कुलुस्सियों 1:12 - चम्बयाली नौआ नियम

¹² ते पिता परमेश्वर रा शुकर करदे रेयो, जिन्हा ने असा जो इस जोग्गा बणाया कि स्वर्ग रे राज बिच तिन्हेरे अपणे लोक्कां कने तिस विरासत रे हिस्सेदार बनण, जे तिन्हा ने अपणे लोक्कां तांइ तैयार कित्ते रा है।

कुलुस्सियों 1:12 ပူးပေါင်းရင်းမြစ်များ

मत्ती 25:34

फिरी मैं अपणे सज्जे हत्थ पास्से वालेयां जो बोलणा, ओ मेरे प्यो का आशीष पाये रे लोक्कों, आओ, ते जे राज तुसा रे तांइ दुनिया रचणे का पैह्ल्ले तैयार कित्तेया गेया है उसेरे अधिकारी होई जाओ।

यूहन्ना 14:6

यीशु ने तिसजो बोल्लेया, रस्ता अते सच्चाई ते जिन्दगी मैं ही है, बगैर मेरे कोई पिता-परमेश्वर का नी पूज्जी सकदा।

यूहन्ना 20:17

यीशु ने तिसजो बोल्लेया, मेरे जो मत छू, किजोकी मैं हल्ले तांइ पिता का उप्पर नी गेया, पर मेरे चेल्‍लेयां का जाई करी तिन्हा जो बोल्ली दे, मैं अपणे ते तुसा रे परम पिता, अते अपणे ते तुसा रे परमेश्वर का उप्पर जाया करदा है।

यूहन्ना 4:23

पर से बेल्ला आणे वाला है हालांकि अब्बे भी है जिस बिच सच्चे भक्त बाबे री भक्ति आत्‍मा कने सच्चाई कने करणी किजोकी बाबा अपणे तांइ इदेए भक्तां जो तोपदा

प्रेरितां रे कम्म 20:32

ते अवे मैं तुसा जो परमेश्वर, ते तिन्हेरे अनुग्रह रे वचन जो सौंपी दिन्दा जे तुसा रे विश्वास बिच तरक्की करांदा ते सारे पवित्र कित्ते रे मणूआं बिच साझ्झी करी के परमेश्वर विरासत बिच दैणा।

प्रेरितां रे कम्म 26:18

ताकि तू तिन्हेरी आख्खियां खोल्ले जिस कने से न्याहरे का रौसनी पास्से, ते शैतान रे अधिकार का निकली करी परमेश्वर पास्से फिरी जाण ताकि से तिन्हेरे पाप्पां जो माफ करण ते से मणू तिन्हा मणूआं कने जगाह् हासिल करण जे मेरे पर विश्वास करणे कने पवित्र कित्ते गेरे हिन।

रोमियों 11:17

इस्राएल देस रे मणू जैतून रे बूट्टे री डालियां सांई हिन। ते तिन्हेरी जड़ तिन्हेरे पुरखा अब्राहम, इसहाक ते याकूब हिन। ते जे अगर किच्‍छ डालियां तिस बिच का कट्टी भी दित्ती गयी हो, ते अगर तू इक्क जंगली बूट्टे री डाली होणे रे बावजूद भी तिन्हा बिच साट्टेया गेया हो, तां जिय्यां कोई साट्टे रे डाली तिस बूट्टे री चिकनेपन री हिस्सेदार बणदी, तिय्यां ही तू भी यहूदियां जो मिलणे वाली तिन्हा आशीषां रा हिस्सेदार बणेया, जिसेरा वादा परमेश्वर ने अब्राहम कने कित्तेया थिया।

रोमियों 15:27

तिन्हा ने ए सब किच्‍छ अपणी मर्जी कने कित्तेया। से यरुशलेम रे विश्वासियां रे कर्जदार हिन। किजोकी जां गैर यहूदी विश्वासियां ने यरुशलेम रे विश्वासियां रे जरिये परमेश्वर रे सुब बसेख री आत्मिक आशीषां जो हासिल कित्तेया, तां तिन्हा जो ए महसूस हुंदा कि तिन्हेरी आर्थिक मदद करी के तिन्हेरा कर्जा चुकाई दैण।

रोमियों 8:17

ते जे अगर असी परमेश्वर री औलाद्दां हिन तां असी तिन्हेरे वारिस भी हिन। बल्कि असी मसीह यीशु कने परमेश्वर री महिमा रे वारिस हिन। जे अगर असी मसीह यीशु सांई जुल्म सैह्‍ंदे, जे असी अब्बे सहन करेया भी करदे हिन, तां असा ने भी तिन्हेरी महिमा बिच हिस्सा पाणा।

