इफिसियों 1:13 - चम्बयाली नौआ नियम

¹³ ते तुसा कने भी से ही गल्ल होई। तुसा ने सच्चा सुब बसेख सूणेया जे परमेश्वर रा बसेख है कि तिन्हा ने किय्यां तुसा जो बचाया। जां तुसा ने मसीह यीशु बिच विश्वास कित्ता तां परमेश्वर ने तुसा जो पवित्रात्मा दित्ता जे तिन्हा ने अपणे लोक्कां जो दैणे रा वादा कित्तेया थिया। पवित्रात्मा इक्क मौहर सांई है जे ए दर्शांदी कि तुसा मसीह रे मणू हिन।

इफिसियों 1:13 ပူးပေါင်းရင်းမြစ်များ

लूका 11:13

बुरे स्वभाव रे मणू हुन्दे-सुन्दे भी तुसा जो पता है कि अपणे बच्चेयां जो ठीक चीजां किय्यां दित्ती जान्दी, तां अवे तुसा अप्पु सोच्चो कि असा रा स्वर्ग अन्दर रैह्णे वाला परमेश्वर अपणे मंगणे वालेयां जो खुसी कने पवित्रात्मा किजो नी दिंगा

लूका 24:49

ते दिख्खो, जिय्यां मेरे पिता ने वादा कित्ते रा है, तिसेरे हिसाब कने मैं तुसा पर पवित्रात्मा जो भेजणा, ते स्वर्ग का ताकत पाणे तिकर तुसा इसी कस्बे बिच ठहरे रेयो।

यूहन्ना 1:17

इस तांइ कि मूसा रा कानून तां मूसा रे पास्से का दित्तेया गेरे थिया पर परमेश्वर ने यीशु मसीह रे जरिए अनुग्रह कने सच्चाई लोक्कां पर ज़ाहिर कित्ती।

यूहन्ना 14:26

पर पिता ने मेरे नां कने भेजणा इक्क मददगार जो भेजणा जे पवित्रात्मा है, तिसने तुसा जो सब गल्लां सखाणी, अते जे किच्‍छ मैं तुसा जो बोल्लेया से सब गल्लां तिन्ने तुसा जो चेत्ता कराणी।

यूहन्ना 15:26

जां तिस मददगार ने आणा, जिस जो मैं पिता रे पास्से का तुसा का भेजणा, बल्कि सच्चाई री आत्‍मा, जे पिता रे पास्से का आंदी, तिसने मेरी गवाई दैणी।

यूहन्ना 3:33

पर जिनिए तिसेरी गवाई मन्नी लेई, तिनिए इस गल्ल पर छाप लगाई दित्ती कि परमेश्वर सच्चे हिन।

यूहन्ना 6:27

मुकी जाणे वाली रोट्टी तांइ परिश्रम न करो, पर तिस रोट्टी तांइ मैहनत करो जे कि हमेसा री जिन्दगी तक रैह्‍ंदी, जिस जो मणू रा पुत्तर, जे मैं ही है, तुसा जो दिंगा, किजोकी पिता परमेश्वर ने ए करणा रा अधिकार भी दित्ते रा है।

प्रेरितां रे कम्म 1:4

जां से सारे कठ्ठे थिया तां यीशु ने तिन्हा कने मिली करी तिन्हा जो हुकम दित्तेया, यरुशलेम सहर जो ना छड्डो, पर पिता रे तिस वादे रे पूरा होणे रा इतंजार करो, जिसेरी गल्ल तुसा मेरे का सुणी चुके रे हो।

प्रेरितां रे कम्म 13:26

ओ भाईयों, तुसा जे अब्राहम री औलाद हिन, ते जे तुसा परमेश्वर रा डर मनणे वाले हिन, परमेश्वर ने तुसा तांइ मसीह यीशु रे बारे बिच ए बसेख भेज्जे रा है जे लोक्कां जो बचांदे।

प्रेरितां रे कम्म 2:33

इस तरिक्के कने परमेश्वर रे सज्जे हत्थ का सबका बड्डा पदवी पाई करी, ते पिता का से पवित्रात्मा पाई करी जिसेरा वादा कित्ता गेया थिया, ते तिन्हा ने पवित्रात्मा असा जो देई दित्ता रा है, जे तुसा दिखदे ते सूणदे हिन।

रोमियों 1:16

किजोकी मैं मसीह रा सुब बसेख सुनाणे बिच गर्व करदा। ए सुब बसेख परमेश्वर री से ताकत है जिनिए पैल्ले यहूदी लोक्कां जो छुटकारा दित्तेया, ते अवे गैर यहूदियां जो भी छुटकारा देया करदे हिन।

रोमियों 4:11

परमेश्वर ने पैल्ले ही अब्राहम जो धार्मिक ठैहराई करी अपणाई लित्तेया थिया, जां हल्ले तिन्हेरा खतना भी नी होए रा थिया। खतने रा निसान परमेश्वर द्वारा अपणाए जाणे री निशानी है। इधेरे तांइ अब्राहम तिन्हा लोक्कां रे आत्मिक पुरखे हिन जिन्हेरा खतना ता नी होए रा है पर तिन्हा जो परमेश्वर बिच विश्वास है। से मणू अपणे विश्वास रे जरिए धार्मिक बणाए गेरे हिन।

रोमियों 6:17

पर परमेश्वर रा शुकर हो, कि तुसा जे पाप रे गुलाम थिये, अवे मन कने तिन्हा शिक्षां जो मनणे वाले बणी गेरे हिन, जे मैं तुसा जो मसीह रे बारे बिच सिखाई थी।

