2 थिस्सलुनीकियों 1:5 - चम्बयाली नौआ नियम

⁵ तुसा परमेश्वर तांइ दुख-मुसीबतां सहन करेया करदे हिन ते ए तुसा जो तिन्हेरे राज बिच जाणे रे लायक बणांदा। ए इस गल्ल रा सबूत है कि परमेश्वर ने धार्मिकता कने तुसा रा हिसाब-किताब करणा।

2 थिस्सलुनीकियों 1:5 ပူးပေါင်းရင်းမြစ်များ

लूका 20:35

पर जे मणू इस जोग्गे होणे कि तिस युग जो ते मुर्देयां बिच का फिरी जिन्दा होण, तिन्हा ने ब्याह नी करणे ते ना ही दुबारा ब्याह बिच दित्ते जाणे

लूका 21:36

हर बेल्ले तैयार रेयो, अते प्रार्थना करदे रेयो कि तुसा जो इन्हा सब गल्लां का, जे होणे वाली हिन, तिन्हा का बचणे री ताकत मिली सकें अते भरोसे कने मणू रे पुत्तर, जे मैं ही है रे अग्गे खड़ी सकण।

प्रेरितां रे कम्म 13:46

तां पौलुस ते बरनबास ने निडर होई करी बोल्लेया, जरुरी थिया, कि परमेश्वर रा वचन पैल्ले तुसा जो सुणाया जांदा, पर हालांकि तुसा तिसजो नक्कारदे हिन, ते अप्पु जो हमेसा री जिन्दगी रे लायक नी समजदे, तां दिख्खो, असा गैर यहूदियां पास्से मुड़ेया करदे हिन।

प्रेरितां रे कम्म 14:22

ते हर इक्क कस्बे बिच जाई करी चेल्‍ले रे मन जो मजबूत करदे रे ते ए उपदेस दिंदे थिये, कि विश्वास बिच बणे रेयो, ते ए बोलदे थिये कि असा जो बड़े दुख सहन करी के परमेश्वर रे राज बिच पुजणा है।

रोमियों 2:5

पर किजोकी तुसा ढीठ हिन ते अपणे पाप्पां का तौबा करणे का इन्कार करणे कने तुसा अपणे तांइ बड़ी वरी सजा कठेरेया करदे हिन। किजोकी परमेश्वर रे गुस्सा करणे रा से दिन आया करदा है, जा तिन्हेरा धार्मिक इन्साफ लोक्कां पर ज़ाहिर होणा।

रोमियों 8:17

ते जे अगर असी परमेश्वर री औलाद्दां हिन तां असी तिन्हेरे वारिस भी हिन। बल्कि असी मसीह यीशु कने परमेश्वर री महिमा रे वारिस हिन। जे अगर असी मसीह यीशु सांई जुल्म सैह्‍ंदे, जे असी अब्बे सहन करेया भी करदे हिन, तां असा ने भी तिन्हेरी महिमा बिच हिस्सा पाणा।

इफिसियों 4:1

इधेरे तांइ मैं जे प्रभु री सेवा करणे री वजह कने कैद बिच है, तुसा रे छन्दे करदा कि जिस बुलाह्ट कने तुसा सद्दे गे थिये, तिस जोग्गी चालचलन बणाई रख्खो,

फिलिप्पियों 1:28

कुसकी भी तरिक्के कने अपणे दुश्मणा का मत डरो, तुसा री हिम्मत तिन्हेरे विनास री निशानी है, पर ए तुसा तांइ छुटकारे री निशानी है ते ए परमेश्वर रे पास्से का है।

कुलुस्सियों 1:12

ते पिता परमेश्वर रा शुकर करदे रेयो, जिन्हा ने असा जो इस जोग्गा बणाया कि स्वर्ग रे राज बिच तिन्हेरे अपणे लोक्कां कने तिस विरासत रे हिस्सेदार बनण, जे तिन्हा ने अपणे लोक्कां तांइ तैयार कित्ते रा है।

1 थिस्सलुनीकियों 2:14

इस तांइ तुसां, ओ संगी विश्वासियों, परमेश्वर रे तिन्हा कलीसिया रे लोक्कां सांई जिन्दगी जीणा लगे जे यहूदियां प्रदेश बिच मसीह यीशु बिच हिन किजोकी तुसा भी अपणे ही प्रदेश रे लोक्कां का तैसा ही दुख पाया जदेया तिन्हा ने यहूदियां प्रदेश का पाया,

2 थिस्सलुनीकियों 1:11

इधेरे तांइ असी हमेसा तुसा तांइ प्रार्थना भी करदे कि परमेश्वर तुसा जो तैसी जिन्दगी जीणे रे लायक बनाण जे जीणे तांइ तिन्हा ने तुसा जो सद्दे रा है। ते से तुसा अपणी ताकत रे हिसाब कने चलाण ताकि तुसा रा हर इक्क खरा मकसद ते हर इक्क चीज तुसा विश्वास कने करदे से पूरा होई जाए।

2 तीमुथियुस 2:12

जे अगर असी मसीह तांइ सबर कने सहन करदे रैह्‍ंगे, तां असी तिन्हा कने राज भी करणा, पर जे अगर असी तिन्हेरा इन्कार करगे, तां तिन्हा ने भी असा रा इन्कार करणा।

प्रकाशित वाक्य 15:4

ओ प्रभु, कुण तेरे का नी डरगा ते तेरे नां री महिमा नी करगा? किजोकी सिर्फ तू ही पवित्र है सारी जातियां आई तेरे सामणे प्रणाम करगी, किजोकी तेरे इंसाफ रे कम्म सामणे आई गेरे हिन।

प्रकाशित वाक्य 16:7

फिरी मैं वेदी का ए शब्द सूणेया, हाँ ओ सर्वशक्तिमान परमेश्वर तुसा रे फैसले ठीक ते सच्चे हिन।

प्रकाशित वाक्य 19:2

किजोकी तिन्हेरे फैसले सच्चे ते ठीक हिन तिन्हा ने तिस बड्डी वेश्या रा, जे अपणे व्यभिचार कने धरती जो भ्रष्ट करदी थी, इंसाफ कित्ता ते तिसका अपणे दासां रे खून रा बदला लित्तेया।

प्रकाशित वाक्य 3:4

पर सरदीस सहर बिच तुसा लोक्कां बिच किच्‍छ इदेय मणू भी हिन जे पाप कने भिठ्ठे नी होए रे हिन। तिन्हा ने मेरे कने चिट्टे कपड़े पाई करी चलणा, किजोकी से मणू इसेरे काबिल हिन।