2 पतरस 2:1 - चम्बयाली नौआ नियम

¹ जिय्यां कि बड़े पैल्ले झूठ्ठे भविष्यद्वक्तां उठे थिये, तिय्यां ही तुसा बिच झूठ्ठे शिक्षक उठणे। तिन्हा ने झूठ्ठी शिक्षा देया करणी जिसेरी वजह कने लोक्कां ने मसीह बिच विश्वास करणा छड्डी दैणा। इत्ते तिकर तिन्हा ने मसीह जो अपणा मालिक बणने का इन्कार करी दैणा जिन्हेरा तिन्हा लोक्कां पर हक है ते जिन्हा ने तिन्हा लोक्कां जो पाप रे काबू का अजाद कित्ते रा है। तिस्सी तरिक्के कने तिन्हा ने अप्पु जो चाणचक्के ही मुकाई दैणे री वजह बणना।

2 पतरस 2:1 ပူးပေါင်းရင်းမြစ်များ

मत्ती 10:33

पर जे मणूआं रे सामणे मेरे जो नी अपनांगा, मैं भी तिसजो अपणे पिता रे सामणे जे स्वर्ग बिच हिन, नी अपनाणा।

मत्ती 24:11

मते सारे झूठ्ठे भविष्यद्वक्ता आणे, ते मते जणेया जो भटकाणा।

मत्ती 24:24

किजोकी झूठ्ठे मसीह ते झूठ्ठे भविष्यद्वक्ता खड़ी उठणे, ते बड्डी-बड्डी चीजां ते हैरान करणे वाले चमत्कार दिखाणे कि जे होई सके ते चुणे रे लोक्कां जो भी भड़काई दैण।

मत्ती 24:5

किजोकी मते सारे इदेय होणे जिन्हा ने मेरे नां कने आई करी बोलणा, मैं मसीह यीशु है, ते मते जणेया जो भड़काणा।

मत्ती 7:15

“झूठे भविष्यद्वक्ता का बच्ची रेयो, जे भेड़ां रे भेस अन्दर तुसा का आन्दे, पर अन्दर का से खूंखार भेड़िए सांई हिन।”

मरकुस 13:22

किजोकी झूठ्ठे मसीह ते झूठे भविष्यद्वक्ता खड़ी उठणे, अते तिन्हा मती किस्म री निशानियां ते चमत्कार वाले कम्म दखाणे ताकि होई सके तां से चुणे रे लोक्कां जो भी धोखा देई दैण।

लूका 12:9

पर, जे मणूआं रे सामणे मेरे का मुक्करगा, तिसेरा परमेश्वर रे स्वर्गदूतां सामणे इन्कार कित्तेया जाणा

लूका 21:8

यीशु ने बोल्लेया, ध्यान रखो, कुदखी कोई तुसा जो ठग्गी ना लेयो। किजोकी मेरे ना कने बड़े जणेयाँ ने आणा अते तिन्हा बोलणा, कि मैं मसीह यीशु है। अते ए भी बोलणा कि से बेल्ला नेड़े आई गे रा है तां तुसा तिसेरे पीछे मत चली जान्दे।

लूका 6:26

लाणत है तुसा पर जां सब मणू तुसा री बड़ी तरीफां करण, किजोकी तिन्हेरे बब्ब-दाद्दे भी झूठे-भविष्यद्वक्ता री इय्यां ही बड़ाई करदे थिये।

रोमियों 16:18

किजोकी ऐसे मणू प्रभु मसीह यीशु री सेवा अपणे मतलब तांइ करदे, से अपणे मतलब जो पूरा करणे तांइ मिठ्ठी-मिठ्ठी गल्लां बोल्ली करी, भोले भाले लोक्कां जो धोखा दिंदे।

1 कुरुन्थियों 11:19

हालांकि फूट री वजह कने तुसा बखरे होई गेरे हिन इधेरे तांइ जे मणू सच्चाई कने हिन से असानी कने पहचाणे जाणे।

