इफिसियों 2:10 - चम्बयाली नौआ नियम

¹⁰ किजोकी परमेश्वर ने असा जो बणाए रा है ते मसीह यीशु रे जरिये तिन्हा नौए मणू सांई तिन्हा भले कम्मां जो करणे तांइ बणाए गेरे हिन जिन्हा जो परमेश्वर ने इधेरे तांइ तैयार कित्ता कि असी से पूरे करण।

इफिसियों 2:10 ပူးပေါင်းရင်းမြစ်များ

मत्ती 5:16

इय्यां ही तुसा री लौ मणूआं रे सामणे चमकणा चाएदी कि से तुसा रे भले कम्मां जो दिख्खी करी तुसा रे प्यो री, जे स्वर्ग अन्दर हिन, बड़ाई करण।”

यूहन्ना 3:21

पर जे मणू सच्चाई रे रस्ते पर चलदा, से रौसनी रे नेड़े आंदा है ताकि दूए मणू दिख्खी सके कि तिनिये परमेश्वर रे हुकमां जो मन्ने रा है।

प्रेरितां रे कम्म 9:31

इस तरिक्के कने सारे यहूदियां, गलील ते सारे सामरिया रे प्रदेशां बिच कलीसिया जो सांती मिल्ली अते तिसेरी तरक्की हुंदी गेई, ते से प्रभु रे डर ते पवित्रात्मा रे जरिए कलीसिया बिच मणू बदधे गे ते सारे खुशहाल रे।

प्रेरितां रे कम्म 9:36

याफा कस्बे बिच तबीता नां री यीशु री इक्क चेल्ली रैहन्दी थी, यूनानी भाषा बिच जिस जो दोरकास बोलदे। से बड़े भले रे कम्म रे दान पुन्य करदी रेह्न्दी थी।

रोमियों 8:1

इधेरे तांइ अवे जे प्रभु यीशु मसीह बिच विश्वास करदे, तिन्हा पर सजा रा हुकम नी है।

रोमियों 8:29

किजोकी परमेश्वर अपणे लोक्कां जो पैल्ले का जाणदे, ते परमेश्वर ने तिन्हा लोक्कां जो अपणे पुत्र सांई बणने तांइ चुणे रा है, ताकि मसीह यीशु परमेश्वर रे बाकि मती औलाद्दां बिच तिन्हेरे जेठे पुत्तर ठैहरे।

1 कुरुन्थियों 3:9

किजोकी असी मणू परमेश्वर रे सहकर्मी हिन ते तुसा विश्वासी मणू परमेश्वर रे खेत्तर सांई हिन, ते तुसा परमेश्वर रे घर सांई हिन।

2 कुरुन्थियों 5:17

इस तांइ जे कोई मसीह यीशु बिच विश्वास रखदा तां से नौई रचना है: पुराणी जिन्दगी बीती गे री है, अवे नौई जिन्दगी री सुरुआत होए री है।

2 कुरुन्थियों 5:5

जिन्हा ने असा जो स्वर्गीय सरीर जो पाणे तांइ तैयार कित्ते रा है, से परमेश्वर है, जिन्हा ने असा जो अमानत बिच पवित्रात्मा भी दित्ते रा है।

2 कुरुन्थियों 9:8

ते परमेश्वर ने बड़ी उदारता कने तुसा जो हर किस्म री आशीष दे। जिस कने हर गल्ल बिच, हर बेल्ले तुसा का अपणी जरुरत री हर चीज रे, ताकि भले कम्म करणे तांइ तुसा का जरुरत का भी जादा रे।

गलातियों 6:15

किजोकी खतना होणे या ना होणे कने परमेश्वर जो कोई फरक नी पैंदा, पर इक्क नौई रचना बणी जाणा जरुरी है।

इफिसियों 1:1

मैं पौलुस, जे परमेश्वर री मर्जी कने यीशु मसीह रा प्रेरित है इफिसुस री कलीसिया रे विश्वासियां जो ए चीठ्ठी लिख्खेया करदा है।

इफिसियों 1:4

दुनिया रे बणाए जाणे का पैल्ले ही परमेश्वर ने मसीह कने असा रा रिस्ता बणाणे रे जरिये चुणेया ताकि असी परमेश्वर रे सामणे पवित्र ते बेकसूर ठैहरे।

