जिस पर पुत्तर तिसजो जाहिर करणा चाए।

यूहन्ना 1:16

तिन्हा री अनुग्रह री भरपुरी बिच का असी तिन्हा का इक्क का बाद इक्क मती सारी आशीषां हासिल कित्ती।

यूहन्ना 16:3

अते तिन्हा ने इय्यां इधेरे तांइ करणा किजोकी तिन्हा ने ना ता स्वर्ग बिच रैह्णे वाले पिता जो जाणेया ते ना ही मेरे जो जाणेया,

यूहन्ना 17:21

कि से सब इक्क होंन, तिय्यां ही जिय्यां, ओ पिता जी, तुसा मेरे बिच हिन अते मैं तुसा रे बिच है, से भी असा बिच का इक्क होंन, ताकि दुनिया रे मणू विश्वास करण कि तुसा ने मेरे जो भेज्जेया है।

यूहन्ना 17:3

ते इस तरिक्के कने हमेसा री जिन्दगी जो हासिल कित्तेया जाई सकदा कि मणू इकलौते सच्चे परमेश्वर जो ते यीशु मसीह यानी मेरे जो जाणे जिस जो तुसा दुनिया रे लोक्कां का भेज्जे रा है।

यूहन्ना 6:69

असा ने तुसा बिच विश्वास कित्या, कने जाणी गे हिन, कि परमेश्वर रा भेज्जे रे पवित्र मसीह तू ही है।

प्रेरितां रे कम्म 4:32

भरोसे करणे वालेयां री मडंली इक्क मन रे थिये, इत्ते तिकर कोई भी अपणी जायदाद जो अपणा नी बोलदा थिया, पर सारा किच्‍छ आपस रा थिया

1 कुरुन्थियों 1:10

अवे ओ मेरे संगी विश्वासियों, मैं असा रे प्रभु यीशु मसीह रे हक कने तुसा जो इय्यां करणे तांइ जोर पांदा कि तुसा सारे जणे इक्क ही गल्ल पर राज़ी होया करो, ते तुसा लोक्कां बिच कोई फूट ना हो ते मैं जोर पाई करी बोलदा कि इक्क मकसद ते इक्क ही तरिक्के सोच विचार रख्खी करी अप्पु-मिते सांती बणाई रख्खो।

1 कुरुन्थियों 14:20

ओ संगी विश्वासियों, इन्हा गल्लां जो समजणे बिच बच्चेयां सांई ना बणो, बुराई करणे बिच तां बच्चेयां सांई अनजाण ही रेयो, पर इन्हा गल्लां जो समजणे बिच अक्कलमंद बणो।

1 कुरुन्थियों 2:6

फिरी भी असी पक्के विश्वासियां रे बिच ज्ञान री गल्लां सुणान्दे हिन, पर ए ज्ञान कोई दुनियावी ज्ञान नी है ते ना ही इस जुग रे प्रधान लोक्कां रे ज्ञान जदेया है जे इक्क दिन नास होई जाणा।

2 कुरुन्थियों 4:6

किजोकी परमेश्वर ने ही बोल्ले रा है, “न्याहरे बिच रौसनी चमके।” ते से ही असा रे दिल बिच चमकी, ताकि असी मसीह बिच परमेश्वर री महिमा जो दिख्खी सकण।

गलातियों 4:19

ओ मेरे प्रियों, जिय्यां कुसकी दुपराणी जनानी जो लोकिणे री पीड़ हुंदी, तिसी सांई मैं तुसा तांइ पीड़ सहन करेया करदा है। ते जां तांइ तुसा मसीह बिच पूरी तरह पकी नी जांदे, तां तांइ मेरे जो से पीड़ रैह्णी।

इफिसियों 1:17

मैं प्रार्थना करदा कि असा रे प्रभु यीशु मसीह रे महिमामय पिता परमेश्वर तुसा जो आत्मिक ज्ञान ते समजदे ताकि तुसा तिन्हा जो पूरी तरिक्के कने जाणी सको।

इफिसियों 1:23

कलीसिया मसीह यीशु रे सरीर है ते मसीह री भरपुरी कने भरे री है जे सारेया बिच हर इक्क गल्ल जो पूरा करदी।