1 कुरुन्थियों 6:20

किजोकी प्रभु ने सुली पर कुर्बानी देई करी तुसा री कीमत चुकाए री है। इधेरे तांइ अपणे सरीर कने ठीक कम्म करी के परमेश्वर री महिमा करो।

1 कुरुन्थियों 7:23

मसीह यीशु ने सुली पर कुर्बानी देई करी तुसा री कीमत चुकाए री है इधेरे तांइ कुसकी मणू रे नी पर परमेश्वर रे गुलाम बणो।

गलातियों 3:13

मसीह यीशु ने असा जो मूसा रे कानून रे श्राप का छुटकारा दैणे तांइ तिस श्राप जो अपणे उप्पर लेई करी सुली पर अपणी जान देई दित्ती, किजोकी पवित्रशास्त्र बिच लिख्खे रा है, “शापित है से मणू जे सुली पर मरदा।”

गलातियों 4:17

गलत शिक्षा दैणे वाले मणू तुसा जो अपणा दोस्त ता बनाणा चाह्‍ंदे पर तिन्हेरा मकसद तुसा री भलाई नी है, तिन्हेरा मकसद तुसा जो मेरे का अलग करणा है ताकि तुसा बड़े जोस कने तिन्हेरी गल्लां मन्नों।

गलातियों 5:20

मूर्तां री पूजा करणा, जादू-टोणा करणा, दुश्मणी रखणा, लड़ाई-झगड़े करणा, हिरस, लैह्र, मतलबीपन, दूज्जे रे खिलाफ सोच, फूट पाणा, गुटबंदी करणा,

इफिसियों 1:7

परमेश्वर ने असा जो मसीह रे खून बहाई करी कुर्बानी दैणे रे जरिये छुटकारा दित्ते रा है, जिसेरा मतलब ए है कि असा रे पाप माफ होई गेरे हिन किजोकी परमेश्वर रा अनुग्रह इन्ना महान है जे तिन्हा ने असा पर बड़ा जादा कित्ते रा है।

इफिसियों 4:14

ताकि अग्गे जो असी बच्चेयां सांई ना रैह्ण, असी तिन्हा किस्तियां सांई नी रैह्णा जे लहरां ते हवा कने इत्ते-उत्ते डोलदी रेह्न्दी। इसेरा मतलब ए है कि चलाक ते ठग लोक्कां ने फिरी असा जो अपणी झूठ्ठी शिक्षा कने बेवकूफ नी बणाई सकणा।

फिलिप्पियों 3:19

अग्गे चली करी तिन्हेरा खातमा होई जाणा, तिन्हेरा परमेश्वर तिन्हेरे शारीरिक इच्छा हिन, से अपणी बेशर्मी री गल्लां पर घमंड करदे, ते से मणू सिर्फ तिन्हा दुनियावी चीजां जो करणे रे बारे बिच सोचदे रैहन्दे जे इस दुनिया रे मणू करदे।

कुलुस्सियों 2:18

कुसकी भी मणू जो तुसा जो निकम्मा बणाणे रा मौक्का मत देयो जे झूठ्ठा निमतापन दिखांदा ते स्वर्गदूतां री पूजा करणे बिच खुस हुंदा। इदेय मणू दर्शन दिखदे ते बड्डी बड्डी गल्लां बोलदे, ते तिन्हेरी इन्सानी सोच तिन्हा जो बेवकूफी रे घमंड कने भरी दिंदी।

कुलुस्सियों 2:8

चुकन्ने रेयो की कोई तुसा जो अपणी तिन्हा विचारां ते बेकार गल्लां ते धोखे कने फसाई ना लेयो, जे लोक्कां री परम्परा ते दुनियावी रीति-रीवाज जे सदियां का चली आया करदी हिन, ते इस दुनिया री न्याहरे री ताकत पर आधारित है, पर मसीह यीशु री शिक्षा पर आधारित नी है।