रोमियों 9:23

परमेश्वर ने तिन्हा लोक्कां पर अपणी महिमा ज़ाहिर करी कित्ता, जिन्हा जो तिन्हा ने अपणी महिमा दैणे तांइ चुणेया थिया।

1 कुरुन्थियों 9:23

मैं ए सब किच्‍छ मसीह रे सुब बसेख जो फैलाणे तांइ करदा ताकि इसेरी आशीषां बिच हिस्सा पां।

2 कुरुन्थियों 11:14

पर ए कोई हैरानी वाली गल्ल नी है! किजोकी शैतान ता अप्पु भी परमेश्वर रे स्वर्गदूत रे भेस बिच रैहन्दा।

2 कुरुन्थियों 5:5

जिन्हा ने असा जो स्वर्गीय सरीर जो पाणे तांइ तैयार कित्ते रा है, से परमेश्वर है, जिन्हा ने असा जो अमानत बिच पवित्रात्मा भी दित्ते रा है।

इफिसियों 1:11

अते परमेश्वर ने भी असा रा मसीह यीशु कने रा रिस्ता बणाणे रे जरिये असा जो तिन्हेरे अपणे मणू बणाया, किजोकी सुरुआत का ही तिन्हेरी ए योजना थी, ते परमेश्वर सब किच्‍छ अपणी इच्छा ते योजना रे हिसाब कन्ने करदे।

इफिसियों 1:18

मैं ए भी प्रार्थना करदा कि से तुसा जो सच्चाई जो पूरी तरिक्के कने समजणे बिच मदद करे ताकि तुसा जाणी सको तिन्हेरे असा जो सद्दणे री आस कै है, ताकि तुसा जाणी सको कि से आशीषां किन्नी जादा महिमामय हिन जिन्हेरे दैणे रा वादा परमेश्वर ने अपणे लोक्कां कने कित्ते रा है।

इफिसियों 2:18

मसीह यीशु री वजह कने असी सारे जणे इक्क ही पवित्रात्मा रे जरिये पिता रे नेड़े आई सकदे।

इफिसियों 3:6

ते से राज़ ए है कि मसीह यीशु रा सुब बसेख सुनणे ते तिन्हा कने रिस्ता बणने री वजह कने गैर यहूदी लोक्कां जो भी विरासत बिच हिस्सा मिलणा। से अवे मसीह रे सरीर रा इक्क हिस्सा बणी गेरे हिन जे कलीसिया है। ते तिन्हा सारी चीजां बिच तिन्हेरा हिस्सा भी है जिसेरा वादा परमेश्वर ने यहूदी लोक्कां कने कित्तेया थिया।

इफिसियों 4:6

असी सारे इक्क ही परमेश्वर री अराधना करदे जे असा सारेयां रे पिता हिन, जे सारेयां रे उप्पर राज करदे ते सबणा री जरिये कम्म करदे ते असा सबणा बिच रैहन्दे।

इफिसियों 5:11

न्याहरे रे नाकाम पाप्पां बिच हिस्सेदार मत बणो, बल्कि लोक्कां जो फटकार लाई करी दस्सो कि से कम्म गलत हिन।

इफिसियों 5:20

ते हमेसा सारी गल्लां तांइ असा रे प्रभु यीशु मसीह रे नां कने परमेश्वर पिता रा शुकर करदे रेया करो।

इफिसियों 5:4

ते ना गाल-मुआल, ना बेशर्मी री गल्लां, ना बेवकूफी री गल्लां ते ना ही मजाक उड़ाणे री गल्लां हो किजोकी इदेय गल्लां तुसा जो नी जचदी। पर तुसा जो हमेसा परमेश्वर रा शुक्रिया करणा चाएदा।

इफिसियों 5:8

तुसा पैल्ले न्याहरे बिच जीणे वाले मणूआं सांई थिये, पर अवे तुसा रौसनी रे मणू हिन किजोकी तुसा परमेश्वर रे मणू हिन। इधेरे तांइ रौसनी रे मणूआं सांई जिन्दगी जियो।

कुलुस्सियों 2:2

ताकि तुसा जो ते तिन्हा लोक्कां जो होंसला मिल्ले, ते से प्यार कने अप्पु बिच कठ्ठे रैह्ण। मैं चाह्‍ंदा कि तिन्हा जो इस गल्ल रा होंसला रेयो किजोकी से परमेश्वर रे हर राज़ री योजनां जो समजदे, जे मसीह यीशु ही हिन।

