2 कुरुन्थियों 4:6 - चम्बयाली नौआ नियम

⁶ किजोकी परमेश्वर ने ही बोल्ले रा है, “न्याहरे बिच रौसनी चमके।” ते से ही असा रे दिल बिच चमकी, ताकि असी मसीह बिच परमेश्वर री महिमा जो दिख्खी सकण।

2 कुरुन्थियों 4:6 ပူးပေါင်းရင်းမြစ်များ

लूका 10:22

फिरी यीशु ने तिन्हा चेल्‍लेयां जो बोल्लेया, मेरे पिता जी ने मेरे जो सबणी चीजां पर हक्क दित्ते रा है ते पिता ही जाणदे कि पुत्तर कुण है, ते पुत्तर जो छड्डी करी होर कोई नी जाणदा कि पिता कुण है, या तिन्हेरे जो छड्डी करी से जाणी सकदे जिस जो पुत्तर पिता रे बारे अन्दर दस्सणा चांह्दा

यूहन्ना 1:14

वचन मणू रे रुप बिच आया, ते से अनुग्रह ते सच्चाई कने भरी कने तिसने हमारे बिच डेरा कित्ता कने असी तिसेरी इदेइ बड़ाई दिख्खी जिय्यां पिता रे इकलौत्ते पुत्तर री महिमा दिख्खी हो।

यूहन्ना 11:40

यीशु ने तिसजो बोल्लेया, कै मैं तेरे जो नी बोल्लेया थिया कि जे तू विश्वास करगी, तां परमेश्वर री महिमा जो दिखगी?

यूहन्ना 12:41

यशायाह ने ए गल्लां इस तांइ बोल्ली किजोकी उसने यीशु री आणे वाली महिमा दिख्खी थी, ते उसदे बारे बिच गल्लां कित्ती।

प्रेरितां रे कम्म 26:18

ताकि तू तिन्हेरी आख्खियां खोल्ले जिस कने से न्याहरे का रौसनी पास्से, ते शैतान रे अधिकार का निकली करी परमेश्वर पास्से फिरी जाण ताकि से तिन्हेरे पाप्पां जो माफ करण ते से मणू तिन्हा मणूआं कने जगाह् हासिल करण जे मेरे पर विश्वास करणे कने पवित्र कित्ते गेरे हिन।

1 कुरुन्थियों 12:8

पवित्रात्मा इक्क जणे जो तिन्हेरे बसेख रे बारे बोलणे री खूबी दिंदे जे कि ज्ञान कने भरपूर हुंदी, ते से ही आत्‍मा दूए मणू जो तिन्हेरा बसेख बोलणे री खूबी दिंदे जे समझ कने भरपूर हुंदा।

2 कुरुन्थियों 2:10

पर जिस कुसकी जो तुसा कुसकी गल्ल तांइ माफ करदे तिसजो मैं भी माफ करदा। किजोकी जे किच्‍छ मैं माफ करदा (जे माफ कित्तेया है) से मसीह यीशु रे मिल्ले रे हक कने तुसा रे फायदे तांइ ही करदा।

2 कुरुन्थियों 3:18

असी सारे प्रभु री महिमा जो अपणे उघाड़े रे चेहरे कने इक्क सीसा सांई प्रकाशित करदे। असा जो अपणे सांई बणाणे तांइ तिस चमकदार महिमा बिच जादा का जादा बदलेया करदे हिन। ते ए महिमा परमेश्वर रे पास्से का है, जे पवित्रात्मा रे रुप बिच असा का है।

2 कुरुन्थियों 4:4

शैतान, जे इस दुनिया रे लोक्कां रा शासक है, तिनिये मसीह यीशु बिच विश्वास ना करणे वाले लोक्कां री समझ जो मंद करी रख्खे रा है, ताकि से मणू सुब बसेख री महिमामय रौसनी जो नी दिख्खी सके। से मणू मसीह यीशु रे इस महिमा रे बसेख जो नी समजदे जे परमेश्वर रे प्रतीरुप हिन।

इफिसियों 1:17

मैं प्रार्थना करदा कि असा रे प्रभु यीशु मसीह रे महिमामय पिता परमेश्वर तुसा जो आत्मिक ज्ञान ते समजदे ताकि तुसा तिन्हा जो पूरी तरिक्के कने जाणी सको।

इफिसियों 1:18

मैं ए भी प्रार्थना करदा कि से तुसा जो सच्चाई जो पूरी तरिक्के कने समजणे बिच मदद करे ताकि तुसा जाणी सको तिन्हेरे असा जो सद्दणे री आस कै है, ताकि तुसा जाणी सको कि से आशीषां किन्नी जादा महिमामय हिन जिन्हेरे दैणे रा वादा परमेश्वर ने अपणे लोक्कां कने कित्ते रा है।