1 तीमुथियुस 5:8

पर जे अगर कोई मणू अपणे रिस्तेदारां री ते खासतौर पर अपणे परिवार रे मणूआं री फिकर ना करे तां से मणू मसीह बिच विश्वास करणे का मुकरी गे रा है ते अविश्वासी का भी जादा बत्तर होई गे रा है।

2 तीमुथियुस 4:3

किजोकी इदेया बेल्ला आणा जां लोक्कां ने सही शिक्षा जो सुनणा नी चाह्‍णा, पर तिन्हा ने अपणी मर्जी रे हिसाब कने चलणा ते तिन्हा शिक्षकां जो तोपणा जिन्हा ने से ही बोलणा जे से मणू सुनणा चाह्‍ंदे।

तीतुस 1:11

इदेय लोक्कां जो बाकि विश्वासियां जो सिखाणे का रोक्को किजोकी जां से इदेइ गल्लां सिखांदे तां से पूरे परिवार रे विश्वास जो बर्बाद करी दिंदे। से इय्यां इधेरे तिकर करदे ताकि से पैसे कमाई सकण।

तीतुस 3:10

जे मणू कलीसिया बिच फूट पांदे तिन्हा जो इक्क-दो वरी समझाई देयो कि से इय्यां करणा बांद्द करी दैण। जे अगर से तां भी ना मन्ने तां तिन्हा का अलग रेयो।

इब्रानियों 10:29

तां सोच्ची लेयो, कि इदेय मणू जो होर भी किन्नी जादा वरी सजा दैणी, जे मणू परमेश्वर रे पुत्तर जो नक्कारी दिंदा, ते वाचा रे खून जो बेकार समजदा, जिसेरे जरिए से पवित्र ठैहराया गेया थिया, ते असा पर अनुग्रह करणे वाले पवित्रात्मा री बेजती करदा।

1 पतरस 1:8

तुसा ने मसीह यीशु जो कदी भी नी दिख्खे रा है पर फिरी भी तुसा तिन्हा जो प्यार करदे। तुसा इस बेल्ले तिन्हा जो दिख्खी नी सकदे पर तुसा तिन्हा बिच विश्वास करदे। इधेरे तांइ तुसा तिस आनंद ते महिमा बिच खुस हुंदे जे शब्दां बिच बयान नी होई सकदी।

2 पतरस 2:3

ए झूठ्ठे शिक्षक लालची होणे, ते तिन्हा ने तुसा का रुपया लैणे तांइ तुसा जो मनघड़ंत गल्लां सुनाणी। परमेश्वर ने बड़े पैल्ले ही इस गल्ल रा फैसला करी लित्तेया थिया तिन्हा ने इन्हा लोक्कां जो सजा दैणी ते से इय्यां करणे तांइ तैयार भी हिन। तिन्हा ने इन्हा लोक्कां जो यकिनन बर्बाद करी दैणा।

1 यूहन्ना 2:26

मैं तुसा जो ए गल्लां तिन्हा गलत शिक्षा देई करी भटकाणे वाले लोक्कां का चुकन्ने रैह्णे तांइ लिख्खे री हिन।

1 यूहन्ना 4:1

ओ प्यारेयो, हर तिस मणू पर भरोस्सा मत करो जे ए दावा करदे कि असी पवित्रात्मा रे कहे मुताबिक गल्लां करदे। पर आत्‍मा जो परखो कि से परमेश्वर रे पास्से का हिन का नी किजोकी मते सारे झूठ्ठी भविष्यद्वक्ता दुनिया बिच हिन।

यहूदा 1:18

से तुसा जो ए बोलदे हुंदे थिये, “मसीह यीशु रे हटणे का पैल्ले किच्‍छ इदेय मणू उठणे जिन्हा ने परमेश्वर ते तिन्हेरे लोक्कां रा मजाक उडाणा। ए से मणू हिन जिन्हेरी जिन्दगी तिन्हेरे अपणे दिल री बुरी इच्छा रे वस बिच है।”

