प्रेरितां रे कम्म 8:1 - चम्बयाली नौआ नियम

¹ शाऊल स्तिफनुस रे मारे जाणे बिच सहमत थिया। तिस्सी दिन का यरुशलेम सहर री कलीसिया पर बड़ा अत्याचार होणा सुरु होई गेया ते प्रेरितां जो छड्डी करी बाकि सारे यहूदियां ते सामरिया प्रदेश बिच बिखरी गे।

प्रेरितां रे कम्म 8:1 ပူးပေါင်းရင်းမြစ်များ

मत्ती 22:6

होर लोक्कां ने जे बचेया करदे थिये तिसेरे नौकरांं जो पकड़ी करी तिन्हेरी बेजती कित्ती ते मारी रख्खेया।

मत्ती 23:34

इधेरे तांइ दिख्खो, मैं तुसा का भविष्यद्वक्ता, समजदार ते शास्त्रि लोक्कां जो भेजेया करदा है, तुसा उन्हा बिच का किन्नेयां जो मारी दैणा अते किन्नेयां जो सुली पर चढ़ाई दैणा, किन्नेयां जो तुसा अपणी सभास्थल बिच कोड़े लगाणे अते इक्क सहर का दूज्जे सहर उन्हेरा पीच्छा करदे फिरणा।

मत्ती 5:13

“तुसी दुनिया रे लोक्कां तांइ लूण सांई हिन, पर जे अगर लूण रा स्वाद ही बिगड़ी जाओ, तां फिरी तिस्स जो लूणका नी कित्तेया जाई सकदा? फिरी से कुसी भी कम्म जोग्गा नी रैहन्दा सिर्फ इधेरे कि तिसजो बाहर सूटी दित्तेया जाओ ते मणूआं रे पैरां हेठ आई जाओ।

यूहन्ना 15:20

मैं जे गल्लां तुसा जो बोल्ली, तिन्हा जो याद रख्खो, इक्क नौक्कर अपणे मालक का बड्डा नी हुंदा, इधेरे तांइ जे तिन्हा मेरे पर जुल्म कित्तेया तां तुसा पर भी जुल्म करणा, अते जे अगर तिन्हा मेरी शिक्षा जो मन्नेयां, तां तुसा री भी मनणी।

यूहन्ना 16:2

तिन्हा तुसा जो सभास्थल का बाहर कड्डी दैणा, बल्कि से बेल्ला आया करदा ए जां तुसा रे बिच का कुसकी जो भी मारी करी हर कोई ने सोचणा कि से परमेश्वर री सेवा करेया करदा है।

प्रेरितां रे कम्म 1:8

पर जां पवित्रात्मा तुसा पर आणा तां तुसा ताकत पाणी ते तुसा यरुशलेम सहर ते सारी यहूदियां प्रदेश ते सामरिया प्रदेश बिच, ते दुनिया रे हर कुणे तिकर तुसा मेरे गवाह बणना।”

प्रेरितां रे कम्म 13:1

अन्ताकिया सहर री कलीसिया बिच किन्ने भविष्यद्वक्ता ते शिक्षक थिये, मतलब बरनबास ते शमौन जिन्हा जो कि नीगर भी बोलदे, ते लूकियुस कुरेनी, ते देस रे चौथे हिस्से रा राज्जा हेरोदेस रा सक्के भ्याल मनाहेम ते शाऊल

प्रेरितां रे कम्म 13:36

किजोकी दाऊद तां परमेश्वर री मर्जी रे हिसाब कने अपणे बेल्ले बिच सेवा करी के मरी गेया, ते अपणे पूरखां कने जाई मिल्लेया ते सड़ी भी गेया।

प्रेरितां रे कम्म 2:47

ते परमेश्वर री तारीफ करेया करदे थिये, ते सारे मणू तिन्हा का खुस थिये: ते जे छुटकारा पादें थिये, तिन्हेरे जो प्रभु हर दिन तिन्हा बिच मलाई दिदें थिये।

प्रेरितां रे कम्म 22:20

जां तेरे गवाह स्तिफनुस रा खून रुड़ेया करदा थिया तां मैं भी तित्ते खड़ित्ते रा थिया ते इस गल्ल कने सहमत थिया, अते तिसजो बट्टे मारणे वालेयां रे चोग्गे जो सम्भालेया करदा थिया।

प्रेरितां रे कम्म 26:10

ते मैं यरुशलेम अन्दर इय्यां ही कित्तेया ते बड्डे पुरोत्तां का अधिकार लेई करी मते सारे पवित्र मणूआं जो जेल अन्दर पाया, ते जां तिन्हा जो मारी रखदे थिये तां मैं भी तिन्हेरे खिलाफ अपणी सैह्मती दिन्दा थिया।

