2 पतरस 1:16 - चम्बयाली नौआ नियम

¹⁶ जां असी प्रेरितां ने तुसा जो मसीह यीशु री ताकत ते तिन्हेरे हटणे रे बारे बिच दस्सेया थिया, तां असी तुसा जो चलाकी कने कोई मनघड़ंत कहाणी नी थिये सुणांदे। बल्कि असी मसीह री महिमा दिख्खे री है।

2 पतरस 1:16 ပူးပေါင်းရင်းမြစ်များ

मत्ती 16:27

किजोकी मणू रा पुत्तर, जे मैं ही है अपणे स्वर्गदूतां कने अपणे पिता री महिमा बिच आणे वाला है तां तिन्ने हर इक्क मणू जो तिसेरे कम्मां रे हिसाब कने ईनाम दैणा।

मत्ती 16:28

“मैं तुसा कने सच बोलदा कि इत्ते खड़ितेरे लोक्कां बिच का किच्‍छ, इदेय भी हिन कि जां तांइ मणू रे पुत्तर, जे मैं ही है जो तिसेरे राज बिच का आन्दे नी दिख्खी लिन्दे, तां तांइ तिन्हा ने मौत नी दिखणी।”

मत्ती 17:1

यीशु छे रोजां बाद पतरस, याकूब, अते तिसेरे भ्याल यूहन्ना जो अपणे कने कल्ले बिच इक्क उँचे पहाड़ पर लेई गे।

मत्ती 24:27

किजोकी जिय्यां बिजली पूरब का लेई करी पश्चिम तकर चमकदी, तिय्यां मणू रे पुत्तर, जे मैं ही है रा आणा भी होणा।

मत्ती 24:3

जां से जैतून पहाड़ पर बैठ्ठे रे थिये, तां चेल्‍लेयां ने किल्ले बिच तिन्हेरे का आई करी बोल्लेया, असा जो दस्सो ए गल्लां कधाड़ी होणी? तुसा रे आणे रा ते दुनिया रे खतम होणे री कै निशानी होणी?

मत्ती 28:18

फिरी यीशु ने उन्हेरे का जाई करी बोल्लेया, स्वर्ग ते जमीन बिच सब हक मेरे जो दित्ते गे हिन।

मरकुस 13:26

तां लोक्कां ने मणू रे पुत्तर, जे मैं ही है, जो महान ताकत अते महिमा कने बद्दलां पर आंदे दिखणा।

मरकुस 14:62

यीशु ने बोल्लेया, “हाँ! ‘मैं है’ ते तुसा मणू रे पुत्तर जो, जे मैं ही है, तिस ताकतवर परमेश्वर री सज्जे पास्से बैठ्ठे रे ते आसमान बिच बदलां पर आंदे दिखणा।”

लूका 1:2

यीशु री सेवकाई री सुरुआत रे बारे बिच से ही गल्लां लिख्खी जे तिन्हा ने तिन्हा लोक्कां का सुणी जिन्हा ने ए सब किच्‍छ अपणी हाख्खियां कने दिख्खेया थिया ते बाद बिच जे मणू मसीह रे सेवक भी बणी गे थिये।

लूका 9:43

तां सब मणू परमेश्वर रे चमत्कार जो दिख्खी करी हैरान होई गे यीशु रे चमत्कारी कम्मां जो दिख्खी करी सब मणू हैरान थिये। फिरी यीशु ने अपणे चेल्‍लेयां जो बोल्लेया,

यूहन्ना 1:14

वचन मणू रे रुप बिच आया, ते से अनुग्रह ते सच्चाई कने भरी कने तिसने हमारे बिच डेरा कित्ता कने असी तिसेरी इदेइ बड़ाई दिख्खी जिय्यां पिता रे इकलौत्ते पुत्तर री महिमा दिख्खी हो।

यूहन्ना 17:2

किजोकी तुसा ने अपणे पुत्तर जो पूरी मणू जाति पर हक दित्ते रा है कि से, हर इक्क जो, जिन्हा जो तुसा ने तिसजो दित्ते रा है, हमेसा री जिन्दगी देयो।