यहूदा 1:4

मेरा तुसा जो ए चीठ्ठी लिखणे रा मकसद ए है कि किच्‍छ इदेय मणू तुसा लोक्कां बिच मझाटे मिली गेरे हिन जे मसीह यीशु बिच विश्वास करणे रा ढोंग करदे। से परमेश्वर रा आदरमान नी करदे ते से मणू ए सिखांदे कि परमेश्वर असा रे पाप्पां जो माफ करी दिंदे इधेरे तांइ असी अनैतिक जिन्दगी जी सकदे। से मसीह यीशु जो नक्कारदे जे असा रे मालिक ते प्रभु हिन।

प्रकाशित वाक्य 13:14

तिन्हा चिन्ह-चमत्कारां री वजह कने जिन्हा जो उस ड्रोणे जानवर रे सामणे दिखाणे रा हक तिसजो दित्तेया गेया थिया, से धरती बिच रैह्णे वाले लोक्कां जो इस तरिक्के कने भटकान्दा थिया, कि धरती रैह्णे वालेयां जो बोलदा थिया, कि जिस जानवर री तलवार लग्गी री थी, से जी गेया, तिसेरी मूर्ति बणाओ।

प्रकाशित वाक्य 2:13

मैं जाणदा कि तुसा रा कस्बा शैतान रे वस बिच है, पर इय्यां हुंदे होए भी तुसा ने मेरे बिच अपणा विश्वास मजबूती कने बणाई रख्खेया ते मेरे पर विश्वास करणा नी छड्डेया, तिस बेल्ले भी नी जां लम्बे समय पैल्ले अन्तिपास जो मारी दित्तेया गेया थिया। से मेरा बसेख सुनाणे बिच भरोस्सेमंद थिया, इधेरे तांइ तिसजो तुसा रे कस्बे बिच मारी रख्खेया गेया जित्ते शैतान रा काबू है।

प्रकाशित वाक्य 2:9

मैं जाणदा कि तेरे पर बड़े जुल्म होए रे हिन ते तू गरीब है। पर आत्मिक गल्लां बिच तू अमीर है। मैं तिन्हा यहूदी मणूआं जो जाणदा जे परमेश्वर रे चुणित्ते रे मणू होणे रा दावा ता करदे पर से हकीकत बिच चुणित्ते रे नी हिन। से तुसा री बुराई करदे ते से शैतान रे गुट रे मणू हिन।

प्रकाशित वाक्य 3:8

मैं तेरे कम्मां जो जाणदा, सुण, मैं जाणदा कि तेरे का बड़ी घट ताकत है, पर तू फिरी भी मेरी गल्लां रे मुताबिक चलेया, ते तू मेरे पर विश्वास करणे का कदी नी मुकरेया। इधेरे तांइ मैं तेरे तांइ इक्क दुआर जदेया खोल्ली दित्ते रा है जिस जो कोई भी बांद्द नी करी सकदा।

प्रकाशित वाक्य 5:9

से इक्क नौआ गाणा गाणे लगे, “तू इस कताब री मौहरे खोलणे रे तिस बिच लिख्खे री गल्लां जो पढ़ने रे लायक है, किजोकी तू मारेया गेया थिया ते तैं अपणे खून कने हर इक्क कुल, देस, भाषा, ते लोक्कां जो परमेश्वर तांइ खरीदी लित्तेया।”

प्रकाशित वाक्य 6:10

से जोरे सणे हक्क देई करी बोल्लेया करदे थिये, ओ पवित्र अते सच्चे प्रभु, तुसा किजो धरती पर रैह्णे वाले पाप्पी लोक्कां जो सजा दैणे बिच इन्ना इंतजार करेया करदे हिन? असी छंदे करदे कि तुसा तिन्हा लोक्कां रे बर्ताव तांइ बदला लेयो जिन्हा ने असा रा खून करी रख्खेया।