इफिसियों 4:12 - चम्बयाली नौआ नियम

¹² तिन्हा ने ए दान इधेरे तांइ दित्ते ताकि से परमेश्वर रे लोक्कां जो तिन्हेरे तांइ कम्म करणे तांइ तैयार करी सकण, ते से मसीह रे सरीर रे रुप बिच पूरी तरह कने पकी जाण ते ताकतवर बणी सकण।

इफिसियों 4:12 ပူးပေါင်းရင်းမြစ်များ

लूका 22:32

पर मैं तेरे तांइ परमेश्वर का प्रार्थना कित्ती कि तेरा विश्वास टुटी ना जाओ अते जां तू फिरी तौबा करी हटणा तेरे भरोसे जो दिख्खी करी तेरे संगी विश्वास भ्यालां रा भी होंसला होई जाओ।

प्रेरितां रे कम्म 1:17

किजोकी से ता असा बिच का इक्क थिया, ते इस सेवकाई बिच हिस्सेदार होया,

प्रेरितां रे कम्म 1:25

कि से इस सेवकाई ते प्रेरिताई रा हक्क लै, जिस जो यहूदा मरणे का बाद खाली छड्डी करी तिस जगाह् पर चली गेया जित्ते तिसजो अपणे कम्मां रे हिसाब कने होणा चाएदा।

प्रेरितां रे कम्म 11:23

से तित्ते पूज्जी करी परमेश्वर रे अनुग्रह जो दिख्खी करी बड़ा खुस होया ते सब जो शिक्षा दित्ती की तन मन लगाई करी प्रभु यीशु कने लिपटी रेयो,

प्रेरितां रे कम्म 20:24

पर मैं अपणी जान जो किच्‍छ भी नी समजदा कि तिसजो प्यारा समजां, पर तां ए कि, मैं अपणी दौड़ जो ते तिस सेवा जो पूरा करां, जे मैं परमेश्वर रे अनुग्रह री सुब बसेख पर गवाई दैणे तांइ प्रभु यीशु का पाए री है।

प्रेरितां रे कम्म 20:28

इधेरे तांइ अपणी ते अपणे सारे झुण्ड री चुकन्ने रेह्ई करी देख-रेख करो जिन्हा परमेश्वर रे लोक्कां बिच पवित्रात्मा ने तुसा जो कलीसिया रे मुखिया बणाए रा है कि तुसा परमेश्वर री कलीसिया री रखवाली करो जिस जो तिसने अपणे खून कने खरीदी लित्ते रा है।

प्रेरितां रे कम्म 9:31

इस तरिक्के कने सारे यहूदियां, गलील ते सारे सामरिया रे प्रदेशां बिच कलीसिया जो सांती मिल्ली अते तिसेरी तरक्की हुंदी गेई, ते से प्रभु रे डर ते पवित्रात्मा रे जरिए कलीसिया बिच मणू बदधे गे ते सारे खुशहाल रे।

रोमियों 12:5

तिय्यां ही असी विश्वासी मणू मिली करी मसीह यीशु रे जिस्म रा हिस्सा बणी गेरे हिन, ते असी आपस बिच इक्क-दूए कने जुड़े रे हिन।

रोमियों 12:7

अगर कुसकी जो लोक्कां री सेवा करणे रा वरदान मिल्ले रा हो, तां सेवा करणे बिच लग्गी रेयो। जे अगर कुसकी जो शिक्षा दैणे रा वरदान हो, तां से शिक्षा दैणे बिच लग्गी रेयो।

रोमियों 14:19

इधेरे तांइ असा जो तिन्हा गल्लां जो करणे बिच लग्गी रैह्णा चाएदा, जिन्हा कने मणू मिली जुली करी रे, ते सारेयां रा विश्वास मजबूत हो।

रोमियों 15:14

ओ मेरे संगी विश्वासियों, मैं अप्पु ही तुसा रे बारे बिच पक्के तरिक्के कने जाणदा, कि तुसा अप्पु भी भलाई कने भरपूर हिन, ते जे गल्लां परमेश्वर जे तुसा का चाह्‍ंदे, तिन्हा जो जाणदे, ताकि इक्क दूए जो सिखाई सको।

रोमियों 15:2

असा जो अपणे संगी विश्वासियां रे भले तांइ सोचणा चाएदा। ते से चीजां करणी चाएदी जिस कने से मणू खुस हुंदे, ते दुज्जेया री मदद करणी चाएदी, ताकि तिन्हेरा विश्वास मजबूत हो।