इफिसियों 2:13

तुसा मणू पैल्ले परमेश्वर का दुर थिये पर अवे मसीह कने तुसा रा रिस्ता है किजोकी परमेश्वर ने मसीह यीशु री कुर्बानी देई करी तुसा जो अपणे नेड़े कित्ते रा है।

इफिसियों 2:2

तिस बेल्ले तुसा दुनियादारी रे तौर-तरिक्के कने चलदे थिये ते तुसा शैतान रे कहे मुताबिक चलेया करदे थिये जे दुष्टात्मां रा हाकिम है, ते जे अज्ज भी तिन्हा लोक्कां बिच कम्म करेया करदा है जे परमेश्वर रे हुकमां री ना-फरमानी करदे।

इफिसियों 2:6

परमेश्वर ने असा जो मसीह यीशु कने मुर्देयां बिच का जिन्दा कित्ते रा है, ते मसीह यीशु कने असा रा रिस्ता होणे री वजह कने तिन्हा ने असा जो मसीह यीशु कने स्वर्ग बिच इक्क जगाह् भी दित्ते री है।

इफिसियों 4:1

इधेरे तांइ मैं जे प्रभु री सेवा करणे री वजह कने कैद बिच है, तुसा रे छन्दे करदा कि जिस बुलाह्ट कने तुसा सद्दे गे थिये, तिस जोग्गी चालचलन बणाई रख्खो,

इफिसियों 4:24

ते जिय्यां परमेश्वर ने तुसा जो नौआ स्वभाव ते जीणे रा नौआ तरिक्का दस्से रा है जे तिन्हेरे अपणे स्वभाव जदेया ही है। इधेरे तांइ तिस्सी स्वभाव ते तरिक्के कने जिन्दगी बिताओ ते हकीकत बिच पवित्र ते धार्मिक बणो।

फिलिप्पियों 1:6

मेरे जो इस गल्ल रा भरोस्सा है कि जिस परमेश्वर ने तुसा अन्दर भला कम्म सुरु कित्ते रा है ते तिस्सी परमेश्वर ने ही तिस कम्म जो मसीह यीशु रे हटणे रे समय तिकर पूरा करणा।

फिलिप्पियों 2:13

किजोकी परमेश्वर तुसा बिच कम्म करेया करदे हिन, ते तुसा जो इच्छा ते ताकत देया करदे हिन ताकि तुसा से कम्म करो जिस कने से खुस हुंदे।

कुलुस्सियों 1:10

तां तुसा रा चालचलन प्रभु जो पसंद आणे वाला बणना, ते तुसा परमेश्वर जो हर तरिक्के कने खुस करणे वाली जिन्दगी जीणी, ते तिसेरी वजह कने तुसा अपणी जिन्दगी बिच हर तरिक्के रे ठीक कम्म करदे रैह्णा, ते तुसा परमेश्वर जो होर भी ठीक तरिक्के कने जाणदे रैह्णा।

कुलुस्सियों 3:10

तुसा अवे इक्क नौए मणू बणी गेरे हिन, ए नौआ स्वभाव अपणे बणाणे वाले परमेश्वर सांई बणदा जाया करदा है ते इस वजह कने तुसा परमेश्वर जो जादा ठीक तरिक्के कने समझणा।

2 थिस्सलुनीकियों 2:17

ते असी ए प्रार्थना करदे कि पिता परमेश्वर ते मसीह यीशु तुसा जो हिम्मत ते ताकत दे ताकि तुसा ठीक कम्म करदे ते ठीक गल्लां बोलदे रेयो।

1 तीमुथियुस 2:10

पर इन्हा चीजां जो करणे रे बजाए तिन्हा जो दूए लोक्कां तांइ भलाई रे कम्म करी के अप्पु जो खूबसुरत बनाणा चाएदा किजोकी मसीही जनानियां जो इय्यां करणा सजदा।

1 तीमुथियुस 5:10

से विधवा जनानी अपणे भलाई रे कम्मां तांइ जाणी जांदी हो जिय्यां कि बच्चेयां रा पालण-पोषण करणा, मेहमान-नवाजी करणा, प्रभु रे लोक्कां री सेवा करणा, मुसीबत बिच पेय रे लोक्कां री मदद करणा ते हर तरिक्के रे भलाई रे कम्मां बिच मन लाणा।

1 तीमुथियुस 5:25

तिय्यां ही भले कम्म भी सामणे आदें ते जे इदेय नी हुदें, से भी लुकी नी सकदे।

1 तीमुथियुस 6:18

तिन्हा जो बड़े जादा ठीक काम्म, ते दयालू ते इक्क-दूए री जरुरत रे हिसाब कने बडंणा सिखाओ।