2 कुरुन्थियों 1:22

जिन्हा ने असा पर मौहर भी लाई ते अमानत रे तौर पर असा जो पवित्रात्मा जो दित्ता।

2 कुरुन्थियों 6:7

असी सच्चे प्यार कने, सच्चाई रे वचनां कने, परमेश्वर री ताकत कने, धार्मिकता रे हथियारां कने जे हमला करणे ते अपणी रक्षा करणे तांइ हिन, ते लोक्कां रा असा री इज्जत या बेइज्जती करणे रे जरिये, ते तिन्हेरे असा रे बारे बिच ठीक या बुरी गल्लां बोलणे रे जरिये भी अप्पु जो परमेश्वर रे चुणे रे दास साबित करदे। ते हालांकि असा जो ढोंगी समजेया गेया, पर असी सच ही बोलदे।

गलातियों 3:14

मसीह यीशु ने ए इधेरे तांइ कित्ता ताकि गैर यहूदियां जो भी से सारी आशीषां मिल्ले जिसेरा वादा परमेश्वर ने अब्राहम कने कित्ते रा थिया। मसीह यीशु बिच विश्वास करणे रे जरिये असी पवित्रात्मा जो हासिल करण, जिसेरा वादा तिन्हा ने असा कने पैल्ले कित्तेया थिया।

इफिसियों 4:21

मेरे जो इस गल्ल रा पक्के तौर पर पता है कि जां तुसा ने मसीह यीशु रे बारे बिच सूणेया थिया तां तुसा तिन्हा का सच्ची शिक्षां जो सिख्खेया थिया।

इफिसियों 4:30

अपणे कम्मां री वजह कने पवित्रात्मा जो दुखी मत करो जिन्हेरे जरिये छुटकारे वाले दिन तांइ तुसा पर मौहर लाई गे री है।

1 थिस्सलुनीकियों 2:13

इस तांइ असी भी परमेश्वर रा शुक्रिया लगातार करदे की जां असा रे जरिए परमेश्वर रे सुब बसेख रा वचन तुसा ने सूणेया, तां तुसा तिसजो मणूआं रा नी पर परमेश्वर रा वचन समजी करी अपणाया कि से हकीकत बिच तिन्हेरे हिन, ते ए ही सुब बसेख तुसा विश्वास करणे वालेयां लोक्कां री जिन्दगी बिच कम्म करदा।

2 तीमुथियुस 2:15

जिन्नी जादा होई सके तुसा उन्नी जादा मैहनत करो ताकि परमेश्वर तुसा जो तिन्हेरे इदेय कम्म करणे वाले मणू रे रुप बिच पसंद करी सके जे तिन्हेरे कम्म का शर्मिंदा ना हुंदा हो ते जे सही तरिक्के कने तिन्हेरे सच्चाई रे बसेख जो सुणांदा हो।

2 तीमुथियुस 2:19

तां भी परमेश्वर रे लोक्कां रा विश्वास कुसकी घरे री नीं सांई मजबूत है जे बिल्कुल भी हिलदी नी। तिस नीं पर ए गल्लां लिखित्ते री हिन, “परमेश्वर जाणदे कि तिन्हेरे मणू कुण हिन” ते ए भी “जे मणू परमेश्वर री अराधना करदे तिन्हा जो बुराई करणा छड्डी दैणा चाएदा।”

2 तीमुथियुस 3:15

तू बचपन का ही पवित्रशास्त्र बिच लिख्खे री गल्लां जो जाणदा, जे तेरे जो समझ देई सकदे कि तू मसीह बिच विश्वास करे ते छुटकारा पाए।

तीतुस 2:11

किजोकी परमेश्वर ने सारे लोक्कां जो छुटकारा दैणे तांइ इक्क रस्ता खोल्ली करी तिन्हा पर अनुग्रह कित्तेया।

इब्रानियों 2:3

तां फिरी असी ए किय्यां सोच्ची सकदे कि जे अगर असी इस छुटकारे रे बसेख री ना-फरमानी करी के बची सकदे, जे मसीह ने अप्पु दित्तेया। असा जो ए बसेख तिन्हा लोक्कां ने दित्तया, जिन्हा ने तिन्हा जो ए सब दसदे सूणेया थिया।

याकूब 1:18

तिन्हा ने अपणी ही मर्जी कने असा जो सच्चाई रे वचन रे जरिए असा जो अपणी औलाद बणाया, ताकि असी तिन्हेरे बणाए री सृष्टि रे पैल्ले फल्ल सांई सृष्टि रे सबका खास हिस्सा बणन।

याकूब 1:21

इधेरे तांइ सारी गन्दगी ते नफरत जो छड्डी करी परमेश्वर रे वचन जो निमते मन कने अपणाई लेयो जे दिल बिच बोया गे रा है ते जे तुसा जो छुटकारा देई सकदा।

1 पतरस 2:10

भविष्यद्वक्ता होशे ने तुसा रे बारे बिच जे लिख्खे रा है से सही ही है, “पैल्ले तुसा परमेश्वर रे मणू नी थिये पर अवे तुसा परमेश्वर रे मणू हिन। पैल्ले तुसा परमेश्वर रे दया जो नी जाणदे थिये पर अवे तुसा जाणदे किजोकी तिन्हा ने तुसा पर दया करी दित्ते री है।”