इफिसियों 2:18 - चम्बयाली नौआ नियम

¹⁸ मसीह यीशु री वजह कने असी सारे जणे इक्क ही पवित्रात्मा रे जरिये पिता रे नेड़े आई सकदे।

इफिसियों 2:18 ပူးပေါင်းရင်းမြစ်များ

मत्ती 28:19

इधेरे तांइ तुसा जाओ अते जाति-जाति रे लोक्कां जो मेरा चेल्ला बणाओ तुसा जो ए कम्म परम पिता रे नां बिच, पुत्तर रे नां बिच अते पवित्रात्मा रे नां बिच उन्हा जो बपतिस्मा देई करी पूरा करणा है।

यूहन्ना 10:7

तां यीशु ने फिरी तिन्हा जो बोल्लेया, मैं तुसा कने सच-सच बोलदा, कि भेड़ां रा दुआर मैं है।

यूहन्ना 10:9

दुआर मैं है, जे अगर कोई मेरे का अन्दर आए, तां छुटकारा पाणा, ते अन्दर बाहर आया जाया करणा ते चारा पाणा।

यूहन्ना 14:6

यीशु ने तिसजो बोल्लेया, रस्ता अते सच्चाई ते जिन्दगी मैं ही है, बगैर मेरे कोई पिता-परमेश्वर का नी पूज्जी सकदा।

रोमियों 5:2

असा रे विश्वास रे जरिये मसीह ने असा जो अनुग्रह दित्ते रा है, जिस बिच असी अज्ज टिके रे हिन, ते असी बड़ी हिम्मत ते खुसी कने परमेश्वर री महिमा जो बंडणे तांइ उत्सुक हिन।

रोमियों 8:15

किजोकी तुसा जो गुलामी री आत्‍मा नी मिल्ले री है कि तुसा जो डर बिच जिन्दगी बिताओ, पर जां परमेश्वर ने तुसा जो अपणी औलाद्दां बणाई करी गोद लेई लित्ता, तां तुसा जो पवित्रात्मा मिल्लेया। अवे असी परमेश्वर जो पिता बोलदे।

1 कुरुन्थियों 12:13

तिय्यां ही असी सारे जणे चाए यहूदी या गैर यहूदी, चाए गुलाम हो या अजाद, असी सारेयां रा इक्क ही सरीर बिच इक्क बणी जाणे तांइ तिस ही आत्‍मा रे जरिये बपतिस्मा होए रा है ते असी सारेयां ने इक्क ही आत्‍मा पाए रा है।

गलातियों 4:6

अवे असी जे तिन्हेरे अपणे औलाद हिन इधेरे तांइ परमेश्वर ने अपणे आत्‍मा जो असा रे दिल बिच पाए रा है, जे असा जो ओ अब्बा ते ओ पिता करी के पुकारदा।

इफिसियों 3:12

मसीह यीशु रे जरिये ते असा रे तिन्हा पर विश्वास करणे री वजह कने अवे असी बड़ी हिम्मत कने परमेश्वर रे नेड़े आई सकदे।

इफिसियों 3:14

इन्हा सारेयां तांइ परमेश्वर पिता रे सामणे गोड्डे भारे पेई करी प्रार्थना करदा।

इफिसियों 4:4

असी इक्क ही सरीर रे हिस्से हिन, ते असा जो इक्क ही पवित्रात्मा भी मिल्ले रा है, से आस भी इक्क ही है जिस बिच तुसा जो परमेश्वर रे मणू बणने तांइ चुणेया गेया थिया।

इफिसियों 6:18

हर बेल्ले ते हर तरिक्के कने पवित्रात्मा रे कहे मुताबिक प्रार्थना ते बिनती करदे रेयो, ते इस गल्ल तांइ जागदे रेयो की परमेश्वर रे सारे लोक्कां तांइ लगातार बिनती करेया करो।

कुलुस्सियों 1:12

ते पिता परमेश्वर रा शुकर करदे रेयो, जिन्हा ने असा जो इस जोग्गा बणाया कि स्वर्ग रे राज बिच तिन्हेरे अपणे लोक्कां कने तिस विरासत रे हिस्सेदार बनण, जे तिन्हा ने अपणे लोक्कां तांइ तैयार कित्ते रा है।

इब्रानियों 7:19

किजोकी मूसा रा कानून कुसकी जो भी सिद्व नी बणाई सकेया, पर तिस्सी समय पर, असा जो तिसका जादा ठीक आस दित्ती गयी, जे असा जो परमेश्वर रे करीब लै जाई सकदा।

याकूब 3:9

जिब्ब कने अपणे प्रभु अते पिता परमेश्वर री बड़ाई करदे अते इस्सी कने मणूआं जो जे परमेश्वर रे रुप बिच बणाये गे हिन, कोसदे भी हिन।

1 पतरस 1:17

परमेश्वर जाणदे कि हर इक्क मणू ने क्‍या-क्‍या कित्ते रा है, ते से हर इक्क मणू का बगैर कोई पक्षपात कित्ते हिसाब-किताब लिंदे। जां तुसा परमेश्वर का प्रार्थना करदे तां तुसा तिन्हा जो पिता बोल्ली करी पुकारदे। इधेरे तांइ जां तिकर तुसा इस धरती पर इक्क अजनबी सांई रैह्‍न्दे तुसा हमेसा तिन्हेरा आदरमान करो।

1 पतरस 1:21

मसीह यीशु ने जे असा तांइ कित्तेया तिसेरी वजह कने अवे तुसा परमेश्वर बिच विश्वास करदे। तिन्हा ने ही मसीह यीशु जो मुर्देयां बिच का फिरी जिन्दा कित्तेया ते तिन्हा जो महिमा दित्ती। इधेरे तांइ परमेश्वर बिच तुसा रा विश्वास ते आस अवे मजबूत है।

1 पतरस 3:18

मैं ए इधेरे तांइ बोल्लेया करदा है किजोकी मसीह ने असा रे पाप्पां रे बदले जुल्म सैह्‍ण कित्तेया ते मारे गे। से इक्क ही वरी मरे ते तिय्यां दुबारा करणे री जरुरत नी है। से अप्पु धार्मिक थिये जिन्हा असा जो परमेश्वर रे नेड़े अणने तांइ असी पाप्पी लोक्कां तांइ अपणी जान देई दित्ती। लोक्कां ने तिन्हेरे सरीर जो मारी छड्डेया पर तिन्हेरी आत्‍मा हल्ले भी जिया करदी है।

यहूदा 1:20

पर प्यारे दोस्तों, तिन्हा पवित्र शिक्षां रे आधार पर इक्क-दूए जो प्रोत्साहित ते इक्क-दूए री मदद करदे रेया करो जिस पर तुसा ने विश्वास कित्तेया ते जिस बिच तुसा पवित्रात्मा रे बोल्ले प्रार्थना भी करदे।