रोमियों 1:4

ते जां से पवित्रात्मा री ताकत कने मरे रे लोक्कां बिच का फिरी जिन्दे कित्ते गे, तां से परमेश्वर रे पुत्तर ठैहरे।

1 कुरुन्थियों 1:17

किजोकी मसीह यीशु ने मेरे जो बपतिस्मा दैणे तांइ नी, पर सुब बसेख सुनाणे जो भेज्जे रा है, जां मैं सुब बसेख सुणांदा तां मैं अपणे गल्ल-बात करणे री खूबी रा इस्तेमाल नी करदा, नी ता लोक्कां ने सिर्फ मेरे गल्ल-बात करणे रे तरिक्के कने ही मेरा भरोस्सा करी लैणा थिया ते शायद तिन्हा लोक्कां ने सुली पर मसीह यीशु री मौत री ताकत का अनजाण रैह्णा थिया।

1 कुरुन्थियों 1:23

पर असा तां तिस सुली पर चढ़ाये मसीह यीशु रा प्रचार करदे जिन्हा ने असा जो पाप्पां का छुड़ाणे तांइ सुली पर जान दित्ती थी, किजोकी यहूदी लोक्कां ने ए सोच्चेया थिया कि मसीह ने हमेसा जीणा इधेरे तांइ से इस गल्ल पर विश्वास नी करी सके कि यीशु ही मसीह थिये।

1 कुरुन्थियों 1:7

ते इसी वजह कने पवित्रात्मा ने तुसा जो आत्मिक वरदान दित्ते रे हिन जां हल्ले तुसा मणू मसीह यीशु रे हटणे रा इंतजार करेया करदे हिन।

1 कुरुन्थियों 2:1

ओ संगी विश्वासियों, मैं जां आई करी तुसा जो परमेश्वर रे सुब बसेख रा राज़ दस्सेया, तिस बेल्ले मैं तुसा सामणे समजदार लगणे तांइ बड़े वरी बुलंद शब्द नी इस्तेमाल कित्ते।

1 कुरुन्थियों 2:4

अते मेरे शिक्षा ते मेरे प्रचार बिच इन्सानी समझ वाले बड्डे बड्डे छैल शब्द नी थिये पर पवित्रात्मा ने तुसा जो इन्ने ताकतवर तरिक्के ए दिखाया कि जे बसेख मैं तुसा जो सुणाया थिया से सच थिया,

1 कुरुन्थियों 5:4

तुसा जो इय्यां करणे री जरुरत है कि मसीही विश्वासियां रे रुप बिच कठियो ते ए जाणी रख्खो कि तुसा का मसीह यीशु रा हक है। ते ए ऐसा है कि मैं भी अपणे मन बिच तुसा कने तित्ते ही है तां फिरी मसीह यीशु री ताकत कने

2 कुरुन्थियों 2:17

असी उन्हा केई मणूआं सांई नी हिन, जे पैसे रे लालच बिच परमेश्वर रे वचन बिच हेराफेरी करदे हिन, पर असी ए जाणदे होए कि परमेश्वर असा जो भेज्जे रा है, ते से असा जो दिख्खेया करदे हिन, ते असी मसीह रे हक कने हमेसा सच्चाई कने शिक्षा दिंदे।

2 कुरुन्थियों 4:2

पर असा ने शरम रे ते गुप्त कम्मां जो छड्डी दित्तेया, अते न चलाकी कने चलदे, अते ना परमेश्वर रे वचन बिच हेराफेरी करदे, पर परमेश्वर रे सामणे असी सिर्फ सच बोलदे, ते असी लोक्कां रे विवेक बिच ए बिठाई दिंदे कि जे असी बोल्लेया करदे हिन से सच है।

