कुलुस्सियों 2:4 - चम्बयाली नौआ नियम

⁴ ए मैं इस तांइ बोलदा की कोई मणू तुसा जो गलत शिक्षा सिखाई करी धोखा ना दे।

कुलुस्सियों 2:4 ပူးပေါင်းရင်းမြစ်များ

मत्ती 24:24

किजोकी झूठ्ठे मसीह ते झूठ्ठे भविष्यद्वक्ता खड़ी उठणे, ते बड्डी-बड्डी चीजां ते हैरान करणे वाले चमत्कार दिखाणे कि जे होई सके ते चुणे रे लोक्कां जो भी भड़काई दैण।

मत्ती 24:4

यीशु ने तिन्हेरे जो जवाब दित्तेया, चौकन्ने रेयो! कोई तुसा जो भड़काई ना सके,

मरकुस 13:22

किजोकी झूठ्ठे मसीह ते झूठे भविष्यद्वक्ता खड़ी उठणे, अते तिन्हा मती किस्म री निशानियां ते चमत्कार वाले कम्म दखाणे ताकि होई सके तां से चुणे रे लोक्कां जो भी धोखा देई दैण।

प्रेरितां रे कम्म 20:30

तुसा बिच मझाटे बिच इदेय-इदेय मणू आई जाणे जिन्हा ने चेल्‍लेयां जो भी भटकाई दैणे तांइ पुठ्ठी-सीद्दी गल्लां बोलणी।

1 कुरुन्थियों 2:4

अते मेरे शिक्षा ते मेरे प्रचार बिच इन्सानी समझ वाले बड्डे बड्डे छैल शब्द नी थिये पर पवित्रात्मा ने तुसा जो इन्ने ताकतवर तरिक्के ए दिखाया कि जे बसेख मैं तुसा जो सुणाया थिया से सच थिया,

2 कुरुन्थियों 11:3

पर मैं डरदा कि जिय्यां शैतान ने कीड़े रे रुप बिच, अपणी चलाकी कने हव्वा जो बैह्काया थिया, तिय्यां ही तुसा रे मन तिस सिधाई ते पवित्रता, जिस कने तुसा जो मसीह यीशु रा आदरमान करणा चाएदा, कुदखी भ्रष्ट नी कित्ते जाण।

इफिसियों 4:14

ताकि अग्गे जो असी बच्चेयां सांई ना रैह्ण, असी तिन्हा किस्तियां सांई नी रैह्णा जे लहरां ते हवा कने इत्ते-उत्ते डोलदी रेह्न्दी। इसेरा मतलब ए है कि चलाक ते ठग लोक्कां ने फिरी असा जो अपणी झूठ्ठी शिक्षा कने बेवकूफ नी बणाई सकणा।

इफिसियों 4:17

इधेरे तांइ मैं परमेश्वर का मिल्ले रे अधिकार कने ए बोलदा कि जिय्यां परमेश्वर बिच विश्वास ना करणे वाले मणू बेकार गल्लां बिच जिन्दगी जिन्दे, तुसा अज्ज का बाद तिय्यां मत जिन्दे।

इफिसियों 5:6

इधेरे तांइ इदेय लोक्कां का धोख्खा मत खांदे जे इन्हा पाप्पां जो करणे तांइ बहान्ने बणांदे किजोकी इन्हा ही कम्मां री वजह कने परमेश्वर रा गुस्सा तिन्हेरे हुकमां री ना-फरमानी करणे वालेयां पर भड़कदा।

कुलुस्सियों 2:18

कुसकी भी मणू जो तुसा जो निकम्मा बणाणे रा मौक्का मत देयो जे झूठ्ठा निमतापन दिखांदा ते स्वर्गदूतां री पूजा करणे बिच खुस हुंदा। इदेय मणू दर्शन दिखदे ते बड्डी बड्डी गल्लां बोलदे, ते तिन्हेरी इन्सानी सोच तिन्हा जो बेवकूफी रे घमंड कने भरी दिंदी।

कुलुस्सियों 2:8

चुकन्ने रेयो की कोई तुसा जो अपणी तिन्हा विचारां ते बेकार गल्लां ते धोखे कने फसाई ना लेयो, जे लोक्कां री परम्परा ते दुनियावी रीति-रीवाज जे सदियां का चली आया करदी हिन, ते इस दुनिया री न्याहरे री ताकत पर आधारित है, पर मसीह यीशु री शिक्षा पर आधारित नी है।

2 तीमुथियुस 2:16

पर अभक्त ते खोखली चीजां रे बारे बिच गल्ल-बात करणे का टलो, किजोकी जे मणू इदेइ अभक्ति वाली चीजां री गल्ल-बात करणे शामिल हुंदे से अप्पु भी अभक्त बणी जांदे।

2 तीमुथियुस 3:13

पर दुष्ट ते धोख्खेबाज लोक्कां ने होर भी जादा बुरे कम्म करणे। तिन्हा ने लोक्कां जो धोख्खा दैणा ते तिन्हा ने अप्पु भी लोक्कां धोख्खा खाणा।

1 यूहन्ना 2:18

ओ बच्चेयों, मसीह रे हटी आणे रा बेल्ला नेड़े है ते जिय्यां तुसा सुणे रा है कि मसीह यीशु रा विरोधी आणे वाला है, तिसेरे हिसाब कने अब्बे भी मते सारे मसीह यीशु रा विरोध करणे वाले खड़ी गेरे हिन, इस कने असा जो पता चलदा कि ए आखरी समय है।

1 यूहन्ना 2:26

मैं तुसा जो ए गल्लां तिन्हा गलत शिक्षा देई करी भटकाणे वाले लोक्कां का चुकन्ने रैह्णे तांइ लिख्खे री हिन।

1 यूहन्ना 4:1

ओ प्यारेयो, हर तिस मणू पर भरोस्सा मत करो जे ए दावा करदे कि असी पवित्रात्मा रे कहे मुताबिक गल्लां करदे। पर आत्‍मा जो परखो कि से परमेश्वर रे पास्से का हिन का नी किजोकी मते सारे झूठ्ठी भविष्यद्वक्ता दुनिया बिच हिन।

2 यूहन्ना 1:7

मैं ए इधेरे तांइ बोलदा किजोकी लोक्कां जो झूठ्ठी शिक्षा देई करी भटकाणे वाले मणू दुनिया बिच जगाह्-जगह फैल्ली गेरे हिन। से बोलदे कि मसीह यीशु इक्क मणू रे रुप बिच दुनिया बिच नी आए थिये। जे अगर कोई मणू इदेइ गल्लां करदा तां से मणू मसीह विरोधी है जे लोक्कां जो भटकांदा।

प्रकाशित वाक्य 12:9

तां तिस अजगर ते तिसेरे दूत जो धरती पर सूटी दित्तेया गेया। से अजगर ओ ही है जिस जो पैल्ले-पैल्ले कीड़ा भी बोल्लेया गेया थिया, जिसेरा नां शैतान। एह् ओई है जे दुनिया रे लोक्कां पर इल्जाम लगांदा अते भटकाया करदा है।

प्रकाशित वाक्य 13:8

धरती रे सारे मणूआं ने तिसेरी अराधना कित्ते री है। जिन्हा लोक्कां रे नां तिस जिन्दगी री कताब बिच दुनिया जो बणाणे रे पैल्ले लिख्खे गेरे हिन, सिर्फ तिन्हा ने ही तिस ड्रोणे जानवर री अराधना नी कित्ती। से जिन्दगी री किताब, तिस “उरणू” री कताब है जिस जो कुर्बान कित्तेया गेया थिया।