कुलुस्सियों 2:8 - चम्बयाली नौआ नियम

⁸ चुकन्ने रेयो की कोई तुसा जो अपणी तिन्हा विचारां ते बेकार गल्लां ते धोखे कने फसाई ना लेयो, जे लोक्कां री परम्परा ते दुनियावी रीति-रीवाज जे सदियां का चली आया करदी हिन, ते इस दुनिया री न्याहरे री ताकत पर आधारित है, पर मसीह यीशु री शिक्षा पर आधारित नी है।

कुलुस्सियों 2:8 ပူးပေါင်းရင်းမြစ်များ

मत्ती 10:17

पर मणूआं का बची करी रेयो, किजोकी तिन्हा तुसा जो पंचायता बिच देई दैणा, अते तिन्हा तुसा जो अपणी सभास्थल बिच कोड़े मारणे।

मत्ती 16:6

यीशु ने तिन्हा जो बोल्लेया, दिख्खो, फरीसी अते सदूकियां री तराक्क का सावधान रेयो।

मत्ती 7:15

“झूठे भविष्यद्वक्ता का बच्ची रेयो, जे भेड़ां रे भेस अन्दर तुसा का आन्दे, पर अन्दर का से खूंखार भेड़िए सांई हिन।”

प्रेरितां रे कम्म 17:18

तां इपिकुरी ते स्तोईकी पणतां बिच का किन्ने तिस कने तर्क करणे लग्गे, ते कितणेयां ने बोल्लेया, ए अंट-शंट बोलणे वाला कै बोलणा चांदा? पर होरनियाँ ने बोल्लेया, से दूज्जे देवता रा प्रचारक लगदा, किजोकी ए यीशु रा, ते मरी करी फिरी जिन्दे होई जाणे रा सुब बसेख सुणांदा।

प्रेरितां रे कम्म 17:32

मरे रेयां रे फिरी जिन्दा होई जाणे री गल्ल सुणी करी किन्ने ही मजाक उड़ाणा लग्गे, ते कित्तणेया ने बोल्लेया, ए गल्ल असा तुसा का फिरी कदी सुणगे

रोमियों 16:17

अवे ओ संगी विश्वासियों, मैं तुसा रे छंदे करी के बोलदा, कि तुसा तिन्हा लोक्कां का अलग होई जाओ, जे दूज्जेयां रे विश्वास जो कमजोर करदे, अते तिन्हा लोक्कां भी दुर रेयो जे असा री सिखाए री गल्लां री ना-फरमानी करी के कलीसिया बिच मुसीबतां ते फूट पांदा।

1 कुरुन्थियों 10:12

इधेरे तांइ जे विश्वासी ए दावा करदा कि से विश्वास बिच पक्का है, से चुकन्ना रेयो कि कुदखी तिस्सी तरिक्के रे पाप बिच ना पेई जाओ।

1 कुरुन्थियों 8:9

पर चुकन्ने रेयो! इय्यां ना हो कि तुसा रे इय्यां करणे री वजह कने कुसकी संगी विश्वासी रा मसीह यीशु बिच विश्वास कमजोर होई जाओ।

2 कुरुन्थियों 10:5

असी इन्सानी बैह्सबाजी ते घमंड री वजह कने आणे वाली हर इक्क बाधा जो तोड़ी दिंदे जे लोक्कां जो परमेश्वर जो जानणे का दुर रखदी। ते असी तिन्हेरे हर इक्क चाहत जो काबू बिच करी के, तिन्हा जो मसीह यीशु री गल्ल मनणे वाले बणांदे।

गलातियों 1:14

मैं अपणी उमर रे बाकि मणूआं का बदिया यहूदी मणू थिया, ते मैं अपणे पूरखां री परम्परा जो सिखणे ते मनणे बिच हमेसा बड़े जोस बिच हुंदा थिया।

गलातियों 4:3

तिय्यां ही असी भी जां तिकर बच्चे थिये, तां दुनिया री सुरुआती शिक्षा रे वस बिच होई करी इक्क गुलाम सांई थिये।

गलातियों 4:9

पर अवे ता असा ने परमेश्वर जो जाणी लित्ते रा है, बल्कि इय्यां बोलणा जादा सही होणा कि पैल्ले परमेश्वर ने असा कने रिस्ता बणाया। तां फिरी किय्यां तिस कमजोर ते सुरुआती शिक्षा पास्से मुड़ी सकदे? तुसा फिरी किजो तिन्हेरे गुलाम बणना चाह्‍ंदे?

गलातियों 5:15

जे अगर तुसा अप्पु-मिते लड़दे रे, तां चुकन्ने रेयो कि कुथकी तुसा अप्पु जो बर्बाद ना करी लेयो।

इफिसियों 2:2

तिस बेल्ले तुसा दुनियादारी रे तौर-तरिक्के कने चलदे थिये ते तुसा शैतान रे कहे मुताबिक चलेया करदे थिये जे दुष्टात्मां रा हाकिम है, ते जे अज्ज भी तिन्हा लोक्कां बिच कम्म करेया करदा है जे परमेश्वर रे हुकमां री ना-फरमानी करदे।

इफिसियों 4:20

पर जां तुसा जो मसीह यीशु रे बारे बिच सिखाया गेया थिया तां तुसा ने ए सारी गल्लां नी सिख्खी।