इफिसियों 5:8

तुसा पैल्ले न्याहरे बिच जीणे वाले मणूआं सांई थिये, पर अवे तुसा रौसनी रे मणू हिन किजोकी तुसा परमेश्वर रे मणू हिन। इधेरे तांइ रौसनी रे मणूआं सांई जिन्दगी जियो।

फिलिप्पियों 2:6

जिनिये अप्पु परमेश्वर हुंदे होए भी, परमेश्वर रे बराबर होणे जो अपणे अधिकार बिच रखणे री चीज नी समजेया।

कुलुस्सियों 1:15

कोई भी परमेश्वर जो नी दिख्खी सकदा, पर जां तिन्हेरे पुत्तर ने इक्क मणू रे रुप बिच जन्म लित्ता, तां तिसने परमेश्वर जो लोक्कां पर ज़ाहिर कित्ता किजोकी से अप्पु परमेश्वर रे स्वरूप बिच है। परमेश्वर रा पुत्तर पूरे ब्रम्हांड रे बणाए जाणे रे पैल्ले का है, ते परमेश्वर री बणाए री हर चीज पर तिन्हेरा हक है।

1 थिस्सलुनीकियों 2:12

कि तुसा इदेइ जिन्दगी जियो जे परमेश्वर जो आदर दिंदी हो, जे तुसा जो अपणे राज ते महिमा बिच हिस्सेदार बणने तांइ सददे।

इब्रानियों 1:3

पुत्र ही परमेश्वर री महिमा री रौसनी है, ते पुत्र रे जरिये ही असी दिखदे कि परमेश्वर कदेय हिन। अते से अपणी ताकत रे वचनां कने से ब्रम्हांड जो चलाया करदे हिन। तिन्हा ने लोक्कां रे पाप्पां जो माफ कित्ता, ते परमेश्वर री महिमामय बिच स्वर्ग अंदर तिन्हेरे सज्जे पास्से बेई गे।

इब्रानियों 6:4

जे मणू परमेश्वर बिच विश्वास करणा छड्डी दिंदे, तिन्हा लोक्कां जो फिरी दुबारा कदी तौबा करणे री नौबत तिकर नी लाया जाई सकदा। तिन्हा ने इक्क समय पर परमेश्वर का मिलणे वाली सच्चाई जो पैछाणे रा है, ते परमेश्वर का आशीषां भी पाए री हिन, ते दूए विश्वासियां कने पवित्रात्मा भी हासिल कित्तेया।

1 पतरस 1:12

पर परमेश्वर ने तिन्हा भविष्यद्वक्तां जो ए दस्सेया कि ए बसेख तिन्हा तांइ नी पर तुसा लोक्कां तांइ है। से बसेख मसीह यीशु रा सुब बसेख है जिस जो अवे तुसा सुणी चुके रे हिन। तुसा जो सुब बसेख सुनाणे तांइ लोक्कां री मदद तांइ परमेश्वर ने स्वर्ग का अपणे पवित्रात्मा जो भेज्जेया थिया। स्वर्गदूत भी इन्हा गल्लां जो बड़े उत्तेजित होई करी दिख्खेया करदे हिन।

1 पतरस 2:9

पर तुसा मणू तैसे नी हिन किजोकी तुसा परमेश्वर रे चुणे रे मणू हिन, तुसा तिस परमेश्वर रे पुरोत्त हिन जे राज्जा है। तुसा सारे परमेश्वर जो समर्पित हिन ते तुसा परमेश्वर रे ही हिन। तिन्हा ने तुसा जो न्याहरे का बाहर अपणी अनौखी रौसनी बिच अंदे रा है ताकि तुसा तिन्हेरे महान कम्मां रा प्रचार करी सको।

2 पतरस 1:19

इधेरे तांइ असी भविष्यद्वक्तां री बोल्ले री गल्लां बिच होर भी जादा हिम्मत रखदे। जे अगर तुसा इस बसेख पर ध्यान दिंगे ता से बड़ी बदिया गल्ल होणी, किजोकी ए इक्क दीये सांई है जे न्याहरे बिच तां तांइ चमकदी जां तांइ दिन नी आई जांदा ते मसीह री रौसनी तुसा रे दिल बिच नी चमकदी, बिल्कुल तिय्यां ही जिय्यां भ्याग्गे रा तारा इस दुनिया बिच रौसनी लांदा।