रोमियों 15:29

ते मेरे जो पता है, जां मैं तुसा का आणा ता तुसा कने मसीह री आशीषां जो सांझा करणा।

1 कुरुन्थियों 12:27

इस तरिक्के तुसा बिच का हर इक्क मिली करी मसीह यीशु रा सरीर हिन, ते तुसा बिच का हर इक्क तिन्हेरे बखरे-बखरे अंग हिन।

1 कुरुन्थियों 12:7

परमेश्वर हर इक्क जणे जो पवित्रात्मा रे अनुभव रा सबूत दिंदा ताकि से सारे विश्वासियां री मदद तांइ इस्तेमाल होई सके।

1 कुरुन्थियों 14:12

इधेरे तांइ तुसा भी जां आत्मिक वरदानां री धुन बिच हिन तां ए कोसीस करो कि इन्हा वरदान्नां री वजह कने पूरी कलीसिया रे तरक्की हो।

1 कुरुन्थियों 14:14

इधेरे तांइ जे मैं बखरी-बखरी भाषां बिच प्रार्थना करां, तां मेरी आत्‍मा प्रार्थना करदी पर तिस बिच मेरी समझ री कोई हिस्सेदारी नी है किजोकी मैं तिसजो नी समजी सकेया।

1 कुरुन्थियों 14:26

ओ संगी विश्वासियों, मैं तुसा जो दसदा कि ए सारा किच्‍छ किय्यां करणा चाएदा, जां तुसा अराधना करणे तांइ कठ्ठिंदे, तां हर इक्क रे मन बिच भजन या उपदेस या बखरी-बखरी भाषां या परमेश्वर रा प्रकाशन या बखरी-बखरी भाषां रा मतलब दसणा, मसीह बिच विश्वासियां रे विश्वास जो मजबूत करणे तांइ होणा चाएदा।

2 कुरुन्थियों 12:19

ओ प्यारे विश्वासियों, तुसा हल्ले तांइ समजदे हो कि असी तुसा जो हटी करी जवाब देया करदे हिन। असी तां ए सोच्ची करी कि परमेश्वर असा जो दिख्खेया करदे हिन, मसीह यीशु बिच बोलदे, अते असी सारी गल्लां तुसा जो मसीह बिच विश्वास करणे बिच मजबूत बणाणे तांइ ही बोलदे।

2 कुरुन्थियों 13:11

ओ मेरे संगी विश्वासियों, खुस रेयो; ते मसीह बिच विश्वास करणे बिच सिद्व बणदे जाओ; अप्पु-मिते इक्क मन बणी करी रेयो, ते प्यार ते सांती दैणे वाले परमेश्वर तुसा कने रैह्णा।

2 कुरुन्थियों 13:9

पर जिस बेल्ले असी कमजोर हुंदे ते तुसा ताकतवर हुंदे, तां असा जो बड़ी खुसी हुंदी, इसेरे अलावा असी प्रार्थना भी करदे कि तुसा मसीह यीशु बिच विश्वास करणे बिच सिद्व होई जाओ।

2 कुरुन्थियों 4:1

इधेरे तांइ जां असा रे पर इदेयी दया होई कि असा जो परमेश्वर रा बसेख सुनाणे री सेवा मिल्ली तां असी हिम्मत नी हारदे।

2 कुरुन्थियों 5:18

ए सारी गल्लां परमेश्वर रे पास्से का है, जिन्हा ने मसीह यीशु रे जरिए असा रा अप्पु कने मेल जोल करी दित्ता, ते अप्पु कने लोक्कां रा मेल जोल करणे री सेवा असा जो सौंप्पि दित्ती।

2 कुरुन्थियों 6:3

परमेश्वर रे सहकर्मी होणे रे नात्ते असी कुसकी गल्ल बिच ठोक्कर खाणे रा कोई भी मौक्का नी दिदें, ताकि असा री सेवा पर कोई इल्जाम ना आये।

2 कुरुन्थियों 7:1

अते ओ प्यारे संगी विश्वासियों, जां परमेश्वर ने असा कने ए वादा कित्ते रा है कि तिन्हा ने असा जो अपणे बच्चेयां रे रुप बिच अपणाई लैणा, इधेरे तांइ, आओ असी हर तरिक्के री बुराई जो छड्डी दैण, ते इक्क पवित्र जिन्दगी जीणे री कोसीस करदे रैह्ण।

इफिसियों 1:23

कलीसिया मसीह यीशु रे सरीर है ते मसीह री भरपुरी कने भरे री है जे सारेया बिच हर इक्क गल्ल जो पूरा करदी।