इफिसियों 4:14

ताकि अग्गे जो असी बच्चेयां सांई ना रैह्ण, असी तिन्हा किस्तियां सांई नी रैह्णा जे लहरां ते हवा कने इत्ते-उत्ते डोलदी रेह्न्दी। इसेरा मतलब ए है कि चलाक ते ठग लोक्कां ने फिरी असा जो अपणी झूठ्ठी शिक्षा कने बेवकूफ नी बणाई सकणा।

फिलिप्पियों 3:21

तिन्हा ने अपणी तिस्सी ताकत कने जिस कने तिन्हा ने हर चीज पर अपणा काबू करी लैणा, असा रे कमजोर इन्सानी शरीरां जो बदली करी तिन्हा जो अपणे महिमामय सरीर सांई बणाई दैणा।

1 थिस्सलुनीकियों 2:19

भला असा री आस या खुसी या बड़ाई रा ताज कुण है? असा रे प्रभु यीशु रे हटणे बेल्ले से तुसा ने ही होणा।

2 थिस्सलुनीकियों 2:9

तिस दुष्ट ने शैतान री ताकत कने लोक्कां रे सामणे आणा ते तिनिये लोक्कां जो अपणी ताकत कने झूठ्ठे चिन्ह-चमत्कार दिखाणे।

1 तीमुथियुस 4:7

पर नासमझी री मनघड़ंत कहाणिया बिच समय मत बर्बाद जिस कने परमेश्वर जो आदरमान नी मिलदा पर तुसा जो अप्पु जो ईश्वरीय जिन्दगी जीणा सिखाणा चाएदा।

तीतुस 1:14

यहूदियां री तिन्हा बेकार री कहाणियां ते इन्सानी हुकमां पर कोई ध्यान मत देयो। ए सारी तिन्हा गल्लां लोक्कां मन री घड़े री गल्लां जे सच्चाई जो नी मनदे।

2 पतरस 2:3

ए झूठ्ठे शिक्षक लालची होणे, ते तिन्हा ने तुसा का रुपया लैणे तांइ तुसा जो मनघड़ंत गल्लां सुनाणी। परमेश्वर ने बड़े पैल्ले ही इस गल्ल रा फैसला करी लित्तेया थिया तिन्हा ने इन्हा लोक्कां जो सजा दैणी ते से इय्यां करणे तांइ तैयार भी हिन। तिन्हा ने इन्हा लोक्कां जो यकिनन बर्बाद करी दैणा।

1 यूहन्ना 4:14

ते असा ने पुत्तर जो अपणी हाख्खियां कने दिख्खी भी लित्ता ते गवाई दिन्दे कि पिता परमेश्वर ने पुत्तर जो दुनिया रे लोक्कां रा छुटकारा दैणे वाला बणाई करी के भेज्जे रा है।

यहूदा 1:14

हनोक जे आदम री सतमी पीढ़ी बिच पैदा होया थिया, तिनिये इन्हा अधार्मिक लोक्कां रे बारे बिच भविष्यवाणी कित्ती थी। तिनिये बोल्लेया थिया, “सुणो, प्रभु ने अपणे अणगिणत स्वर्गदूतां कने सारे मणूआं रा हिसाब-किताब करणे तांइ आणा ते तमाम अधार्मिक लोक्कां जो तिन्हेरे सारे अनैतिक ते बुरे कम्मां तांइ ते परमेश्वर रे खिलाफ बोल्ले री तमाम बेजती री गल्लां तांइ गुनेह्गार ठैहराणा”

प्रकाशित वाक्य 1:7

सुणो, मसीह यीशु ने बदलां पर आणा ते हर इक्क मणू ने तिन्हा जो दिखणा, इत्ते तिकर तिन्हा लोक्कां ने तिन्हेरे जो आंदे दिखणा, जिन्हा ने तिन्हा हो सुली पर चढाया थिया। ते धरती रे सारे मणूआं ने तिन्हा जो आंदा दिख्खी करी बड़ी लेरां मारी-मारी करी रोणा। हाँ, ए होणे वाला है, आमीन!