इफिसियों 5:6

इधेरे तांइ इदेय लोक्कां का धोख्खा मत खांदे जे इन्हा पाप्पां जो करणे तांइ बहान्ने बणांदे किजोकी इन्हा ही कम्मां री वजह कने परमेश्वर रा गुस्सा तिन्हेरे हुकमां री ना-फरमानी करणे वालेयां पर भड़कदा।

फिलिप्पियों 3:2

तिन्हा बुरे लोक्कां का बची रेयो जे कूत्तेयां सांई हिन, ते तिन्हा लोक्कां का भी बचे रेयो जे तुसा जो बोलदे कि छुटकारा पाणे तांइ तुसा जो खतना करवाणे री जरुरत है।

कुलुस्सियों 2:18

कुसकी भी मणू जो तुसा जो निकम्मा बणाणे रा मौक्का मत देयो जे झूठ्ठा निमतापन दिखांदा ते स्वर्गदूतां री पूजा करणे बिच खुस हुंदा। इदेय मणू दर्शन दिखदे ते बड्डी बड्डी गल्लां बोलदे, ते तिन्हेरी इन्सानी सोच तिन्हा जो बेवकूफी रे घमंड कने भरी दिंदी।

कुलुस्सियों 2:20

किजोकी तुसा रा पापी स्वभाव मसीह यीशु कने मारी दित्तेया गे रा है, इधेरे तांइ अवे तुसा जो दुनियावी रीति-रीवाज्जां जो मनणे री जरुरत नी है, फिरी भी तुसा तिन्हा गल्लां जो इय्यां मनदे कि जिय्यां कि से हल्ले भी तुसा जो काबू बिच रखदे,

कुलुस्सियों 2:22

लोक्कां री ए सारी रीति-रीवाज ते शिक्षां बेकार हिन, किजोकी ए मणूआं रे हुकमां ते शिक्षा पर आधारित है।

कुलुस्सियों 2:23

इदेय रीति-रीवाज, अपणे अराधना रे तौर-तरिक्के, झूठ्ठे निमतेपन ते कड़े शारीरिक अभ्यास कने ता बड़े ज्ञान रा भाव ता लगदा, पर ए रीति-रीवाज लोक्कां जो तिन्हेरे बुरे ख्याल्लां जो रोकणे बिच कोई मदद नी करदे।

1 तीमुथियुस 6:20

ओ तीमुथियुस, इस जिम्मेदारी रा ध्यान रख्खे कि तू से कम्म जरुर करे जे करणे तांइ परमेश्वर ने तिज्जो चुणे रा है, मनघड़ंत ते खोखली गल्लां का दुर रेयो जे सुनणे बिच समजदारी री गल्लां लगदी।

2 तीमुथियुस 3:13

पर दुष्ट ते धोख्खेबाज लोक्कां ने होर भी जादा बुरे कम्म करणे। तिन्हा ने लोक्कां जो धोख्खा दैणा ते तिन्हा ने अप्पु भी लोक्कां धोख्खा खाणा।

इब्रानियों 13:9

नौई ते बखरी-बखरी शिक्षां रे पीच्छे मत चलदे, जिन्हा ने तुसा जो सही रस्ते का गलत रस्ते पर लेई जाणा। परमेश्वर रा अनुग्रह कने अंदरूनी ताकत पाणा ठीक गल्ल है, ते खाणे-पीणे रे कानूनां जो ना मनणा खरा है, किजोकी जे मणू इन्हा कानूनां जो मनदे, तिन्हा जो इन्हा कने कोई फायदा नी होणा।

इब्रानियों 3:12

ओ संगी विश्वासियों, चुकन्ने रेयो, कि तुसा रे मन बिच इदेइ बुराई ते अविश्वास ना आई जाओ, जे तुसा जो जिन्दगी दैणे वाले परमेश्वर रे हुकमा जो मनणे का फेरी दे।

1 पतरस 1:18

तुसा जाणदे कि पैल्ले तुसा बेकार तरिक्के कने जिन्दगी जिया करदे थिये, से ओ ही तरिक्का थिया जे तुसा जो अपणे का पैल्ले रे मणूआं का मिल्लेया थिया। पर तुसा जो तिस बेकार जिन्दगी का छुटकारा दित्तेया गेया। तुसा रा मुल्ल चुकाया गेया पर सोन्ने चाँदी जदेई चीजां कने नी जे सड़ी जांदी, पर मसीह रे कीमती खून कने, जे इक्क सुच्चे ते सिद्व उरणू सांई हिन।

2 पतरस 3:17

तुसा जो पैल्ले का पता है कि ए सब चीजां होणे वाली हिन। इधेरे तांइ चुकन्ने रेयो, किजोकी जे मणू कानूनां जो नी मनदे तिन्हा ने तुसा कने झूठ बोल्ली-बोल्ली करी तुसा जो भटकाई दैणा। तुसा ने तिस ही गल्ल पर शक करणा सुरु करी दैणा जिस पर तुसा इक्क समय पर पक्का विश्वास करदे थिये।

2 यूहन्ना 1:8

इधेरे तांइ तुसा इदेय मणूआं का चुकन्ने रेयो कि से तुसा जो धोखा ना दैण ताकि परमेश्वर री सेवा करणे तांइ तुसा जे मैहनत कित्ते री है, से बेकार ना जाओ पर इसेरे बजाए परमेश्वर तुसा जो तुसा री सेवा रा ईनाम दे।