कुलुस्सियों 3:8 - चम्बयाली नौआ नियम

⁸ पर अवे तुसा इन्हा सारी गल्लां जो, जिय्यां की गुस्से, रोष, दुश्मणी, बैर-भाव, बेजती करणा, गालीयां दैणा, छड्डी देयो।

कुलुस्सियों 3:8 ပူးပေါင်းရင်းမြစ်များ

मत्ती 5:22

पर मैं तुसा जो बोलदा कि जे कोई अपणे भाई पर गुस्सा करगा, तिसजो सजा मिलणी, अते जे कोई अपणे भाई जो निकम्मा बोल्ले तिसजो कचेरी बिच सजा दित्ती जाणी, अते जे कोई अपणे भ्याल जो बेवकूफ बोलगा, तिसजो नरक री आग्ग बिच पाया जाणा।

मरकुस 7:22

व्यभिचार, लालच, बुराई करणा, धोखा, लुचपन, हिर्स, चुगली, घमंड, अते बेफकुफी।

रोमियों 13:13

असा जो रौसनी बिच रैह्णे वाले लोक्कां सांई अपणे चालचलन जो खरा बणाई करी रखणा चाएदा। पर न्याहरे बिच रैह्णे वाले लोक्कां सांई मतवाल्ले, पियक्कड़, रंगरेलियां, व्यभिचारी करणे वाले, अश्लील, झगड़े करणे वाले ते हिर्स करणे वाले ना बणे।

1 कुरुन्थियों 3:3

किजोकी हल्ले तांइ तुसा इस दुनिया रे अविश्वासी लोक्कां सांई हिन। तुसा रे बिच हिर्स अते झगड़ा है, इस कने साबित हुंदा कि तुसा इस दुनिया रे दूए लोक्कां सांई हिन ते तिय्यां ही बरताव करदे।

2 कुरुन्थियों 12:20

किजोकी मेरे जो डर है, कि कुते इय्यां ना होई जाए कि जां मैं तुसा का आं, तां जदेया मैं चाह्‍ंदा, तुसा तदेय ना होण, ते तुसा भी मेरे जो तदेया ना पाओ जदेया तुसा मेरे जो चाह्‍ंदे। ते मेरे जो डर है कि तिसेरी वजह कने तुसा बिच लड़ाई, हिरस, गुस्सा, विरोध, मतलबीपन, चुगली, घमण्ड, धोखा-धड़ी ते बखेड़े होई जाणे।

गलातियों 5:15

जे अगर तुसा अप्पु-मिते लड़दे रे, तां चुकन्ने रेयो कि कुथकी तुसा अप्पु जो बर्बाद ना करी लेयो।

गलातियों 5:20

मूर्तां री पूजा करणा, जादू-टोणा करणा, दुश्मणी रखणा, लड़ाई-झगड़े करणा, हिरस, लैह्र, मतलबीपन, दूज्जे रे खिलाफ सोच, फूट पाणा, गुटबंदी करणा,

गलातियों 5:26

असी घमंडी ना बणे ते ना ही इक्क-दूज्जे जो छेड़े, अते नां इक्क-दूज्जे री हिर्स करण।

इफिसियों 4:22

कि तुसा जो दस्सेया गेया थिया कि तुसा री बेवकूफी भरी मर्जियां ने तुसा जो बर्बाद करी छडणा ते तुसा जो अपणी जिन्दगी जीणे रे पुराणे तरिक्के जो ते अपणी सारी गलत आदतां जो छड्डी दैणा चाएदा।

इफिसियों 4:25

इधेरे तांइ झूठ बोलणा छड्डी करी सब जणे अपणे संगी विश्वासी कने सच बोल्लेया करो, जिय्यां कि असी इक्क ही सरीर रे अंग हिन।

इफिसियों 4:26

जे अगर तुसा गुस्सा भी होई जांदे ता ध्यान रख्खो कि कोई पाप ना करो, ते ध्यान रख्खो कि रात्ती सोणे का पैल्ले-पैल्ले ही अपणे गुस्से जो सांत करी लेया करो।

इफिसियों 4:29

कोई गंदी गल्ल तुसा रे मुँह का ना निकले पर जे भी तुसा बोल्लो से गल्ल ठीक ते दूज्जेयां तांइ मददगार हो ताकि सुनणे वालेयां जो सुणी करी होंसला मिल्ले।

इफिसियों 5:4

ते ना गाल-मुआल, ना बेशर्मी री गल्लां, ना बेवकूफी री गल्लां ते ना ही मजाक उड़ाणे री गल्लां हो किजोकी इदेय गल्लां तुसा जो नी जचदी। पर तुसा जो हमेसा परमेश्वर रा शुक्रिया करणा चाएदा।