प्रेरितां रे कम्म 5:18

ते प्रेरितां जो पकड़ी करी जेलखाने बिच ढप्पी दित्ता।

प्रेरितां रे कम्म 5:20

जाओ, मन्दिर बिच खड़ी करी इस हमेसा री जिन्दगी री गल्लां सारे लोक्कां जो सुणाओ।

प्रेरितां रे कम्म 5:33

ए सुणी करी सभा रे सदस्य मणू जलणा लग्गी पे ते प्रेरितां जो मारी रखणा चाएया।

प्रेरितां रे कम्म 5:40

तां तिन्हा ने तिसेरी गल्ल मन्नी लित्ती ते प्रेरितां जो सद्दी करी कुटवाया, ते ए हुकम देई करी छड्डी दित्तेया कि यीशु रे नां कने फिरी कोई उपदेस मत करदे।

प्रेरितां रे कम्म 7:38

ए से ही मूसा है, जिस ने बियाबान बिच इस्राएली मणूआं रे बिच-मझाटे तिस स्वर्गदूत कने सीने पहाड़ पर कने गल्लां कित्ती ते असा रे पूरखां कने थिया, तिसी जो जिन्दगी दैणे वचन मिल्ले कि असा तिकर पूजाए।

प्रेरितां रे कम्म 7:54

ए गल्लां सुणी करी से यहूदी अधिकारी फुकी पे ते स्तिफनुस पर दांद्द पिह्णा लग्गी पये।

प्रेरितां रे कम्म 7:58

ते तिसजो यरुशलेम सहर रे बाहर कड्डी करी तिस पर बट्टे मारी करी तिन्हेरे जो जान का मारणा लग्गी पये। स्तिफनुस रे खिलाफ गुआई दैणे वालेयां ने अपणे चोग्गे उतारी करी शाऊल नां रे इक्क जवान मणू का रख्खी दित्ते।

प्रेरितां रे कम्म 8:14

जां यरुशलेम बिच रैह्णे वाले प्रेरितां ने सूणेया कि सामरिया प्रदेश रे लोक्कां ने परमेश्वर रे वचन जो अपणाई लित्ते रा है, तां तिन्हा ने पतरस ते यूहन्ना जो तिन्हा का भेज्जेया।

प्रेरितां रे कम्म 8:2

ते किच्‍छ भक्तां ने स्तिफनुस जो कब्र बिच रख्खेया: ते तिसेरे तांइ अफसोस कित्तेया।

प्रेरितां रे कम्म 8:4

पर जे विश्वासी बिखरी गे थिये से जित्ते भी गे तित्ते सुब बसेख सुणादे गे।

प्रेरितां रे कम्म 8:5

ते फिलिप्पुस सामरिया प्रदेश रे इक्क कस्बे बिच गेया ते तित्ते मसीह यीशु रे बारे बिच सारेयां जो दसणा लग्गेया।

प्रेरितां रे कम्म 9:31

इस तरिक्के कने सारे यहूदियां, गलील ते सारे सामरिया रे प्रदेशां बिच कलीसिया जो सांती मिल्ली अते तिसेरी तरक्की हुंदी गेई, ते से प्रभु रे डर ते पवित्रात्मा रे जरिए कलीसिया बिच मणू बदधे गे ते सारे खुशहाल रे।

रोमियों 1:32

से ता परमेश्वर रे इन्हा धार्मिकता रे नियमां जो जाणदे कि इदेय-इदेय कम्म करणे वाले मौत री सजा रे जोग्गे हिन, ते फिरी भी ना सिर्फ इदेय कम्म करदे, पर इदेय कम्म करणे वालेयां का खुस भी हुदें। से ता जाणदे कि परमेश्वर इंसाफ करणा चाह्‍ंदे, ते इदेय कम्म करणे वाले मणू तिन्हेरी नजर बिच मौत री सजा रे जोग्गे हिन।

फिलिप्पियों 1:12

ओ संगी विश्वासियों, मैं चाह्‍ंदा कि तुसा जो ए पता लग्गी जाओ कि मेरे कने बीत्ती, तिस कने सुब बसेख लोक्कां बिच होर जादा फैल्लेया।

इब्रानियों 11:27

भरोसे कने ही राज्जे रे गुस्से का नी डरी करी तिसने मिस्र जो छड्डी दित्ता किजोकी से समजी गेया थिया कि ए इदेया है, जिय्यां तिसने अणदिख्खे परमेश्वर जो दिख्खे रा हो।