कुलुस्सियों 3:15

अप्पु जो तिस सांती रे वस बिच करी देयो जे मसीह का मिलदी, किजोकी तुसा सारे ही इक्क ही सरीर रे हिस्सा हिन ते तुसा सारे इक्क-दूए कने सांती कने रैह्णे तांइ सद्दे गेरे हिन।

कुलुस्सियों 3:17

ते जे किच्‍छ भी तुसा करदे या बोलदे, से मसीह यीशु रे नां बिच करो, तिन्हेरे जरिये पिता परमेश्वर रा शुकर करदे रेयो।

तीतुस 2:14

जिन्हा ने असा जो पाप री ताकत का छुटकारा दैणे तांइ अप्पु जो कुर्बान करी दित्ता ते असा जो धार्मिक ठैहराया ताकि असी तिन्हेरे अपणे खास मणू बणी जाण जिन्हा बिच ठीक कम्म करणे री बड़ी वरी इच्छा है।

इब्रानियों 12:23

ते परमेश्वर रे पैल्ली औलाद्दां री खुशहाल संगती जिन्हेरे नां स्वर्ग बिच लिख्खे गेरे हिन। ते सारेयां रा फैसला करणे वाले परमेश्वर का, ते सिद्ध कित्ते गेरे धार्मिक लोक्कां री आत्‍मा का स्वर्ग बिच आए रे हिन।

इब्रानियों 3:1

इधेरे तांइ मेरे संगी विश्वासियों, तुसा जे परमेश्वर रे हिन, परमेश्वर ने तुसा जो स्वर्ग बिच हमेसा री जिन्दगी रे हिस्सेदार बणने तांइ सद्दे रा है। मसीह यीशु पर ध्यान लाई रख्खो, जे असा तांइ परमेश्वर रे पास्से का भेज्जे गेरे प्रेरित ते प्रधान पुरोत्त हिन।

इब्रानियों 3:14

जे अगर असी परमेश्वर बिच विश्वास करणे अंदर आखिर तिकर तिय्यां ही मजबूत बणे रे, जां तिस बेल्ले थिये जा असी पैल्ली वरी तिन्हा बिच विश्वास कित्तेया थिया, तां असा जो मसीह री हर चीज बिच हिस्सा मिलणा।

याकूब 3:9

जिब्ब कने अपणे प्रभु अते पिता परमेश्वर री बड़ाई करदे अते इस्सी कने मणूआं जो जे परमेश्वर रे रुप बिच बणाये गे हिन, कोसदे भी हिन।

1 पतरस 5:1

तुसा रे कलीसिया रे बुजुर्ग लोक्कां कने मैं इक्क संगी मुखिया ते मसीह पर होए जुल्मां रा इक्क इदेया गवाह होणे रे नात्ते, जिनिये तिन्हेरी महिमा बिच हिस्सेदार भी होणा ए बिनती करदा,

1 यूहन्ना 1:3

असा ने तिसजो दिख्खेया अते सूणेया है अवे तुसा जो भी यीशु का सुब बसेख देया करदे हिन ताकि तुसा भी असा रे कने साझी होई जाओ असा रा ए सांझा परम पिता परमेश्वर अते उन्हेरे पुत्तर मसीह यीशु कने है।

प्रकाशित वाक्य 21:23

तिस सहर जो रौसनी तांइ सूरज या चाँद री जरुरत नी थी, किजोकी परमेश्वर री चमक अप्पु तिस सहर पर चमकदी थी, ते तिस उरणू भी अप्पु तिस सहर री रौसनी री वजह थिया।

प्रकाशित वाक्य 22:14

धन्न है से, जे अपणे चोग्गे धोई लिंदे, किजोकी तिन्हा जो सहर रे दुआर का अंदर आणे रा हक दित्तेया जाणा। ते तिन्हा जो तिस बूट्टे रा फल्ल खाणे रा भी हक दित्तेया जाणा जिस जो खाणे कने हमेसा री जिन्दगी मिलदी।

प्रकाशित वाक्य 22:5

फिरी कदी रात नी होणी, ते सहर रे लोक्कां जो रौसनी तांइ दीये या सूरज री जरुरत नी पैणी, किजोकी परमेश्वर ने अप्पु ही तिन्हा बिच चमकणा। तिन्हा ने राज्जे सांई हमेसा-हमेसा राज करणा।