2 तीमुथियुस 2:21

तिय्यां ही जे अगर कोई विश्वासी मणू अप्पु जो हर तरिक्के री बुराई का बखरा करगा, तां तिसने तिस भांडे सांई ठैहरणा जे खास अवसर पर इस्तेमाल होणे तांइ ठैहराए गे रा है, जिस विश्वासी मणू री जिन्दगी पवित्र होणी तिसने अपणे मालिक तांइ बड़े कम्मे रा होणा।

2 तीमुथियुस 3:17

ताकि परमेश्वर रा मणू सिद्व बणे ते हर इक्क खरा कम्म करणे तांइ तैयार ते उत्सुक रे।

तीतुस 2:14

जिन्हा ने असा जो पाप री ताकत का छुटकारा दैणे तांइ अप्पु जो कुर्बान करी दित्ता ते असा जो धार्मिक ठैहराया ताकि असी तिन्हेरे अपणे खास मणू बणी जाण जिन्हा बिच ठीक कम्म करणे री बड़ी वरी इच्छा है।

तीतुस 2:7

तुसा अप्पु हर गल्ल बिच दूज्जेयां तांइ ठीक बर्ताव रा इक्क उदारण बणो कि से भी तिय्यां ही करण।

तीतुस 3:1

विश्वासी लोक्कां जो समझा कि से हाकिमां ते अधिकारियां री इज्जत करण, ते तिन्हेरे हुकमां जो मनण, ते हर इक्क मणू दुज्जेया तांइ ठीक कम्म करणे तांइ हर बेल्ले तैयार रे।

तीतुस 3:14

सिर्फ इन्ना ही नी पर तुसा जो विश्वासियां जो ए सिखाणे री जरुरत है कि से ठीक कम्म करणे तांइ मैहनत करणे बिच ध्यान लाण ताकि जरुरतमंद लोक्कां री जरुरतां जो पूरा करी सकण। इस कने विश्वासी लोक्कां जो इक्क ठीक मकसद कने जीणे बिच मदद मिलणी।

तीतुस 3:8

जे गल्लां मैं तुसा जो इस चीठ्ठी बिच बोल्ली री हिन से सारी भरोस्सेमंद हिन। ते मैं ए चाह्‍ंदा कि तुसा मणू इन्हा गल्लां रे बारे बिच डटी करी विश्वासी लोक्कां जो सिखाओ। ते से मणू भलाई रे कम्म करणे बिच अपणा ध्यान लाई रखण। ए शिक्षा हर इक्क जणे तांइ बदिया ते बड़ी मददगार हिन।

इब्रानियों 10:24

ते असा जो इक्क दूए तांइ फिकरमंद होणा चाएदा, कि असी इक्क-दूए जो प्यार दिखाए ते इक्क-दूए कने भलाई करण।

इब्रानियों 13:21

ते परमेश्वर प्रभु यीशु मसीह री ताकत कने तुसा बिच से हर इक्क ठीक चीज पैदा करे, जिस कने से खुस हुंदे, जिस कने तिन्हेरी महिमा हमेसा-हमेसा तिकर हुंदी रेयो। आमीन।

1 पतरस 2:12

तुसा रे नेड़े-तेड़े रैह्णे वाले मणू जे परमेश्वर बिच विश्वास नी करदे इय्यां जरुर बोलगे कि तुसा गलत कम्म करेया करदे हिन। पर तुसा इक्क इदेइ जिन्दगी जियो ताकि से मणू तुसा रे भलाई रे कम्मां जो दिख्खी सकण ते मसीह यीशु रे हटणे रे दिन पर परमेश्वर री महिमा करण।

1 यूहन्ना 1:7

पर जिय्यां परमेश्वर रौसनी बिच हिन जे अगर असी भी तिय्यां ही रौसनी बिच जिन्दगी बिताण ते असी परमेश्वर कने अप्पु मिते इक्क-दूए कने मेल-मिलाप रखगे, ते तां मसीह यीशु रे खून ने असा रे पाप्पां का साफ करणा।

1 यूहन्ना 2:6

जे अगर कोई ए बोलदा की मैं परमेश्वर बिच बणी रैहन्दा, तां तिस तांइ जरुरी है कि तदेई ही जिन्दगी जिये जदेई जिन्दगी मसीह यीशु जिन्दे थिये।