इफिसियों 4:12

तिन्हा ने ए दान इधेरे तांइ दित्ते ताकि से परमेश्वर रे लोक्कां जो तिन्हेरे तांइ कम्म करणे तांइ तैयार करी सकण, ते से मसीह रे सरीर रे रुप बिच पूरी तरह कने पकी जाण ते ताकतवर बणी सकण।

इफिसियों 4:3

ते पवित्रात्मा रे पास्से का मिल्ले री सांती जो बणाई रखणे तांइ अप्पु-मिते मिली-जुली करी रेयो।

इफिसियों 4:5

असा सारेयां रे इक्क ही प्रभु हिन, असी सारे मसीह यीशु बिच ही विश्वास करदे, असा सारेयां ने इक्क ही बपतिस्मा लित्ते रा है,

फिलिप्पियों 3:10

मैं ए चाह्‍ंदा कि मैं मसीह जो जाणी लेयां ते तिन्हेरी तिस मरे रे बिच का जी उठणे री ताकत रा अनुभव करां जिस कने से फिरी जिन्दे होई गे थिये, ते तिन्हेरे सांई दुख सैह्णे ते तिन्हेरे सांई बणने ते तिस्सी तरिक्के कने मरणे रे जरिये जिय्यां से मरे थिये।

फिलिप्पियों 3:8

जे अगर मैं मसीह यीशु जो अप्पु जानणे रे मुल री तुलना बाकि चीजां कने करां, तां मैं बाकि सारी चीजां जो बेकार समजदा, ते इसी वजह कने मैं हर तिस चीज जो छड्डी रख्खेया ते मैं तिन्हा चीजां जो कचरा समजदा। ताकि मैं मसीह यीशु रे हुकमां जो जादा ठीक तरिक्के कने मन्नी सकां।

कुलुस्सियों 1:28

असी मसीह रा प्रचार करदे, ते परमेश्वर रे असा जो दित्ते रे सारे ज्ञान कने हर मणू जो सिखांदे ते चितौणी दिंदे, ताकि जां हर इक्क जणा जां परमेश्वर रा सामणे खड़िये तां से सारे परिपक्व विश्वासी बणी जाण।

कुलुस्सियों 2:2

ताकि तुसा जो ते तिन्हा लोक्कां जो होंसला मिल्ले, ते से प्यार कने अप्पु बिच कठ्ठे रैह्ण। मैं चाह्‍ंदा कि तिन्हा जो इस गल्ल रा होंसला रेयो किजोकी से परमेश्वर रे हर राज़ री योजनां जो समजदे, जे मसीह यीशु ही हिन।

इब्रानियों 5:14

अनाज तां तिन्हा मणूआं तांइ है जे सही ते गलत रा अनुभव करी के विश्वास करणे बिच समजदार होई गेरे हिन।

2 पतरस 1:4

ते तिन्हेरी महिमा ते भलाई री वजह कने तिन्हा ने असा कने बड़ा महान ते कीमती वादा कित्ते रा है। इन्हा वरदान्नां जो इस्तेमाल करी के असी सरीर री बुरी इच्छां का बची सकदे जिसेरी वजह कने दुनिया रे मणू बर्बाद होई जांदे। ते इन्हा रे जरिये मणू परमेश्वर रे स्वभाव बिच हिस्सेदार बनण।

2 पतरस 3:18

पर तुसा जो असा रे प्रभु ते छुटकारा दैणे वाले मसीह यीशु रे अनुग्रह रा होर भी जादा अनुभव करणा चाएदा, ते तिन्हा जो समजणे बिच होर भी जादा बधणा चाएदा। तिन्हा रा आदरमान अब्बे ते हमेसा-हमेसा तिकर हुंदा रे।

1 यूहन्ना 5:20

ते ए भी जाणदे कि परमेश्वर रा पुत्तर मसीह यीशु आई गे रा है ते तिनिये असा जो समझ दित्ते री है कि, असी तिस सच्चे परमेश्वर कने गहरे रिश्ते बिच हिन किजोकी असी मसीह यीशु कने गहरे रिश्ते हिन जे सच है, सच्चा परमेश्वर ते हमेसा री जिन्दगी ए ही है।