इफिसियों 4:16

असी सारे जणे जे मसीह यीशु बिच विश्वास करदे, तिन्हेरे सरीर रे हिस्से सांई हिन। जिय्यां कुसकी मणू रा सरीर जोड़ां री वजह इक्क गठ्ठ होई करी रैह्न्दा, ते जां सरीर रा हर इक्क हिस्सा सही तरिक्के कने कम्म करदा, तां सरीर बदधा ते मजबूत बणदा जांदा, तिय्यां ही जां असा बिच का हर इक्क जणा सही तरिक्के कने से कम्म करदा जे मसीह ने असा जो दित्ते रा है, तां असा ने भी ताकतवर, परिपक्व होणा ते इक्क-दूए कने प्यार करणा।

इफिसियों 4:29

कोई गंदी गल्ल तुसा रे मुँह का ना निकले पर जे भी तुसा बोल्लो से गल्ल ठीक ते दूज्जेयां तांइ मददगार हो ताकि सुनणे वालेयां जो सुणी करी होंसला मिल्ले।

इफिसियों 4:4

असी इक्क ही सरीर रे हिस्से हिन, ते असा जो इक्क ही पवित्रात्मा भी मिल्ले रा है, से आस भी इक्क ही है जिस बिच तुसा जो परमेश्वर रे मणू बणने तांइ चुणेया गेया थिया।

कुलुस्सियों 1:24

मेरे जो तुसा तांइ जुल्म झेलणे बिच खुसी हुंदी, मैं इस गल्ल बिच खुस है कि मैं मसीह रे सरीर तांइ, जे तिन्हेरी कलीसिया है, आखरी समय तिकर मसीह रा अपणी कलीसिया तांइ जुल्म झेलणे बिच जे भी कम्म अधुरा रेई गे रा हो, तिसजो पूरा करदे रैह्णा।

कुलुस्सियों 1:28

असी मसीह रा प्रचार करदे, ते परमेश्वर रे असा जो दित्ते रे सारे ज्ञान कने हर मणू जो सिखांदे ते चितौणी दिंदे, ताकि जां हर इक्क जणा जां परमेश्वर रा सामणे खड़िये तां से सारे परिपक्व विश्वासी बणी जाण।

कुलुस्सियों 4:17

अरखिप्पुस जो बोल्लेयो, जे सेवा करणे तांइ प्रभु ने तेरे जो चुणे रा है, ध्यान रे कि तू तिस सेवा जो पूरा करे।

1 तीमुथियुस 1:12

मैं असा रे प्रभु यीशु मसीह रा शुकर करदा कि तिन्हा ने मेरे जो ताकत दित्ती ते मेरे जो भरोस्सेमंद समजी करी अपणी सेवा करणे तांइ ठैहराया।

2 तीमुथियुस 4:11

इस बेल्ले सिर्फ लूका मेरे कन्ने है। जां तू आणा तां अप्पु कने मरकुस जो लेई आए किजोकी सेवा रे कम्म बिच से मेरे तांइ बड़े कम्मे रा मणू है।

2 तीमुथियुस 4:5

पर तू हर गल्ल बिच अप्पु पर काबू रख्खे, बड़े सबर कने सारी मुसीबतां जो सहन करी लेय। सुब बसेख रा प्रचार करणे तांइ तू कड़ी मैहनत करे, ते परमेश्वर रा सेवादार होणे रे नात्ते तू से सारे कम्म करे जिन्हा तांइ परमेश्वर ने तेरे जो चुणे रा है।

इब्रानियों 13:17

अपणे अगुवे री गल्लां मन्नो, ते तिन्हेरे अधीन रेयो। से हमेसा तुसा तांइ चुकन्ने रैहन्दे, ताकि तुसा भटकी ना जाण। किजोकी तिन्हा जो अपणी सेवकाई रा हिसाब परमेश्वर जो दैणा जरुरी है। इय्यां ही करो, ताकि से अपणे कम्मां बिच र खुस ही होण, ना की दुखी होण, नी ता तुसा जो कोई फायदा नी होणा।

इब्रानियों 6:1

आओ असी मसीही बसेख रे पैल्ली शिक्षां जो छड्डी करी परिपक्व शिक्षां पास्से बधी चलन। असा जो तिन्हा फालतू रे कम्मां का घड़ी-घड़ी तौबा करी के परमेश्वर बिच विश्वास करणे री जरुरत नी है।