कुलुस्सियों 4:3 - चम्बयाली नौआ नियम

³ ते कने-कने असा तांइ भी प्रार्थना करदे रेया करो ताकि परमेश्वर असा जो मसीह रे बसेख रा प्रचार करणे रा इक्क इदेया मौक्का दैण कि असी मसीह रे तिस राज़ रा वर्णन भी करी सकण। मैं अब्बे कैद बिच है किजोकी मैं इस बसेख रा प्रचार कित्ता।

कुलुस्सियों 4:3 ပူးပေါင်းရင်းမြစ်များ

मत्ती 13:11

यीशु ने जवाब दित्तेया, तुसा जो स्वर्ग रे राज रे भेदां री समझ दित्ती गे री है, पर इन्हा जो नी।

प्रेरितां रे कम्म 14:27

तिते पूज्जी करी, तिन्हा ने कलीसिया इकठ्ठी कित्ती ते दस्सेया, कि परमेश्वर ने असा कने होई करी कदेय बड्डे-बड्डे कम्म कित्ते ते किय्यां गैर यहूदी जो मसीह यीशु बिच विश्वास करणे तांइ दुआर खोल्ली दित्तेया।

रोमियों 16:25

परमेश्वर जो महिमा मिल्ले जे तुसा रे विश्वास जो तिस सुब बसेख रे हिसाब कने मजबूत करी सकदे जिसेरा मैं प्रचार करदा। मसीह यीशु रे इस सुब बसेख ने तुसा गैर यहूदियां तांइ परमेश्वर री तिस योजना जो ज़ाहिर करी दित्तेया, जे सदियां का लुके री थी।

1 कुरुन्थियों 16:9

हालांकि तित्ते मेरे मते सारे विरोधी हिन पर तिसेरे बावजूद मेरे जो तित्ते बड़ा असरदार कम्म करणे रा मौक्का मिल्ले रा है।

1 कुरुन्थियों 4:1

असा जो मसीह रे से सेवक समझो जिन्हा जो परमेश्वर रे बसेख रे राज़ जो फैलाणे रा कम्म दित्ते रा है।

2 कुरुन्थियों 2:12

जां मैं मसीह यीशु रा सुब बसेख सुनाणे त्रोआस सहर बिच आया, तां प्रभु ने मेरे जो सुब बसेख सुनाणे रा बड्डा मौक्का दित्तेया।

इफिसियों 3:1

किजोकी परमेश्वर ने ए सारा किच्‍छ तुसा गैर यहूदी लोक्कां तांइ कित्तेया, मैं पौलुस तुसा सारेयां तांइ प्रार्थना करदा। मैं मसीह यीशु री सेवा तुसा रे खातिर कित्ती इधेरे तांइ मैं कैद बिच है।

इफिसियों 3:3

जिय्यां कि मैं पैल्ले ही घट शब्दां बिच तुसा जो दस्सी चुके रा है कि परमेश्वर ने से राज़ मेरे पर ज़ाहिर कित्ते रा है।

इफिसियों 3:4

जिस जो पढ़ी करी तुसा जाणी सकदे कि मैं मसीह यीशु रे तिस राज़ किन्नी ठीक तरिक्के कने समजदा।

इफिसियों 3:9

ते सारे लोक्कां जो परमेश्वर री ए राज़ री योजना समझाणे तांइ, जिस जो परमेश्वर, जे सारी दुनिया रे बणाणे वाले हिन, तिन्हा ने दुनिया री सुरुआत का लुकाई करी रख्खे रा थिया।

इफिसियों 4:1

इधेरे तांइ मैं जे प्रभु री सेवा करणे री वजह कने कैद बिच है, तुसा रे छन्दे करदा कि जिस बुलाह्ट कने तुसा सद्दे गे थिये, तिस जोग्गी चालचलन बणाई रख्खो,

फिलिप्पियों 1:19

किजोकी मैं जाणदा कि तुसा जे मेरे तांइ प्रार्थना करेया करदे हिन, तिसेरे जरिए, ते मसीह यीशु री पवित्रात्मा री मदद कने मेरे जो छुटकारा मिलणा।

फिलिप्पियों 1:7

खरा होणा कि मैं तुसा सबणी तांइ इदेय सोच रख्खां, किजोकी मैं तुसा कने बड़ा वरी प्यार रखदा, किजोकी तुसा मेरे कने ए सौभाग्य परमेश्वर रे अनुग्रह कने हासिल कित्ते रा है, अब्बे भी जां मैं कैद बिच है ते मसीह रे सुब बसेख पर उठणे वाले सवाल्लां रा जवाब दैणे ते तिसजो साबित करणे बिच भी।

कुलुस्सियों 1:26

मतलब कि से बसेख जिस जो जे परमेश्वर सदियां ते पीढ़ियां का राज़ रख्खेया, पर अवे परमेश्वर ने अपणे पवित्र मणूआं पर तिसजो जाहिर कित्ते रा है।

कुलुस्सियों 4:18

मैं पौलुस, चीठ्ठी रे इस हिस्से जो अपणे हत्थ कने लिख्खी करी तुसा जो नमस्ते भेज्जेया करदा है। याद रख्खेयो कि मैं कैद बिच है, ते मेरे तांइ प्रार्थना करदे रेयो। तुसा पर परमेश्वर रा अनुग्रह बणे रे। आमीन।

1 थिस्सलुनीकियों 5:25

ओ संगी विश्वासियों, असा तांइ प्रार्थना करो।

2 तीमुथियुस 1:16

उनेसिफुरूस रे टब्बर पर प्रभु दया करण, किजोकी से मती वरी मेरे कने मिल्लेया ते मिंज्जो प्रोत्साहित कित्तेया, ते से कैद बिच मेरे जो मिलणे तांइ शर्मिंदा नी होया।

2 तीमुथियुस 2:9

मैं मुजरिमां सांई तकलिफां सहन करेया करदा है किजोकी मैं सुब बसेख रा प्रचार करदा, इत्ते तिकर मैं कैद बिच भी पाया गे रा है, पर परमेश्वर रे बसेख जो फैलणे का कोई नी रोक्की सकदा।

2 तीमुथियुस 4:2

कि तू परमेश्वर रे बसेख रा प्रचार कर, ते चाए हालात ठीक होण या बुरे, हर बेल्ले प्रचार करणे तांइ तैयार रे, जरुरी है कि तू तिन्हा जो दस्से कि तिन्हा ने कै गलती कित्ते री है, ते तेरे जो तिन्हा जो तिन्हेरे पाप्पां तांइ बकणा जरुरी है। पर तेरे जो लोक्कां जो बड़े सबर कने सिखांदे होए प्रोत्साहित करणा भी जरुरी है।

फिलेमोन 1:22

ते इक्क होर गल्ल कि अपणे घर बिच मेरे तांइ इक्क कमरा तैयार करी रख्खो किजोकी मेरे जो इस गल्ल री उम्मीद है कि परमेश्वर ने तुसा री प्रार्थनां रा जवाब दैणा ते मेरे जो तित्ते आई करी तुसा कने मिलणे रा मौक्का मिलणा।