प्रेरितां रे कम्म 26:10 - चम्बयाली नौआ नियम

¹⁰ ते मैं यरुशलेम अन्दर इय्यां ही कित्तेया ते बड्डे पुरोत्तां का अधिकार लेई करी मते सारे पवित्र मणूआं जो जेल अन्दर पाया, ते जां तिन्हा जो मारी रखदे थिये तां मैं भी तिन्हेरे खिलाफ अपणी सैह्मती दिन्दा थिया।

प्रेरितां रे कम्म 26:10 ပူးပေါင်းရင်းမြစ်များ

प्रेरितां रे कम्म 7:58

ते तिसजो यरुशलेम सहर रे बाहर कड्डी करी तिस पर बट्टे मारी करी तिन्हेरे जो जान का मारणा लग्गी पये। स्तिफनुस रे खिलाफ गुआई दैणे वालेयां ने अपणे चोग्गे उतारी करी शाऊल नां रे इक्क जवान मणू का रख्खी दित्ते।

प्रेरितां रे कम्म 8:1

शाऊल स्तिफनुस रे मारे जाणे बिच सहमत थिया। तिस्सी दिन का यरुशलेम सहर री कलीसिया पर बड़ा अत्याचार होणा सुरु होई गेया ते प्रेरितां जो छड्डी करी बाकि सारे यहूदियां ते सामरिया प्रदेश बिच बिखरी गे।

प्रेरितां रे कम्म 8:3

पर शाऊल कलीसिया रे लोक्कां पर जुल्म करदा थिया ते सारे जनानियां ते मर्दां जो धृड़ी-धृड़ी करी जेल बिच पाया करदा थिया।

प्रेरितां रे कम्म 9:21

सारे सुनणे वाले ए सुणी करी हैरान होई करी बोलणे लग्गेया, कै ए सेइ मणू नी है जे यरुशलेम बिच यीशु पर विश्वास करणे वालेयां जो मुकाई दिंदा थिया, ते इत्ते भी इधेरे तांइ ही आया थिया कि तिन्हेरे एजो बन्नी करी बड्डे पुरोत्तां का लेई जाए?

प्रेरितां रे कम्म 9:26

यरुशलेम सहर जाणे का बाद शाऊल ने तित्ते रैह्णे वाले प्रेरितां बिच मिली जाणे री कोसीस कित्ती, पर सारे तिसका डरदे थिये, किजोकी तिन्हा जो शाऊल रा विश्वास नी हुदां थिया कि से भी इक्क चेल्ला है।

प्रेरितां रे कम्म 9:32

फिरी इय्यां होया कि पतरस तिन्हा प्रदेशां बिच घूमदा रेया ते तिन्हा यीशु पर विश्वास करणे वाले लोक्कां का भी पूज्जेया जे लुद्देया कस्बे बिच रैहन्दे थिये।

प्रेरितां रे कम्म 9:41

तिसने हत्थ देई करी तिसजो खड़ेरेया ते परमेश्वर रे लोक्कां ते विधवा जनानियां जो सद्दी करी तिन्हेरे जो से जिन्दी दिखाई दित्ती

1 कुरुन्थियों 15:9

किजोकी मैं प्रेरितां बिच सारेयां का छोटा है, बल्कि मैं प्रेरित केहलाणे रे जोग्गा भी नी है, किजोकी मैं परमेश्वर री कलीसिया रे लोक्कां पर जुल्म करदा हुंदा थिया।

गलातियों 1:13

तुसा जाणदे कि मैं यहूदी नियमां जो किन्ना जादा मनदा थिया, कि मैं मसीह री शिक्षा पर चलणे वालेयां पर बड़ा वरी जुल्म करदा थिया, ते परमेश्वर री कलीसिया जो नास करणे री कोसीस करदा रैहन्दा थिया।

इफिसियों 1:1

मैं पौलुस, जे परमेश्वर री मर्जी कने यीशु मसीह रा प्रेरित है इफिसुस री कलीसिया रे विश्वासियां जो ए चीठ्ठी लिख्खेया करदा है।

प्रकाशित वाक्य 17:6

ते मैं दिख्खेया कि से जनानी परमेश्वर रे लोक्कां रे खून कने इदेइ मतवाल्ली होए री थी कि जिय्यां मणू सराब पीणे कने हुंदे, तिन्हा लोक्कां रे खून कने जे इधेरे तांइ मारे गे किजोकी से परमेश्वर तांइ भरोस्सेमंद थिये। मेरे जो बड़ा वरी दुख होया।”