इफिसियों 2:20 - चम्बयाली नौआ नियम

²⁰ कन्ने मिली करी असी परमेश्वर रा घर हिन जे प्रेरितां ते भविष्यद्वक्तां री नीं पर बणे रा है ते तिस नीं रा पत्थर अप्पु मसीह यीशु हिन।

इफिसियों 2:20 ပူးပေါင်းရင်းမြစ်များ

मत्ती 16:18

ते मैं भी तिज्जो बोलदा कि तू पतरस है, ते मैं इस्सी पत्थर पर अपणी कलीसिया बनाणी ते पताल रे दुआर तिस पर हावी नी होणे।

मत्ती 21:42

यीशु ने तिन्हा जो बोल्लेया, कै तुसा कदी पवित्रशास्त्र बिच ए नी पढ़ेया: जिस बट्टे जो राजमिस्त्रियां ने ठुकराई दित्तेया थिया, से ही कुणे रे सिरे रा बट्टा होई गेया? ए परमेश्वर रे पास्से का होया ते असा री नजर बिच अनौखा है।

1 कुरुन्थियों 12:28

मसीह रे इस सरीर बिच परमेश्वर ने असा जो अलग-अलग तरिक्के रा कम्म करणे तांइ दित्ते रा है, पैल्ले तिन्हा ने किच्‍छ मणूआं जो प्रेरित बणने तांइ चुणेया, किच्‍छ मणूआं जो तिन्हेरी गल्लां दसणे तांइ भविष्यवाणी करणे तांइ चुणेया, ते किच्‍छ जणेया जो तिन्हा ने लोक्कां जो वचन री शिक्षा दैणे तांइ चुणेया, इसका बाद किच्‍छ जणेया जो तिन्हा ने चिन्ह-चमत्कार करणे रा हक दित्ते रा है, ते किच्‍छ जणेया जो लोक्कां री बीमारी ठीक करणे रा हक, ते किच्‍छ जणेया जो दूज्जेयां री मदद करणे रा हक दित्ते रा है, ते किच्‍छ जणेया जो तिन्हा ने अगुवे बणने तांइ चुणे रा है, ते किच्‍छ जणेया जो तिन्हा ने पवित्रात्मा रे जरिये बखरी-बखरी भाषा बिच गल्ल करणे री खूबी दित्ते री है।

गलातियों 2:9

याकूब, कैफा ते यूहन्ना जिन्हा जो कलीसिया रे खम्भे सांई समजेया जांदा, जां तिन्हा ने मेरे पर होए रे परमेश्वर रे अनुग्रह जो समजी लेया, तां तिन्हा ने मेरे जो ते बरनबास जो अपणी मण्डली रा सहयोगी मन्नी लेया ते से इस गल्ल पर सहमत होई गे कि से यहूदी मणूआं बिच ते असी गैर यहूदी मणूआं जो बसेख सूणाणा जारी रखण।

इफिसियों 3:5

पैल्ले समय बिच परमेश्वर ने अपणाए राज़ कुसकी पर भी ज़ाहिर नी कित्ते रा थिया, पर अवे तिन्हा ने इसजो अपणे पवित्र प्रेरितां ते भविष्यद्वक्तां पर पवित्रात्मा रे जरिये ज़ाहिर कित्ते रा है।

कुलुस्सियों 2:7

ते मसीह बिच विश्वास रखणे बिच मजबूत बणे रेयो। जिय्यां की तुसा जो सिखाए गे रा है, तिय्यां ही विश्वास बिच मजबूत हुंदे जाओ ते परमेश्वर रा जादा का जादा शुक्रिया करो।

1 पतरस 2:6

जिय्यां कि पवित्रशास्त्र बिच परमेश्वर ने बोल्ले रा है, “दिख्खो! मैं सिय्योन बिच कुसकी जो कुणे रे बट्टे सांई रख्खेया करदा है। से इक्क कीमती बट्टे रे बराबर है जिस जो नीं पाणे तांइ चुणेया गे रा है। जे कोई तिन्हा बिच विश्वास करदा तिसजो कदी शर्मिंदा नी होणा पैणा।”

प्रकाशित वाक्य 21:14

तिन्हा ने सहर रे चारो पास्से दुआल बारा बड्डे-बड्डे बट्टेयां पर बणाए री थी। हर बट्टे पर तिस उरणू रे बारा प्रेरितां रे नां लिखित्ते रे थिये।