कुलुस्सियों 3:5

इधेरे तांइ तुसा अप्पु जो अपणे पुराणे पापी स्वभाव रे काबू बिच मत पैणा देयो। मतलब कि, व्यभिचार, भिठ्ठे काम्म, बुरी तमन्‍ना, ते लालच जे मूर्ति पूजा करणे रे बराबर है।

कुलुस्सियों 3:9

इक्क दूए कने झूठ मत बोल्लो, किजोकी तुसा ने अपणे पुराणे बुरे कम्मां जो छड्डी दित्ते रा है।

1 तीमुथियुस 1:13

मसीह बिच विश्वास करणे पैल्ले तां मैं तिन्हेरी बुराई करदा थिया, विश्वासी लोक्कां पर जुल्म करी के बड़ी बेरहमी कने तिन्हेरा नुक्सान करदा थिया पर फिरी भी परमेश्वर ने मेरे पर दया कित्ती किजोकी मेरे जो नी पता थिया कि मैं जे करेया करदा है से गलत है किजोकी तिस बेल्ले तक मैं मसीह यीशु बिच विश्वास नी कित्तेया थिया।

1 तीमुथियुस 1:20

उन्ही बिच का हुमिनयुस ते सिकन्दर हिन जिन्हा जो मैं कलीसिया बिच का कड्डी दित्ते रा है ते तिन्हा जो शैतान रे वस बिच छड्डी दित्ते रा है ताकि से मणू समजी जाण कि तिन्हा जो परमेश्वर री बेजती नी करणी चाएदी।

इब्रानियों 12:1

जां विश्वास बिच जीणे वाले इन्हा मणूआं री मती सारी गवाहियां जो असी जाणदे, इधेरे तांइ आओ, असी तिन्हा सारी चीजां जो छड्डी दैण, जे असा जो रोकदी, ते उलझाणे वाले जो दुर करी के, सबर कने तिस रस्ते पर बदधे जाण, जिस पर असा जो जाणा चाएदा।

याकूब 2:7

ए से ही मणू हिन जे तुसा रे मसीह यीशु रे उत्तम नां री बुराई करदे।

1 पतरस 2:1

इधेरे तांइ हर तरिक्के री नफरत, धोख्खेबाजी, ढोंग, हिर्स ते लोक्कां री बदनामी करणा छड्डी देयो।

2 पतरस 2:18

जां से लोक्कां जो सिखाणा लगदे, तां से बेकार ते घमंड कने भरपूर शब्दां रा इस्तेमाल करदे। से लोक्कां जो ए सिखांदे कि से अपणे सरीर री बेशर्मी भरी इच्छां जो पूरा करी सकदे। ते से लोक्कां जो पाप री से ही चीजां करणे बिच दुबारा भटकाई दिंदे जिस जो करणा तिन्हा ने हाल ही बिच छड्डे रा हुंदा।

2 पतरस 2:7

पर तिन्हा ने सदोम सहर जो तबाह करणे का पैल्ले लूत जो तिस सहर का कढाइ करी तिसजो बचाया, जे इक्क खरा मणू थिया। लूत इस गल्ल कने बड़ा परेशान थिया किजोकी मणू परमेश्वर रे कानून रे मुताबिक नी चलदे थिये ते अश्लील चीजां करदे थिये।

यहूदा 1:13

जिय्यां समुंद्र री जोरदार छलारां गंदी झाग बणादी तिय्यां ही ए मणू भी शर्मिंदगी भरे कम्म करदे। से मणू सुरुआत ता करदे पर सीद्दे रस्ते पर नी चलदे, से सही रस्ता नी दिखांदे। परमेश्वर ने तिन्हा लोक्कां तांइ इदेइ न्याहरी जगाह् बणाए री है जित्ते तिन्हा लोक्कां जो रख्खेया जाणा।

यहूदा 1:8

तिय्यां ही मसीह यीशु बिच विश्वास करणे रा ढोंग करणे वाले मणू ए दावा करदे कि परमेश्वर ने दर्शन देई करी ए बोलदे कि असी अनैतिक जिन्दगी जी करी अपणे शरीरां जो भिठ्ठा करी सकदे। से नी चाह्‍ंदे कि कोई तिन्हा पर हक जताए ते से मणू महिमामय स्वर्गदूतां रे बारे बिच गलत गल्लां बोलदे।

प्रकाशित वाक्य 16:9

मणू बड़ी गरमी कने फुकी गे ते परमेश्वर रे नां री बुराई कित्ती जिन्हा जो इन्हा मुसीबतां पर हक्क है, पर तिन्हेरी महिमा करणे तांइ मन नी लाया। पर तिन्हा ने फिरी भी अपणे पाप्पां का तौबा नी कित्ती ते परमेश्वर री अराधना नी कित्ती।